Ibôdôl i nwii 2018, mimbamble nwés mi mbamba mi mpôdôl ndik ño nkwel wada. Mimbamble mi nwominsôna mi yé ikété Nkuu wés bisélél inyu niiga. Jon di nla gwélél nwo i likalô. Di yé le di hiômna mo i ngéda di yé ke liké tole i ngéda di yé ke i bôm. Di ngwélél bé mimbamble inyu nigil Bibel ni bôt, ndi mimbamble mi, mi nla hôla bôt i bana ngôñ i yi mam ma yé ikété Bibel.

Ibale u mbôdôl kwel ni mut, éñél nye nlôñ kaat Bibel. I mbus, pôdôl ngim jam u bi añ ikété mbamble, li u nhoñol le li nla lémél i mut nu. Kii hihéga ibale i mut nu a gwé bon tole ngim jam i ntééñga nye, u nla kal nye le: “Tokekii, me bi añ kaat i mpôdôl jam li, baa me nla éba we yo?” Ibale a neebe, u nla ti nye mbamble u gwé mukété bot yoñ tole u nla éble nye wo ni njel internet, to ibale ngélé bisu i le u mboma nye. Tolakii njômbi yés bisu i ta bé i kap bikaat, mimbamble mi nla hôla bés i léba i bet ba gwé libak lilam inyu kôhna niñ boga.​—Minson mi baôma 13:48.