Yérémia 5:1-31
5 Hiôma mu manjel ma Yérusalem.
Béñgnana homa nyensôna, ni tibil ki wan.
Yéña mu mambégdé ma tisontoo ni nla tehe mut nu a téé sép,+nu a mboñ biliya i ba maliga.
Ibale ni nléba i nya mut i, ki m’a nwéhél tison.
2 To ba nkal le: “Me nkum soñ ni niñ i Yéhôva!”
Bitembee ndik gwon ba mpot.+
3 A Yéhôva, baa mis moñ ma nyéñ bé bôt ba ba yé maliga?+
U bi bép bo, ndi hala a bi kal bé bo to yom.*
U bi tjé bo, ndi ba bi tjél le u kodol bo.+
Ba bi lédés miñem* nwap kiki ngok,+ba bi tjél témb i weeni.+
4 Ndi me bi kalba le: “Ibabé pééna, ba mboñ hala inyule ba nyi bé jam.
Ba mboñ bijôñ bi mam inyule ba nyi bé manjel ma Yéhôva,to mambén ma Nyambe wap.
5 Me ga ke me pôdôs mintôô mi bôt,inyule ba nlama yi manjel ma Yéhôva,yak ni mambén ma Nyambe wap.+
Ndi bobasôna ba bi bôk kop nson,ba pat ki minsañ.”*
6 Inyu hala nyen mbondo njéé y’a lôl lipan, i nol bo;ngwo-njéé y’a lôl i tegep ñoñ, i sand bo ibabé waa;yak njéé y’a hes bo i bitison gwap.
Hiki mut nu a nlôl mu, binuga bi ga pat nye.
Inyule bibéba gwap bi mbôl,maboñok map mabe ma nlôôha.+
7 Lelaa me nla nwéhél we i ngéda u mboñ i mam mana?
Bon boñ ba bi tjôô me,ba nkum soñ i jôl li nu a ta bé Nyambe.+
Me bi ti bo mam momasôna ma bé kon bo ngôñ,ndi to hala, ba ngi kenek ndik i ndéñg,ba nkodba i ndap i muda libambe.
8 Ba yé kiki balôm ba hosi ba ba nloñ ni ngôñ i bééba miñiñ,hiki wada a noñ nwaa mut wé libôk.+
9 “Baa me nlama bé kéés bo inyu mam mana?” Hala nyen Yéhôva a mpot.
“Baa me nlama bé pun memede inyu mam i loñ ini i mboñ me?”+
10 “Beda i nwom nwé mi minkôô mi wai, tjéna nwo,ndi ni tjé bañ nwominsôna.+
Kida mintjep nwé mi mondo,inyule mintjep mi Yéhôva bé mi.
11 Inyule Israel ni Yudaba ntonbana me iloo hihéga,” hala nyen Yéhôva+ a mpot.
12 “Ba bi tañba Yéhôva, ba nkal le:
‘A ga boñ bé to yom.*+
Bikuu bi ga kwél bé bés,di ga tehe bé gwét, to njal.’+
13 Bapôdôl ba mpot ndik bipopoda,bañga i Nyambe i ta bé ikété yap.
Yak bo ba ga tjiba!”
14 Inyu hala nyen Yéhôva, Nyambe nu mintôñ mi gwét a nkal le:
“Kiki i bôt bana ba mpot hala,me yé i boñ le bañga yem i i mpémél i nyo woñ i ba kiki hié,+bôt ba litén lini ba ga ba kiki tjéé,hié hi ga ligis bo.”+
15 “A litén li Israel,+ me yé i lona loñ i i nlôl haa i bééni,” hala nyen Yéhôva a mpot.
“Loñ i i yé ibôdôl kôba.
Loñ i ngéda kwañ,loñ i i yé le u nyi bé hop wé,u nok bé to i yom ba mpot.+
16 Bot yap makoñ i yé kiki soñ i i néhi;bobasôna ba yé bôt ba gwét.
17 Ba ga je libumbul joñ ni bret gwoñ.+
Ba ga je bon boñ bôlôm ni bon boñ bôda.
Ba ga je mintômba nwoñ ni nyaga yoñ.
Ba je minkôô nwoñ mi wai ni bie gwoñ bi faigé.
Lôñni pansoñ, ba ga tjé bitison gwoñ bi mapénd, bi u mbôdlene ñem.”
18 Yéhôva a nkal le: “Ndi to ha ngéda i, m’a tjé bé bé bobasôna.+
19 Ibale ba mbat we le: ‘Inyuki Yéhôva Nyambe wés a mboñ bés i mam mana momasôna?’ W’a timbhe bo le: ‘Nlélém kiki ni bi tjôô me, ni kahal gwélél nkén nyambe munu loñ nan, hala nyen ni ga sélél bakén ba bôt i loñ i i ta bé loñ nan.’”+
20 Leglana mbôda Yakôb i jam lini,añlana jo i Yuda, ni kal le:
21 “Emblana i jam lini, a bijôñ bi bôt, bi bi gwé bé yi:*+
ba gwé mis ndi ba ntehna bé;+ba gwé maôô ndi ba noga bé.+
22 Yéhôva a mpot le: ‘Baa ni nkon bé me woñi?
Baa ni kôli bé sehla i bisu gwem?
Men me bi hek lisege le li ba nwaa u tuye,nwaa u u nom i boga ni boga le tuye a nla bé tagbe.
To ibale mangudga mé ma nhôl, ma nla bé yémbél;to ibale ma nyiñgha lelaa, ma nla bé tagbe i nwaa u.+
23 Ndi bôt ba litén lini ba nai ni ndok, ba gwé ki nledek ñem;ba bi kôm me mbus, ba noñ yap njel.+
24 Ndi ba mpot bé ikété miñem nwap le:
“Nano, di konok Yéhôva Nyambe wés woñi,nyen a nti bés banop i ngéda i kôli,banop ba bisu ni banop ba nsôk,*nyen a nkôôbana bés mangéda ma libumbul.”+
25 Bibéba gwoñ gwon bi mboñ le u gwé ha bé i mam mana;maboñok moñ mabe ma nkéñ we njel i bana gwom bilam.+
26 Inyule bibéba bi bôt bi yé ikété litén jem.
Ba nhes, wengoñle nnol dinuni nu a nyiibe.
Ba ñamb hiandi hi hi nola.
Bôt ba binam bon tjandi tjap di ngwel.
27 Kiki nkuu u u yôni ni dinuni,hala nyen mandap map ma yôni ni malôga.+
Hala nyen ba bi yila bôt ba ngui ni mingwañ mi bôt.
28 Ba nkeñep, yak kôgôô yap i ntomb;ndi ba nai ni bibéba bi mam.
Inyu boñ le ba kônde ngwañap,ba nkôde nkaa u man nyuu,+ba mpémhene bé diyeyeba mbagi i téé sép.’”+
29 “Baa me nlama bé kéés bo inyu mam mana?” Hala nyen Yéhôva a mpot.
“Baa me nlama bé pun memede inyu mam i loñ ini i mboñ me?
30 Jam li bilim ni jam li li nsuñgaha ñem li mbôña i loñ:
31 Bapôdôl ba mpot ndik bitembee,+biprisi bi ngwélél énél yap inyu tét bôt,litén jem li ngwés hala.+
Ndi i ngéda lisuk li nlo, n’a boñ lelaa?”
Ndoñi
^ Ni hop Lôk Héber, “ndi ba bi tomb bé.”
^ Ni hop Lôk Héber, “masu.”
^ Ni hop Lôk Héber, “minkôô.”
^ I nla ki ba, “A ta yaga bé.”
^ Ni hop Lôk Héber, “a bijôñ bi bôt bi bi gwé bé ñem.”
^ Tole “nop makôs ni nop bibabaya.”
