Ibale u yéñ ba liwanda li Djob, u nlama bôñôl base i i nlémél Nye. Yésu a kal le “bañga babégés” Djob ba nlama bégés nye kingéda “maliga.” (Yôhanes 4:23, 24) Bañga njel i yé ndik yada inyu bégés Djob. (Efésô 4:4-6) Base i maliga i nkena i niñ boga, ndi base i bitembee i nkena i tjiba.—Matéô 7:13, 14.

U nla yimbe base i maliga ngéda u nun bôt ba bôñôl yo. Kii Djob a yé loñge hala ki nyen bañga yé babégés i nlama ba loñge. Nlélém kii tén pôma lam i num bapôma balam, hala ki nyen base i maliga i nti biloñge bibôt.—Matéô 7:15-20.

Mawanda ma Yéhôva ma ndiihe Bibel ngandak. Ba nyi le Bibel i nlôl ni Djob. Ba neebe le i yom i nkal i éga biniñ gwab inyu pémés bo i mandutu map ni le i hôla bo i nigil i yi Djob. (2 Timôtéô 3:16) Ba noode bôñôl mam ba niiga.

 Mawanda ma Yéhôva ma ngwéhna. Yésu a éba le a ngwés bôt ngéda a ba niiga bo mam inyu Djob ni ngéda a ba mélés bakokon. Yak i bet ba bôñôl base i maliga ba ñunda bôt bape gwéha yap. Kikii Yésu, ba nyan bé diyeyeba, to i bet ba ta bé nlélém litén ni bo. Yésu a kal le ba’ yil banigil bé i gwéha ba’ ba ba ngéhna.—Yôhanes 13:35.

Mawanda ma Djob ma ndiihe jôl jé le Yéhôva. Ibale mut a ntjél sima jôl joñ, baa mut nu a yé le a ba liwanda joñ li ñemnyu? Heni! Ngéda di gwé liwanda, di nsima jôl jé, di kalak ki bôt bape biloñge bimam a mboñ. Jon i bet ba nsômbôl ba mawanda ma Djob ba nlama sima jôl jé ni pôdôl nye bôt bape. Yéhôva a ngwés le di boñ hala.—Matéô 6:9; Rôma 10:13, 14.

Kikii Yésu, mawanda ma Djob ma niiga bôt inyu Ane Yé. Ane i Djob i yé énél i ngi i ya’ hielel hisi paradis. Mawanda ma Djob ma nkabna ñañ nlam u Ane unu ni bôt bape.—Matéô 24:14.

Mbôgi i Yéhôva i noode ba mawanda ma Djob. Ba ndiihe Bibel, ba banga ki gwéha i pôla yap. Ba nsima ki jôl li Djob ba tinag jo lipém, ba niiga ki bôt bape mam inyu Ane i Djob. I len ini Mbôgi i Yéhôva yon i mbôñôl base i maliga hana isi.