I hilo 23 hi sôñ Matumb, di mbem yom kiki bo 12 di didun di bôt, tole iloo ha, i tégbaha mbigda i nyemb Yésu ni bés. Kinjee mbôgi ikeñi ba ga kôhna ngéda nti nkwel a ga toñol kii i yé likébla li binoñ Yéhôva a bi ti bés, ni bisai hala a ga lona bôt ba binam i dilo di nlo! (Yésaya 11:6-9; 35:5, 6; 65:21-23; Yôhanes 3:16) Ndi nti nkwel nyetama bé nyen a ga ti mbôgi mu likoda li tôbôtôbô li. Bés bobasôna di nla yoñ ngaba i leege bakén bés ni minyaô. (Rôma 15:7) Ndék maéba ini inyu boñ hala.

• Ilole u hoo ke i yén inyu bem le likoda li bôdôl, u nlama ndugi leege bakén ni maséé, ni bet ba bi waa téé likalô

• To hala kiki u ga yoñ ngéda i tôbôtôbô ni bôt wemede u naña, yoñ ngéda i yimbe bet ba nlo inyule ba bi kôs lipep li nsébla i ngéda hônd. Yis bo i pañ yoñ. Hôla bo ni Bibel yoñ, ni kaat yoñ tjémbi

• Mbus nkwel, yoñ ndék ngéda inyu timbhe mambadga mut a nla bana. Ibale ngéda i ta bé inyule likoda lipe li nlama jôp i Ndap Ane inyu tégbaha bilôp bi Nwet, yoñ bitelbene i yuuga nye mu dilo di noñ ha. Ibale u nyi bé lelaa u nla témb u tehe nye, u nla kal le: “Me gwé ngôñ i bana mahoñol moñ inyu nkwel di ntip emble. Lelaa me nla boñ inyu boma we?”