Kiki i nlet i bana liwanda, hala ki nyen i nlet i tééda jo. Yéhôva a’ sayab we ngandak inyu biliya gwoñ u mboñ i ba, ni i yén liwanda jé. Yésu a kal i bet ba hémle nye le : “Maliga m’a yilha bé ngwélés.” (Yôhanes 8:32) Hala a nkobla lelaa?

U nla ba ngwélés hanano. U nla koblana i si biniigana bi bitembee Satan a bi tjam. U nla koblana ki i si ngibotñem i didun di bôt di di nyi bé Yéhôva ba gwé. (Rôma 8:22) To “woñi u bawoga” u mbémbe ha bé ki mawanda ma Djob.​—Lôk Héber 2:14, 15.

U nla témb ngwélés i hisi hi yondo hi Djob. Kinje kunde i mbuma ñañ w’a bana i dilo di nke lo! I paradis hana isi, bôt b’a koblana i si gwét, makon, manola, liyep, njal, biuni, nyemb, woñi, ndéénga ni ngitelepsép. Bibel i nkal inyu Djob le: “U nahal woo woñ, u nuus ki ngôñ i hii yom i gwé niñ.”—Hiémbi 145:16.

Mawanda ma Djob m’a niñ i boga ni boga. Niñ boga i yé tik likébla  li Djob a’ ti bôt bobasô ba ba nyéñ ba mawanda mé. (Rôma 6:23) Hoñol ki i yom niñ i ngi lisuk i nla ba inyu yoñ!

W’a bana ngéda i boñ ngandak mam. Bebek u yé le u gwés le u nigil nkôkôda, tole i ôt bititii, tole u ba kapinda. U yé le u bana ngôñ i nigil mam inyu binuga tole bibebela, tole u nla gwés ke i bileñel i tehe bôt bape ni biloñ bipe. Ibale u niñ boga ni boga, w’a la boñ mam mana momasôna!

W’a bana ngéda i kôs ngandak mawanda. Niñ boga y’a ume we le u yi ngandak bôt ipe i i bi yila mawanda ma Djob. W’a yi likeñge li nson li hiki wada wap ni bilem gwap bilam. Yak bo b’a ba mawanda moñ. W’a gwés bo, yak bo b’a gwés we. (1 Korintô 13:8) Li bana niñ boga l’a ti we ngéda i ba liwanda ni hikii mut hana isi! Li li nloo momasô, liwanda joñ ni Yéhôva l’a ba li nhol kii nwii nw’a ba mi ntagbe, l’a ôbi bé ke ki kel. Ba ni liwanda li Djob i boga ni boga!