BAA U YÉ TOI LE U POHOL LELAA BILÔL GWOÑ BI GA BA? Ngim bôt i nhémle le niñ yés i yé ntilbaga ibôdôl behee, le di nla bé héñha yo. Ngéda ba nla bé yônôs sômbôl yap, ba yé ba sôk kal le nya ipe i ta ha bé. Inyule ba nkal le: “I bé ntilbaga le m’a la bé boñ i jam li.”

Bape ba yé ba nimis makénd map ngéda ba ntehe le ba gwé bé njel i pamba munu nkoñ isi u njiiha ni ngitelepsép. Ba bi yéñ ngandak manjel inyu boñ le niñ yap i ba loñge​—ndi yom ba bi sôk tehe i yé gwét, manola, nyeñg disi, makon, gwon bi nkéñ bo i yônôs njômbi yap. Jon ba yé ba badba le: ‘Di ntééñgana kii nyuu?’

I yé maliga le mimpuhge mi mam mi nla pémél bés kayéle di la bé yônôs njômbi yés. (Ñañal 9:11) Ndi inyu jam li mbéñge bilôl gwoñ, u gwé toi kunde i pohol. Jon Bibel i ntoñol le we nyen u mpohol lelaa bilôl gwoñ bi ga ba. Béñge kii i nkal.

Môsi, nkena litén li Israél i ngéda kôba, kiki li bé bebee ni jôp Hisi hi Likak, a kal jo le: “Me ntéé niñ ni nyemp bisu gwoñ, masoda ni ndiihe; jon tep niñ, le ndi u niñ, wemede ni mbôô yoñ, i gwés Yéhôva Nyambe woñ, i nôgôl kiñ yé, i adbe ki nye.”​—Ndiimba Mbén 30:15, 19, 20.

“Me ntéé niñ ni nyemp bisu gwoñ, masoda ni ndiihe; jon tep niñ.”​—Ndiimba Mbén 30:19

Ñ! Djob a bi péyés Lôk Israél minkôm i Égiptô, a ti ki bo kunde i pohol niñ i nsañ ni i maséé i Hisi hi Likak. Ndi bisai bi, bi bé bé le bi kwél ndik bo hala yañga, bo ngi boñ to yom. Ba bé le ba kôhna bisai bini, ibale ba “pohol niñ.” Lelaa ba bé le ba boñ hala? ‘Ibale ba ngwés Djob, ba nôglak nye, ba adbege ki nye.’

I len ini, yak we u gwé kunde i pohol. I yom u mpohol yon i ñunda lelaa bilôl gwoñ bi ga ba. Ngéda u mpohol i gwés Djob, u tibil ki emble yom a nkal we, u adbege ki nye, ha nyen u ñunda le u mpohol niñ​—niñ boga ikété paradis hana isi. Ndi matode ma di nsima, kii hiki jada li nkobla? 

Gwéha i yé lem bisu i Djob. Ñôma Yôhanes a bi kal le: “Nyambe a yé gwéha.” (1 Yôhanes 4:8) Inyu hala nyen, ngéda ba bi bat Yésu le imbe mbén i nlel mambén momasôna, a bi timbhe le: “U gwéhék Nwet le [Yéhôva] Nyambe woñ ni ñem woñ wonsôna, ni nom yoñ yosôna, ni mahoñol moñ momasôna.” (Matéô 22:37) Bañga gwéha yon i nla boñ le di bana maada malam ni Yéhôva Djob, ndi he woñi bé tole yi yotama. Jon, inyuki di nlama pohol i gwés nye?

Gwéha Yéhôva i yé kiki gwéha bagwal ba gwé inyu bon bap. Tolakii ba ta bé peles, bagwal ba ba ngwés bon bap ba niiga bo, ba nti bo makénd, ba nit bo, ba nkodol ki bo, inyule ba ngwés le ba ba maséé, ba bana ki lisuk lilam. Kii yak bagwal ba mbémél bon bap? Ba mbem le bon bap ba gwés bo, ba diihe ki mam ba bi niiga bo inyu yéñe yap. Baa Isañ wés nu ngii a kôli bé  ni gwéha yés inyu mam momasôna a bi bôñôl bés?

Ni hilémb ba bi gwélél inyu tila Bibel, ini buk le “emble” i nla kobla ki le “nôgôl.” Baa hala bé nyen i yé i ngéda di ngwés kal mañge le: “Emble bagwal boñ?” Jon, ngéda di ñemble kiñ Djob, hala a nkobla le di nigil, di nôgôl ki i yom a nkal bés. Tolakii di nla bé nok kiñ Djob ni maôô més, di nla emble nye ngéda di ñañ, di boñok ki mam ma yé ikété Bañga yé le Bibel.​—1 Yôhanes 5:3.

Kel yada, inyu unda bés nseñ u yé i nôgôl kiñ Djob, Yésu a kal le: “Mut a’ niñil bé inyu koga yotama, ndi ndik inyu hiki bañga i mpémél i nyo [Yéhôva] Nyambe.” (Matéô 4:4) Kiki bijek bi yé bés nseñ, hala nyen li yi Djob li nlôôha ba bés nseñ. Inyuki? Mut pék wada le Kiñe Salômô a bi toñol le: “Pék i nsôñ mut, kiki yak moni mi nsôñ nye, ndi yi i gwé nseñ, pék i niñis nu a gwé yo.” (Ñañal 7:12) Yi ni pék bi bi nlôl ni Djob, bi nla tat bés ibôdôl len; bi nhôla ki bés i yi yoñ makidik ma ma ga kena bés i niñ boga i bilôl.

Di témb di hoñol hihéga Yésu a bi yoñ, hi di bi sima i yigil i ntip tagbe: “Nwemel u yé ntitigi, njel ki i nke niñ i yé hipagda; ndék yon i nléba yo.” (Matéô 7:13, 14) Kiki di mba di nkil mu njel i, di ga kôhna nseñ i ba ipañ ni i kiha lôñni bañga ñéga ibale di ngwés pam lisuk​—hala wee niñ boga. Jon, di gwé manjom malam i ba bebee ni Djob. (Tjémbi 16:8) Lelaa ni di nla boñ hala?

Hiki kel di gwé ngandak mam di nlama boñ, di gwé ki ngandak ipe di gwé ngôñ i boñ. Mam ma, ma nla yoñ bés ngandak ngéda kayéle di bana ndik ndék ngéda tole ngéda i nhéñél yaga bés inyu boñ sômbôl Djob. Inyu hala nyen Bibel i nhôñlaha bés le: “Yoña ni yihe bañga liyoñok kiki ni nhiôm, ha kiki bijôñ bi bôt bé, ndi kiki bôt ba pék. Péghana ki ngéda, inyule dilo di yé dibe.” (Efésô 5:15, 16) Di nyén bebee ni Djob ngéda di yoñ maada di gwé ni nye kiki jam li nlôôha ba nseñ inyu yés.​—Matéô 6:33.

Tolakii u nla bé héñha mam ma bi tagbe, ngim mam i yé le u nla boñ kayéle we ni bôt u ngwés ni bana bilôl bilam. Bibel i nyelene bés le Isañ wés nu ngii le Yéhôva Djob a ngwés bés ngandak, a niiga ki bés kii a mbem le di boñ. Béñge kii mpôdôl Mika a nkal:

“A we mut binam, ba mal éba we jam li yé loñge. Jam Yéhôva a nyéñ i weeni li yé kii? Ndigi le, u boñ mam ma téé sép, u gwés loñgeñem, u kiha ki ni Nyambe woñ ni ñem nsôhga!”​—Mika 6:8.

Baa u ga neebe nsébla u Yéhôva le u kiha ni nye inyu kôhna niñ boga i a bi bôn i bet ba mboñ sômbôl yé? Pohol wemede!