1. Ibôdôl i bibéé, limbe jam li nene i mam Djob a boñ?

YÉHÔVA bo Yésu ba niñ ikété adna ibôdôl ngéda Djob a bi bôdôl heg. Yéhôva a bi bôk a heg Yésu ilole a nheg mana mam mape. Mbus, Yésu a bi sal ni nye, a “ba nye pañ kiki nwet ngwelnson.” (Bingéngén 8:30) Bagwélél ba Yéhôva ba bi sal ntôñ mu nson ba bééna i boñ. Kiki héga, Nôa ni lihaa jé ba bi sal ntôñ inyu oñ nkuu. Yak, Lôk Israél i sal ntôñ inyu oñ lap, inyu bagal bipes gwé, ni inyu kena yo homa numpe. I témpel, ba bé tôp tjémbi, ba kôdôk nsik nlam ni bikôkôda inyu bégés Yéhôva lôñ. Litén li Yéhôva li bi la boñ mam mana momasôna inyule ba bé sal lôñ ikété manôgla.​—Bibôdle 6:14-16, 22; Ñanga bôt 4:4-32; 1 Miñañ 25:1-8.

2. (a) Kii i bé jam li tôbôtôbô ikété likoda li bikristen li bisu? (b) Mambe mambadga di ga timbhe?

² I hiai bisu, bikristen bi bi sal ntôñ ikété manôgla. Ñôma Paul a bi toñol le, to hala kii ba bééna bé nlélém ngap ni nlélém bôlô ikété likoda, ba bé niñ ikété adna. Bobasôna ba bé noñ Ñéga wap le Yésu Kristô. Ñôma Paul a bi yoñ hihéga hi nyuu i mut binam inyu pôdôl bo. A kal le ba yé kiki nyuu i i  gwé ngandak bijô bi bi nsal ntôñ. (Añ 1 Korintô 12:4-6, 12.) Ndi kii di nla kal inyu yés i len ini? Lelaa di nla sal ntôñ inyu añal ñañ nlam, ikété likoda, ni ikété ndap lihaa?

3. Imbe yiinda ñôma Yôhanes a bi tehe?

³ I hiai bisu, ñôma Yôhanes a bi tehe ikété biyiinda, biañgel bisaambok bi bi bé hem sép. Ngéda añgel i nyônôs itan i bi hem sép yé, ñôma Yôhanes a bi tehe “hiôdôt hi bi lôl ngii, hi kwo isi.” “Hiôdôt” hi, hi bi gwélél hiliba inyu yibil likôga li bee i i yé isi kiyaga, jiibe li bak ki mukété. Hida hion hi bi bôk hi pam mukété bee, mbus, liuñ li bitandi li pémél ikété hida. Ndi ilole bi je bie tole bikai, bitandi bi kwo i ngii “bôt ba gwé bé béndél Nyambe mbom yap.” (Masoola 9:1-4) Ñôma Yôhanes a bé yi le liuñ li bitandi li nla tjé bañga litjék; bi bi boñ hala i ngéda Môsé i Égiptô. (Manyodi 10:12-15) Bitandi ñôma Yôhanes a bi tehe bi yé yimbne i minhook mi bikristen mi mi bi ti mabéhna ma ngui i kolba kwéha base. Didun di bôt bape ba ba gwé botñem i niñ hana isi di nhôla minhook mu bôlô i. Bobasôna lôñ, ba ntéé likalô ikété adna. Hala a bi hôla ngandak bôt i tjôô bibase bi bitembee, ni i nyodi isi énél i Satan.

4. Imbe bôlô litén li Djob li gwé i boñ? Ni imbe mpom njel ba nla sal bôlô i?

⁴ Di gwé bôlô i añle bôt ba nkoñ isi bobasôna “miñañ minlam” ilole lisuk li nlo. Hala a yé soso bôlô kiyaga! (Matéô 24:14; 28:19, 20) Di nlama naña i bôt bobasôna “nyus i gwé” i nyo “malép ma niñ,” hala wee di nlama niiga bôt bobasôna ba nsômbôl yi maliga, Bibel. (Masoola 22:17) Ndi, di nla ndik boñ hala ibale di yé ‘ñadbaga loñge’ ni ibale ikété likoda, di nsal lôñ ikété manôgla.​—Efésô 4:16.

5, 6. Lelaa adna yés i nene ikété likalô di ntéé?

⁵ Inyu boñ le di tihba libim li bôt di nla ni likalô jés, di nlama tjek mam loñge. Biniigana ntôñ u nti bés bi nhôla bés i boñ hala. Mbus likoda li likalô, di mpam inyu añle bôt ñañ nlam u Ane Djob. Di nti yak bo bikaat bi ntoñol Bibel. I pot maliga, di ma tjam didun di didun di bikaat bi ni nkoñ isi wonsôna. Ngim mangéda, ba nla bat bés le di yoñ ngaba i hônd hi tôbôtôbô. Ngéda u mboñ bôlô i, u yé ikété maada ni didun di bilôk bikéé bipe, bi bi ntjam nlélém ñwin ni nkoñ isi wonsôna! U yé ki sal ni biañgel, bi bi nhôla bagwélél ba Djob i añal ñañ nlam.​—Masoola 14:6.

⁶ Kinje maséé di yé di bana ngéda di ñañ Kaat i ñwii ba nsébél ni pulasi le Annuaire inyu tehe mahol ma bôlô yés ni nkoñ isi wonsôna! Hoñol kiki adna yés i nene ni nkoñ isi wonsôna ngéda di naña bôt i makoda més ma ndôn. Mu makoda ma, bés bobasô di nkôs minlélém mi biniigana. Minkwel, mintuk, ni ndémbél bi nti bés makénd i boñ biliya gwobisôna i gwélél Yéhôva. Adna yés i nene ki i ngéda bilôk bikéé bi bôlôm ni bi bôda bi nkodba hiki ñwii ni nkoñ isi wonsôna inyu Bilôp bi Nwet. (1 Korintô 11:23-26) Di nkodba nlélém hilo, hala wee i hilo 14 hi sôñ Nisan ngéda hiañgaa hi nañal, i ti Yéhôva mayéga inyu mam a boñ inyu yés ni inyu nôgôl mbén Yésu. Ndék sonde ilole Bilôp bi Nwet bi ntagbe, di nsal ntôñ i naña ngandak bôt i ba ni bés inyu likoda tôbôtôbô li.

7. Ngéda di nsal ntôñ, kii di nla boñ?

 ⁷ Tandi yada i nla bé boñ bañga jam. Yak Mbôgi Yéhôva yada i nla bé añle bôt bobasôna ñañ nlam. Ndi, kiki di nsal ntôñ, di nla añle didun di bôt mam inyu Yéhôva, di hôlga ki ndék mukété yap i bégés Yéhôva ni ti nye lipém.

8, 9. (a) Himbe hihéga ñôma Paul a bi gwélél inyu niiga bikristen i tééda adna yap? (b) Lelaa di nla sal ntôñ ikété likoda?

⁸ Ñôma Paul a bi toñle bôt ba Efésô lelaa mam ma yé ntjegek ikété likoda, a kal le bôt bobasô ikété likoda ba nlama “hol ki ikété mam momasôna.” (Añ Efésô 4:15, 16) Ñôma Paul a bi gwélél hihéga hi nyuu inyu toñol le hiki kristen i nla hôla likoda i tééda adna yé ni i noñ Yésu, nu a yé Ño ntôñ. A bi kal le bijô bi nyuu gwobisôna bi nsal ntôñ ni ‘môñga ma nyuu inyu adbana loñge.’ Jon too di yé mañge wanda tole mañ mut, too di yé mbôô too di ta bé, kii hiki wada ikété yés a nlama boñ?

⁹ Yésu a bi téé mimañ le mi éga likoda, jon a ngwés le di ti bo lipém, di noñok ki biniigana ba nti bés. (Lôk Héber 13:7, 17) Hala a ta bé jam li ntomb i boñ hiki ngéda. Ndi, di nla bat Yéhôva mahôla. Mbuu wé mpubi u nla hôla bés i nôgôl to bimbe biniigana mimañ mi nti bés. Hoñol ki lelaa di nla hôla likoda ibale di gwé suhulnyu i sal lôñni mimañ ikété manôgla. Likoda jés li ga bana adna, gwéha ipôla yés i ga hol ndigi.

10. Lelaa bahôla nson ba nyoñ ngaba i lédés adna ikété likoda? (Béñge titii i bibôdle bi yigil.)

¹⁰ Yak bahôla nson ba nhôla i tééda likoda ikété adna. Ba nsal ngandak i nit mimañ, jon di nti bo mayéga inyu bôlô yosôna ba mboñ. Kiki héga, bahôla nson ba mboñ kii yosôna ba nla i boñ le di bana jôga li bikaat inyu likalô, ba nleege ki bakén i makoda més. Ba ntumbba ki ni nson inyu tibil Ndap Ane ni tééda yo mapubi. Ngéda di nsal lôñni bilôk bikéé bi ikété manôgla, adna i yé ipôla yés, di gwéélak ki Yéhôva ikété oda.​—Béñge yak Minson mi baôma 6:3-6.

11. Kii boñge ba wanda ba nla boñ inyu hôla likoda i ba ikété adna?

¹¹ Ngim mimañ i bi tégbaha ngandak ñwii mi bôlô ikété likoda. Ndi bebeg le i len ini, ba nla ha bé sal kiki ngéda kôba inyule ba ñun. Boñge ba wanda ba nla hôla. Ibale ba niiga bo loñge, ba nla boñ ngandak bibôlô ikété likoda. Ngéda bahôla nson ba nyeñgep bé, ba nla yila mimañ yani ni noma. (1 Timôtéô 3:1, 10) Jôga li boñge ba wanda ba ba bi yila mimañ, ba bi bana ki mahol mape i pes i mbuu. I len ini ba yé bagwélél ba makiiña, ba hôlga ki lôk kéé i bôlôm ni i bôda ikété ngandak makoda. Di yé maséé ngéda di ntehe le boñge ba wanda ba gwé ngôñ i hôla bilôk bikéé bi bôlôm ni bi bôda.​—Añ Tjémbi 110:3; Ñañal 12:1.

12, 13. Kii i nla hôla lihaa jolisôna i sal ikété adna?

¹² Lelaa di nla hôla bôt ba ndap yés lihaa i niñ ikété adna? I bégés Djob hiki ngéda ikété ndap lihaa i nla hôla bés. Ngéda bagwal ni bon bap ba ntégbaha ngéda ntôñ i nigil manjel ma Yéhôva, gwéha ipôla yap i nkônde nañ. Mu mangéda ma, ba nla kôôba i mam ba ga pot i likalô, hala a ga hôla bo i bana makénd. Ngéda ba nok bôt ba lihaa bap ba mpahal hémle yap, ba tehge ki le lihaa  jolisôna li ngwés Yéhôva, li ban-ga ki ngôñ i lémél nye, hala a nlédés maada map.

¹³ Lelaa ñwaa bo nlôm ba nsal ikété adna? (Matéô 19:6) Ngéda boba ba ngwés Yéhôva, ba gwéélak ki nye lôñ, maséé ni adna bi ga ba ikété libii jap. Ba nlama ki unda le ba ngwéhna kiki Abraham bo Sara, Isak bo Rébéka, ni Elkana bo Hana. (Bibôdle 26:8; 1 Samuel 1:5, 8; 1 Pétrô 3:5, 6) Ngéda ñwaa bo nlôm ba mboñ hala, adna i mba ipôla yap, ba kôôgege ki Yéhôva bebee.​—Añ Ñañal 4:12.

14. Ibale nlô woñ tole ñwaa woñ a ngwélél bé Yéhôva, kii u nla boñ inyu tééda maada malam ni sobiina woñ?

¹⁴ Bibel i ntibil yaga toñol le di nlama bé biiba ni mut nu a ngwélél bé Yéhôva. (2 Korintô 6:14) Ndi, ngim bilôk bikéé bi bôlôm ni bi bôda bi yé mbiibaga ni mut nu a ta bé Mbôgi Yéhôva. Bahogi ba bi yila Mbôgi Yéhôva mbus libii jap, ndi sobiina wap a neebe bé maliga. Bebeg le bape ba bi bii ngwélél Yéhôva, mbus, sobiina a nyodi ntôñ. Ha mangéda ma, bikristen bi nlama boñ biliya gwap gwobisôna inyu nôgôl maéba ma Bibel inyu boñ le maada ma libii jap ma let. Hala a ta a ba bé jam li ntomb. Kiki héga, Maria bo nlô wé David ba bi gwélél Yéhôva ntôñ. Mbus, David a waa lo i makoda. Ndi, Maria nye a kôndge ndik ba loñge ñwaa, a undga ki bilem bilam. A bi niiga ki bon bé basamal i yi Yéhôva, a kôndge ki ke makoda matitigi ni makeñi. Ñwii mi bi tagbe, boñge ba nañ, ba nyodi yak ndap. Ndi Maria a kenek ndik ni bisu i gwélél Yéhôva to hala kii mam ma bé let ndigi let ni let. Kel yada, David a bôdôl añ mimbamble Maria a bé yék mu ndap inyu yé. Kii ngéda i bé tagbe, David a témb a bôdôl lo i ngim makoda. Nlal wé nu ñwii minsamal a bé téédana nye yééne hiki ngéda. Ibale David a nlo bé i likoda, nlal wé a bat nye le: “A Sôgôl, di nlôl we len i likoda.” David a bi témb yak Yéhôva mbus 25 ñwii. Nye ni ñwaa wé ba yé maséé inyule boba ba nsélél ki Yéhôva ntôñ i len ini.

15. Lelaa ba ba bi biiba behee ba nla hôla bet ba ntip biiba?

 ¹⁵ Satan a njôs mahaa ngandak i len ini. Hala a yé njom yada i i nlama tinde ñwaa bo nlôm ba ngwélél Yéhôva i sal ntôñ ikété manôgla. To ibale u ma tégbaha imbe ngéda ikété libii, hek pék inyu yi kii u nlama boñ inyu lédés libii joñ. Ibale u yé mbiibaga ibôdôl behee, u nla ti ndémbél ilam inyu ba ba ntip biiba. Bebeg u nla sébél bet ba ntip biiba i tégbaha ngéda ni bé inyu bégés Yéhôva ikété lihaa. Hala a ga hôla bo i tehe le to libii li nom ñwii nwañen, babiina ba nlama unda le ba ngwéhna, ba niñik ki ikété adna.​—Titô 2:3-7.

16, 17. Kii bagwélél ba Djob ba ba nsal ikété adna ba mbem?

¹⁶ Ngéda Lôk Israél i bé ke i mangand map i Yérusalem, ba bé sal ntôñ ikété manôgla. Ba bé ba kôôba mam momasôna ma mbéda bo inyu liké. Mbus, ba nkiha ntôñ, ba hôlnaga. I témpel, bobasôna ba bé ba bégés Yéhôva ntôñ. (Lukas 2:41-44) I len ini, kiki di nkôôba inyu jôp i mbok yondo, i mbéda le di bana adna, di boñ ki mam momasôna di nla inyu sal ikété adna. Baa u ntehe manjel u nla gwélél inyu kônde boñ biliya mu jam li?

¹⁷ Bôt ba nkoñ isi unu ba nôgla bé, ba jok ki inyu ngandak mam. Ndi bés di nti Yéhôva mayéga le a bi hôla bés i niñ ikété nsañ ni i nok maliga! Bagwélél bé ni nkoñ isi wonsôna ba mbégés nye kiki a nsômbôl. Téntén munu dilo di nsôk, adna i litén li Yéhôva i mbuma ñañ. A yé ndik kiki mbañ i Yésaya ni Mika i nkal le di yé bet i “hikôa hi Yéhôva” lôñ. (Yésaya 2:2-4; añ Mika 4:2-4.) Kinje maséé di ga bana i dilo di nlo, ngéda bôt bobasôna hana nkoñ isi ba mba ‘ñadbaga loñge,’ ba salak ikété manôgla inyu bégés Yéhôva!