HOÑOL ki kel bisu u lôôha kon maséé i niñ yoñ. Baa kel i, i yé kel libii joñ tole kel ligwéé li man woñ nu bisu? Tole kel i, i yé kel sôble yoñ? Ibabé nkaa, kel sôble yoñ i nla ba kel i nlôôha nseñ i ñiñ yoñ, ni kel u bi lôôha koñ maséé. Yokel, bilôk bikéé i likoda bi bé maséé ngandak i tehe we u ñunda le u ngwés Yéhôva ni ñem woñ wonsôna, ni nom yoñ yosôna, ni mahoñol moñ momasôna, ni ngui yoñ yosôna!—Markô 12:30.

Ibabé nkaa, u ma nôgda ngandak maséé i gwélél Yéhôva ibôdôl nu u bi sôblana. Ndi, ngandak batéé likalô ba bi nimis maséé ba bééna i bibôdle. Inyuki? Mambe manjom di gwé i ke ni bisu i gwélél Yéhôva ni maséé?

Ñwin u Ane u nti bés ngandak maséé. Inyuki di nkal hala? Inyule Yéhôva a mbôn le ndég ngéda Ane Djob i ga tjé i béba nkoñ isi unu, i lona ki mbok yondo. Sôfônia 1:14 a nkal le: “Ngwa nkeñi u Yéhôva u gwé ni moo! U gwé yaga ni moo, u nhoo ki ngandak.” Ndi ibale di nôgda wengoñle di bôdôl bañ bem ngwa u, di nla nimis maséé di bééna i bibôdle. Hala a nla hôyôs biliya gwés ikété nson u Djob.—Bingéngén 13:12.

Ngéda di ntégbaha ngéda ni bilôk bikéé bi bôlôm ni bi bôda, hala a nkônde bés makénd i ke ni bisu i gwélél Yéhôva ni maséé. Bebeg le bilem bilam bi Mbôgi Yéhôva gwon bi bi ôt bés i maliga, bi hôla ki bés i bôdôl gwélél Yéhôva ni maséé. (1 Pétrô 2:12) Ndi, kii i yé i tagbe ibale ba nkodol kristen muda tole munlôm inyule a mbôk mbén Djob? Hala a nla tômbôs bape i likoda, hala a boñ ki le ba nimis maséé map.

Yak njômbi nkus i nla boñ le di nimis maséé més. Lelaa hala a nla bôña? Nkoñ isi u Satan u noode kwés bés nkaa le di somb gwom bi bi tane bé bés nseñ. Jon di nlama tééda bibañga bi Yésu i mahoñol més: “Mut nye ki nye a nla bé gwélél bet iba, ndik le a’ oo wada, a gwés nuu; to le a’ adbe ni wada, a yan nuu. Ni ta bé le ni gwéélak Nyambe, ni gwéélak ki nkus.” (Matéô 6:24) Di nla bé gwélél Yéhôva ikété maséé, nlélém ngéda di noodege bana gwom bi nkoñ isi gwobisôna.

I gwélél Yéhôva li ta bé nledek jam inyu bet ba ngwés nye. (1 Yôhanes 5:3) Di bigda jam Yésu a bi kal: “Lona meeni, bé bobasôna ba ni ntumbba ni bééga ki mbegee i nyét, me me nti bé noi. Yoña kop yem nson, ni niglene ki meeni; inyule me yé ñwee ni ñem nsôhga; ndi to le miñem minan nw’a noi. Inyule kop yem nson i yé tomba, mbegee yem ki i nhoi.” (Matéô  11:28-30) Libak li bañga kristen li nlona ñem ñwee ni maséé. Ibabé nkaa, di gwé ngandak manjom i ba maséé ikété bôlô i Yéhôva. Di wan manjom maa.—Habakuk 3:18.

Di ngwélél Nwet biniñ gwés, Djob li maséé. (Minson mi baôma 17:28; 1 Timôtéô 1:11) Di nyi le di yé i niñ inyule Djob nyen a bi hek bés. Jon di ke ni bisu i gwélél nye ni maséé, ibabé béñge ñwii ñwañen di ma tégbaha ikété ntôñ u Djob.

Di yoñ hihéga hi Héktor, nu a bi sal kiki ngwélél makiiña 40 ma ñwii. ‘Yak i biunul gwé,’ a ngi konok maséé i gwélél Yéhôva. (Tjémbi 92:13-15) Kon u ñwaa u nsôña Héktor i gwel nson kiki ngéda bisu, ndi to hala, a nimis bé maséé mé. A nkal le: “Me nok ndutu i tehe kon u ñwaa wem u mbet ndigi, bet ni bet; yak i tééda nye li ta bé ntombok jam; ndi to hala, me nwas bé le ndutu ini i mélés maséé me gwé i gwélél bañga Djob. I yi me nyi le Yéhôva nyen a bi hek me, ni le a boñ bé hala yañga, inyu yem, hala a kôli i gwés nye ni i sélél nye ni ñem wem wonsôna. Me mboñ biliya le me waa bañ téé likalô, me noodege ki tééda botñem i Ane yômi ikété mahoñol mem inyu boñ le me nimis bañ maséé mem.”

Yéhôva a bi ti binoñ inyu boñ le di niñ ikété maséé. Ni maliga, “Nyambe a lôôha gwés nkoñ isi, jon a tine pombe yé Man, le tonjee a nhémle nye a’ nimil bé, ndi a gwé niñ boga.” (Yôhanes 3:16) Ñ, bibéba gwés bi nla nwéhlana, di nla ki kôhna niñ boga ibale di ñunda le di nhémle likébla li gwéha li Djob le binoñ. Kinjee njom ilam i ti Djob mayéga! I ngôñ di gwé i ti Djob mayéga, i ga tinde bés i gwélél Yéhôva ni maséé.

Mankéé Yésús, nu a niñ i Meksika a nkal le: “Me bé sal kiki nkol, me bé sal juu ni njamuha to hala kiki me bé bé nyéksaga i boñ hala. Me bé boñ hala inyu bana ngandak moni. Mbus, me nigil i yi njee a yé Yéhôva ni lelaa a bi sem Man wé inyu bôt ba binam. Me bi bana ngôñ keñi i gwélél nye. Jon me bi ti memede nkikip yak Yéhôva. Mbus 28 ñwii mi bôlô, me nyodi mu ndap bôlô i, me yoñ bôlô nsañal nu ngéda yosôna.” Hala nyen mankéé wés Yésús a bi bôdôl gwélél Yéhôva ni maséé.

Di nkon ki maséé inyule di bi nwas maboñog mabe i niñ yés. Baa u ngi hoñlak lelaa niñ yoñ i bé ilole u nyi Yéhôva? Ñôma Paul a bi hôñlaha bikristen bi Rôma le ba bé “minkol mi béba”, ndi ba “bi yila minkol mi telepsép.” Kiki  ba bi bôdôl bana niñ i mpôp, bôtñem i niñ boga i yoñ ngui inyu yap. (Rôma 6:17-22) Yak bés di nla noñ matiñ ma Yéhôva. Ibale di mboñ hala, di ga nôgda bé i ndutu i nlôl ni niñ i bisañ ni i ndéñg. Kinjee njom keñi i kon maséé!

Jaimé a bé hémle bé le Djob a niñ, ni le nyen a hek mam momasôna. A bé gwés a njo i sañ ba ñômna bikut. Ndi Jaimé a bi bôdôl ke makoda. I gwéha a bi koba nyoo, i bi tihba nye ngandak. Inyu kôm nlômbi wé niñ mbus, Jaimé a bi bat Yéhôva le a hôla nye i hémle le Djob a niñ toi. Jaimé a nkal le: “Ndég ni ndég, me bi léba le Tata nu gwéha ni nu konangoo a yé mu ngii. Niñ inoñnaga ni matiñ ma Yéhôva li bi sôñ me. Ibale me héñha bé, bebeg ki ba ma nol me, kiki ngandak yem mawanda di bé boñ mintuk mi bisañ. I ñwii mi bi lôôha lona me maséé, mi yé mi me bi tégbaha i gwélél Yéhôva.”

Mambe mahoñol di nlama bana mu kiki di mbem lisuk li béba nkoñ isi unu? Di hôya bañ le sômbôl Djob yon di mboñ, ni le di nyamnda ni ngôñ i bana niñ boga. Jon, “di waa bañ i boñ loñge, inyule d’a bumbul ngéda i ma kola, ibale di ntomp bé.” (Galatia 6:8, 9) Ni mahôla ma Yéhôva, di hônba, di sal ni ngui i bana bilem bilam bi mbéda bés inyu pei i “njiiha keñi” ni inyu ke ni bisu i gwélél Yéhôva ni maséé.—Masoola 7:9, 13, 14; Yakôbô 1:2-4.

Di yé nkwoog nkaa le Yéhôva a ga bom hônba yés inyule a nyi nson di nsal, ni gwéha di ñunda inyu yé ni inyu jôl jé. Ibale di nke ni bisu i gwélél Yéhôva ni maséé, di ga ba kiki ntôp tjémbi le David, nu a kal le: “Me gwé Yéhôva bisu gwem ngéda yosôna; lakii a yé i woo wem walôm, wee m’a pingla bé me. Jon ñem wem u nhak, yak nom yem i nséé. Minsôn ñwem ki nw’a yén ibabé woñi.”—Tjémbi 16:8, 9.