YOM BÔT BA NKAL

Ngandak i nkal le mintuk mi moni mi yé ndik minjôha, béba i ta bé mu, ibale mi mbôk bé mbén. Ngim mintuk mi moni mi mbôk bé mbén, kiki hihéga ngim lôtéri i yé le ngomin a nit; mintuk mi, mi mbulus ki moni inyu nseñ u ngandak bôt.

YOM BIBEL I NKAL

Nlôñ Bibel to wada u mpôdôl bé mintuk mi moni. Ndi i gwé ngandak matiñ i i ñunda lelaa Djob a ntehe mintuk mi moni.

I tuk mintuk mi moni wee u nyéñ le u je i ngii miño mi bôt bape. I nya mahoñol ma, i nkiha bé ni Bibel, inyule i nkal le: “Ni tadak ki bébomede inyu mintén mi hép nwominsôna.” (Lukas 12:15) Hép nkus won u ntinde bôt i tuk mintuk mi moni. Babot mintuk mi moni ba mbôn ngandak bôt lingwañ, ndi ba nkal bé bo maliga, hala wee le ndik ndék yon i nla je; inyule ba nyi le i emel lingwañ i ga tinde i bôt ba i pémés moni inyu tuk. Mintuk mi moni mi nhôla bé mut i ke hép nkus ngwéé, ndi mi nti nye ngôñ i pala kwo ngwañ.

Mintuk mi moni mi gwé ndik njômbi yada: i je nwañan moni bana batuk bape ba nimis. Ndi ki le Bibel i niiga mut le a “kee ni bisu i yéñ, ha nseñ wé nyetama bé, ndi nseñ u bôt bape.” (1 Korintô 10:24) I bak ki le mbén yada mukété jôm li mambén i nkal le: “U nlama bé tam . . . yom yo ki yo mut woñ libôk a gwé.” (Manyodi 20:17) I ngéda mut a ntuk a mbot ñem le a ga je, i maliga, a yé bot ñem le bape ba ga nimis moni nwap le nyen a je nwo.

Bibel i nkal ki le di yoñ yihe i tehe mbom ilam (tole masoda) kiki ngim ngui i i nla kôp bés bisai. I nlômbi Israel, bahogi ba bé hémle ha bé Yéhôva, ba bi “[tek] téblé inyu nyambe nu Masoda.” Baa Yéhôva a bé neebe bibégés ba bé ti “nyambe nu Masoda”? To, a bi kal bo le: “Ni bi kônde boñ mam mabe i mis mem, ni pohol ki i boñ mam ma mbébél me.”—Yésaya 65:11, 12.

Maliga ma yé le, i ngim bahoma ba nkoñ ’isi, moni mi nlôl mintuk ngomin a nti kunde mi nhôla inyu bisuklu, mahol ni mam mape inyu nseñ u bôt bobasôna. Ndi to ba ngwélél i moni mi, hala a nhéya bé lelaa mi bi yôña—mi nlôl ni minson mi ñunda bilem kiki hép nkus, ni i tôñ ndik wemede ni mahoñol le, u nla kwo ngwañ i likéébana li jis.

“U nlama bé tam . . . yom yo ki yo mut woñ libôk a gwé.”—Manyodi 20:17.

KII BIBEL I NKAL

Bibel i nti mana mabéhna: “Ndi i bôt ba nai ndik le ba mba mingwañ ba nkwo ikété manoodana, ikété hiandi ni ikété ngandak minheña mi bijôñ mi mi nôgha njôghe, mi ken-ga ki bôt i tjiba ni i yimil.” (1 Timotéô 6:9) Mintuk mi moni mi nhôñôs hép nkus, i lem i i yé béba i nya yé le, Bibel i nkal le, “hép” i yé mu ikété bilem bibe mut a nlama ke ngwéé ni ngui.—Éfésô 5:3.

I nti ndik mut mahoñol le a pala kwo ngwañ ibabé ndutu, hala a ntinde bo i gwés moni—jon Bibel i nsébél yo le “nkañ u mam mabe momasôna.” Ibale mut a gwé ngôñ ikeñi i kôs moni, i ta bé nye ndutu i yila nkol u moni, hala a ga ti nye kon mahoñol, a nla ki nimis hémle yé. Bible i ngwélél ini titii inyu unda kii y’a pémél i bet ba ngwés moni, i nkal le, “ba nôgha ki bomede njôghe homa nyensôna.”—1 Timotéô 6:10.

I hép nkus i nsôk tinde mut i tjelel, i nimis maséé mé inyu moni a gwé hanano, i nhéya ki nye maséé mé. “I mut a ngwés moni a ga nuu bé moni, to nu a ngwés lingwañ a ga nuu bé jo.”—Ñañal 5:10.

Milioñ i bôt i bi kwo i hiandi hi mintuk mi moni i bi sôk léba le ba bi yila minkol mi mintuk. I jam li, li yé ni nkoñ ’isi wonsôna, bayimam ba nkal le, i Amérika ndigi ba yé milioñ mi bôt ba ba yé minkol mi mintuk mi moni.

Ngéni yada i nkal le: “Ngababum le mut a nkôhna ni manjel mabe i ga lona bé i mut nu bisai i dilo di nlo.” (Bingéngén 20:21) Mintuk mi moni mi bi yilha bahogi minkol, ba gwé mapil, bape ba bi sot yak, a bak ki le bape ba bi nimis bôlô yap, libii jap ni mawanda map. Mintuk mi moni mi nla héya mut maséé mé, ni nip nye niñ yé, ndi i noñ matiñ ma Bibel i nla hôla nye i keñgle bikuu bi.

“Ngababum le mut a nkôhna ni manjel mabe i ga lona bé i mut nu bisai i dilo di nlo.”—1 Timotéô 6:9.