1, 2. (a) Kii i nti litén li Djob maséé i len ini? (b) Lelaa bagwal ba ba yé bikristen ni mimañ ba nla hôla boñge ba wanda i tibil nok kii sôble i nkobla?

MAÑ u likoda u bi kal Kristofa, mañge 12 ñwii le: “Me nyi we ibôdôl nu u bi gwéé, me yé ki maséé i yi le u ngwés kôs sôble. Me gwé ngôñ i bat we le, inyuki u nyéñ kôs sôble?” Unu mañ u bééna manjom malam i bat nya mbadga i. Hala a nlôôha ti bés maséé i tehe le dikôô di boñge ba wanda di nkôs sôble hiki ñwii. (Ñañal 12:1) Ndi, bagwal ba ba yé bikristen, ni mimañ ikété likoda ba nlama ba nkwoog nkaa le i boñge ba, ba nyoñ makidik ma ni bomede ni le ba nok kii sôble i nkobla.

² Ikété Bibel, di nigil le i ti wemede nkikip ni sôble bi yé bibôdle bi niñ i mondo inyu kristen. I niñ mondo ini i nlona bés ngandak bisai bi Yéhôva, ndi yak ngolba i Satan. (Bingéngén 10:22; 1 Pétrô 5:8) Inyu hala nyen, bagwal ba ba yé bikristen ba nlama yoñ ngéda i niiga bon bap kii i yé toi i  ba nnigil nu Kristô. Ngéda boñge ba wanda ba gwé bé bagwal ba ba yé bikristen, mimañ mi likoda nwon mi ga hôla bo ni gwéha i nok ngobol i ti bomede nkikip ni kôs sôble. (Añ Lukas 14:27-30.) Kiki mut a nkôôba inyu mélés maoñ ma ngim ndap, hala nyen boñge a wanda ba nlama ba nkôôbaga ilole ba nsôblana inyu ba bebee i téñbe ni Yéhôva “letee ni lisuk.” (Matéô 24:13) Kii y’a hôla boñge ba wanda i yoñ makidik ma ngui i sélél Yéhôva i boga ni boga? Di wan jam li.

3. (a) Kii bibañga bi Yésu bo Pétrô bi niiga bés inyu nsen i sôblana? (Matéô 28:19, 20; 1 Pétrô 3:21) (b) Mambe mambadga di ga wan hanano? Inyuki?

³ Baa u yé mañge wanda nu a nsômbôl kôs sôble? Ibale ñ, hala a yé loñge ngôñ u nyéñ yônôs! Kinje lipém likeñi i ba nsôblege kiki Mbôgi Yéhôva. Hala a yé jam le kristen i nlama boñ, a bak ki makidik ma mahee inyu bet ba ga pei i njiiha keñi. (Matéô 28:19, 20; 1 Pétrô 3:21) Ngéda u nkôs sôble, u ñunda le u bi bôn Yéhôva le u ga gwélél nye i mba ni mba. U nlama toi gwés tééda u mbônga u, jon mana mambadga ma ga hôla we i tehe too u yé nkôôbaga i kôs sôble: (1) Baa me yé toi nhôôlak i pes mbuu inyu yoñ ma makidik? (2) Baa ngôñ yem memede i? (3) Baa me nok yaga kii i ti memede nkikip yak Yéhôva i nkobla? Di wan mambadga ma.

4, 5. (a) Inyuki sôble i ta ndik bé inyu mimañ mi bôt? (b) I ba nhôôlak i pes mbuu i nkobla le kii inyu kristen?

⁴ Bibel i nkal bé le ndik bet ba yé minhôôlak i ñwii, tole ba ba mbol ngim ñwii u tôbôtôbô bon ba nla sôblana. Di ñañ i kaat Bingéngén 20:11 le: “Ndék mañge i nyiba inyu bibôñôl gwé, too liboñog jé li mpôp, too li yé ki sép.” Jon yak mañge a nla nok kii i yé i boñ mam malam ni kii i yé i ti nyemede yak Nhek wé. Jon, sôble i yé makidik ma mahee ni ma ma kôli inyu mañge wanda nu a ñunda le a yé nhôôlak i pes mbuu, ni nu a nti nyemede nkikip yak Yéhôva.​—Bingéngén 20:7.

⁵ I ba nhôôlak i pes mbuu i nkobla le kii? Ba nkal ndik bé le mut a yé nhôôlak inoñnaga ni ñwii ñwé, tole inyule a mañap. Bibel i nkal le minhôôlak bi bôt mi yé ba ba nyi gwélél “ngui i bagal mam” inyu yi maselna ipôla jam lilam ni jam libe. (Lôk Héber 5:14, MN) Nhôôlak mut u nyi kii i yé jam lilam, a nkit ki i ñem wé le a mboñ jo. Jon i ta bé bun le ba tinde nye i boñ béba. A gwé bé ki to ngôñ le mut numpe nyen a kal nye hiki ngéda le a boñ jam lilam. Di kôli bem le mañge wanda nu a yé nsôblaga a boñ mam malam yak ngéda bagwal bé tole minhôôlak mi bôt bape mi ta bé nye ipañ.​—Hégha ni Filipi 2:12.

6, 7. (a) Toñol manoodana Daniel a bééna ngéda a bé i Babilôn. (b) Lelaa Daniel a bi unda le a bé nhôôlak?

⁶ Baa mañge wanda a nla toi hôlôl i nya i, i pes mbuu? Di wan ndémbél i Daniel. A bé lama ba mañge wanda ngéda ba bi yoñ nye i moo ma bagwal bé inyu ep nye i Babilôn. Kunda yada, Daniel a bôdôl niñ ipôla bôt ba bé nôgôl bé mambén ma  Djob. Ndi di tibil wan niñ i Daniel nyoo i Babilôn. Ba bé ti nye lipem li bañga mut i Babilôn. A bé ipôla ndék boñge ba wanda ba ba bi yoñ ngéda i pohol inyu sélél kiñe. (Daniel 1:3-5, 13) I nene le Daniel a bééna tel keñi i Babilôn iloo kiki a bé le a bana i loñ i Israél.

⁷ Ndi lelaa mañge wanda le Daniel a bi boñ? Baa a bi neebe le bôt ba Babilôn ba boñ le a nimis bilem gwé bilam, ni le ba tômbôs hémle yé? Heni! Bibel i nkal le mu kiki a bé i Babilôn, Daniel a bi “ôm siñ ikété ñem wé le a ta bé le a hindis nyemede,” ni le a ga yén haa ni kii yosôna i gwé maada ni kwéha base. (Daniel 1:8) Hala a bi unda toi le a bé nhôôlak i pes mbuu!

8. Bimbee biniigana u nla ôt mu ndémbél i Daniel?

⁸ Bimbe biniigana u nla ôt mu ndémbél i Daniel? Mañge wanda nu a yé nhôôlak i pes mbuu a yé siñ ikété biniigana a nhémle, yak ngéda a mboma mandutu. A ga ba bé kiki yôñngôô, ntén ngôdô u u nyoñ binene bi homa a yéne inyu solop. A ta bé mañge nu a mboñ weñgonle a yé liwanda li Djob i Ndap Ane, ndi a bak liwanda li nkoñ isi i suklu. Mahéñha ni la, a ntéñbe ni Djob yak ngéda a mboma manoodana.​—Añ Efésô 4:14, 15.

9, 10. (a) Umbe nseñ mañge wanda a nla kôs i hoñol lelaa a bi boñ ngéda a bi sôk boma manoodana? (b) Sôble i nkobla le kii?

⁹ I yé ntiik le mut nye ki nye a ta bé peles. Boñge ba wanda kiki mimañ mi bôt ba nhôs ngim mangéda. (Ñañal 7:20) Ndi ibale u gwé ngôñ i sôblana, njel pék i mbat le u wanba inyu yi too u ma yoñ makidik ma ngui inyu nôgôl mambén ma Yéhôva. Badba le: ‘Baa me ma unda ikété ntandaa ngéda le me nôgôl Yéhôva?’ Hoñol lelaa u bi boñ ngéda u bi sôk boma manoodana. Baa u bi la kit kii u boñ inyu lémél Yéhôva? Kiki Daniel, baa mut numpe a ma tinde we i gwélél ngap yoñ inyu sélél nkoñ isi u Satan? Ngéda ma mahoñol ma nlôô we i boña, baa u yé u yi kii i yé sômbôl i Djob?​—Efésô 5:17.

 ¹⁰ Inyuki i yé nseñ le wemede u badba ma mambadga? Inyule ma nhôla we i nôgda le sôble i ta bé jam li mintuk, ndi jam li mahee. Sôble i ñunda bôt bape le u nti Yéhôva bañga likak. U bi bôn nye le w’a gwés nye ni ñem woñ wonsôna i boga ni boga. (Markô 12:30) Hiki mut nu a nsôblana a nlama yoñ makidik ma ngui inyu yônôs likak a nti Yéhôva.​—Añ Ñañal 5:4, 5.

11, 12. (a) Mut a nhek le a kôs sôble a nlama ba nkwoog nkaa le kii? (b) Kii i nla hôla we i tééda matehge ma Yéhôva inyu sôble?

¹¹ Bibel i ñunda le bôt bobasôna ikété litén li Yéhôva, yak boñge ba wanda, b’a ti “bomede ni ngôñ [tole ni ñem wap wonsôna].” (Tjémbi 110:3) Jon mut nu a nyéñ sôblana a nlama ba nkwoog nkaa le ngôñ yé nyemede i. Hala a nla bat le u wanba loñge loñge, téntén ibale u néñél ikété maliga.

¹² Mu kiki u nañ, i nla ba le u meya u ntehe ngandak bôt i nsôblana, bebeg yak mawanda moñ ni lôk kéé yoñ i bôlôm ni i bôda i pes i minsôn. Ndi yoñ matat le u bôdôl bañ nôgda weñgonle u nlama ndik sôblana inyule u mpam ngim ñwii tole inyule bana bape bobasôna ba nsôblana. Lelaa u nla ba nkwoog nkaa le u ntehe sôble kiki Yéhôva nyemede a ntehe yo? Yoñ ngéda i hoñol inyuki sôble i yé jam li nlôôha ba nseñ. U ga léba manjom malam munu yigil ini, ni i i ga noñ ha.

13. Lelaa u nla yi ibale makidik moñ i kôs sôble ma nlôl toi we ñem?

¹³ Njel yada inyu yi too makidik moñ i kôs sôble ma nlôl toi we ñem, i yé le u wan masoohe moñ. U mbéna soohe Yéhôva ngélé yañen? Baa u mbéna sima mam ma tôbôtôbô mu masoohe moñ? Mandimbhe ma mambadga ma, ma nla unda we ipam limbe likala maada moñ ni Yéhôva ma yé bas bas. (Tjémbi 25:4) Yéhôva a yé a mbéna timbhe masoohe més ni njel Bibel. Njel ipe inyu yi too u gwé toi ngôñ i kôôge Yéhôva bebee, ni too u nyéñ toi gwélél nye ni ñem woñ wonsôna, i yé le u wan ntjegek woñ ngéda inyu yigil. (Yôsua 1:8) Badba le: ‘Baa me gwé lem i nigil Bibel hiki ngéda? Baa me yé me ba maséé i yoñ ngaba i ntjegek ngéda ndap lihaa i mpohol inyu bégés Yéhôva? Mandimbhe u ga ti inyu mambadga mana ma ga hôla we i tehe too makidik moñ i kôs sôble ma nlôl toi we ñem.

14. Toñol maselna ma yé ipôla i ti wemede nkikip ni sôble?

¹⁴ I nla pam le ngim boñge ba wanda ba yi bé maselna ma yé ipôla i ti bomede nkikip ni sôble. Bahogi ba nla ki kal le ba mal ti bomede nkikip yak Yéhôva, ndi ba ta bé bebee i kôs sôble. Ndi baa hala a nla toi bôña? I ti wemede nkikip i yé i soohe Yéhôva inyu bôn nye le u ga gwélél nye i mba ni mba. Ngéda u nsôblana, u ñunda bôt bape le u bi mal yoñ makidik i ti wemede nkikip yak Yéhôva. Jon ilole u nsôblana, u nlama tibil nok kii i ti wemede nkikip yak Djob i nkobla.

15. Kii i ti wemede nkikip i nkobla?

¹⁵ Ngéda u nti wemede nkikip yak Yéhôva, u nkal nye le u yé wé. U mbôn nye le, i gwélél nye jon li ga ba jam li bisu ikété niñ yoñ. (Añ Matéô 16:24.) Nya mbônga u, u gwé mahee ngandak i mis ma Djob! (Matéô 5:33) Lelaa u nla unda le u nyi le u nlama ha bé sélél gwéñe gwoñ wemede (tole u nlama yôiba), ndi le nano u yé nu Yéhôva?​—Rôma 14:8.

16, 17. (a) Ti hihéga inyu toñol kii i yé i yôiba? (b) Kii mut a nti nyemede nkikip yak Djob a nkal toi?

 ¹⁶ Di wan le ndémbél yada. Hégda le liwanda joñ jada li nti we litôa kiki likébla. A ti we mapep ma litôa, ndi a kal we le: “Litôa lini li yé joñ.” Ndi i mbus, liwanda joñ li kal we le: “Men me ga tééda diliba. Me ki nyen m’a luk litôa lini, ha we bé.” Lelaa u ga tehe likébla lini? Mambe mahoñol u ga bana inyu liwanda joñ li li nti we likébla li?

¹⁷ Ngéda mut a nti niñ yé nkikip yak Yéhôva, a nkal Djob le: “Me nti we niñ yem. Me yé woñ.” Yéhôva a kôli bem le i mut nu, a yônôs mbônga wé. Ndi i ga ba lelaa ibale i mut nu a mbôdôl ndogbene Yéhôva, ni njel matondna ma bisôsôli ni ngim mut a ngwélél bé Djob? Tole lelaa i ga ba ibale i mut nu a neebe ngim bôlô i nyoñ ngéda a lamga tégbaha i likalô, tole i mboñ nye le a kahal tôl makoda ngim mangéda? Wee mut nu a ta bé i yônôs mbônga a bi ti Yéhôva. A yé kiki mut nu a ntééda diliba di litôa. Ngéda di nyoñ niñ yés, di ti Yéhôva, di yé kal nye le: “Me mbii niñ yem i moo moñ, ha mem ha bé.” Jon di ga boñ mam Yéhôva a ngwés hiki ngéda, yak ngéda hala a nlémél bé bés. Di nigle Yésu nu a bi kal le: “Inyule me bi lôl ngii, ha i boñ sômbôl yem bé, ndik sômbôl i nu a om me.”​—Yôhanes 6:38.

18, 19. (a) Lelaa bibuk bi Rôsa ni Kristofa bi ñunda le i ba nsôblege i yé nsima u u nlona bisai? (b) Lelaa u ntehe minsima mi yé i ba nsôblege?

¹⁸ Ibabé nkaa, sôble i yé makidik ma mahee. Hala a yé bisai bikeñi i ti wemede nkikip yak Yéhôva ni i kôs sôble. Boñge ba wanda ba ba ngwés Yéhôva, ba nogok ki kii i ti bomede nkikip i nkobla, ba nkon bé woñi i ti bomede nkikip yak Djob ni i sôblana. Ba ntam bé makidik map. Mañge wanda ba nsébél Rôsa, nu a bi sôblana, a nkal le: “Me ngwés Yéhôva, jam lipe li ta bé le li ti me maséé kiki i gwélél Yéhôva. Me ma ba bé nkwoog nkaa i boñ ngim jam jo ki jo i niñ yem kiki makidik me bi yoñ i kôs sôble.”

¹⁹ Lelaa ni inyu Kristofa nu di nsima i bibôdle bi yigil ini? Mambe mahoñol a gwé nano inyu makidik mé ma sôble a bi yoñ ngéda a bééna 12 ñwii? A nkal le a yé maséé ngandak inyule a bi yoñ makidik ma. A bi bôdôl bôlô i nsañal nu ngéda yosôna a ban-ga 17 ñwii, a yila nhôla nsoñ i ñwii u bé noñ ha. I len ini, a nsal i Bétel. Nyen a nkal le: “I kôs sôble i bé makidik malam. Niñ yem i yé nyonok ni maséé ma nlôl i bôlô i Yéhôva ni i ntôñ wé.” Ibale u nsômbôl kôs sôble, lelaa u nla ni kôôba? I yigil i noñ ha y’a timbhe mbadga i.