1, 2. (a) Kii nyis bés le mut binam a nla ba liwanda li Djob? (b) Kii di ga nigil munu i yigil ini?

IBÔDÔL ligwéé jés ikepam nyemb yés, di gwé ngôñ le ba gwés bés. Bôt ba binam ba gwé bé ndigi ngôñ i nôgda gwéha i i yé ipôla munlôm ni muda, ndi yak ni gwéha ipôla bañga mawanda. Ndi iloo mam momasôna, di gwé ngôñ ni gwéha i Yéhôva. Ngandak bôt i nhôñol le mut binam a nla bé ba bañga liwanda li Djob inyule ba ntehe bé nye, a yé ki Nu ngui yosôna. Ndi bés, di nyi maliga!

² Bibel i niiga le bôt ba binam ba bi ba mawanda ma Djob. Di nla ôt biniigana mu ndémbél yap. Inyuki di nkal hala? Inyule i ba liwanda ni Djob li yé jam li nlôôha nseñ le di nla hek i bana. Di wan ndémbél i Abraham. (Añ Yakôbô 2:23.) Lelaa Abraham a boñ ndi a yila liwanda li Djob? Jam li bisu li li hôla Abraham i  ba liwanda li Djob li yé hémle, jon ba nsébél nye le “isañ bobasôna ba nhémle.” (Rôma 4:11) Ngéda u mba u nigil ndémbél yé, badba le: ‘lelaa me nla nigle hémle i Abraham, ni lédés liwanda jem ni Yéhôva?’

3, 4. (a) Toñol mam ma bi noode hémle i Abraham? (b) Inyuki Abraham a bé bebee i sem man wé Isak?

³ Hégda jam lini: Abraham a gwé 125 ñwii, a yé bet hikôa mbeñee mbeñee. ^[1] (Béñge ndoñi i ngim bibuk.) Man wé Isak nu a gwé bebee le 25 ñwii, a yé noñ nye mbus ni mbañ tjéé. Abraham a gwé ngwende ni gwom bipe bi bi mbéda inyu kwiye hié. Bebeg le liké lipe li mah lédél bé Abraham kiki lini. Baa liké li, li bé lédél nye ndik inyule a bé ñunuk ngandak? Heni! A bé a ngi gwé ngui ngandak. Liké li bi lédél nye inyule Yéhôva a bat nye le a ti man wé kiki sesema!​—Bibôdle 22:1-8.

⁴ Bebeg le jam lipe li bi noode bé hémle i Abraham kiki lini. Ngim bôt i nkal le Djob a bi bana nledek ñem i bat Abraham le a ti man wé kiki sesema. Bape ba kalak le Abraham a bé bebee i ti man wé inyule a bé gwés bé nye. Bôt ba gwé mintén mi mahoñol mi inyule ba gwé bé hémle, ba nyi bé to kii yé bañga hémle tole kii yé minson nwé. (1 Korintô 2:14-16) Ndi Abraham a bé nôgôl bé Djob kiki nuga, hala wee kiki jôñ mut. A bé nôgôl inyule a bééna bañga hémle. A bé yi le Yéhôva a yé mbén i bat le a boñ jam li li ga tééñga nye niñ yé yosôna. Abraham a bé yi le, ibale a yé manôgla, Yéhôva a ga sayap nye ni man wé nu gwéha. Ndi kii i bi hôla Abraham i bana unu ntén hémle ngui? I yi a bééna ni i mam a bi boma i niñ yé.

5. Lelaa Abraham a bi nigil i yi Yéhôva? I yi i, i bi tinde nye i boñ kii?

⁵ I yi a bééna. Abraham a bi nañ i  tison ba nsébél le Ur. Bôt ba Ur ba bé bégés bikwéha bi mop, yak isañ Abraham. (Yôsua 24:2) Lelaa Abraham a bi nigil i yi Yéhôva? Bibel i ñunda le Sém, man Nôa, a bé mut lihaa nu Abraham. Ngéda Sém a bé wo, Abraham a bééna 150 ñwii. Sém a bé mut hémle keñi kiyaga. I nene le a bi niiga bôt bé ba lihaa njee a yé Yéhôva. Di ta bé nkwoog nkaa ni jam li, ndi i nene le ni njel yé nyen Abraham a bi nigil i yi Yéhôva. I mam Abraham a bi nigil, ma bi tinde nye i gwés Yéhôva. I yi i, i bi hôla ki nye i bana hémle.

6, 7. Lelaa mam Abraham a bi boma i niñ yé, ma bi lédés hémle yé?

⁶ Mam a bi boma i niñ yé. Lelaa mam Abraham a bi boma i niñ yé, ma bi lédés hémle yé inyu Yéhôva? Bahogi ba nkal le ñem woñ u nkap nkônô, hala wee mahoñol mut a gwé ñem, mon ma ngwal maboñog. I mam Abraham a bi nigil inyu Djob, ma bi tihba ñem wé, ma tinde ki nye i bana njôôñ lipém inyu “Yéhôva, Nyambe Nungingii, Nwet ngii ni isi.” (Bibôdle 14:22) Bibel i nsébél i njôôñ lipém ini le ‘woñi Nyambe.’ (Lôk Héber 5:7, MN) Inyu bana maada ma bas bas ni Djob, di nlama kon nye woñi. (Tjémbi 25:14) I lem ini yon i bi tinde Abraham i nôgôl Yéhôva.

⁷ Djob a bi kal Abraham bo Sara le ba nyodi i nkoñ wap u Ur inyu ke i loñ ipe. Ba bé ha bé boñge ba wanda, ba bé lama niñ ikété mandap ma mabadô niñ yap yosôna. To hala kiki Abraham a bé yi le ngandak mandutu i bé bem nye, a bi yoñ makidik ma ngui i nôgôl Yéhôva. Inyu manôgla mé nyen Djob a bi sayap nye, a sôñ ki nye. Kiki hihéga, ngéda ba bi kena nlam ñwaa Abraham le Sara haa ni nye, ba sômbôl nol Abraham, Yéhôva a bi boñ hélha jam inyu sôñ bo iba ha ngélé yada bé. (Bibôdle 12:10-20; 20:2-7, 10-12, 17, 18) I mam ma, ma bi lédés hémle i Abraham.

8. Lelaa di nla kôhna yi ni pék bi bi ga lédés liwanda jés ni Yéhôva?

⁸ Baa di nla ba Yéhôva bañga mawanda? Ñ, ibabé nkaa! Nlélém kiki Abraham, di nlama nigil i yi Yéhôva. Yak bés di nla bana i yi i mbéda bés. I len ini, i mam di nyi, ma nloo ma Abraham a bé yi. (Daniel 12:4; Rôma  11:33) Bibel i yé nyonok ni yi i “Nwet ngii ni isi.” I mam di nigil, ma ntinde bés i gwés Yéhôva, ma nhôla ki bés i bana njôôñ lipém inyu yé. Lipém ni gwéha di gwé inyu yé, gwon bi ntinde bés i nôgôl nye. Ngéda di nôgôl nye hala, a nsôñ bés, a sayap bés, a ti ki bés pék: hala a ga lédés hémle yés. Ngéda di ngwélél Yéhôva ni ñem wés wonsôna, di ga bana nsañ ni maséé. (Tjémbi 34:9; Bingéngén 10:22) Kiki yi ni pék bi ga kôndba bés, hala nyen liwanda jés ni Djob li ga kônde bana ngui.

9, 10. (a) Kii i mbéda inyu lédés liwanda? (b) Kii i ñunda le Abraham a bé diihe, a lédhak ki liwanda jé ni Yéhôva?

⁹ Bañga liwanda li nla ba mahee kiki lisôô li nkus. (Añ Bingéngén 17:17.) Li ta bé kiki libôi li li nhee diye ba ngwélél ndigi inyu lémés ndap. Ndi li yé kiki loñge mbônji i i gwé ngôñ ni malép, ni le ba bôñgôl yo inyu too. Abraham a bé diihe, a bôñglak ki liwanda jé ni Yéhôva. Lelaa a bi boñ hala?

¹⁰ Abraham a bi ke ni bisu i lédés manôgla mé ni woñi wé u Nyambe. Kiki hihéga, ngéda a bé ke i nkoñ Kanaan ni lihaa jé, ni minkol nwé; a bi nwas le Yéhôva nyen a éga nye mu makidik momasôna a bé yoñ, makeñi ni matitigi. Ñwii wada ilole Isak a ngwéé, ngéda Abraham a bé a gwé 99 ñwii, Yéhôva a kal nye le a kwee bôlôm ba ndap yé bobasôna. Baa Abraham a bi pééna Yéhôva, tole a bi bot manjom inyu boñ le a nôgôl bañ jam Djob a kal nye? Heni, a bi bii botñem yé yak Yéhôva, a nôgol nye “nlélém kel.”​—Bibôdle 17:10-14, 23.

11. Kii i bé tééñga Abraham inyu tjiba i Sôdôm ni Gômôra, lelaa yéhôva a bi hôla nye?

¹¹ Kiki Abraham a bé nôgôl Yéhôva ngéda yosôna, yak i disii di mam, hala a bi lédés liwanda ipôla yap. A bé yi le a bé le a kwel to kii ni Yéhôva, yak i bat nye mandimbhe inyu mambadga ma ma bé tééñga nye ngandak. Kiki hihéga, ngéda Yéhôva a bi kal le a ga tjé minkoñ mi Sôdôm ni Gômôra, hala a bi tééñga mahoñol ma Abraham ngandak. Inyuki? A bé kon woñi le bôt ba téé sép ba tjiba lôñni bibéba bi bôt. Bebeg a bé tôñ inyu man manyañ le Lôt ni lihaa jé, ba ba bé yééne i Sôdôm. Abraham a bôdôl Yéhôva ñem, nu a yé “Nkéés nu hisi hiosôna.” Inyu hala nyen a bi pahlene Yéhôva nduña yé ni suhulnyu. Yéhôva a bi hônba liwanda jé, a unda ki nye le a yé konangoo. Yéhôva a bi toñle nye le yak ngéda a nlona mbagi nôgôs, a nyéñ biloñge bi bôt inyu tohol bo.​—Bibôdle 18:22-33.

12, 13. (a) Lelaa yi i Abraham ni mam a bi boma niñ yé, ma bi yiga hôla nye? (b) Kii ñunda le Abraham a bé bôdôl Yéhôva ñem?

 ¹² I yé ntiik le yi i Abraham ni mam a bi boma i ñiñ yé, ma bi hôla nye i lédés liwanda jé ni Yéhôva. Jon ngéda Yéhôva a bi sôk bat Abraham le a ti nye man wé kiki sesema, a bé yi le Yéhôva a yé a bak ndigi wongut ni konangoo, a bak nu di nlama bôdôl ñem ni nu a nsôñ bagwélél bé. Abraham a bé nkwoog nkaa ngi pééna yo ki yo le, to hala kiki Yéhôva a mbat nye sesema i man wé, a nyila bé Djob li nledek ñem ni li ngi konangoo. Inyuki di nkal hala?

¹³ Ilole a nyék minkol nwé inyu ke ti sesema, Abraham a kal bo le: “Bé yéglana hana ni jagas, bés hiloga hini di nke nyoo, di ôôp letee ni isi, ndi di témb ki bééni” (Bibôdle 22:5) Kii Abraham a bé sômbôl kal? Baa a bé tembee ngéda a bé kal bo le a ntémb a loo ni Isak, a yik le a nke i ti nye kiki sesema? Heni. Bibel i nkal le Abraham a bé yi le Yéhôva a nla tugul Isak ikété bawoga. (Añ Lôk Héber 11:19.) Abraham a bé yi le Yéhôva nyen a ti nye ngui i bana man to hala kiki bo Sara ba bé ñunuk ngandak. (Lôk Héber 11:11, 12, 18) Jon a bé yi le jam to jada li nla bé yémbél Yéhôva. Abraham a bé yi bé kii i bé lama pémél nye yokel. Ndi a bééna hémle le Yéhôva a bé le a tugul lok yé inyu boñ le mimbônga mi Djob ñwominsôna mi yon. Inyu hala nyen ba nsébél Abraham le “isañ bobasôna ba nhémle.”

14. Mambe mandutu u mboma mu kii u ngwélél Yéhôva, lelaa ndémbél i Abraham i nla hôla we?

¹⁴ I len ini, Yéhôva a mbat bé bés bon bés kiki bisesema, ndi a mbat bés le di nôgôl mambén mé. Ngim mangéda, i nla pam le di nok bé inyuki Djob a nti ngim mambén, tole di nla tehe wengoñle ma let i nôgôl. Baa yak we u ma nôgda hala? Inyu bahogi, likalô jon li nlédél bo. Bebeg ba ta bé minyaô tole hala a nlédél bo i pôdôs bakén ba bôt. Bape ba nkon woñi i ba maselna ni mawanda map ma suklu ni ma bôlô. (Manyodi 23:2; 1 Tésalônika 2:2) Ibale i mbéda le u boñ jam li li nlédél we, hoñol ndémbél i hémle ni i makénd Abraham a yigle bés. Ngéda di mbigda ndémbél i bôda ni bôlôm ba hémle ba kôba, hala a nla ti bés makénd i nigle bo ni i kôôge liwanda jés Yéhôva bebee.​—Lôk Héber 12:1, 2.

15. Inyuki di nla ba nkwoog nkaa le, kekikel Abraham a bi tam bé ndéñbe yé i nôgôl Yéhôva?

¹⁵ Baa Abraham a bi yik tam manôgla a bi nôgôl Yéhôva? Bibel i ntimbhe le Abraham “a wo, ñunuk  yaga, mañ mut, nyonok ni dilo.” (Bibôdle 25:8) Ngéda a bééna 175 ñwii, Abraham a bé a nwemla ngéda a nhoñol ntandaa wé niñ, nyonok ni mam malam. Inyuki di nkal hala? Inyule liwanda jé ni Yéhôva li bé nseñ ngandak i mis mé iloo mam momasôna. Jon ngéda di ñañ le Abraham a bé “mañ mut, nyonok ni dilo,” hala a nkobla bé le a bééna ha bé ngôñ niñ.

16. Mambe maséé Abraham a ga bana i Paradis?

¹⁶ Bibel i nkal le Abraham “a ba bem nkoñ u gwé bañga hikuu, ñungus nkoñ u ni nhek wé a yé ndigi Nyambe.” (Lôk Héber 11:10) Abraham a bééna hémle le kel yada a ga tehe ngéda nkoñ u, hala wee Ane Djob, i ga énél hisi hiosôna. Ibabé nkaa, a ga tehe wo! Hégda maséé Abraham a ga bana i niñ ikété Paradis, ni i kônde lédés liwanda jé ni Djob. A ga ba maséé ngandak i yi le ndémbél yé i mut hémle i bi hôla ngandak bagwélél ba Djob ñwii ndi ñwii! Ikété Paradis, a ga nigil le, i sesema a bi ti i hikôa Môria, i bé ndigi yimbne i sesema ikeñi. (Lôk Héber 11:19) A ga nigil le i njôghe a bi nok ngéda a bé kôôba inyu ti man wé Isak kiki sesema, i bi yiga hôla didun di bahémle i nôgda i njôghe Yéhôva a bi nok ngéda a bi ti Man wé Yésu Kristô kiki binoñ inyu bôt ba binam. (Yôhanes 3:16) Ndémbél i Abraham i nhôla bés bobasôna i kônde diihe binoñ, liboñog li gwéha likeñi kiyaga!

17. Makidik moñ ma yé le kii, kii di ga tehe mu yigil i noñ?

¹⁷ Hiki wada wés a yoñ makidik ma ngui i noñ ndémbél hémle i Abraham. Kiki nye, yak bés di gwé ngôñ ni yi, ni pék di ñot ikété mam di mboma i niñ yés. Kiki di ga ke ni bisu i yi Yéhôva, ni i nôgôl nye, di ga tehe lelaa a ga sayap bés, a ga sôñ ki bés. (Añ Lôk Héber 6:10-12.) Yéhôva a ba liwanda jés i boga ni boga! Mu yigil i noñ ha, di ga nigil ndémbél i bahémle baa, ba ba bi yila mawanda ma Djob.