Di nlama leege njee ni makénd? Tonjee a nlo i likoda inyu ngélé bisu, tole minlômbi mi mawanda. (Rôma 15:7; Lôk Héber 13:2) A nla ba mankéé wada nu a nlôl i loñ ipe, tole mankéé nu a bi waa téé likalô ni lo i makoda ibôdôl behee. Hégda le we nu, w’a nôgda lelaa? Baa w’a ba bé maséé ibale ba nleege we loñge? (Matéô 7:12) Jon di nlama boñ biliya bi ngui inyu yéga bôt mu Ndap Ane, i bisu ni i mamélél ma likoda. Hala a nlona maséé ni gwéha, a tinak ki Yéhôva lipém. (Matéô 5:16) I pot maliga, d’a la bé kwel ni bôt bobasôna ba ba ga lo i likoda. Ndi, bés bobasôna di ga ba maséé ibale hiki mut a nyoñ ngaba i leege bôt bape loñge. *

Di nleege ndik bé bôt loñge ngéda makoda ma tôbôtôbô, kiki bo Bilôp bi Nwet, ndi di nleege bôt loñge hiki ngéda. Ngéda ba nlo i makoda inyu ngélé yap bisu, ba ntehe gwéha i bilôk bikéé, hala a nla tinde bo i ti Yéhôva lipém, ni i adba ni bés mu bibégés bipubi.​—Yôhanes 13:35.