Yéhôva a bi ti Ezékiel ñwin u hogbe, a bôn adna i litén li Israél i mbus matémb map i loñ i likak. Ñwin unu u bi pot ki i bisu bi ngéda inyu adna litén li Djob li ga témb li bana i dilo di nsôk.

Yéhôva a bi kal mpôdôl Ezékiel le a tila i ngii bikék biba. A bé lama tila ngii kék yada le: “Inyu Yuda ni bon ba Israél ba yé basolôñ bé.” A yoñ ki kék ipe, a tila mu le: “Inyu Yôsef, kék i Éfraim ni ngim ndap Israél i yé basolôñ bé.” Bikék bi gwo biba bi bé lama “yila kék yada” ikété woo Ezékiel.​—Ezékiel 37:15-17.

 Ini buk le “Éfraim” i ngwélana inyu bonjee? Yérôbôam nyen a bé kiñe bisu i jôm li matén ma ño mbok. A bé lôl i litén li Éfraim, li li bé lel mana matén mape ngui. (Ndiimba Mbén 33:13, 17; 1 Bikiñe 11:26) Litén li li bé lôl ni Éfraim, man Yôsef. (Ñanga bôt 1:32, 33) Yakôb a bi ti man wé Yôsef bisai bi tôbôtôbô. Jon hala a bé jam li kôli le “kék i Éfraim” i gwélana i pot inyu ane i jôm li matén. Bon ba Asiria ba bi kena bôt ba ane i ño mbok i Israél i minkôm, ntandaa ngéda ilole Ezékiel a ntila mbañ i bikék biba. Hala a bi tagbe i ñwii 740 B.N.Y. (2 Bikiñe 17:6) Jon ha ngéda i, libim li bana bon ba Israél li bé ntjamak ikété minkoñ nwominsôna, mi mi bé isi énél i loñ i Babilôn i i bi yémbél énél i Asiria.

I ñwii 607 B.N.Y., bebeg le bôt ba ane i ño mbok ba ba bi yégle, ni bôt ba ane i matén ima, ba bi ke i minkôm i Babilôn. Bikiñe bi bé lôl mu mbôda i Yuda, gwon bi bé ane matén mana moma, bi ban-ga ki nson u biprisi isi yap, inyule biprisi bi bé gwel nson ikété témpel i Yérusalem. (2 Miñañ 11:13, 14; 34:30) Jon hala a bé jam li kôli le “kék i Yuda” i gwélana i pot inyu ane i matén ima.

Imbe ngéda ba bi at bini bikék gwo biba? I ngéda Lôk Israél i bi témb i Yérusalem inyu tiimba oñ témpel i ñwii 537 B.N.Y. Bôt ba ane i matén ima, ni bôt ba ane i jôm li matén, ba bi témb lôñ i mbus minkôm. Litén li Israél li bé ha bé ki nkabak. (Ezékiel 37:21, 22) Lôk Israél i bé bégés ki Yéhôva ntôñ. Maada malam mana ba bi témb ba bana ma bi pôda i bisu bi ngéda ni njel bapôdôl le Yésaya bo Yérémia.​—Yésaya 11:12, 13; Yérémia 31:1, 6, 31.

Mambe maliga ma tôbôtôbô mbañ ini i niiga bés i béñge bibégés bipubi? I niiga bés le Yéhôva a ga boñ le bagwélél bé ba ba ‘wada.’ (Ezékiel 37:18, 19) Baa ini mbañ inyu adna, i nyon i ngéda yés? Ñ. Ini mbañ i bi bôdôl yon i ñwii 1919, ngéda ndék ni ndék, litén li Djob li bi témb li tjek mam mé loñge, li bana ki adna ipôla yap. Biliya bi Satan inyu bagal bo, bagal yosôna, bi bi kwo i malép.

Ha ngéda i, libim li bôt li bi témb li adba, li bééna botñem i yila bikiñe ni biprisi i ngii ni Yésu. (Masoola 20:6) Jon ba bé kiki kék i Yuda. Ndi kiki ngéda i bé tagbe, hala nyen nsoñgi u bôt ba gwé botñem i niñ i hana isi u bé bet ndigi, bet ni bet, kayéle ba bôdôl adba ni bon ba Lôk Yuda i pes mbuu. (Sakaria 8:23) Ba bé kiki kék Yôsef. Ba bééna bé botñem i ane ni Yésu.

Mintôñ mini nwo ima mi nsal ntôñ i len ini kiki litén li Yéhôva, isi Kiñe yada le Yésu Kristô, nu mbañ i nsébél le “nkol wem le David.” (Ezékiel 37:24, 25) Yésu a bi soohe le banigil bé bobasôna ‘ba ba wada, ndik kiki Isañ bo nye ba gwé adna, yak nye ni Isañ ba ban-ga adna.’ * (Yôhanes 17:20, 21) Yésu a bi pot i bisu bi ngéda le bémba yé titigi i minhook, i ga yila “bémba yada” ni “mintômba mimpe.” Bobasôna ba ga ba isi “ntééda wada.” (Yôhanes 10:16) Bibañga bi Yésu bi ntibil yaga toñol adna i pes i mbuu, i i ga ba ikété litén li Yéhôva i len ini, ibabé béñge ntén botñem hiki wada wap a gwé inyu dilo di nlo!