Inyuki di ngwés makoda més makeñi ngandak? Kiki i nlômbi Israel, i len ini makoda makeñi ma nti bés pôla i bégés Yéhôva ni dikôô tole ni didun di bagwélél bé. Di ngwés biniigana gwobisôna di nkôs bi bi nhôla bés i bana maada malam ni Yéhôva. Di ndiihe yak mangéda malam di ntégbaha ni mawanda més ni lihaa jés. Jon di mboñ biliya i ba ha mu dilo daa ti.

Ngéda di nkodba ni bilôk bikéé gwés, njômbi yés i ta ndik bé le di nôgda le bape ngwés bés, ndi le yak bés di unda bo gwéha yés. (Galatai 6:10; Lôk Héber 10:24, 25) Ngéda di nyibil likôga le mankéé nu munlôm tole nu muda a jôp, tole ngéda di ntééda ndik biyééne bi di nla bana ngôñ, di ñunda le di nyéñ ndik bé yéñe yés, ndik yak yéñe i bôt bape. (Filipi 2:3, 4) Makoda makeñi ma nti bés pôla i bana mawanda ma mondo. Ilole likoda li mbôdôl, ngéda noi tole i mamélél, di nla yoñ makidik le di ga kwel ni bilôk bikéé di nyi bé loñge. (2 Korintô 6:13) Mawanda di ga bot mangéda ma, ma nla nom i mba ni mba! U héya hala, ngéda bahogi ba ntehe gwéha i yé ipôla yés, ba nla yoñ makidik i gwélél Yéhôva.—Yôhanes 13:35.

BÉÑGE VIDÉÔ I GWÉ ÑO LE “GWÉHA I MAL BÉ”! MAKODA MAKEÑI I BILOÑ BIPE, I MBUS TIMBHE MAMBADGA MANA:

• Lelaa ba bi unda bilôk bikéé bi ba bi naña i makoda makeñi ma nwii 2019 gwéha?

• Inyuki adna ni gwéha i bagwélél ba Yéhôva i yé tôbôtôbô?

• Mambe matode ma ma mbéñge gwéha bilôk bikéé bi yé i Juu li bakena ntôñ bi bi yigye?

• Lelaa gwéha i i yé ipôla bikristen i bi at bilôk bikéé bi yé i Jaman ni i Kôré nwelmbok?

• Mambe makidik di nlama yoñ?