1. Lelaa di nlama tehe hémle bikristen bi gwé?

HÉMLE i bikristen i yé lem lam i i yé mahee ngandak. Bôt ba binam bobasôna bé bon ba gwé lem i. (2 Tésalônika 3:2) Kiki hémle i nlôl ni njel mbuu mpubi, jon Yéhôva a ngwélél mbuu wé inyu ti hiki wada wés hémle i kôli. (Rôma 12:3; Galatia 5:22) Ba bobasôna ba gwé lem ini, ba nlama ti mayéga ni ñem wap wonsôna.

2, 3. (a) Bimbe bisai mut nu a gwé hémle a nla kôs? (b) Mambe mambadga di ga wan?

² Yésu Kristô a bi kal le Tata wés nu a yé ngii a ñôt bôt i pañ yé ni njel Man Wé. (Yôhanes 6:44, 65) Jon i hémle Yésu i nyible hiki mut njel i kôhna nwéhél i bibéba gwé. Hala a nyible ki bés njel i nok maséé ma yé i bana maada ma boga ni Yéhôva. (Rôma 6:23) Kii di bi boñ inyu kôhna nya bisai i? Kiki di yé bikwéha bi bôt, i yom yosôna di kôli bana i yé nyemb. (Tjémbi 103:10) Ndi Yéhôva a bi tehe mam malam mu miñem nwés. Ikété loñge yé ñem, a bi yibil  miñem nwés inyu tinde bés i emble ñañ nlam. Jon di bi bôdôl unda le di nhémle Yésu ni botñem le d’a kôhna niñ boga.​—Añ 1 Yôhanes 4:9, 10.

³ Ndi kii i yé toi hémle? Baa i yé ndik i yi bisai Djob a ntéédana bés? Ndi iloo mam mana momasôna, lelaa di nla unda le di gwé hémle?

4. Toñol inyuki i bana hémle i ta ndik bé i bana yi?

⁴ Hémle i ta ndik bé i yi le Djob a gwé ngim bitééne. Ndi i yé ngui, i i ntinde mut i boñ mam inoñnaga ni sômbôl i Djob. Ibale mut a nhémle njel i tohi i Djob, hala a ga tinde nye i añle bôt bape ñañ nlam. Ñôma Paul a bi toñol le: “Ibale u mpahal ni nyo woñ le Yésu a yé Nwet, ndi u undga ki le u nhémle ni ñem woñ le Nyambe a tugul nye ikété bawoga, wee w’a tohlana. Inyule ni ñem nyen mut a nhémlene inyu telepsép; ni nyo ki nyen a mpahlene inyu tohi.”​—Rôma 10:9, 10, MN; 2 Korintô 4:13.

5. Inyuki hémle i nlôôha ba nseñ, lelaa di nla tééda hémle i ngui? Ti hihéga.

⁵ Inyu boñ le di kôs niñ boga ikété paradis, di nlama bana ni tééda hémle i ngui. Ndik kiki e i gwé ngôñ ni malép, hala nyen i yé bés mahee le di tééda hémle i ngui. Bañga e i yé mahéñha ni mbañak e, inyule yo i nañ hiki ngéda. Bañga e i nkôt ngéda ba nkôp bé yo malép, ndi i nkônde nañ ibale ba nkôp yo malép hiki ngéda. Ibale ba nkôp bé yo jôga li malép, e i i bé nañ loñge i nsôk i wo. Hala nyen yak hémle yés i yé. Ibale di ntôñ bé yo, i nsôk i wo. (Lukas 22:32; Lôk Héber 3:12) Ndi ibale di nyoñ ngéda ni hémle yés, i ga yén i niñ, i lôôha ki ‘hol’ kayéle di bana hémle i ngui.​—2 Tésalônika 1:3; Titô 2:2.

6. Mambe manjel ima kaat Lôk Héber 11:1 i ngwélél inyu toñol kii hémle i yé?

⁶ Ndoñi Bibel i nti inyu hémle i yéne i kaat Lôk Héber 11:1 (Añ.) Hémle i ntihba mam ima ma tôbôtobô ma di ntehe bé i mis: (1) “Mam mut a mbôdôl ñem”​—ma nla ba mimbônga di mbem le mi yon, ndi mi yé ngi yon. Kii héga, di mbem lisuk li béba yosôna ni malo ma mbok yondo. (2) “Mam ma nene bé.” I buk Grikia ba nkobol hana le “mbôgi” i yé “i ba nkwoog nkaa” inyu mam di ntehe bé. Kii héga, di yé nkwoog nkaa le Yéhôva Djob a yé, le Yésu Kristô a yé, ni le biañgel bi yé. Di yé ki nkwoog nkaa ni minson mi Ane i ngii. (Lôk Héber 11:3) Lelaa di nla unda le hémle yés i nginda yii yômi ni le di nhémle i mam di ntehe bé ni mis, ma ma bi pôda ikété Bibel? Di mboñ hala ni njel bibuk gwés ni maboñog més. Ibale di mboñ bé hala, wee hémle yés i yôni bé.

7. Lelaa ndémbél i Nôa i niiga bés kii i bana hémle i nkobla? (Béñge titii i bibôdle bi yigil)

⁷ Kaat Lôk Héber 11:7 i nyigye hémle i Nôa, inyule “ngéda a kôs mabéhna ni Nyambe inyu mam ma ngi nene, a nyodi ni siñge Nyambe ñem, a bañ nkuu i tohol ndap yé.” Nôa a bi unda le a gwé hémle ngéda a bi oñ soso nkuu. Ibabé pééna, bebeg le bôt bé ba libôg ba bi bat inyuki a yé oñ nya soso ndap i. Baa Nôa a bi yip nyo wé, tole a kal bo le ba ha bañ manyo map mu nson wé? To jam! Hémle yé i bi tinde nye i ti bo mbôgi ni makénd, ni i béhe bôt ba ngéda yé inyu malo ma mbagi i Djob.  Bebeg ki le Nôa a bi tiimba kal bo bini bibuk Yéhôva a bi gwélél ngéda a bi pôdôs nye, a kal nye le: “Lisuk li minsôn nwominsôna li nkola bisu gwem; inyule hisi hi nyon ni njôô inyu yap . . . Me me nlona ntida malép hana isi i tjé minsôn nwominsôna mi mi gwé nhébék u niñ, isi ngii; gwom gwobisôna bi yé munu isi gw’a wo.” I nene ki le Nôa a bi toñle bo mpom njel tohi ba bééna, a tiimbaga kal bo ini mbén i Djob: “U nlama jôp nkuu.” Hala nyen Nôa a bi kônde unda hémle yé, mu kiki a bé “ñañal telepsép.”​—Bibôdle 6:13, 17, 18; 2 Pétrô 2:5.

8. Lelaa Yakôbô a bi toñol kii bañga hémle i bikristen i nkobla?

⁸ Yakôbô a bi lama tila kaat yé ndék ngéda i mbus le Paul a tila ndoñi i hémle Djob a bi ti nye. Kiki Paul, Yakôbô a bi toñol le inyu kristen, hémle i ta ndik bé i ba nkwoog nkaa inyu botñem di gwé. Ndi di ñunda yo ni njel maboñog més. A tila le: “Éba ni me hémle yoñ ibabé minson, ndi yak me m’a éba we hémle ikété minson nwem.” (Yakôbô 2:18) Yakôbô a bi kônde ki unda mahéñha ma yé ipôla i ba nkwoog nkaa, ni i unda le di gwé toi hémle. Mimbuu mimbe mi yé nkwoog  nkaa le Djob a yé, ndi mi gwé bé bañga hémle. Ibabé nkaa, maboñog map ma ñunda le ba nsal ndigi i boñ le bitééne bi Djob bi yon bañ. (Yakôbô 2:19, 20) Ndi ngéda a bé pôdôl mut hémle nu kôba numpe, Yakôbô a bi bat le: “Abraham, tata wés, baa a kéla bé le a téé sép inyu minson, lakii a kena man wé Isak ngii juu li bisesema? U ntehe ni le hémle i ba sal lôñni minson nwé, ni le hémle i ba nyonok inyu minson.” Ha nyen Yakôbô a ntibil ki unda le maboñog mon ma nlama unda le mut a gwé hémle. Jon a bi tila le: “Kiki nyuu i yé woga ibale i gwé bé mbuu, hala ki nyen hémle ngi minson i yé woga.”​—Yakôbô 2:21-23, 26.

9, 10. Lelaa ñôma Paul a nhôla bés i nok inyuki i yé nseñ le di unda hémle yés?

⁹ Iloo mômaa ma ñwii mbus ha, ñôma Yôhanes a bi tila kaat yada ni maléta maa ma ma gwé jôl jé. Djob a bi gwélél batila Bibel bape inyu unda kii i yé bañga hémle inyu kristen. Baa ñôma Yôhanes a bé diihe toi ndoñi i? Ini buk i Grikia ba nkobol le “i unda hémle,” Yôhanes a bi gwélél yo iloo batila Bibel bobasôna.

¹⁰ Kii héga, Yôhanes a bi toñol le: “Nu a ñunda le a nhémle Man a gwé niñ boga; ndi nu a nôgôl bé Man a’ tehe bé niñ, ndi hiun hi Nyambe hi tiñi ni nye.” (Yôhanes 3:36, MN) Hémle i kristen i ntinde nye i unda le a noñ mambén ma Yésu. Yôhanes a bé sima bibuk bi Yésu inyu yelel imbe sañ di nlama jo ibabé waa, kayéle di unda hémle yés, ni le di kôhna mbônga u niñ boga.​—Yôhanes 3:16; 6:29, 40; 11:25, 26; 14:1, 12.

11. Lelaa di nla unda le di ndiihe maliga di gwé?

¹¹ Kinje maséé di nlama bana i yi le Yéhôva a ngwélél mbuu mpubi inyu yelene bés maliga, ni ti bés ngui i unda le di nhémle miñañ minlam! (Añ Lukas 10:21.) Kekikel di waak bañ ti Yéhôva mayéga, inyule a ñôt bés i nyeni ni njel Man wé, nu a yé “Mbôgna-nlôñ ni Nyônôs hémle yés.” (Lôk Héber 12:2) Inyu unda le di ndiihe ini loñgeñem i mbuma ñañ, di nlama ke ni bisu i lédés hémle yés ni njel masoohe ni yigil Bañga i Djob.​—Efésô 6:18; 1 Pétrô 2:2.

12. Mambe manjel di nla gwélél inyu unda hémle yés?

¹² Di nlama ke ni bisu i unda le di ndiihe mimbônga mi Yéhôva. Di nlama gwélél manjel ma ma ñunda toi bôt bape le di nhémle. Kii héga, di nlama ke ni bisu i téé likalô inyu Ane Djob, ni yilha bôt banigil. Di nlama ki kônde boñ biliya le “di boñog ndigi loñge ikété bôt bobasôna ndi téntén ikété ba ba yé lihaa li hémle.” (Galatia 6:10) Di nsal ki ni ngui inyu “engla ni nlômbi mut ni dipa tjé,” kayéle di keñgle hiki jam li li nla tômbôs bés i pés mbuu.​—Kôlôsé 3:5, 8-10.

13. Umbe nseñ “i hémle Djob” i gwé, di nla hégha “i hémle Djob” ni kii, inyuki?

¹³ Bibel i nkal le ‘ibabé hémle mut a ta yaga bé le a lémél Djob, inyule mut nu a nkôôge bebee ni Nyambe a nlama hémle a yé, ni le a yé mbom bôt ba nyéñ nye.’ (Lôk Héber 11:6) Bibel i ñunda le “i hémle Djob” i mbéda mu hikuu hiki mut a nlama bana inyu yila, ni tééda libak jé li bañga kristen. (Lôk Héber 6:1) Mu hikuu hi hémle yap nyen bikristen bi nlama kônde bilem bilam bipe, inyu boñ le ba “téédaga bomede ikété gwéha Nyambe.”​—Añ 2 Pétrô 1:5-7; Yuda 20, 21.

14, 15. Inyuki di gwé ngôñ ni gwéha, he hémle ndik bé?

 ¹⁴ I bôt ba bi tila bitilna ni hop Grikia, ba bi yigye nseñ u hémle, ngéda ba bi pôdôl yo mbôgôl ngélé. Ba bi sima bé lem lam ipe kiki lem i. Baa hala a nkobla le hémle i yé lem lam i nlôôha ba mahee kristen i nlama bana?

¹⁵ Ngéda a bé hégha hémle ni gwéha, Paul a bi tila le: “To me bana yaga hémle yosôna, kayéle me heñlak dikôa, ndi me bana bé me gwéha, wee me ta bé me to jam.” (1 Korintô 13:2) Yésu a bi kônde yigye nseñ u gwéha inyu Djob ngéda a bi timbhe i mbadga ini le: “Limbe litiñ li nloo ikété mbén?” (Matéô 22:35-40) Inyu bana gwéha, kristen i nlama bana ngandak bilem bilam bipe, yak hémle i yé mu bilem bi. Bibel i nkal le ‘gwéha i nhémle mam momasôna.’ Gwéha i nhémle mam Djob a nkal ikété Bañga yé i maliga.​—1 Korintô 13:4, 7.

16, 17. Lelaa Bitilna bi nsima hémle ni gwéha ntôñ, ndi imbe lem lam i nlôôha ba mahee, inyuki?

¹⁶ Inyule gwéha ni hémle bi yé nseñ, jon batila Bibel ba ba bé bikristen ba bi yigye bilem bini gwo biba ngandak ngélé, ngim mangéda ikété nlélém nlôñ. Paul a bi ti bilôk bikéé gwé makénd le “ba engep ben tôl le hémle ni gwéha.” (1 Tésalônika 5:8) Pétrô a bi pôdôl Yésu, a kal le: “Nyen ni ngwés, to lakii ni ntehe bé nye; nyen ni hémle ki, to lakii ni ntehe bé nye.” (1 Pétrô 1:8) Yakôbô a bi bat bilôk bikéé gwé bi bi bé minhook le: “Baa Nyambe a tep bé ba ba yé diyeba nkoñ isi le ba ba mingwañ ikété hémle ni bakôdôl ane i a bôn bet ba ngwés nye?” (Yakôbô 2:5) Yôhanes a bé pôdôl Yéhôva ngéda a bi tila le: “Ndi litiñ jé lini le di hémle jôl li Man wé Yésu Kristô, di gwéhnaga ki kingéda litiñ a ti bés.”​—1 Yôhanes 3:23.

¹⁷ To hala kiki hémle i yé nseñ, i dilo di nlo, di ga bana ha bé le di hémle mimbônga mi Djob inyu mbok yondo, inyule di ga tehe kiki mi nyon. Ndi gwéha yés inyu Djob ni inyu mut wés libôk, i nlama kônde nañ ibabé waa. Jon Paul a bi tila le: “Ndi ikété mam mana maa, gwéha yon i nloo.”​—1 Korintô 13:13.

18, 19. Imbe ndémbél i mbuma ñañ di ntehe i len ini, njee a kôli kôhna lipém inyu jam li?

¹⁸ Munu dilo tjés, litén li Yéhôva li yé li undga hémle yap inyu Ane Djob a ntéé. Hala a bi boñ le paradis i mbuu i gwéé, kayéle i bana iloo didun di bôt juem. Litam li mbuu li nyamb mayoo mu homa nu. (Galatia 5:22, 23) Hala a yé toi ndémbél i hémle ni i gwéha i i mbuma ñañ!

¹⁹ Mut binam to wada a nla bé bép woo tôl le nyen a mboñ jam lini. Djob jés jon li mboñ jo. Ini bôlô i hélha ‘i nti Yéhôva lipém, i yé ki yimbne i i ga nom letee ni mba ni mba, i nya i i nkida bé.’ (Yésaya 55:13) Hala a yé toi “likébla li Nyambe” le di “tohlana inyu hémle.” (Efésô 2:8) Paradis yés i mbuu y’a ke ndigi ni bisu i hol ni i too letee le hisi hi ba nyonok ni bôt ba binam ba ba yé peles, ba bak bôt ba telepsép, ba bak ki maséé, kayéle jôl li Yéhôva li kôhna lipém i boga ni boga. Di nsoohe le bés bobasôna di ke ni bisu i unda le di nhémle mimbônga mi Yéhôva!