Yôsua 2:1-24
2 I mbus, Yôsua man Nun, a ep bôt ba mbep iba bisôsôli i Sitim.+ A kal bo le: “Ni kee, ni béñge loñ, téntén Yérikô.” Ha nyen ba bi ke, ba jôp i ndap muda libambe nu ba bé sébél le Rahab,+ ba yén nyoo.
2 Ndi ba bi yis kiñe Yérikô le bon ba Israel ba bi lo juu inyu hes loñ.
3 Jon kiñe Yérikô i bi om bôt yak Rahab le ba kal nye le: “Pémés i bôlôm ba nlo i weeni, ba ba yé i ndap yoñ; inyule ba nlo i hes loñ yosôna.”
4 Ndi muda a bi sôô i bôlôm bana bo iba. I mbus, a timbhe le: “Ñ, i bôlôm ba, ba nlo i meeni, ndi me yik bé i het ba nlôl.
5 I ngéda ba kwéhék nwemel u tison juu, i bôt ba, ba nke ngwéé. Me nyi bé i het ba nke, ndi ibale ni mpala noñ bo, ni ga gwel bo.”
6 (Ndi muda a bi bedna bo i nyôl, a sôô ki bo i mimbom mi ndoñgi* mi mi bé mbogok i ngii nyôl, mbom wada i ngii uu umpe.)
7 Jon i bôlôm ba, ba bi noñ bo mu njel letee ni i mabôñ+ ma lom Yordan; kiki i bôt ba bé noñ bo ba bi nyodi i tison, ba yip nwemel u tison.
8 Muda a bet i nyôl inyu tehe i bôlôm ba bo iba ilole ba nañal.
9 A kal bôlôm le: “Me nyi yaga le Yéhôva a’ ti bé loñ,+ ni le ni nkônha bés woñi.+ Ni mboñ+ yak le bôt ba loñ bobasôna ba sehla,
10 inyule di bi nok lelaa Yéhôva a bi boñ le malép ma tuye Nkôibaga ma sa i bisu binan i ngéda ni bi nyodi i Égiptô,+ di nok ki i yom ni bi boñ bikiñe gwo biba bi Lôk Amôr le Sihôn+ ni Og,+ bikiñe ni bi nol ii pes ipe* i Yordan.
11 I ngéda di bi nok i jam li, di nimis makénd més,* ni boñ ki le mut to wada ipôla yés a bana ha bé ñem ngui, inyule Yéhôva Nyambe nan nyen a yé Nyambe nyoo i ngii ni hana ’isi.+
12 Nano ni, soho, ni kum soñ i bisu bi Yéhôva le, kiki me mal unda bé loñgeñem,* yak bé n’a unda lihaa li* tata loñgeñem; ni ti ki me yimbne le n’a yônôs mbônga nan.*
13 Ni nlama nwas tata wem ni mama yem i niñ, ni nlama ki yék lôk kéé yem i bôlôm ni i bôda i niñ, lôñni bôt bap bobasôna; ñ, ni nlama sôñ bés* le di wo+ bañ.”
14 Ha nyen bôlôm bo iba ba timbhe nye le: “Di ga wo inyu nan!* Ibale u nyelel bé i jam lini, di ga unda we loñgeñem,* di yônôs ki mbônga wés i ngéda Yéhôva a ga ti bés loñ.”
15 I mbus hala, muda a suhlene bo i winda ni nkôô, inyule ndap yé i bé i édi ni pes yada i lipénd li tison. Ñ, ndap i het a bé a nyééne i bé i ngii lipénd.+
16 Ha nyen a bi kal bo le: “Kena nyoo i mbok dikôa, ni solop nyoo dilo daa, inyu boñ le i bôt ba noñ bé, ba tehe bañ bé. I ngéda banoñ bé ba ga huu, ha nyen yak bé ni ga yoñ njel nan.”
17 Bôlôm ba kal nye le: “Di ga ba ha bé nyégsaga i yônôs i mbônga unu u ntinde bés i bôn+ we*
18 handugi le i ngéda di ga lo munu loñ, di koba le u nkañ kôyôp nkôô munu winda i het u nsuhlene bés. U nlama kot isoñ, ni nyuñ, ni lôkisoñ, ni lihaa li isoñ jolisôna le ba ba ni we ikété ndap.+
19 Ibale mut a nyap manwemel ma ndap yoñ ndi a ke i mbégdé, wee nyemede nyen a nyéñ nyemb yé,* bés di ga ba nginsohi. Ndi ibale mut a nyégle ikété ndap ni we ndi jam libe li pémél nye, wee bés bon di ga bana pil matjél inyu nyemb yé.*
20 Ndi ibale u nyelel i jam+ lini, wee di ga ba ha bé nyégsaga i yônôs i mbônga unu u ntinde bés i bôn we.”*
21 Muda a timbhe bo le: “Me nok, m’a boñ kiki ni nkal me.”
Ha nyen muda a bi nwas bo, ba ke. I mbus, a téñ kôyôp nkôô i winda.
22 I bôlôm bana bo iba ba ke i mbok dikôa, ba yén nyoo dilo daa letee banoñ bo ba témb; banoñ bo ba yéñ bo mu manjel momasôna, ndi ba tehe bé bo.
23 I mbus ngéda, i bôlôm ba bo iba ba sôs i mbok dikôa, ba yap lom, ba lo yak Yôsua. Ba añle nye mam momasôna ma ntagbe.
24 I mbus, ba kal Yôsua le: “Yéhôva a nti bés loñ yosôna.+ Ñ, di mboñ le bôt ba loñ bobasôna ba sehla.”+
Ndoñi
^ I bé kai ba bé sal i ngéda kôba. Minkôô nwé mi bé gwéélana inyu boñ loñge bôñgô, i ba nsébél ni hop Pulasi le lin.
^ Hala wee, i pes likôl.
^ Ni hop Lôk Héber, “miñem nwés mi nyimbi.”
^ Ni hop Lôk Héber, “ndap.”
^ Tole “yimbne mut a nla bôdôl ñem.”
^ Ni hop Lôk Héber, “me mal téñbe i unda bé gwéha.”
^ Tole “biniñ gwés.” Âme ni hop Pulasi. Béñge Ndoñi bibuk.
^ Tole “Di ga ti biniñ gwés inyu nan!”
^ Ni hop Lôk Héber, “di ga téñbe i unda we gwéha.”
^ Ni hop Lôk Héber, “di ga ba ngi nshohi inyu i soñ ini u mboñ bés le di kum.”
^ Ni hop Lôk Héber, “matjél mé m’a ba i ngii ño wé.”
^ Ni hop Lôk Héber, “matjél mé m’a ba i ngii miño nwés.”
^ Ni hop Lôk Héber, “di ga ba ngi nsohi inyu soñ u mboñ bés le di kum.”
