I minkwel mi ntagbe mi ñunda le ndék ngéda, Djob a ga tjé i béba nkoñ ’isi ini, a mélés ki mandutu ma bôt ba binam. Di nla ba nkwoog nkaa le i mam ma ma ga bôña toi. Inyuki? Inyule Djob a mbôn ikété Bañga yé le:

“Nkoñ ’isi u yé i tagbe.”​—1 YÔHANES 2:17.

Di nla ba nwkoog nkaa le bôt ba ga pei mu tjiba i inyule i pes kaat di mbôk di sima i nkônde le:

“I mut a mboñ sômbôl i Nyambe a ga niñ i boga ni boga.”

Jon, i mut a gwé ngôñ i pei a nlama boñ sômbôl i Nyambe. Inyu yi kii i yé sômbôl i Nyambe, di nlama ndugi yi nye.

Yésu a bi kal le: “I jam lini jon li nkena i niñ boga, le ba nigil i yi we, bañga mpom Nyambe wada, ni nu u bi ep le Yésu Kristô.” (Yôhanes 17:3) Inyu pei i tjiba i nkôñ ’isi unu ni i kôhna niñ boga, di nlama “nigil i yi” Nyambe. Di nlama bé ndik neebe le a yé, ni yi ndék mam inyu yé. Di nlama yila mawanda mé. Kiki u ntégbaha ngéda ni liwanda joñ inyu lédés maada manan, hala nyen u nlama yoñ ngéda inyu yi Nyambe. Di wan ndék biniigana bi mahee bi bi nla hôla bés i lédés maada més ni Djob.

Di nje hiki kel inyu niñ. Ndi Yésu a bi kal le: “Mut binam a niñil ndik bé inyu bijek, ndi i nôgôl hiki bañga i mpémél i nyo u Yéhôva.”​—Matéô 4:4.

I len ini, di nléba bibañga bi Djob ikété Bibel. Ibale u nigil yo, u ga léba i mam Nyambe a bi bôñôl bôt i ngéda kôba, i ngéda yés, ni ma a ga boñ i dilo di nlo.

Kii u nla boñ ibale u nyéñ noñ biniigana bi Nyambe ndi u tehge le bi yé ndutu i bii i bisélél? Ibale u nyi toi Djob, hala a ga hôla we ngandak.

Muda wada di ga sébél le Sakura a bééna niñ i nyega. I ngéda a bi bôdôl nigil Bibel, a nok i mbén ini le: “Kena malal ma nyega ngwéé.” (1 Korintô 6:18) Sakura a bi soohe Yéhôva le a hôla nye i yémbél i béba i, a pam ki i boñ hala. Ndi a ngi kenek ni bisu i jôs mahoñol mabe. A nkal le: “Ibale mahoñol ma nyega ma nlôl me, me nkal Yéhôva mam momasôna ikété masoohe, inyule me nyi le, me nla bé jo i sañ i metama. Masoohe ma bi boñ le me kôôge bebee ni Yéhôva.” Kiki Sakura, didun di bôt di bi pam i yi Nyambe. Djob a nti bo ngui i lona mahéñha mu niñ yap inyu pam i lémél nye.​—Filipi 4:13.

Ibale u nke ni bisu i yi Nyambe loñge loñge, hala nyen yak ‘Nyambe a ga yi we,’ a ga yoñ we kiki liwanda jé. (Galatia 4:9; Tjémbi 25:14) Ha nyen u ga pam i pei i tjiba i nkoñ ’isi unu ni i jôp i mbok yondo. Ndi lelaa mbok yondo i ga ba? I nkwel u noñ u ga timbhe mbadga i.