1-3. Lelaa mindañ ipôla Éwôdia ni Sintiké mi bi gwéé, ni lelaa di nla keñgle nya mindañ i? (Béñge titii i bibôdle bi yigil.)

BAGWÉLÉL ba Yéhôva ba ndiihe kaat pubi i Djob le Bibel, bañga lidiihege. Kiki di yé kwéha, jon di nkôhna maéba ma ma yé ikété Bitilna. Lelaa di ga unda le di neebe maéba ma? Di yoñ hini hihéga: Di yé i hiai bisu, Éwôdia ni Sintiké ba yé bikristen. Mindañ mi ngwéé ipôla bana bôda ba ba yé minhook. Mimbe mindañ? Bibel i nkal bé. Ndi inyu hégda jam li bi tagbe, di nyoñ ndémbél yada.

² Di hégda le Éwôdia a naña ngim bikristen bi bôda ni bi bôlôm inyu tégbaha loñge ngéda ni je ntôñ. Ndi a naña bé Sintiké. I mbus, Sintiké a nok ñwin le ngand i bi tagbe loñge ni le hiki mut a bé maséé. Bebeg le Sintiké a nla kal le: ‘Me nla bé neebe hala, le Éwôdia a naña bé me! Me hoñlak le me ni nye di yé biloñge bi mawanda.’ Kiki a nôgda le liwanda jé li nwéha nye nyuu, Sintiké a bôdôl nun Éwôdia ni mis mabe. Yak nye a yoñ gwé bitelbene inyu naña minlélém mi bilôk bikéé bi bôlôm ni bi bôda i ngand yé, ndi a naña bé  Éwôdia! Bebeg le ndañ u u bé ipôla Éwôdia bo Sintiké u bi tééñga nsañ u likoda jolisôna. Bibel i nkal bé bés yom i bi tagbe i mbus ha, ndi bebeg le bini bilôk bikéé bi bôda bi bi sôk bi neebe maéba ñôma Paul a bi ti bo lôñni gwéha.​—Filipi 4:2, 3.

³ Minlélém mi mam mi nla lona mindañ ikété makoda ma bagwélél ba Yéhôva i len ini. Ndi, di nla mélés tole keñgle nya mindañ i, ibale di noñ maéba di nkoba ikété Bañga i Djob le Bibel. Ni le, ibale di ndiihe kaat i Yéhôva bañga lidiihege, di ga niñ inoñnaga ni biniigana bi.​—Tjémbi 27:11.

4, 5. Mambe maéba Bañga i Djob i nti inyu hôla bés i yi gwel mahoñol ma ñem wés?

⁴ I yi gwel hiun hiés i ta bé jam li ntomb ngéda di nôgda le ba mbabaa bés, tole ba mboñ bés ngim jam li li téé bé sép. Hala a nla tééñga bés ngandak ibale ba mboñ bés béba inyule di nlôl i mambok mape, di gwé kôgôô ipe, tole inyu manjom mape. Nduña di nôgda i gwé bé héga, ibale kristen ipe yon i boñ bés hala! Baa Bibel i nla ti bés mahôla ibale libak li kwéha li mut binam li ôbôs maada di bak di gwé ni nye?

⁵ Ibôdôl i bibôdle, Yéhôva a mbéñge maada ma ma yé ipôla bôt ba binam. A nyimbe mahoñol més ma ñem ni maboñog més. Mahoñol més, téntén ma ma yé nyonok ni nduña, ma nla boñ bés le di pot, tole di boñ jam di ga sôk tam. Inyu hala nyen, kiki Bibel i nkal bés, i ga ba bés loñge le di yik gwel bésbomede, kayéle di pala bañ unup! (Añ Bingéngén 16:32; Ñañal 7:9.) Maliga ma yé le bés bobasôna di nlama boñ biliya le di pala bañ unup, di bak bebee i nwéhél. Inyu Yéhôva bo Yésu, nwéhél i yé jam li mahee ngandak. (Matéô 6:14, 15) Baa u ntehe le u nlama boñ biliya inyu ke ni bisu i nwéhél, tole u boñ biliya bi bi mbéda inyu gwel mahoñol ma ñem woñ?

6. Inyuki di nlama yoñ yihe ni lôlha ñem?

⁶ I bet ba mboñ bé biliya i gwel mahoñol ma ñem wap, ba yé ba sôk ba ba bôt ba gwé lôlha ñem. Inyu hala nyen bôt bape ba ngwés bé ba i pañ i nya bôt i. I bôt ba gwé ño mbe, libak jap libe li nla tééñga likoda. Ba nla noode sôô libak jap libe tole ôa yap, ndi bibéba bi mahoñol ba gwé ikété miñem nwap gw’a “yeli mpaha bisu bi likoda.” (Bingéngén 26:24-26) Mimañ mi nla hôla nya mut i, i tehe lelaa i tééda hiun, ôa tole lôlha ñem i gwé bé liyééne ikété ntôñ u Yéhôva. Kaat i Yéhôva i di nlôôha diihe, i ntibil yaga yigye hala. (Lôk Lévi 19:17, 18; Rôma 3:11-18) Baa yak we u neebe  jam li?

7, 8. (a) Lelaa Yéhôva a ñéga ntôñ wé hana isi? (b) Bimbe biniigana di nléba mu Bañga i Djob, ni inyuki di nlama nôgôl gwo?

⁷ Yéhôva a ñéga, a jéhak ki bagwélél bé hana isi ni njel “nkol u maliga ni u pék,” u u yé isi énél i Kristô, nu a yé “ño ntôñ.” (Matéô 24:45-47; Efésô 5:23) Kiki juu li bakena ntôñ li hiai hi bisu, nkol u maliga ni u pék, u neebe Bañga i Djob, u nlôôha ki diihe yo. (Añ 1 Tésalônika 2:13.) Bimbe biniigana Bibel i nti, bi bi nla bane bés nseñ?

⁸ Bibel i nkal bés le di ke i makoda hiki ngéda. (Lôk Héber 10:24, 25) I nti bés makénd i bana adna ni minlélém mi biniigana. (1 Korintô 1:10) Bañga i Djob i  nkal bés le di yéñ Ane Djob kiki jam li bisu i niñ yés. (Matéô 6:33) Bitilna bi nyigye ki bôlô yés, ni bisai di gwé i añal ñañ nlam i mandap ni mandap, i mbamba, ni to hee homa. (Matéô 28:19, 20; Minson mi baôma 5:42; 17:17; 20:20) Kaat i Djob i niiga mimañ le ba tééda libak li pubi li ntôñ. (1 Korintô 5:1-5, 13; 1 Timôtéô 5:19-21) Ni le, Yéhôva a ntéé le bôt bobasôna ikété ntôñ wé ba nlama ba mapubi i pes mbuu ni i pes minsôn.​—2 Korintô 7:1.

9. Umbe mpom njel u ngwélana inyu hôla bés i nok Bañga i Djob?

⁹ Ngim bôt i nla hoñol le bomede ba nla toñol Bibel. Ndi, mpom njel Yésu a bi téé inyu ti bés bijek bi mbuu i yé ‘nkôl u maliga.’ Ibôdôl i ñwii 1919, Yésu mu libak jé li Kiñe, a ngwélél nkol u, inyu hôla banigil bé i nok Kaat i Djob. I ngéda di nôgôl biniigana bi yé mu Bibel, di nsal i tééda libak jés li pubi, nsañ wés, ni adna yés ikété likoda. Hiki wada wés a nlama badba le: ‘Baa me ntéñbe ni njel Yésu a ngwélél i len ini?’

10. Lelaa kaat Ézékiel i ntoñol ntôñ u Yéhôva u u yé i ngii?

¹⁰ Bañga i Yéhôva i nhôla bés i tibil yi ntôñ wé u u yé i ngii. Kii héga, mpôdôl Ézékiel a bi kôhna yiinda, a tehe kak i ngii, i i bé yimbne i ntôñ u Yéhôva u u yé i ngii. (Ézékiel 1:4-28) Yéhôva nyen a nluk kak i, to hee mbuu u Yéhôva u nke, yak kak i nke nyoo. Inyu hala nyen ntôñ u Yéhôva u u yé i ngii, u ñéga ntôñ wé u u yé hana isi. I kak i, i yé toi i ke ni bisu! Hoñol ngandak mahéñha i i mbôña munu jôm li ñwii lini li ntagbe, u téédaga ki le Yéhôva nyen a nlona mahéñha ma. Kristô ni biañgel bi pubi ba yé bebee i tjé béba nkoñ isi unu. Jon kak i Djob i yé pala ke ni bisu inyu téé jôl li Yéhôva lipubi, ni unda le nyen a kôli énél ngiinda yosôna, ni pubus jôl jé!

11, 12. Mambe mam ntôñ u Yéhôva u mboñ?

¹¹ Di hoñol le mam ntôñ u Yéhôva u yé boñ munu dilo di nsôk: Maoñ. Mbôgôl i bôt ba bôlô i bi sal sum sum inyu oñ Hikuu hi mondo hi Mbôgi Yéhôva, hi hi yéne i tison i Warwick, i pes loñ le New York, i Amérika. Juu li bakena maoñ jon li bé éga nson u. Didun di bôt di nkoñ isi wonsôna di bi ti bomede nkikip, ba sal ni ngui inyu oñ mandap ma Ane ma mondo, ni inyu kéñbaha dikuu di biloñ. Di nti ba bobasôna ba bi ti bomede nkikip mayéga inyu soso bôlô ba bi sal! Bigda le Yéhôva a nkôp bagwélél bé bobasôna ba ba yé hana isi bisai, inyule ba ñunda le ba gwé suhulnyu ni ndéñbe, mu kii ba nyoñ ngaba i ti moni nwap inyu nit i bôlô i.​—Lukas 21:1-4.

¹² Bisuklu. Ngandak bisuklu i ñunda nseñ u biniigana bi Djob. (Yésaya 2: 2, 3) Di gwé Suklu i basañal ba ngéda yosôna, Suklu i baañal ñañ u Ane, Suklu i Giléad, Suklu i bajôp Bétél, Suklu i bagwélél ba makiiña ni baa bap, Suklu i mimañ mi likoda, Suklu i mimañ ni bahôla nsoñ, ni Suklu i mimañ mi dikuu di biloñ ni baa bap. Yéhôva a yé toi maséé i niiga litén jé. Di nhôñôs ki biniigana bi Bibel ni njel site yés internet le jw.org. Mu nyen di nla kôhna bikaat ikété mbôgôl dilémb. Site yés i gwé homa a yé tôbôtôbô inyu boñge ni mahaa, yak homa numpe inyu gwom bi ntip pam. Baa u ngwélél jw.org inyu añal ñañ nlam?

13. Kii di yé nyégsaga i boñ mu kii di yé bagwélél ba Yéhôva ba ba ntéñbe ni nye?

¹³ Kinje bisai di gwé i ba ikété ntôñ u Yéhôva! Yi yés i mambén ni matiñ ma Djob i nyégsa bés i boñ mam ma téé sép, ni i nit libak jé li nungingii. Kiki nkoñ isi unu u njôp ndigi, jôp ni jôp ikété mpuñgu, jon di nlama ‘oo béba’ kiki Yéhôva a ñoo yo. (Tjémbi 97:10) Inyu hala nyen di ntjél noñ bipôdôl bini le ‘béba i yé loñge, ni loñge i yé béba.’ (Yésaya 5:20) Inyule di nsômbôl lémél Djob, di mboñ biliya i tééda libak jés li pubi i pes minsôn, i pes mahoñol, ni i pes mbuu. (1 Korintô 6:9-11) Di ngwés Yéhôva, di mbôdôl ki nye ñem, jon di mpohol i unda nye le di ntéñbe ni nye ngéda di niñ inoñnaga ni matiñ mé, ma ma yé ntilga ikété tik yé Kaat. Jon di mboñ biliya gwobisôna inyu noñ matiñ ma, i ndap, i makoda, i homa bôlô, i suklu, ni to numbe homa di yéne. (Bingéngén 15:3) Di wan manjel mape di nla gwélél inyu unda Djob ndéñbe yés.

14. Lelaa bagwal ba ba yé bikristen ba nla unda le ba ntéñbe ni Djob?

¹⁴ I néñés boñge. Bagwal ba ba yé bikristen, ba ñunda le ba ntéñbe ni Yéhôva ngéda ba néñés bon bap inoñnaga ni Bañga i Djob. Bagwal ba ba ngwés Djob ba nwas bé le litehge li nkoñ isi jon li éga bo mu kii ba néñés bon bap. Bilem bi nkoñ isi bi nlama bé bana liyééne ikété ndap i kristen. (Efésô 2:2) Isañ mbai nu a yé kristen a ga hoñol bé le: ‘I bésni, bôda bon ba niiga boñge.’ Bibel i mpot maliga ngéda i nkal le: “Yak bé, basañ, . . . tônglana [bon banan], ni niiga bo ikété maéba ma Nwet.” (Efésô 6:4) Basañ ni banyañ ba ba nkon Djob woñi ba ngwés le bon bap ba ba kiki Samuel, inyule Yéhôva a bé lôñni nye mu kiki a bé nañ.​—1 Samuel 3:19.

15. Lelaa di ñunda Yéhôva ndéñbe yés ngéda di nyoñ makidik ma mbéñge niñ yés?

¹⁵ I yoñ makidik. Ngéda di nyoñ makidik ma ma mbéñge niñ yés, njel yada i unda le di ntéñbe ni Djob, i yé le di yéñ yaga mahôla mu Bañga yé, ni biniigana bi ntôñ wé. Di nla yoñ hihéga inyu unda inyuki i yé nseñ le makidik més ma nlama ba ma niñne i ngii mambén ma Yéhôva. Di wan le jam jada li li ntééñga ngandak bagwal. Ngandak bôt i i nke i biloñ bipe inyu yéñ niñ, i gwé lem i ep minkéñéé nwap mi bon yak mut wap lihaa, inyu boñ le ba tééda bon bap, kayéle hala a hôla bagwal i ke ni bisu i yéñ ngandak moni nyoo loñ het ba nke. I yé mbale le, hala a yé makidik mut numpe a nla bé yoñ inyu yés, ndi di nlama yi le hiki wada wés a ga timbhe Yéhôva inyu makidik a nyoñ. (Añ Rôma 14:12.) Baa di ga unda le di gwé pék ibale di nyoñ makidik inyu lihaa jés, tole di mpohol i bôlô di ga boñ, ibabé wan ndugi  jam Bibel i nkal? I pot maliga, to! Di gwé ngôñ ni mahôla ma Isañ wés nu ngii, inyule bésbomede ni nyi bé téé makôô més ngéda di nke.​—Yérémia 10:23.

16. Kii muda wada a bi pohol i boñ i ngéda man wé nu munlôm a bi gwéé, kii i bi hôla nye i yoñ makidik malam?

¹⁶ Muda wada nu a bé niñ i loñ ipe, a bi gwal man munlôm. Ndi a kit le a ga ep man wé yak bagwal bé ba ba bi yégle i loñ yé, inyu boñ le ba ntééda man wé. Ndék ngéda i mbus ligwéé li man, Mbôgi Yéhôva yada i kahal nigil Bibel ni muda nu. A boñ mahol i pes mbuu, a nigil le, i néñés man wé kayéle yak nye a bégés Djob i bé mbegee Yéhôva a bi ti nye. (Tjémbi 127:3; Bingéngén 22:6) I muda nu a bi yible Yéhôva ñem wé, ndik kiki Bitilna bi nkal bés. (Tjémbi 62:8, 9) A bi yible ki mankéé nu muda nu a bé nigil Bibel ni nye ñem wé, a pôdôs ki bôt bape ikété likoda. To hala kii bôt bé ba lihaa ni mawanda mé, ba bé tinde nye le a ep man wé yak bagwal bé, i muda nu a bi kal bo le i boñ hala i ta bé jam li téé sép. Hala a bi hélés nlô wé mu kii a bé tehe kiki likoda li bi ba loñge lisolbene inyu nwaa wé ni man wé. Jon a bi neebe yigil i Bibel, a bôdôl ki ke i makoda ni nwaa bo man. Baa u nhoñol bé le i muda nu a bi nôgda le Yéhôva a ntimbhe masoohe mé? Di nla bé pééna le a bi nôgda hala.

17. Bimbe biniigana di bi kôhna inoñnaga ni bôt bés ni bo di nigil Bibel?

¹⁷ I noñ biniigana. Njel yada i unda Djob le di ntéñbe ni nye i yé ngéda di noñ biniigana di nkôhna ni njel ntôñ wé. Kii héga, di wan maéba ba bi ti bés, ma ma bé béñge bôt di niiga Bibel. Ba bi kal bés le ndék ngéda le di mal bôdôl yigil ni mut ikété kaat le Kii Bibel i niiga bés?, di nlama yoñ ndék manut i mbus hiki yigil inyu hôla bôt bés ni bo di nigil Bibel i tibil yi ntôñ u Yéhôva. Di nla boñ hala ngéda di ngwélél vidéô i i gwé ño nkwel le Kii i ntagbe i Ndap Ane?, ni man kaat nu a gwé ño nkwel le Bonjee ba mboñ sômbôl i Djob i len ini? Ba bi kal bés le ngéda di mal nigil ini kaat le Kii Bibel i niiga bés? ni ñudu nu a mboñ mahol i pes mbuu, di gwélél ini kaat le “Ni téédaga bébomede ikété gwéha Nyambe” inyu nigil ni ñudu nu, to ibale a nkôs sôble. Ntôñ u bi ti biniigana bi inyu boñ le banigil ba mondo ba “ôm ki makôô isi siñ siñ ikété hémle.” (Kôlôsé 2:7) Baa u noñ biniigana ntôñ u Yéhôva u nti?

18, 19. Mambe manjom di gwé i ti Yéhôva mayéga?

¹⁸ Di gwé ngandak manjom i ti Yéhôva mayéga! Nyen a nti bés niñ, inyu yé nyen di nhiumul, di yéne ki. (Minson mi baôma 17:27, 28) A nti bés tik likébla: Kaat yé le Bibel. Ni mayéga ikété ñem, di neebe le i yé toi Bañga i Djob, ndik kiki bikristen bi Tésalônika bi bi leege yo, bi neebe ki yo.​—1 Tésalônika  2:13.

¹⁹ Mu kii Djob a bi ti bés Kaat yé, di nkôôge nye bebee, yak nye a nkôôge bés bebee. (Yakôbô 4:8) Isañ wés nu ngii a bi ti bés lini likébla li mbuma ñañ: Di yé ikété ntôñ wé. Di ndiihe bisai bi iloo héga! Ntôptjémbi a bi tibil ntoñol hala ngéda a bi kal le: “Tina Yéhôva mayéga inyule a yé loñge, inyule loñge yé i nom mba ni mba.” (Tjémbi 136:1) Hiémbi 136 hi ntiimba bini bibañga le “inyule loñge yé i nom mba ni mba” môma ma ngélé ni isamal. Ibale di ntééda ndéñbe yés i pañ Yéhôva ni ntôñ wé, di ga tehe le bibañga bi, bi bi ntihba mimeñ nwés, bi yé toi maliga inyule di ga niñ i boga ni boga!