Inoñnaga ni miñem nwap, bôt ba gwé mahoñol nya di nya inyu mam Yésu a mboñ ni mam a nkal. Hala a ntibil nene i ndap yada i Galiléa. Farisai yada le Simôn a naña Yésu i je, bebek inyu tibil tehe i nwet a mboñ mam ma hélha. Yésu a ntehe hala kiki pôla inyu niiga i bôt ba mba ha, jon a neebe, ndik kiki a bi boñ masañ mape ngéda a bi neebe minsébla i je lôñni bakottas ni baboñbéba.

Ndi ba nleege bé Yésu kiki ba mbéna leege bakén. I ngéda u nke ni makôô mu minloñ mi Palestina, makôô ma mbegee lipum li biték, jon ba gwé lem i jôwa makôô ma nkén ni malép ma nsune inyu unda le ba nleege nye. Ba mboñ bé hala inyu Yésu. Yésu a nkôs bé biloñge bi maleege kiki lem. Lem ipe i yé le ba nlama kôp labinde i tjôñ di nkén inyu unda le ba yé minyaô ipañ yé. Ba mboñ bé Yésu hala. Baa a yé toi malo malam?

Je u mbôdôl, bakén ba yé i téblé. Kiki ba yé je, muda wada a njôp ibabé le ba naña nye. “A bé yiba i tison le a yé mboñbéba.” (Lukas 7:37) Bikwéha bi bôt gwobisôna bi yé baboñbéba, ndi i mpôôna le i muda nunu a gwé niñ i nyega, i nene le a yé muda ndéñg. Bebek a nok biniigana bi Yésu, yak nsébla unu le ‘ba bobasôna ba bééga mbegee i nyét, b’a kôs hogbe.’ (Matéô 11:28, 29) I nene le bipôdôl ni maboñok ma Yésu ma ntihba nye, jon a nyéñ le a tehe nye.

Kiki Yésu a yé téblé, a nlôl nye i mbus, a ôm maboñ isi yé makôô. Gwiiha bi nyodi nye mis bi kwélak makôô ma Yésu, a sahak mo ni tjôñ tjé. A nsos makôô mé, a hook mo labinde. Simôn a ntehe bé jam li loñge, a nkal ñem wé le: “Ibale i mut nunu a bak toi mpôdôl, ki a nyi le i nya muda i yé i tihba nye i yé mboñbéba.”​—Lukas 7:39.

Yésu a ntehe bañ mahoñol ma Simôn, a kal le: “A Simôn me gwé jam i kal we.” Simôn a ntimbhe le: “Podok, a Lét!” Yésu a nke ni bisu i kal le: “Mut wada nu a bé pôôs bape moni, a bé bat bôt iba mapil; wada a bééna pil u mbôgôl dinariô itan, nuu numpe a ban-ga pil u môm matan ma dinariô. Kiki ba bééna bé to yom inyu saa nye, a nwéhél bo iba ni ñem wé wonsôna. We u nhoñol lelaa? Njee ikété yap a’ gwés i mut nu ngandak?” To lakii hala nkal bé nye to jam, Simôn a ntimbhe le: “Me nhoñol le nu a nwéhél pil keñi.”​—Lukas 7:40-43.

Yésu a mbégés nye, a béñge muda, a kal Simôn le: “Baa u ntehe i muda nunu? Me njôp i ndap yoñ, u nti bé me malép inyu makôô mem. Ndi i muda nunu a njôwa makôô mem ni gwiiha gwé, a sas ki mo ni tjôñ tjé. U nsos bé me limañ, ndi i muda nunu, ibôdôl i ngeñ me njôp hana, a nwaa bé sos makôô mem ni gwéha. U nkôp bé me môô i ngii ño, ndi i muda nunu a nkôp makôô mem labinda.” Yésu a nla tehe le i muda nunu a nhiel toi ñem inyu niñ yé nyega. Ha nyen a mélés ni bibuk bini: “Me nkal we le, to hala kiki bibéba gwé bi yé ngandak, bi nwéhlana inyule a ñunda ngandak gwéha. Ndi i mut ba nwéhél ndik ndék, a ñunda ndik ndék gwéha.”​—Lukas 7:44-47.

Yésu a ta bé kal le ndéñg i yé loñge. A ñunda ndik konangoo yé inyu baboñbéba, a nok ki bo, mu kiki ba ñunda le ba nhiel miñem ni le ba nyéñ hogbe i nlôl ni Kristô. Imbe hogbe i muda nunu a nkôs ngéda Yésu a nkal nye le: “Bibéba gwoñ bi nwéhlana. . . . Hémle yoñ i ntohol we; kenek ni nsañ.”​—Lukas 7:48, 50.