1-2. Umbe nsébla Yéhôva a nleñ bagwélél bé?

 IBALE ba mbat we le Yéhôva a yé njee inyu yoñ, lelaa u ga timbhe? Bebek u yé le u timbhe le, ‘Yéhôva a yé Tata wem, Nyambe wem ni Liwanda jem.’ Di nla yak gwélél môl mape inyu toñol njee a yé Yéhôva. Ndi, baa u ga hoñol i kal le a bi leege we i nyeni?

² Inyu pôdôl maada ma bas bas ma yé ipôla Yéhôva ni bagwélél bé ba ba tiñi ni nye, Kiñe David a bi gwélél titii i mut a naña bôt i nyeni, ni bakén bé. A bat le: “A Yéhôva, njee u ga leege i ndap yoñ libadô? Njee a’ yén i hikôa hioñ hipubhaga?” (Tjémbi 15:1) Bibuk bi bi ñunda le, di nla ba mu nsoñgi u bôt Yéhôva a nleege i nyeni, hala wee mawanda mé. Kinje nsima nkeñi i ba bakén ba Yéhôva!

YÉHÔVA A NAÑA BÉS I BA BAKÉN BÉ

3. Njee Yéhôva a bi bôk a naña, kii nye ni nkén wé ba bi nôgda?

³ Ilole Yéhôva a mbôdôl hek mam momasôna, a bé nyetama. Ndi ngim ngéda i bi pam, a hek Man wé mbôkgwéé, a leege nye i ndap yé libadô. Yéhôva a bé maséé ngandak i leege nkén i mbai yé inyu ngélé bisu. Bibel i nkal le Man wé “a bé kônha nye maséé hiki kel.” Man wé, nkén wé nu bisu, a “bé konok maséé i bisu [bi  Yéhôva] ngéda yosôna.”​—Bingéngén 8:30.

4. Bonjee ki Yéhôva a bi naña i ba bakén bé i mbus ngéda?

⁴ I mbus le Yéhôva a bi hek bihégél bi mbuu, a naña yak gwo i ba bakén bé. Inyu pôdôl biañgel gwé, Bibel i nkal le “bon ba Nyambe” ba bé maséé i ba ni nye. (Hiôb 38:7; Daniel 7:10) Ntandaa ngéda u bi tagbe le ndigi bihégél bi mbuu gwon bi bééna nsima i ba mawanda ma Yéhôva. I mbus ngéda, a bi kônde kéñbaha ndap yé libadô, a neebe le bôt ba binam ba ba yé hana ’isi ba jôp mu. Ikété bôt ba bi bana nsima u, di nla sima Énok, Nôa, Abraham, ni Hiôb. Bibel i mpôdôl i bôt ba kiki mawanda ma Nyambe, i kalak ki le ba bé kiha “ni bañga Nyambe.”​—Bibôdle 5:24; 6:9; Hiôb 29:4; Yésaya 41:8.

5. Kii mbañ i nlébna i kaat Ézékiel 37:​26, 27 i niiga bés?

⁵ Mu kiki nwii mi bé tagbe, Yéhôva a bi kônde naña mawanda mé mape i ba bakén bé. (Añ Ézékiel 37:​26, 27.) Kiki hihéga, mu mbañ i nlébna i kaat Ézékiel, di ntehe le Nyambe a bé gwés le bagwélél bé ba bana maada ma bas bas ni nye. A bi bôn le, a’ boñ “malômbla ma nsañ ni bo.” I mbañ i, i mpôdôl i ngéda bagwélél ba Yéhôva ba ba gwé botñem i niñ i ngii ni i bet ba gwé botñem i niñ hana ’isi ba ga ba “bémba yada,” ba niñik ikété ndap yé libadô. (Yôhanes 10:16) I jam li jon di ntehe i len ini!

NYAMBE A NYOÑ NDUN NI BÉS TO HEE HOMA DI YÉ

6. Lelaa mut a nla yila nkén Yéhôva mu ndap yé libadô, ndap yé libadô i yéne hee?

⁶ I ngéda kôba, ndap libadô i bé homa mut a bé noi ni homa mut a bé solop nop tole hiañgaa. I nkén a bé a jôp i ndap libadô a bé yi le ba ga yoñ ndun ni nye. I ngéda di mpam i bana maada ma bas bas ni Yéhôva, di ti ki bésbomede nkikip i nyeni, di nyila bakén i ndap yé libadô. (Tjémbi 61:4) I bôdôl ha, di gwé ngandak bijek bi mbuu, di mboma ki ngandak bôt ipe i i yé bakén ba Yéhôva. Ndi ndap libadô i Yéhôva i ta ndigi bé homa wada. To u nke imbe loñ, bebek i likoda li ndôn li li nkot bôt ba ngandak biloñ, u ga boma bôt bape ba ba gwé nsima i ba bakén ba Nyambe mu ndap yé libadô. Ndap libadô i Nyambe  i yé hiki homa bagwélél bé ba yéne.​—Masoola 21:3.

7. Inyuki di nla kal le bagwélél ba Yéhôva ba ba bi wo ba ngi yii i ndap yé libadô? (Béñge yak titii.)

⁷ Kii di nla ni kal inyu bagwélél bé ba ba bi wo? Baa di nla kal le ba nginda yii mu ndap yé libadô? Ñ! Inyuki di nkal hala? Inyule Yéhôva a ntééda bo i boña wé. Yésu a toñol le: “Inyu bitugne bi bawoga, yak Môsi a bi yelel i jam li ikété ñañ u man e biloo, i ngéda a bi sébél Yéhôva le: ‘Nyambe nu Abraham, Nyambe nu Isak, ni Nyambe nu Yakôb.’ A ta bé Nyambe nu bawoga, ndi nu bayômi, inyule inyu yé, bobasôna ba yé i niñ.”​—Lukas 20:​37, 38.

BISAI DI GWÉ I BA I NDAP LIBADÔ I NYAMBE NI KII A MBÉMÉL BÉS

8. Bimbe bisai i bet ba yé i ndap libadô i Yéhôva ba nkôhna i ngéda ba nyééne mu?

⁸ Nlélém kiki ndap libadô i nhôla mut i noi, ni i solop hiañgaa ni nop, ndap libadô i Yéhôva i nhôla i bet ba nyééne mu i keñgle mam momasôna ma nla ôbôs maada map ni Yéhôva, i tinak ki bo bañga botñem. I ngéda di nyén bebee ni Yéhôva, Satan a ta bé le a boñ bés béba i i nom i boga ni boga. (Tjémbi 31:23; 1 Yôhanes 3:8) I mbok yondo, Yéhôva a’ ke ni bisu i sôñ mawanda mé he ndigi bé i pes i mbuu, ndi yak i pes minsôn, hala wee ba ga wo ha bé.​—Masoola 21:4.

9. Kii Yéhôva a mbémél i bet ba nyén i ndap yé libadô?

⁹ Ñ, hala a yé nsima nkeñi i ba bakén ba Yéhôva i ndap yé libadô, tole i bana maada malam ni nye. Kii di nlama boñ inyu ke ni bisu i yén mu ndap yé libadô? I ngéda mut a naña we i mbai yé, u gwé ngôñ i yi kii a mbémél we. Kiki hihéga, a yé le a bat we le u héya bitamb ilole u njôp, u ga boñ hala ni maséé momasôna. Nlélém inyu yés, di gwé ngôñ i yi kii Yéhôva a mbem le di boñ inyu ke ni bisu i yén i ndap yé libadô. Gwéha yés inyu Yéhôva i ntinde bés i boñ kii yosôna di nla inyu “lémél nye i nya i yôni.” (Kôlôsé 1:10) I ngéda di nyoñ Yéhôva kiki Liwanda jés, di nyik nôgda le a yé Djob jés ni Tata wés, nu a kôli ni lipém ni bibégés. (Tjémbi 25:14) Hala a ga boñ le, di ti nye njôôñ lipém hiki ngéda ibabé i hôya njee a yé toi. I njôôñ lipém i, i ga boñ le di keñgle i mam ma yé le ma boñ le a unup. Ñ, ngôñ yés i yé toi le di “kiha . . . ni Nyambe [wés] lôñni ñem nsôhga.”​—Mika 6:8.

YÉHÔVA A BÉ TODOL BÉ BON BA LÔK ISRAEL I ÑOÑ

10-11. I ngéda di nigil lelaa Yéhôva a bé tôñ bon ba Israel i ñoñ Sinai, lelaa hala a ñunda le a ta bé ntodol bôt?

¹⁰ Yéhôva a ta bé mut mbagla mu maada mé ni i bôt a nleege mu ndap yé libadô. (Rôma 2:11) Di nla tibil nok i jam li ibale di nigil lelaa Yéhôva a bé boñ ni bon ba Israel i ñoñ u Sinai.

¹¹ I mbus le a bi pémés litén jé minkôm i Égiptô, Yéhôva a bi téé biprisi inyu sal i lap. A kit le bon ba Lôk Lévi ba nlama gwel mini minson mimpe i lap ipubhaga. Baa Yéhôva a bé tôñ i bet ba bé sal i lap ni i bet ba bé yééne ha ipañ i nya i tôbôtôbô iloo bana bape? Heni! Yéhôva a ntodol bé bôt.

12. Lelaa maboñok ma Yéhôva ipañ Lôk Israel i ñoñ Sinai ma ñunda le a ta bé ntodol bôt? (Manyodi 40:38) (Béñge yak titii.)

¹² Hiki man Lôk Israel a bééna nsima  i ba liwanda li Yéhôva, to a bé gwel to umbe nson, to a bé yééne bebee tole haa ni lap. Kiki hihéga, Yéhôva a bi yoñ bitelbene le bôt ba litén bobasôna ba laa tehe hélha ond ni nkum hié bi bi bé i ngii lap. (Añ Manyodi 40:38.) I ngéda ond i bé telep inyu ke homa numpe, yak i bet ba bé haa ni lap ba bé la tehe yo, ba kot gwom gwap, ba bôk mandap map ma mabadô, ba kee ni bana bôt ba litén bape. (Ñañga bôt 9:​15-23) Hiki mut a bé le a tibil nok sép iba ba bé hem inyu yis bo le ba nlama nyodi. (Ñañga bôt 10:2) I pot maliga, i bé béda ndik bé le mut a ba ipañ lap inyu bana maada malam ni Yéhôva. Maselna ni hala, hiki mut ikété litén a bé le a ba nkén wé, a bak ki nkwoog nkaa le Yéhôva a ga éga nye, a sôñ ki nye. Nlélém i len ini, to hee homa di nyééne hana ’isi, Yéhôva a ngwés bés, a ntôñ bés, a tadak ki bés.

YÉHÔVA A NTODOL BÉ BÔT I LEN INI

13. Lelaa Yéhôva a ñunda le a ntodol bé bôt i len ini?

¹³ I len ini, bagwélél ba Djob bahogi ba nyééne bebee ni hikuu hikeñi tole hikuu hi loñ hi Mbôgi Yéhôva. Bape ba nsal mu. Hala a mboñ le ba nla gwel ngandak minson i i mbôña nyoo, ba bak ki bebee ni lôk kéé i i ñéga nson wés. Bape ba yé bagwélél ba makiiña, tole bagwelnson ba tôbôtôbô. Ibale nano u ta bé mu nsoñgi u bet ba gwé minsima mi, ba nkwoog nkaa le, Yéhôva a ngwés ba bobasôna a nleege kiki bakén bé. Ni le a ntôñ hi wada wap. (1 Pétrô 5:7) Nyambe a nti bagwélél bé bobasôna bijek bi mbuu, a ñéga bo, a tadak ki bo.

14. Ti hihéga hipe hi hi ñunda le Yéhôva a ntodôl bé bôt.

¹⁴ Hihéga hipe hi hi ñunda le Yéhôva a ntodol bé bôt hi yé le, a mboñ le ngandak bôt i laa bana Bibel ni nkoñ ’isi  wonsôna. Bitilna Bipubi bi bi bôk ndugi bi tilba ni dilémb diaa: Hilémb hi Lôk Héber, hi Araméa, ni hi Grikia. Baa i bet ba nla añ Bibel ikété dilémb di ntip sima, ba gwé maada ma bas bas ni Yéhôva iloo i bet ba nla bé añ yo mu dilémb di? To jam.​—Matéô 11:25.

15. Kii i ñunda loñge loñge le Yéhôva a ntodol bé bôt? (Béñge yak titii.)

¹⁵ Inyu naña bés i ba mawanda mé, Yéhôva a mbéñge bé i suklu di bi boñ tole ngap yés i yi ngandak dilémb. Yéhôva a nti mintén mi bôt nwominsôna pék yé, to ba bi boñ bisuklu bikeñi tole heni. Bañga yé le Bibel, i ma koblana ikété dikôô di dilémb; jon ngandak bôt i nkoñ ’isi i nla ôt nseñ ni biniigana gwé, i nigil ki i yila mawanda mé.​—2 Timôtéô 3:​16, 17.

KEE NI BISU I ‘LÉMÉL’ YÉHÔVA

16. Inoñnaga ni Minson mi baôma 10:​34, 35, lelaa di nla ke ni bisu i lémél Yéhôva?

¹⁶ Hala a yé nsima nkeñi le Yéhôva a nleege bés kiki bakén bé i ndap yé libadô. A nlôôha ba liyômba, a nlôôha gwés bôt, nyen a nyi ki leege bakén i nya i mbuma ñañ. Iloo ki hala, a ntodol bé bôt, a nleege mintén mi bôt nwominsôna ibabé i béñge i homa ba nyééne, binéñél gwap, ibale ba bi ke i suklu tole heni, kôgôô yap, litén jap, nwii nwap, ibale ba yé bôlôm tole bôda. Ndi, ndigi i bet ba nôgôl nye bon a nleege i nyeni.​—Añ Minson mi baôma 10:​34, 35.

17. Hee di nla léba biniigana bipe inyu yi kii di nlama boñ inyu boñ le Yéhôva a leege bés i ndap yé libadô?

¹⁷ I kaat Tjémbi 15:​1, David a mbat mana mambadga le: “A Yéhôva, njee u ga leege i ndap yoñ libadô? Njee a’ yén i hikôa hioñ hipubhaga?” Ni mahôla ma mbuu mpubi, ntôp tjémbi a bi timbhe mambadga ma. Yigil i noñ ha i ga pôdôl i mam di nlama boñ inyu lémél Yéhôva ni i ke ni bisu i ba liwanda jé.