Mambadga ma basoñgol
Baa bibañga bini le “u ga tat bo,” di nléba i kaat Tjémbi 12:7, bi mpôdôl “bôt ba nok ndutu” (nlôñ 5) tole “bibañga bi Yéhôva” (nlôñ 6)?
I mam ma nkéña ñañ unu ma ñunda le i nlôñ Bibel unu u mpôdôl bôt ba binam.
I kaat Tjémbi 12:1-4, di ñañ le “ipôla bôt ba binam, i bôt ba nla bôdôl ñem ba ta ha bé.” Nano di wan Tjémbi 12:5-7.
“Yéhôva a nkal le: ‘Kiki bape ba ntét ba nok ndutu,
Kiki diyeyeba di ntjelel,
M’a telep inyu sôñ bo.
M’a tohol bo i moo ma bôt ba ba ndegle bo.’
Bibañga bi Yéhôva bi yé bipubi;
Bi yé kiki silba i i mpubhana ngélé isaambok ikété juu li hié hikeñi, li li yé ni biték.
U ga tat bo, a Yéhôva;
u ga sôñ bo i moo ma hiai hini i boga ni boga.”
Nlôñ 5 u ñunda kii Nyambe a ga boñ inyu “bôt ba nok ndutu.” A ga sôñ bo.
Nlôñ 6 u nkônde le, “Bibañga bi Yéhôva bi yé bipubi,” “bi yé kiki silba i i mpubhana.” Hala a ñunda i yom di nôgda inyu bañga i Yéhôva.—Tjémbi 18:30; 119:140.
Nano béñge nlôñ u noñ ha, Tjémbi 12:7: “U ga tat bo, a Yéhôva; u ga sôñ bo i moo ma hiai hini i boga ni boga.” I buk ini le “bo” i mpôdôl kii?
Kiki nlôñ 7 u noñ nlôñ 6 u u mpôdôl “bibañga bi Yéhôva,” bôt bahogi ba nla hoñol le “bo” a yé inyu pôdôl bibañga bi Nyambe. Di nyi yak le Djob a bi tat Bibel to hala kiki bakolba ba bé yéñ sôñga yo ni tjé yo.—Yésaya 40:8; 1 Pétrô 1:25.
Ndi di nyi ki le Yéhôva a ntat bôt kiki nlôñ 5 u nkal. Yéhôva a nhôla, a ga ke ki ni bisu i hôla ni i tat i “bôt ba nok ndutu” ni i bôt ba yé ikété ‘njiiha.’—Hiôb 36:15; Tjémbi 6:4; 31:1, 2; 54:7; 145:20.
Jon, i buk ini le “bo” i nlôñ 7 i mpôdôl kii?
I ngéda di ntibil wan i hiémbi hini, i nene loñge loñge le i buk ini le “bo” i mpôdôl bôt ba binam.
I Tjémbi 12:1 David a mpôdôl “i bôt ba nla bôdôl” ñem, ba bibéba bi bôt bi nteembene. I mbus, mi ñunda le Yéhôva a’ kogse i bôt ba bitembee ba. I hiémbi hi hi nkwés bés nkaa le di nla bôdôl Nyambe ñem le, a ga lôl litén jé mahôla inyule bibañga gwé bi yé bipubi.
Jon i ngéda nloñ 7 u nkal le, Yéhôva a ga tat a sôñ ki “bo” u mpôdôl i bôt ba nok njôghe i moo ma bibéba bi bôt.
I buk ini le “bo” i i ngwéélana hana i bi yôña i bitilna bi Lôk Héber. Ndi ikété ngobol bitilna bi Lôk Héber ni hop u Grikia ba nsébél le la Septante ba bi gwélél i buk ini le “bés” ngélé iba nlôñ 7, inyu pôdôl i bôt bape ba ntét ba ba nok ndutu. Sôk i nsôk, nlôñ 7 u nkal le, Yéhôva a ga sôñ bagwélél bé “i moo ma hiai hini” hi hi nhôñôs bibéba bi mam. (Tjémbi 12:7, 8) Ngobol i Bitilna bi Lôk Héber ni hop u Araméa i nkobol nlôñ 7 le: “We, A NWET, u ga sôñ bôt ba téé sép, u ga tat bo i moo ma hiai hibe hini i boga ni boga.” Hala a ñunda ndigi bés loñge loñge le, Tjémbi 12:7 a mpôdôl bé bibañga bi Nyambe.
Jon nlôñ unu u nti “i bôt ba nla bôdôl ñem” botñem le: Nyambe a ga boñ jam inyu yap.
