Hégda le u niñ i Galiléa i ngéda Yésu. U nke i Yérusalem inyu lôôs ngand bilap. Tison i yé nyonok ni bagwélél ba Yéhôva ba ba nlôl haa. U nsômbôl ti Yéhôva sesema. Lôñni ntômba u nlona, u mbôdôl liké joñ mu minloñ mi tison inyu ke i témpel. Ngéda u mbol, témpel i yé nyonok ni bôt bape ba ba nsômbôl ti bisesema. I mbus, ngéda yoñ i nkola le u ti biprisi ntômba woñ. Ha ngéda i nyen u mbigda le manyuñ nu a nla ba mu ikété limut tole mu tison a gwééne we hiun. Yésu a ntoñol jam u nlama boñ. (Añ Matéô 5:24) Lelaa we ni manyuñ ni nla noñ nsañ kiki Yésu a niiga? Mu minlôñ mi noñ, ha yimbne i ngii ndimbhe i i yéne we maliga.

U NLAMA . . .

• kwel ni manyuñ ndik ibale u nhoñol le a gwé ngim njom i kôli i i ntinde nye i unup

• noode kodol litehge li manyuñ ibale u nhoñol le a mpala nok liyot, tole noode unda nye le bé boba ni nhôs

• tibil emble manyuñ ngéda a yé pot, to ibale u nok bé loñge i jam a nsômbôl kal, ni ñem woñ wonsô bat nye nwéhél inyu mbabaa a nkôhna ni inyu bikuu bi nlôl mu maboñok moñ

MANYUÑ A NLAMA . . .

• kal bôt bape mu likoda lelaa u mbabaa nye inyu boñ le ba nit nye

• kônd we, a kal we mam momasôna u mboñ, a bat ki we le u neebe hihôha hioñ

• yimbe le hala a mbéda we suhulnyu ni makénd inyu lo kwélés nye, a nwéhél ki we ni ñem wé wonsôna

To hala kii bibégés di nti Djob len bi mbat bé bés bisesema bi binuga, bimbe biniigana Yésu a bé ti inyu unda maada ma yé ipôla nsañ lôñni lôk kéé, ni bibégés Djob a neebe?