Hiki ñwii, ngandak bikristen i i bi waa téé likalô i nlo i Bilôp bi Nwet. Ba bi bôdôl gwélél Yéhôva, ndi inyu ngandak manjom, ba bi waa. Di nla léba minkwel di bi bana ni bape munu ikété man kaat le Soho, témb yak Yéhôva. (Lôk Héber 12:1) Ndi, bet ba bi waa téé likalô ba ngi gwé mahee i mis ma Yéhôva, inyule a bi somb bo ni matjél ma Man wé Yésu Kristô. (Minson mi baôma 20:28; 1 Pétrô 1:18, 19) Lelaa di nla hôla bo i témb ikété likoda?

Mimañ mi likoda mi nyéñ ba ba bi waa téé likalô, ndik kiki ntééda mintômba nu a ntibil yéñ ntômba wé wada u u nimil. (Lukas 15:4-7) Hala nyen Yéhôva nyemede a mboñ. (Yérémia 23:3, 4) Bés bobasôna di nlama ti bo makénd, ha mimañ ndik bé. Biliya di mboñ inyu unda bo loñge yés ñem, di yoñok bo kiki mawanda, bi nlémél Yéhôva, bi nla ki lona bés bisai. (Bingéngén 19:17; Minson mi baôma 20:35) Inyu hala, hoñol bôt u nla ti makénd, u boñ ki hala ibabé lep ngéda!

BÉÑGE VIDÉÔ INI LE TI BA BA BI WAA TÉÉ LIKALÔ MAKÉND, I MBUS WAN MAMBADGA MANA:

• Limbe jam Abbey a bi boñ ngéda a bi boma Mbôgi Yéhôva yada, i a bé yi bé?

• Inyuki di nlama kôôge mimañ bebee ibale di ngwés hôla mut nu a bi waa téé likalô?

• Lelaa Abbey a bi kôôba inyu tiimba ke tehe Laura?

• Lelaa Abbey a bi unda le a gwé hônba, wongut, ni gwéha mu kii a bé boñ biliya i ti Laura makénd?

• Bimbe biniigana di nla ôt mu hihéga Yésu a bi ti ikété kaat Lukas 15:8-10?

• I biliya gwobisôna bi bi bôña inyu hôla Laura, bi bi lona bimbe bisai?