“Jon, yéna péé ibabé waa inyule ni nyi bé kel to ngeñ.”​—MATÉÔ 25:13.

“Yoña yihe ibabé waa, yéna péé ibabé waa, inyule ni nyi bé imbe ngeñ i yé ntéak ngéda.”​—MARKÔ 13:33.

Mut nye ki nye hana ’isi a nyi bé i kel lisuk li nkoñ ’isi li ga loo. Ndi, Bibel i ñunda le Nyambe a ntéé ngim ngéda, tole ngim ‘kel ni ngeñ’ inyu lisuk. (Matéô 24:36) Baa hala a nsômbôl kal le njel yo ki yo i ta bé inyu yi i ngéda lisuk li ga kôôge bebee? Di nla bé kal hala. Yésu a bi kal banigil bé le ba béñge ngim mam i i ga unda le lisuk li yé bebee.

I mam mana mon ma ga ba yimbne le “nkoñ ’isi unu u yé mamélél.” Yésu a kal le: “Inyule loñ y’a telep ikolba loñ, yak ane i kolba ane; njal ikeñi y’a ba, yak nyeñg disi bahoma bahoma.” (Matéô 24:3, 7) A bi kal ki le “dimala” di ga ba. (Lukas 21:11) Baa ni ntehe i mam Yésu a bi kal ma nyon?

I len ini, gwét, njal ni nyeñg disi bi nai nkoñ ’isi. Kiki hihéga i nwii 2004, hisi hi bi nyeñg béba ngandak i Tuye India, hala a boñ le malép ma mbet nkoñ, ma nol 225 000 bôt. Himala hi kon hini le COVID-19, hi hi bi nom nwii maa, hi nol bebee le didun 7 di bôt ni nkoñ ’isi wonsôna. Yésu a bi kal le i nya mam ini i ga ba yimbne le lisuk li nkoñ ’isi li nkôôge bebee.

Inyu pôdôl i ngéda i ga bôk tagbe ilole lisuk li nlo, Bibel i ngwélél bibuk bini le “dilo di nsôk.” (2 Pétrô 3:3, 4) Kaat i nyônôs iba i Timôtéô 3:1-5 i nkal le i dilo di nsôk bôt ba ga bana bilem bibe kiyaga. (Béñge minkéñék mi matila “ Ndék ngéda ilole lisuk li nkoñ ’isi li nlo.”) Baa i len ini, di ntehe bôt ba ngwés ndigi bomede, ba nhép nkus, bôt ba ngwés njôô, ni ba ba ngwés bé bôt bape? Hala a ñunda le lisuk li nkoñ ’isi li gwé ni moo tole li yé bebee.

Dilo di nsôk di ga nom dilo tjañen? Bibel i nkal le, ndigi “ndék ngéda.” I mbus, Nyambe a ga tjé “bôt ba ba ñôbôs hisi.”​—Masoola 11:15-18; 12:12.

Nyambe a mal téé kel ni ngeñ a ga tjé i béba nkoñ ’isi ini. (Matéô 24:36) Nwin nlam umpe u yé le, Nyambe “a nsômbôl bé le mut nye ki nye a tjiba.” (2 Pétrô 3:9) Jon a nti bôt ba binam pôla le ba nigil matiñ mé, ba noñ ki mo. Inyuki? Inyule a gwé ngôñ le di pei i lisuk li nkoñ ’isi unu, di niñ i mbok yondo, i ngéda hisi hi ga ba paradis.

Nyambe a nyoñ bitelbene le mintén mi bôt nwominsôna mi nigil kii mi nla boñ inyu ba i mbok yondo. Yésu a bi kal le ñañ nlam u Ane u ga añlana “ni nkoñ ’isi wonsôna.” (Matéô 24:14) Ni nkoñ ’isi wonsôna, Mbôgi Yéhôva i ntégbaha didun ndi didun di ngeñ i añal ñañ nlam ni i niiga bôt nwin u botñem u u yé ikété Bibel. Yésu a bi kal le i hônd i likalô i, i ga bôña ni hisi hiosôna ilole lisuk li nlo.

Ndék ngéda, wee énél i bôt ba binam i mal. Ndi, nwin nlam u yé le, u nla pei i lisuk li nkoñ ’isi unu, inyu niñ i hisi hi ma yila Paradis Nyambe a mbôn. I yigil i noñ i ñunda i yom u nlama boñ inyu niñ mu mbok yondo i.