BÔT BA BINAM

Kii Bibel i nkal: Djob “a bi hek bé [hisi] yañga, ndi a bi uñgus hio le bôt ba yééne mu.”​—YÉSAYA 45:18.

HISI HIOMEDE

Kii Bibel i nkal: “Hiai hiada hi ntagbe, hiai hipe hi loo, ndi hisi hi nom i boga ni boga.”‏​—ÑAÑAL 1:4.

KII HALA A NKOBLA: Kiki Bibel i ñunda, hisi hi ga tjiba bé kekikel, bôt ba ga yén mu. Jon, kii i yé ni lisuk li nkoñ ’isi?

DI BÉÑGE KI: Bibel i nhégha lisuk li nkoñ ’isi ni i yom i bi bôña i dilo di Nôa. Ha i ngéda i, hisi hi bé ‘nyonok ni bisañ.’ (Bibôdle 6:13) Ndi Nôa nye a bé mut a téé sép. Jon Nyambe a bi sôñ Nôa ni lihaa jé, ndi a nol bibéba bi bôt ni ntida nyemb malép. Inyu pôdôl i jam li bi tagbe ha i ngéda, Bibel i nkal le: “Nkoñ ’isi ha ngéda i u bi tjiba mu kiki malép ma bi hô hisi.” (2 Pétrô 3:6) Lisuk li nkoñ ’isi li bi ba ha i ngéda i. Ndi kii i bi tjiba? Hisi hi bi tjiba bé, ndi bôt ba binam bon ba bi tjiba. Jon, i ngéda Bibel i mpôdôl lisuk li nkoñ ’isi, i mpôdôl bé lisuk tole tjiba i hisi hiomede. Ndi, i mpôdôl lisuk li bibéba bi bôt hana ’isi ni mam mabe ba mboñ.

MANDUTU NI BÉBA

Kii Bibel i nkal: “Ndék ngéda ndigi, bibéba bi bôt bi ga ba ha bé; ñ, u ga béñge i homa ba bé, ndi u ga tehe ha bé bo. Ndi bôt ba suhulnyuu ba ga kôdôl hisi, ba nok ki lingoñoo inyu ngandak nsañ.”​—TJÉMBI 37:10, 11.

KII HALA A NKOBLA: Ntida malép i ngéda Nôa u bi mélés bé bibéba bi bôt ngélé yada inyu ngélé yosôna. I mbus Ntida malép, bibéba bi bôt bi bi témb bi bôdôl ki boñ le niñ i let. Ndék ngéda wee Nyambe a mélés béba ngélé yada inyu ngélé yosôna. Ndik kiki ntôp tjémbi a kal: “Bibéba bi bôt bi ga ba ha bé.” Ni njel Ane yé, Nyambe a ga mélés béba, Ane i ngii i ga énél bôt ba binam ba ba téé sép.

DI BÉÑGE KI: Baa biane bi yé hana ’isi i len ini bi ga kon maséé ni Ane Djob? Bibel i nkal le bi ga ba bé maséé. Bi ga bep kolba Ane Djob (Tjémbi 2:2) Mam ma ga sôk lelaa? Ane Djob i ga tjé biane bi bôt ba binam gwobisôna, “yotama yon i ga nom i boga ni boga.” (Daniel 2:44) Ndi inyuki biane bi bôt ba binam nlama mal?

Kii Bibel i nkal: “Mut binam a nla bé éga nyemede.”​—YÉRÉMIA 10:23.

KII HALA A NKOBLA: Djob a bi hek bé bôt ba binam le ba énél bomede. Ba mpam bé i énél bôt bape loñge, to i mélés mandutu map.

DI BÉÑGE KI: Kaat yada le Britannica Academic i nkal le ane i nkoñ ’isi to yada i mpam bé i “yémbél mandutu ma nkoñ ’isi kiki bo liyep, njal, makon, bikuu ni gwét tole mam mabe mape.” I nke ni bisu i kal le: “Bôt bahogi . . . ba nhoñol le i mbéda ngim ane i i ñénél nkoñ ’isi wonsôna inyu mélés i mam mabe ma momasôna.” Ndi to ibale biane bi nkoñ ’isi wonsôna bi nôgla, nkoñ ’isi u ga ba ndik isi énél i bikwéha bi bôt bi bi nla bé mélés mandutu di nsima. Ane Djob yotama yon i gwé ngui i mélés mandutu ma nkoñ ’isi ngélé yada inyu ngélé yosôna.

Ndi kiki Bibel i ñunda, lisuk li nkoñ ’isi, hala wee li béba hiai ini, li ta bé jam li nlama kônha biloñge bi bôt woñi. Ndi li yé jam ba mbem ni ñem wap wonsôna, inyule Djob a ga tjé i béba nkoñ ’ini, a lona mbok yondo!

Imbe ngéda i mam ma ma ga bôña? Nkwel u noñ u ga ti ndimbhe i Bibel mu mbadga i.