Ndék ngéda, i ngeñ Ane Djob i i yé i ngii i ga yoñ mam ma hisi, i ga énél bôt ba binam bobasôna, i boñ le hisi hi yila loñge homa liyééne i het bôt ba niñ ikété nsañ, ba ban-ga bôlô i i nti bo maséé. Nyambe a bi pohol Yésu Kristô inyu ane hisi. Maselna ni ngandak baane i len ini, Yésu a ga sal ndigi inyu loñge i bôt bé. A ga ane bo ni ngandak gwéha, a ga ba nyonok ni loñgeñem, ni konangoo lôñni telepsép.​—Yésaya 11:4.

I bôt ba ga niñ ha yo ngéda ba ga ba litén jada. Mbagla matén i ga ba ha bé, to i biloñ. (Masoola 7:9, 10) I bôt bobasôna ba ga niñ ’isi, ba ga gwés Nyambe ni mut wap libôk, ba ga sal ikété adna ni nsañ inyu yônôs i njômbi Djob a bééna inyu hisi, le ba bôñgôl hio.​—Tjémbi 115:16.

Ngéda Ane Djob i ga énél hisi, Nhek nyemede a ga yoñ yihe le makék ni mangéda ma tééñga ha bañ bôt ba binam. (Tjémbi 24:1, 2) Ngéda Yésu a bé hana ’isi, a bi unda bés i sii likala i ngui Isañ a nti nye. A bi mômôs soso mbuk mbebi ni ndék bibuk ndigi. (Markô 4:39, 41) Jon, i ngéda a ga ane, bôt ba ga kon ha bé bikuu woñi. Ane Djob i ga témb i boñ le manôgla ma ba ipôla bôt ba binam ni binuga, batjé hisi b’a ba ha bé.​—Hôséa 2:18.

Bôt bobasôna ba ga ba mbôô. Mut nye ki nye a’ kon bé, to un, to nyemb y’a ba ha bé. (Yésaya 35:5, 6) Mbok yosôna i ga ba mapubi ni nlam kiki a ba i wom Éden u bisu. Hisi hi ga témb hi ti ngandak bijek kiki i paradis. (Bibôdle 2:9) Kiki i ba i nlômbi Israel, hiki mut ‘a ga je bijek gwé letee a nuu.’​—Lôk Lévi 26:4, 5.

I si énél Djob, bôt bobasôna ba ga niñ ikété nsañ, ba undga wada ni nuu loñgeñem ni telepsép. Gwét bi ga ba ha bé, to énél i mbanda, mut a ga tumbba ha bé inyu bana koga kel. Bibel i mbôn le: “Ba ga yén, hiki mut isi nkôô wé wai ni e yé faigé, mut nye ki nye a ga kônha bé bo woñi.”​—Mika 4:3, 4.

Hiki lihaa li ga bana yé ndap, ibabé i kon woñi le ba ti ga pémés bo mu. Hiki mut a ga bana bôlô i i nti nye maséé. Bibel i nkal le i bôt ba ga niñ i mbok yondo “ba ga tumbba bé yañga.”​—Yésaya 65:21-23.

Bibel i mbôn le: “Hisi hi ga yon ni yi i Yéhôva.” (Yésaya 11:9) I bôt ba ga niñ i mbok yondo b’a nigil ngandak mu pék i mbuma ñañ i Nhek wap, le Yéhôva, ni mu bihégél gwé bilam. Ba ga ôbôs bé yi yap inyu inyu bañ mangaa, tole inyu boñ bôt béba. (Yésaya 2:4) Maselna ni hala, ba ga nigil i niñ ikété nsañ, ni i yoñ ndun ni hisi.​—Tjémbi 37:11.

Nyambe a bi tibil kôôba hisi inyu boñ di niñ loñge hiki kel. A bé gwés le bôt ba binam ba niñ i boga ni boga. (Tjémbi 37:29; Yésaya 45:18) Inyu yônôs njômbi yé i bisu bisu, Nyambe “a ga mélés nyemb i boga ni boga.” (Yésaya 25:8) Bibel i mbôn le: “Nyemb y’a ba ha bé, to maéya, to nlondok, to njôghe bi ga ba ha bé.” (Masoola 21:4) Nyambe a ga ti bôt bobasôna pôla i niñ i boga ni boga, mu nsoñgi wap, di gwé i bôt ba ga pei tjiba i béba nkoñ ’isi ini, ni didun ndi didun di bôt di di ga lo i bitugne.​—Yôhanes 5:28, 29; Minson mi baôma 24:15.

 Didun di bôt di yé i kôôba i niñ i si Ane Djob ibôdôl nano. Tolakii yak bo ba yé kwéha, ba mboñ biliya i ba mintén mi bôt Nyambe a nyéñ inyu mbok yondo. Lelaa? Ba nigil i yi njee a yé Yéhôva Nyambe yak ni i nwet a bi om, le Yésu Kristô.​—Yôhanes 17:3.

Léba biniigana bipe bi bi nla hôla we i yi lelaa u nla pei tjiba i nkoñ ’isi unu, inyu jôp i mbok yondo i i yé bebee. U nla bat Mbôgi Yéhôva yada le i nigil Bibel ni we i kaat ini le Niñ ilam i boga ni boga!