Di mboñ béba, di nok ndutu, di nwo ki inyule babiina ba bisu, Adam bo Éva, ba bi ndogbene Nyambe. a Ndi hala a ngwés bé kal le hala a mal inyu yés. Yéhôva a bi gwélél Man wé Yésu Kristô inyu héya bés isi ndiihe i béba ni nyemb. Bibel i niiga le ni njel nyemb yé, Yésu a bi ti binoñ. Binoñ bi yé tik yom tole moni mut a nti inyu kobol mut numpe. I ndamba Yésu a bi saa inyu péyés bés, i bé niñ yé i peles. (Añ Matéô 20:28.) I ngéda Yésu a bi neebe nimis kunde a bééna i niñ i boga ni boga hana ’isi, a bi ti bés pôla i tiimba kôhna i mam momasôna Adam bo Éva ba bi nimis. Yésu a bi éba ipam limbe likala nye ni Yéhôva ba ngwés bés. I yigil ini i ga hôla we i kônde ti mayéga inyu nyemb i Yésu.

1. Lelaa nyemb i Yésu i nhôla bés i len ini?

Kiki di yé baboñ béba, di mboñ ngandak mam i i nlémél bé Yéhôva. Ndi, ibale di ntam bibéba gwés ni ñem wonsôna, di bat Yéhôva nwéhél ni njel Yésu Kristô, di boñ ki kii yosôna di nla inyu tjôô bibéba bi, di nla yila mawanda ma Nyambe. (1 Yôhanes 2:1) Bibel i nkal le: “Kristô a bi wo inyu bibéba ngélé yada inyu ngélé yosôna, mut a téé sép inyu bôt ba téé bé sép, le ndi a kena bé yak Nyambe.”—1 Pétrô 3:18.

2. Lelaa Nyemb i Yésu i ga bane bés nseñ i dilo di nlo?

Yéhôva a bi ep Yésu i ti peles yé niñ le ndi “hiki mut a ñunda le a nhémle nye a tjiba bañ, ndi a bana niñ boga.” (Yôhanes 3:16) Di nti mayéga inyu jam Yésu a bi boñ inyule ni njel nyemb yé, ndék ngéda Yéhôva a ga mélés mam mabe momasô ndok Adam i bi lona. Hala a nkobla le ibale di nhémle sesema i Yésu, di ga bana pôla i niñ i boga ni boga i paradis hana ’isi!—Yésaya 65:21-23.

 KÔNDE TÉM

3. Nyemb Yésu i nkobol bés isi béba ni nyemb

1. Adam a bé peles, ngéda a bi ndogop, a bi boñ le bôt bobasôna ba kôdôl béba ni nyemb

2. Yésu a bé peles, a bi nôgôl Djob inyu hala nyen bôt ba binam ba gwé pôla i niñ i boga ni boga

4. Bôt bobasôna ba nla ôt nseñ ni nyemb i Yésu

 5. Binoñ bi yé likébla Yéhôva a nti we

Hiki liwanda li Yéhôva li ntehe binoñ kiki likébla li tôbôtôbô Yéhôva a nti nye. Kiki ’héga, añ Galatia 2:20, i mbus ni kwélél mbadga ini:

• Lelaa ñôma Paul a bi éba le a ntehe binoñ kiki likébla li tôbôtôbô Yéhôva a bi ti nye?

Ngéda Adam a bi boñ béba, nye ni bon bé ba bi kôhna kogse, ba bé lama wo. Ndi, Yéhôva a bi ep Man wé le a wo inyu boñ le u bana pôla i niñ i boga ni boga.

Kiki u mba u ñañ minlôñ mi Bibel mini, noode hégda i jam Yéhôva a bé nôgda ngéda a bé tehe Man wé a nok njôghe. Añ Yôhanes 19:1-7, 16-18, i mbus ni kwélél mbadga ini:

• I ngéda u mbigda i mam Yéhôva bo Yésu ba bi boñ inyu yoñ, kii u nôgda?

 I SEM KWEP

Nyemb i Yésu i nti Yéhôva pôla i nwéhél bibéba gwés, i nyible ki bés njel i niñ boga.

Mambadga ma mbigda

• Inyuki Yésu a bi wo?

• Inyuki peles niñ i Yésu yon i bé i kôli i ba binoñ?

• Mambe mam malam nyemb i Yésu i nlona bés?