NGIM mangéda, Yésu a bé sébél mut nu a ta bé munlôm le “a muda.” Kii héga, ngéda a bi mélés mut nu a bi tégbaha 18 ñwii ikété kon, a bi kal le: “A muda, u nhohla ni biyiñye gwoñ.” (Lukas 13:10-13) Yésu a bi gwélél ini buk bôt ba libôga jé ba bé béna gwélél inyu ti mut lipém, ngéda a bé pôdôs nyañ. (Yôhanes 19:26; 20:13) Bôt ba bééna ki lem i gwélél buk ipe, i i bé ti bôt lipém kiyaga.

Ndi, Bibel i ngwélél ki loñge buk i gwéha ipe ngéda i mpôdôl ngim bôda. Yésu a bi gwélél nlélém buk ngéda a bé pôdôs muda nu matjél ma bé pam 12 ñwii. Njel muda a bi gwélél inyu kôôge Yésu bebee i bé kiha bé ni Mbén Djob, i i nkal le ibale mut a gwé ntén kon u, wee a yé nyega. Bôt ba bé le ba kal le, kiki muda nunu a gwé kon u, a nlama bé ba i het bôt ba yé. (Lôk Lévi 15:19-27) Ndi, nunu muda a bé nhelek. I pot maliga, “a kôs ngandak njonok i moo ma ngandak bangangañ [tole bidokta], a sem mam momasôna a ba a gwé, ndi a boñ bé [tole a nôgda bé] to ndék mbôô, kon u yindge ndigi nyindge.”​—Markô 5:25, 26.

I muda nu, a bé bak bôt inyu ke ada Yésu, a lôl nye i mbus ni mbus, ndi a tihba linjek li mbot yé. Ni nye a kôhna mbôô ngélé yada! Muda nu a bé hoñol le a ga ke, ibabé le mut a yi i yom a mboñ. Ndi, Yésu a bat le: “Njee a ntihba me?” (Lukas 8:45-47) Ha nyen muda a bi kon woñi, a bôdôl sehla, a ôm maboñ i bisu bi Yésu, “a kal nye maliga momasôna.”​—Markô 5:33.

Inyu boñ le muda a wo bañ nyuu, Yésu a bi kal nye ni loñgeñem le: “A ngond yem, ban ñem!” (Matéô 9:22) Inoñnaga ni batoñol Bibel, ini buk le “ngond” ni hop Lôk Héber, yak ni hop Grikia, i ngwélana inyu unda mut le “di ntôñ toi nye.” Yésu a bi ke ni bisu i ti nye ngandak makénd, ngéda a bi kal le: “Hémle yoñ i ntohol we; kenek ni nsañ, u malba ni béba yoñ kon.”​—Markô 5:34.

“A ngond yem.” Hala nyen ngwañ mut u Lôk Israél le Bôas a bi sébél ngond Môab le Ruth. Yak nye a bé wo nyuu inyule a bé toohe kôn i wom u mut nu a bé yi bé. Bôas a bi kal nye le: “Emble, a ngond yem.” I mbus, a bi ti nye makénd i ke ni bisu i toohe mu nwom nwé. Ruth a bi ôôp i bisu bi Bôas, a bat nye inyuki a kon nye ngoo, nye nu a yé nkén muda. Bôas a bi timbhe nye inyu kônde ti nye makénd, a kal nye le: “Ba bi tibil yaga añle me mam momasôna u bé bôñôl nyôgôl woñ [hala wee yik muda le Naômi] . . . Yéhôva a timbhe we inyu nson woñ.”​—Ruth 2:8-12.

Kinje loñge ndémbél Yésu bo Bôas ba nti mimañ mi likoda! Ngim mangéda, mimañ ima mi nla boma mankéé nu muda nu a ngwés le ba hôla nye i pes mbuu, ni inyu ti nye makénd. Ngéda ba mal bat Yéhôva mahôla ni njel masoohe, ba yoñ ki ngéda i tibil emble mankéé nu muda, ha nyen mimañ mi ga ba nkôôbaga i gwélél Bañga i Djob inyu ti nye hogbe, ni hôla nye i tééda botñem yé inyu dilo di nlo.​—Rôma 15:4.