Yéñ mahôla

“Ngim mut i nla yémbél mpom mut wada, ndi bôt iba ba nla jôs nye.”—Ñañal 4:12.

I NGÉDA di gwé bôt ba ba nit bés, di nla bép ñoo wés inyule i bôt ba, ba nkônde bés ngui—to i ba yaa le ñoo wés a yé mut tole yom. Hala wee, ibale u nsômbôl yémbél lem i ôt siga, i nla ba loñge le u yéñ mahôla yak lihaa joñ tole mawanda moñ—tole mut numpe nu a ga ha ñem wé wonsôna i nit we ni hônba we.

Yéñ ki mahôla ma bôt ba ba bi nwas siga, inyule ba ga nok we ndi ba ga ti ki we mahôla ma mbéda we. “Bôt ba bi hôla me iloo i buk i.” Torben, kristen yada i Danmark. Abraham, nu a niñ i loñ India, a ntila le: “I bañga gwéha lihaa jem ni bikristen bipe ba bi unda me i bi hôla me i nwas siga.” Ndi ngim mangéda to mo ma kôli bé.

Mut wada le Bhagwandas a nkal le: “Me bi ôt siga 27 nwii, ndi i ngéda me bi nigil lelaa Bibel i bé tehe bilem bi nyega, me kit le me nwas siga. Me bôdôl suhul dinoo tjem di siga. Me héñha bilôñ gwem. Me ke i dokta. Ndi hala a bi hôla bé to yom. Ha ni nyen u wada, me bi soohe Yéhôva, me yiblene nye ñem wem, me bat yak nye le a hôla me i nwas siga. Ndik i ngéda i nyen me bi pamba!”

Nlôm jam numpe u nla boñ a yé le u kôôba i bisu bi ngéda inyu mandutuu u yé le u boma. Kiki bo kii? Añ ño nkwel u noñ ha.

 [Minkéñék mi matila i lipep 5]

BAA U NLAMA YOÑ BEE?

Ngandak mintén mi bee mi yé inyu nwas siga, kiki bo bandas i nikôtin; ndi u nlama yi le; dikôô ndi dikôô di bôt di ma somb gwo. Ilole u noñ mabal map, badba mana mambadga:

Bimbe bisai bi nlo lo? I nkéla le, ngandak matibla i nla hôla i nwas siga, inyule i nsuhul we ngôñ siga. Ndi bape ba mpééna le i matibla ma, ma ntiblana toi.

Bimbe bikuu bi nla kwo? Ngim bee i nlona mandutu mape, kiki bo ngôñ bilôô, kon mahoñol ni ngôñ i nitba. U nlama yi le, i bee ba nti we inyu héñha nikôtin bi yé bi bana ndék hibañga mu, jon i bee bi, bi yé le bi ti we ngim makon. I maliga, i mut a nyoñ gwo, a nyila nkol u bee bi.

Mambe manjel mape ma yé? Ngim minsoñgi mi ñunda le 88 bôt ikété 100 ba ba bi pat nsañ u siga, ba bi boñ hala ibabé le ba yoñ bee gwo ki gwo.