1, 2. (a) Yéhôva a bi kal le kii i ga tagbe munu ngéda yés? (b) Mambe mambadga ma ga kôhna mandimbhe munu yigil ini? (Béñge titii i bibôdle bi yigil.)

YÉHÔVA a bi kal le i ngéda yés, “jôm li bôlôm l’a kôbda mintômp mi libadô mi man Lôk Yuda, ba lôlak biloñ bi dilémp tjodisôna, ba kalak le: ‘Bés ni bé di kenek, inyule di bi nok le Nyambe a yé ni bé.’” (Sakaria 8:23) “Man Lôk Yuda” a yé yimbne i minhook Djob a nhoo ni mbuu mpubi. Ba nséblana ki le “Israél i Nyambe.” (Galatia 6:16) “Jôm li bôlôm” i yé yimbne i bôt ba gwé botñem i niñ i boga ni boga hana isi. Ba nyi le Yéhôva a nsayap unu ntôñ u minhook, ba tehge ki le hala a yé bisai bikeñi i bégés Yéhôva ni bo.

² Kiki mpôdôl Sakaria, yak Yésu a bi kal le litén li Djob l’a bana adna. A bi toñol le bet ba mbem niñ i ngii, ba yé “bémba titigi” ni le ba ba mbem niñ hana isi ba yé “mintômba mimpe.” Ndi Yésu a bi kal le bobasôna, ba ga ba “bémba yada” ni le ba ga noñ nye kiki “ntééda” wap. (Lukas 12:32; Yôhanes 10:16) Mu kiki ba yé mintoñ mi bôt ima, ngandak i nla badba le: (1) Baa mintômba mimpe mi nlama yi môl ma ba bobasôna ba yé minhook i len ini? (2) Lelaa minhook mi nlama tehe bomede? (3) I likoda jem, ibale mut  a mbôdôl je koga, a nyok ki wai, lelaa me nlama tehe nye? (4) Baa me gwé le me tôñ mu kii nsoñgi u ba ba nje koga, ba nyok ki wai i kel Bilôp bi Nwet u mbet ndigi bet ni bet? I yigil ini i ga timbhe mana mambadga.

3. Inyuki di nla bé yi ngi pééna yo ki yo, bonje ba ga ba mu nsoñgi u 144 000 bôt?

³ Baa mintômba mimpe mi gwé le mi yi môl ma minhook mi mi ngi yii hana isi i len ini? To. Inyuki? Inyule mut nye ki nye a nla bé ba nkwoog nkaa le bôt bana ba ga kôs nsaa wap. [1] (Béñge bibuk i mamélél ma yigil.) To hala kii Djob a nsébél bo i ke i ngii, ba ga kôs ndik nsaa wap ibale ba ntéñbe ni hémle yap. Satan a nyi hala, jon a ngwélél “bapôdôl ba bitembee” inyu noode “yumus” bo. (Matéô 24:24) Bikristen bi yé minhook bi nla bé ba nkwoog nkaa le bi ga kôs nsaa wap letee le Yéhôva a yis bo ngi pééna yo ki yo, le a ntehe toi bo kiki bôt ba telepsép. Bebeg le Yéhôva a nti bo buk yé i nsôk le ba nlémél nye ilole ba nwo, tole ndék ngéda nwaa le “njiiha keñi” i mbôdôl.​—Masoola 2:10; 7:3, 14.

4. Ibale di nla ni bé yi môl ma ba bobasôna ba yé minhook hana isi i len ini, lelaa di nla ni “ke” ni bo?

⁴ Ibale di nla bé yi môl ma ba bobasôna ba yé minhook hana isi i len ini, lelaa mintômba mimpe mi nla ni ‘ke ni’ bo? Bibel i nkal le jôm li bôlôm “l’a kôbda mintômp mi libadô mi man Lôk Yuda, . . . ba kalak le: ‘Bés ni bé di kenek, inyule di bi nok le Nyambe a yé ni bé.’” Bibel i nsima man Lôk Yuda wada. Ndi, ngéda i nkal le “bé” tole “ni bé,” i mpot inyu ngandak bôt. Hala a nkobla le man Lôk Yuda a ta ndik bé mut wada, ndi a yé yimbne i ngim ntôñ u minhook. Mintômba mimpe mi nyi hala, inyu hala nyen mi ngwélél Yéhôva ni ntôñ u. Ba gwé bé le ba yi môl, tole ba noñ hiki mut nu a yé mu ntôñ u. Yésu nyen a yé Ñéga wés, inyu hala nyen Bibel i nkal le di nlama ndik noñ nyetama.​—Matéô 23:10.

5. Mambe mabéhna minhook mi nlama tibil hoñol, ni inyuki?

⁵ Minhook mi nlama tibil hoñol mabéhna ma ma yé ntilbaga ikété kaat i 1 Korintô 11:27-29. (Añ.) I Bilôp bi Nwet, lelaa nhook u nla je koga, u nyo ki wai i “ndôñ i kôli bé”? Ibale mut a ntééda bé maada malam ni Yéhôva tole a ntéñbe bé ni nye, ndi a je koga, a nyo ki wai, wee a nti bé Yéhôva lipém. (Lôk Héber 6:4-6; 10:26-29) Mana mabéhna ma ngui ma nhôñlaha minhook le mi nlama téñbe mu maada map ni Djop ibale mi ngwés kôs “bom inyu nsébla Nyambe u nlôl ngii i Kristô Yésu.”​—Filipi 3:13-16.

6. Lelaa minhook mi bikristen mi ntehe bomede?

⁶ Paul a bi kal minhook mi bikristen le: “Me mut mamok i Nwet, me nsoohe bé le ni hiôm kikii i kôli ni nsébla ni bi séblana.” Lelaa ba bé lama boñ hala? Paul a ntoñol le: ‘Lôñni suhusnyu yosôna ni ñemlima, yak ni wongut. Ni hônbanaga bé ni bé ikété gwéha; ni nyamndaga yaga ki i tééda adna mbuu, le nsañ u at bé ni bé.’ (Efésô 4:1-3) Mbuu mpubi u Yéhôva u nhôla bagwélél bé i ba bôt ba suhulnyu, ni le ba  humbul bañ manyuu. (Kôlôsé 3:12) Jon, minhook mi nhoñol bé le mi yé loñge iloo bôt bape. Mi nyi le Yéhôva a nti bé minhook ngandak mbuu mpubi iloo bana bagwélél bé bape. Mi nhoñol bé to le mi nok biniigana bi Bibel iloo bôt bobasôna. Kekikel, mi ga kal bé mut to wada le yak nye a yé nhook, ni le a nlama bôdôl je koga ni nyo wai i Bilôp bi Nwet. Ndi, ni suhulnyu, mi nyi le Yéhôva nyetema nyen a nsébél bôt i ke niñ i ngii.

7, 8. Minhook mi bikristen mi nlama bé bem kii, ni inyuki?

⁷ To hala kii minhook mi ntehe le hala a yé bisai bikeñi le mi nséblana inyu ke i ngii, mi mbem bé le bôt bape ba leege nwo kiki mintôô mi bôt. (Efésô 1:18, 19; añ Filipi 2:2, 3.) Ba nyi ki le ngéda Yéhôva a bi tep bo, a bi yis bé bôt bape hala. Jon, hala a nhélés bé nhook ibale ngim bôt i nhémle bé kunda yada le a yé nhook. A nyi le Bibel i nkal bés le di hoo bañ hémle mut nu a nkal le Djob a nti nye nson u tôbôtôbô. (Masoola 2:2) Inyule nhook u mbem bé le bôt bape ba ti nye lipém li nlôôha, a ga kal bé bôt a mboma inyu ngélé bisu le a yé nhook. I pot maliga, a nla kit le a ga kal bé mut to wada jam li. A ga kadba bé to inyu bihélha bi mam a ga boñ i ngii.​—1 Korintô 1:28, 29; añ 1 Korintô 4:6-8.

⁸ Minhook mi bikristen mi nhoñol bé le mi nlama ndik tégbaha ngéda ni minhook mimpe, kiki bo wee ba yé bôt ba ngim boma i i yé tôbôtôbô. Ba noode bé toñ minhook mimpe inyu boñ le ba podok ndigi inyu mam ma mbéñge libak jap li minhook, tole ba nkodba ndik bo ni bo, inyu nigil Bibel ntôñ. (Galatia 1:15-17) Likoda li mbana bé adna ibale minhook mi mboñ hala. Ibale ba mboñ hala, wee ba nkolba mbuu mpubi, u u nhôla litén li Djop i bana adna ni nsañ.​—Añ Rôma 16:17, 18.

9. Inyuki u nlama yoñ matat ni lelaa u ntehe bôt ba nje koga, ba nyok ki wai i Bilôp bi Nwet? (Béñge matila ma gwé ño nkwel le “Gwéha ‘i nyeege bé jam.’”)

⁹ Lelaa u nlama tehe minhook mi bikristen mi bôlôm ni mi bôda? Yésu a bi kal banigil bé le: “Bé bobasôna ni yé lisañ li bôt.” A bi kônde ki kal le: “Tonjee a mbédés nyemede a’ suhlana, tonjee ki a nsuhus nyemede a’ bédhana.” (Matéô 23:8-12) Jon, hala a nla bé ba loñge jam i bégés mut nye ki nye iloo héga, to ibale mut nu a yé nhook maasañ nu Kristô. Ngéda Bibel i mpôdôl mimañ, i nti bés makénd i kôna hémle yap, ndi i nkal bé bés le di nlama yoñ mut binam nye ki nye kiki ñéga wés. (Lôk Héber 13:7) I yé mbale le Bibel i nkal le ngim bôt i “kôli kôs lipém môga ima.” Hala a yé inyule ba “ntééda ntôñ loñge” ni le ba “ntumbba i añal ni niiga,” ndi ha inyu bé le ba yé minhook. (1 Timôtéô 5:17) Ibale di nti minhook ngandak bibégés ni lipém, hala a ga tééñga bo. Ndi li li nlôôha ba béba li yé le, di nla tinde bo i yila ngôk. (Rôma 12:3) To mut to wada ikété yés a nsômbôl bé boñ jam jo ki jo, li li nla ba ngok baageene keñi inyu lôkisañ i Kristô!​—Lukas 17:2.

10. Lelaa u nla unda le u nti minhook mi bikristen lipém?

¹⁰ Lelaa di nla unda le di nti minhook mi Yéhôva lipém? Di nlama bé bat bo lelaa ba bi yila minhook. Li jam, li mbéñge ndik botama, jon di gwé bé  kunde i yi jo. (1 Tésalônika 4:11; 2 Tésalônika 3:11) Di nlama bé ki to hoñol le balôm bap, baa bap, bagwal bap, tole bôt bape ikété lihaa jap, ba yé minhook. Mut a nkôdôl bé i botñem i ni njel lihaa jé. (1 Tésalônika 2:12) Di nlama keñgle i bat mambadga ma ma nla babaa bôt bape. Kii héga, di nlama bé bat nwaa mankéé nu a yé nhook lelaa a ntehe botñem i niñ i boga ni boga hana isi ngi nlô wé. Mbale i yé le, di yé nkwoog nkaa le i mbok yondo, Yéhôva a ga “nuus ki ngôñ i hi yom i gwé niñ.”​—Tjémbi 145:16.

11. Lelaa di nsôñ bésbomede ibale di nkeñgle i ‘bibil bôt lélé’?

¹¹ Ibale di ntehe bé minhook kiki bôt ba nlee bape, hala a nsôñ ki bés. Lelaa? Bibel i nkal bés le “lôktata i bihéñba” i nla ba ikété likoda, i kalak ki le i yé minhook. (Galatia 2:4, 5; 1 Yôhanes 2:19) Ni ki le, ngim minhook i ga téñbe bé ni Yéhôva ikepam lisuk. (Matéô 25:10-12; 2 Pétrô 2:20, 21) Ndi, ibale di nkeñgle i ‘bibil bôt lélé,’ di ga noñ bé bôt bape, to ibale ba yé minhook, to lôk kéé i i nyiba, to ba ba ngwélél Yéhôva hala a yé ntandaa ngéda. Jon, ibale ba ntéñbe bé i gwélél Yéhôva tole ba ntjôô likoda, bés di ga nimis bé hémle yés, di ga waa bé to gwélél Yéhôva.​—Yuda 16.

12, 13. Inyuki nsoñgi u ba ba nje koga, ba nyok ki wai i Bilôp bi Nwet u nlama bé tééñga bés?

¹² Ikété ngandak ñwii i i bi tagbe, nsoñgi u ba ba nje koga, ba nyok wai i Bilôp bi Nwet u bé sôs. Ndi munu ñwii mini mi nsôk, nsoñgi wap u mbet ndigi hiki ñwii, bet ni bet. Baa hala a nlama tééñga bés? To. Di wan le inyuki di nkal hala.

¹³ ‘Yéhôva a nyi ba ba yé bé.’ (2 Timôtéô 2:19) Bilôk bikéé bi bi nsoñgol ba ba nje koga, ba nyok ki wai i Bilôp bi Nwet, bi yé mahéñha ni Yéhôva, inyule bo ba nyi bé bôt ba yé toi minhook. Jon, mu nsoñgi wap, ba nsoñgol yak bôt ba nhoñol le ba yé minhook, ndi ki le ba ta bé. Kii héga, ngandak ikété ba ba nje koga, ba nyok ki wai, ba bi sôk ba waa boñ hala. Bape, ba miño mi mpungla bo, tole ba ban-ga kon u mahoñol, ba nhémle le ba ga ane ni Kristô i ngii. Ntiik, di nyi toi bé minhook nwañen mi ngi yii hana isi.

14. Kii Bibel i nkal inyu nsoñgi u minhook mi mi mba mi ngi yii hana isi ngéda njiiha keñi i mbôdôl?

¹⁴ Minhook mi ga ba i ngandak bahoma munu isi ngéda Yésu a ga kena bo i ngii. Bibel i nkal le Yésu “a’ om añgel yé ni mbimba keñi i sép, y’a kot mintebek nwé mi lôlak mbebi ina, ibôdôl lisuk li ngii jada letee ni lii.” (Matéô 24:31) Bibel i ñunda ki le i dilo  di nsôk, ndék minhook i mba i ngi yii hana isi. (Masoola 12:17) Ndi Bibel i nti bé nsoñgi u minhook mi mi mba mi ngi yii hana isi ngéda njiiha keñi i mbôdôl.

15, 16. Kii di nlama yi inyu 144 000 bôt Yéhôva a mpohol?

¹⁵ Yéhôva nyen a nkit inyu ngéda a ga pohol minhook. (Rôma 8:28-30) Yéhôva a bi bôdôl pohol minhook i mbus bitugne bi Yésu. I nene le, i ngéda banigil ba bisu, bañga bikristen yosôna i bé minhook. Mbôgôl i ñwii mbus ha, libim ikété bet ba bé kadba le ba yé bikristen, li bi noñ bé Yésu ni maliga. Kiki Yésu a bi kal, ba bé bambômbônga ba ba bé nañ ikété blé. (Matéô 13:24-30) Munu dilo di nsôk, Yéhôva a bi ke ni bisu i pohol bôt inyu ba ikété 144 000 bôt. [2] (Beñge bibuk i mamélél ma yigil.) Jon ibale Djob a nkit le a mpohol ngim bôt ndék ngéda ilole lisuk li nlo, di ga pééna bé le a yé boñ loñge jam. (Yésaya 45:9; Daniel 4:35; añ Rôma 9:11, 16.) [3] (Beñge bibuk i mamélél ma yigil.) Di nlama yoñ yihe le di kôna bañ baboñnson ba ba bé tjelel, inyu jam nwet bôlô wap a bé boñ ni bôt ba bi bôdôl sal i ngeñ i nsôk.​—Añ Matéô 20:8-15.

¹⁶ Ba bobasôna ba gwé botñem i niñ i ngii bé bon ba yé “nkol u maliga ni u pék.” (Matéô 24:45-47) Ndik kiki ngéda bikristen bi bisu, Yéhôva ni Yésu ba ngwélél ndik ndék bôt inyu jés tole niiga bana bape i len ini. Ndék minhook mi bikristen ndik yon i bi gwélana inyu tila bipes bi Bitilna bi kristen ni hop u Grikia. Yak i len ini, ndék minhook ki yon i gwé bôlô i ti litén li Djob “bijek ngéda litine.”

17. Kii di nok munu i yigil ini?

¹⁷ Kii di nok munu yigil ini? Yéhôva a nkit le a ga ti libim li bôt niñ boga hana isi, ni le a ga ti bôt ba ga ane ni Yésu niñ i ngii. Yéhôva a nsayap bagwélél bé bobasôna, hala wee “man Lôk Yuda” ni “jôm li bôlôm.” A mbem ki le bobasôna ba nôgôl minlélém mi mambén, ba téñbe ki i gwélél nye. Bobasôna ba nlama bana suhulnyu. Bobasôna ba nlama gwélél nye ntôñ, ba ban-ga ki adna. Bobasôna ba nlama ki sal inyu tééda nsañ ikété likoda. Kiki di nkôôge lisuk bebee, bés bobasôna di ke ni bisu i gwélél Yéhôva, ni i noñ Kristô kiki bémba yada.