Kiki a yé Yudéa, Yésu a neebe nsébla u Farisai yada i i naña nye i je i mbai yé bebek njamuha he juu bé. (Lukas 11:37, 38; hégha ni Lukas 14:12.) Ilole i nje, Farisai i gwé lem i jôwa moo ipam liboñ li woo. Ndi Yésu a mboñ bé hala. (Matéô 15:1, 2) Mbén Djob i nsôñga bé le ba jôwa moo nya i. Ndi i nyégsa bé ki to bôt i boñ hala.

Hala a nhélés Farisai ini i tehe le Yésu a njôwa bé moo mé kiki lem yap. Kiki Yésu a nyimbe hala, a nkal le: “Bé Farisai ni mpubus mbus libôndô ni mbus séya, ndi kété nan i yé nyonok ni huluk ñem yak ni béba ñem. A bijôñ bi bôt! Nu a bi hek mbégdé nye ki nyen a bi hek kété, hala bé?”​—Lukas 11:39, 40.

I jôwa moo nwaa le ba nje i ta bé njom, ndi bihéñba bi bibase. Farisai ni bôt bape ba njôwa moo map inyu noñ bilem bi base yap, ndi ba mpubus bé miñem nwap. Inyu hala nyen Yésu a nti bo maéba mana: “Tina mam ma kété kiki makébla ma konangoo, ndi nuna-ki! Mam manan momasôna m’a ba mapubi.” (Lukas 11:41) Hala a yé mbale, likébla li nlama tina ni gwéha i nlôl i ñem ha bé inyu unda le di téé sép.

Hala a nkobla bé le bot bana ba nti bé to yom. Yésu a nkal le: “Ni nti jôga jada ikété jôm li kinjiñkembe, li hitéga, ni li hiki kai, ndi ni nyan telepsép ni gwéha i Nyambe! Ni bé lama boñ mana mam, ndi ni bé lama bé yan maa mape.” (Lukas 11:42) I ngéda libumbul, Mbén Djob i bé bat le ba saa jôga jada ikété jôm. (Ndiimba Mbén 14:22) Nlélém inyu kinjiñkembe, ni hitéga, bikai bi gwéélana inyu boñ le bijek bi bana loñge njiñ. Farisai i ntibil noñ mbén ini, i nti jôga jada ikété bikai bini. Ndi, inyu balôm ba mam ma Mbén ma ma yé nseñ kiki bo telepsép, ni i bana ñem nsôhga, baa ba noñ mo?​—Mika 6:8.

Yésu a nke ni bisu i kal le: “Ngoo ni bé, a Farisai, inyule ni ngwés biyééne bi bisu i mandap ma bibégés, ni mayéga ma tôbôtôbô i bibôm! Ngoo ni bé, inyule ni yé kiki bisoñ le ba mpala bé tehe, bôt ba nkil mu ngii ndi ba nyi bé hala!” (Lukas 11:43, 44) Mut a bé le a bômda nya bisoñ i, a yila ki nyega bisu bi Mbén. Jon, Yésu a ñunda le nyega i Farisai i nene bé i mis.​—Matéô 23:27.

Mut wada nu a nyi Mbén Djob, a ntjelel a kal le: “A Lét, i ngéda u mpot hala, u nsol yak bés.” I pot maliga, bana baéga bibase ba nlama yi le ba nyônôs bé nson wap u u yé i hôla bôt bape. Yésu a nkal bo le: “Yak bé ba ni nyi mbén Môsi ngandak, ngoo ni bé inyule ni mbééga bôt mambegee ma ma nyét, ndi bé bomede ni ntihba bé mambegee ma to ni hinoo hinan! Ngoo ni bé, inyule ni ñoñ bisoñ bi bapôdôl, ndi basôgôlsôgôl banan bon ba bi nol bo!”​—Lukas 11:45-47.

Mambegee Yésu a yé pôdôl ma yé bilem bi Farisai i mbot, ni litehge jap li Mbén. Bôt bana ba mboñ bé to yom inyu hôla litén, maselna ni hala, ba yigye ndik le bôt bobasôna ba noñ mambén map ma ma yé mambegee ma nyét. Ibôdôl yak Abel, basôgôlsôgôl bap ba bi nol bapôdôl ba Djob. To hala kiki ba mboñ wengoñle ba nti bapôdôl lipém i ngéda ba ñoñ bisoñ inyu yap, ba yé kôna libak ni maboñok ma basôgôlsôgôl bap. Ba nyéñ yak nol Mpôdôl Djob nu a nlôôha nkeñi. Yésu a nkal le hiai hini hi ga timbhe bisu bi Djob inyu liboñok jé. Hala ki nyen i bi bôña 38 ma nwii i mbus, i nwii 70 N.Y.

Yésu a nkônde le: “Ngoo ni bé ba ni nyi  mbén Môsi ngandak, inyule ni bi sôô bôt njel i bana yi. Bébomede ni bi jôp bé mu, ndi ba ba nyéñ jôp, ni nkéñ bo njel!” (Lukas 11:52) I bôt bana ba nlama niiga bape Bañga i Djob, ndi iloole ba boñ hala, ba nkéñ bo njel i yi ni i nok yo.

Kii Farisai ni bayimbén ba mboñ? Kiki Yésu a yé ke, ba ñunup, ba bôdôl bat nye ngandak mambadga. Ba mboñ bé hala inyule ba gwé ngôñ i nigil, ndi ba nyéñ le Yésu a kal ngim jam i i nla ti bo kunde i gwel nye.