ME BI gwéé i ñwii 1926 i tison i Kruksvil, i mbok i Ôhaiô, i loñ i Amérika. Tata bo mama ba bé bé bôt ba base, ndi ba bé kal bés juem ba di bé bon bap le di ke i mitiñ. Me bôdôl ke i base i métôdist. Ngéda me bééna 14 ñwii, pastô i bi bom me inyule ikété ngim ñwii me bi tôl bé base kel sonde to yada.

Ha mangéda ma nyen muda wada i libôga jés le Margaret Walker, nu a bé Mbôgi Yéhôva a bi bôdôl yuuga mama yem inyu pôdôs nye Bibel. Kel yada, yak me, me kit le me mbôdôl nigil ni bo. Mama a bi hoñol le m’a tééñga nye i yigil yé, jon a bi kal me le me ba me ke i mbégdé. Ndi me bi ke ni bisu i emble minkwel ñwap bisôsôli. Mbus mapeple ima, Margaret a bat me le: “Baa u nyi jôl li Djob?” Me timbhe le: “Ndi, hiki mut a nyi nga le jôl jé le Djob?” A kal le: “Yoñ le Bibel yoñ, u yibil i kaat Tjémbi 83:19.” Kiki me nyibil pes kaat i, me léba le jôl li Djob le Yéhôva. Me ñôt ngwéé yak mawanda mem, ndi me nkal bo le: “Ngéda n’a huu len juu, ni béñge Tjémbi 83:19 i Bibel nan, n’a tehe jôl li Djob.” Bébomede ni ntehe le me bi bem bé inyu bôdôl likalô.

Me bi nigil Bibel, me sôblana i ñwii 1941. Ndég ngéda i mbus ha, ba bi téé me ñéga yigil Bibel i likoda. Me ti bilôk bikéé ni mama yem makénd le yak bo ba loo i makoda. Ba bôdôl lo i yigil Bibel me bé éga. Ndi Pua yem, hala a bé kal bé nye to jam.

Ba bi kônde me bôlô ikété likoda, me bana ki ngandak bikaat bi Mbôgi Yéhôva. Kel yada, Pua yem a nand bikaat gwem hinoo, ndi a kal le: “U ntehe mapunja moñ mana? Begee mo, u pam me ndap!” Me bi pam yokel. Me ke me yén bebee ni tison i Ôhaiô ba nsébél le Zanesvil. Ndi, me bé ke me lok, inyu lédés mama yem ni bilôk bikéé.

Pua a bi noode sôña mama i ke makoda. Ngim mangéda, a bé noñ mama i njel, a kahal ôt nye inyu témbna nye i ndap. Ndi ngéda mama a mpam  i ndap, a mpémél likôga lipe, a témb likoda. Me kal mama le: “U tôñ bañ. A’ waa i noñ we mbus kel yada.” Mbus ngéda, papa a bi waa gwel nye le a ke bañ makoda. Mama a bé ke nano makoda ni nsañ.

Ngéda ba bi téé Suklu Ane i ñwii 1943, me bôdôl ti minkwel i likoda jem. Maéba malét suklu a bé ti me i mbus hiki nkwel wem, ma bi hôla me i yila bañga nti nkwel.

I ñwii 1944, ngéda gwét bi ntôla bi nyônôs biba bi bé juba, oda i bi pam le me jôp ikété ntôñ gwét. Me bi ke i ñamb bisônda i Kolumbus, ba tégbaha me manoodana inyu béñge to me nla jo gwét, me nyônôs ki ngim mapep. Me kal ki baane ba bisônda le me ga yila bé sônda. Ba nwas me, me huu i mbai yem. Ndi mbus ndég dilo, ñane bisônda a koode likôga jem a kal me le: “A Korwin Rôbison, ba nti me oda le me gwel we.”

Sonde iba mbus ha, me bé me téé i bikééhene. Nkéés nkeñi a kal me le: “Ibale ki metama, ki u nke i mok niñ yoñ yosôna. Baa u gwé ki jam i kal?” Me timbhe le: “A bayem, ni lamga añ me ikété ñañga u baéga bibase ba ba nke bé gwét. Hiki ndap me nkoode, yon i yé me hikôma, me ma añle ki ngandak bôt ñañ nlam u Ane Djob.” Ha nyen nkéés nkeñi a kal ntôñ bakéés le: “Ni ta bé ha inyu kit too mañge wanda nunu a yé ñéga base, too, a ta bé. Ni yé ha inyu kit too a bi neebe jôp ntôñ gwét tole a bi neebe bé.” Ntôñ bakéés u bi nom bé 30 manut inyu kit le me kôli ke mok. Nkéés nkeñi a ti mbagi le me nlama tégbaha ñwii mintan i ndap mok i Asland, Kentucky.

Me bi tégbaha sonde i bisu iba i ndap mok i Kolumbus, i mbok i Ôhaiô. Hilo hi bisu me bi tégbaha ikété hipagda hiem hi tuñ, me bi soohe Yéhôva le: “Me nla bé yén munu tuñ ini letee ni ñwii mitan. Me nyi bé kii me boñ.”

Hilo hi bé noñ ha, bôt ba faa ba ndap mok ba pémés me mu tuñ i, ba ha me tuñ ipe ni bôt ba mok bape. Ha nyen me bi ke ipañ mut mok wada nu a bé mpémba, a bakna mbôñgô ntel. Di telep i winda, di béñgege mbégdé. Mut mok nu a bat me le: “Kii i nlona we munu, we i kidik mut ini?” Me timbhe le: “Me yé Mbôgi Yéhôva.” A kal le: “Wee u yé Mbôgi Yéhôva? Ndi kii u mboñ munu?” Me timbhe nye le: “Mbôgi Yéhôva i nke bé gwét, i nol ki to bôt.” Nye me le: “Ba nha bôt bape i mok inyule ba nol bôt. Ndi we, ba nha we i mok inyule u ntjél le u nol bé bôt, baa u ntehe le jam li li téé?” Me timbhe nye le: “To, li téé bé.”

Ha nyen a bi kal me le: “Me bi tégbaha 15 ñwii i ndap mok ipe, i het me bi añ ndég nan bikaat.”  Ngéda me bi nok hala, me soohe le: “A Yéhôva, hôla le mut nunu a témb i pes yem.” Nlélém ngéda, mut mok nu, nu a bééna jôl le Paul, a kal me le: “Ibale wada ikété diloga dini a ntihba we, we lond ndigi. Me nsal bo bôlô.” Jon ngéda yosôna me bi tégbaha mu ni 50 bôt ba mok bape, to wada a bi tééñga bé me.

Ngéda ba bi ep me i ndap mok i Asland, me bi boma minhôôlak mi bikristen nyoo. Ba bi hôla me, ni bôt bape ki, i yégle liwanda li Yéhôva. Ba bé ti bipes bi Bibel i añ hiki sonde, di bé kôôba mambadga ni mandimbhe inyu makoda més ma di bé sébél le: “Yum i Bibel.” Di bé i tuñ keñi het ngandak binañ i bé. Mankéé wada a bé ti hiki mut jé libôga li likalô. A bé kal me le: “A Rôbison, nañ i sém ni nañ i kaa, bi yé gwoñ. Hiki mut mok a nañal mu binañ bi, yoñ bitelbene le u tééne nye likalô ilole a mpam.” Hala nyen di bi tjek mam inyu téé likalô jés.

Gwét bi ntôla bi nyônos biba bi bi mal i ñwii 1945, ndi me bi kônde yén mok ndég ngéda. Me bé tôñ ngandak inyu bilôk bikéé ni mama, inyule papa a béhe me le: “Ibale me ntohla we, bana bape ba nla bé nai me.” Mbus mapam mem ma mok, loñge jam i bé bem me. Bôt bem ba lihaa basaambok ba bé ke makoda, mankéé nu muda wada a bé nsôblaga to hala kiki pua a bé a ngi tééñgaga.

Ngéda gwét bi Kôré bi bôdôl i ñwii 1950, oda i bi témb i pam le me jôp ki i ntôñ gwét. Ba kal me le témb i nlélém ñamb bisônda i Kolumbus inyu ngélé i nyônôs iba. Ngéda ba bi témb ba tégbaha me manoodana inyu béñge to me nla jo gwét, ñane bisônda a kal me le: “U yé ikété bôt ba bisu munu manoodana mana.” Me timbhe nye le: “Hala a yé loñge, ndi me njôp bé i ntôñ gwét.” Me bi sima nye nlôñ kaat u 2 Timôtéô 2:3, ndi me kônde le: “Me bi mal yila sônda Kristô.” A mom ñwee jôga li ngéda, mbus a kal me le: “U nla ke.”

Mbus ha, likoda li ndôn li bi noñ i tison i Sinsinati, i Ôhaiô, me ke likoda inyu nson u Bétel. Mankéé Milton Henschel a kal bés le i mbéda bôlôm ba ba yé bebee i sal ni ngui inyu Ane Djob i Bétel. Me bi nyônôs mapep inyu jôp i Bétel, ba sébél ki me. Me bi jôp i Bétel i Brooklyn i sôñ juem i ñwii 1954, ibôdôl ha me ngi yii i Bétel.

Me yé me ban-ga ndigi ngandak bôlô i Bétel. Mu ñwii mi nwomisôna, me bi sal i kei i mbulus lék i homa ba mpémés bikaat, ni i homa liyééne, i kis ngim bikei, me tibil ki biyiñgis. Me bi sal ki mandap ma makoda makeñi i tison i New York.

 Mam ma nlémél me i Bétel ma yé bo: Buk i kel, yigil i Nkum Ntat, ni téé likalô ni likoda jem. Ibale di wan loñge, di ntehe le nya mam ini yon mahaa ma Mbôgi Yéhôva ma nlama boñ hiki ngéda. Ngéda bagwal ni bon bap ba mboñ buk i kel lôñ, ba boñok yigil i ndap lihaa hiki ngéda, ba yoñok ngaba i makoda, ba téak ki likalô ni makénd, bôt bobasôna mu lihaa ba ga tééda maada ma bas bas ni Yéhôva.

Me gwé ngandak mawanda i Bétel ni i likoda jem. Bape, ba ba bé minhook, ba yé nano i ngii. Bape ba ta bé minhook. Ndi bagwélél ba Yéhôva bobasôna ba yé bikwéha, yak basal i Bétel. Jon ngéda me gwé ndañ ni mankéé, me noode kôp nsañ. Me nhoñol minlôñ mi kaat Matéô 5:23, 24 ni lelaa di yé le di sañgal mindañ. Hala a ta bé jam li ntomb i kal le: “Soho nwéhél me,” ndi bibuk bini bi nla mélés ngandak mindañ.

Nano kiki me ñun, hala a yé me ndutu i ke mandap ni mandap inyu likalô. Ndi to hala, me ngi kenek. Me bi nigil hop u Kina ndég, nano me nla kwélés bôt ba Kina i nloñ. Ngim bikegla, me nkap yom kiki bo 30 tole 40 ma mimbamble.

Me bi boñ yak mapeple i Kina! Kel yada, nlam mañge muda a bi nôlôs me ngéda a bé kap mapep inyu yis bôt le ba nyibil nyuñga ditatam. Yak me me bi nôlôs nye, me ti nye mimbamble ni hop u Kina. A bi neebe mimbamble mi, a kal me le jôl jé le Kati. Mbus ha, hiki ngéda a bé tehe me, Kati a bé lo i pôdôs me. Me bi niiga nye môl ma bikai ni ma ditatam ni ngisi, a tiimbaga bibuk i mbus yem. Me bi toñle yak nye minlôñ mi Bibel, a neebe kaat le Qu’enseigne réellement la Bible. Mbus ndég sonde, me tehe ha bé nye.

Ndég sôñ i tagbe bañ, mañge muda numpe a bé kap minlélém mi mapep, yak nye a neebe mimbamble. Sonde i bé noñ ha, a nand me nsiñga wé, a kal me le: “Yoñ, mut a nsômbôl pôdôs we i Kina.” Me timbhe le: “Me nyi bé to mut i loñ Kina.” Ndi a nai ndigi le me yoñ nsiñga, me sôk me yoñ wo, ndi me kal le: “Alô, Rôbison nu.” Kiñ mu nsiñga i kal me le: “A Rôbison, Kati nu. Me bi témb i Kina.” Me bat nye le: “I loñ Kina?” Kati a timbhe le: “Ñ, a Rôbison, i mañge muda a nlôôs we nsiñga, mankéé nu. U bi niiga me ngandak mam malam. Soho niiga nye kiki u bi niiga me.” Me timbhe le: “ A Kati, m’a boñ biliya. Me nyéga hala kiki u nyis me hee u yé.” Ndég ngéda mbus ha, me kwélés manyañ Kati inyu ngélé nsôk. To hee dingonda di, di yé i len ini, me nhémle le ba nke ni bisu i nigil njee a yé Yéhôva.

Me bi gwélél Yéhôva 73 ñwii, me yé maséé le a bi hôla me le me yoñ bañ ngaba i gwét, ni le me téñbe ni nye yak ikété mok. Bilôk bikéé bi nkal yak le hala a bi ti bo makénd ngandak i tehe le me bi yémbél ngolba i Papa. Sôk i nsôk, mama yem ni lôk kéé isamal, bôda ni bôlôm, ba bi sôblana. Yak Papa a bi héñha ndég, a bé lo yak ngim makoda ilole a nwo.

Ibale Djob a ngwés, mawanda mem ni bôt bem ba lihaa ba ba bi wo, ba ga témb i bitugbe i mbok yondo. Kinjee maséé di ga bana i bégés Yéhôva ni bet di ngwés i boga ni boga! *—Béñge buk isi lipep.