I yoñ ndutu i mut kiki yoñ, i yé “ngap i nôgda mahoñol ma mut, tole jam li mpémél mut numpe; u hégdaga kiki bo le wen li mpémél.” Dokta Rick Hanson nu a ntibil makon ma mahoñol a nkal le: “Di bi gwééna lem i nok bôt bape.”

BÉÑGE KI LE: Inyuki di gwé ngap i nok bôt, ndi ki le bihégél bipe hana isi bi gwé bé i lem ilam i? Inyule Bibel i ntoñol le mut binam a bi héga i pôôna Nyambe. (Bibôdle 1:26) Di bi héga i pôôna Nyambe hala wee di nla boñ biliya i tehe mam kiki Nyambe a ntehe mo, yak nigle bilem gwé ipam ngim likala. Jon ibale di ntehe bôt ba nyi yoñ ndutu i bôt bape kiki yap, wee Djob nyemede a gwé i lem i, lôôha lôôha.​—Bingéngén 14:31.

Nyambe a nok bés, a ngwés bé to a ntehe bés di nkôs ndutu. I ngéda bon ba nlômbi Israel ba bé minkôm mi mbanda i Égiptô, i mbus ba nom ki 40 ma nwii i ñoñ ikété ndutu, Bibel i nkal le: “Ikété ndutu yosôna ba ba nôgda, hala a ba nye ndutu.” (Yésaya 63:9) Yimbe yaga le, Djob a bé yi ndik bé ndutu yap nyik. Ndi a bé nôgda njôghe yap. A bi kal le: “Me nyi njôghe yap.” (Manyodi 3:7) Djob a nkal le: ‘Ngo i mut a ntihba bé, wee a ntihba ndigi hitéé hi jis jem.’ (Sakaria 2:8) I ngéda bape ba nôgha bés njôghe, a nsôghe lôñni bés.

Bibel i nkwés bés nkaa le, to ibale ñem u nkéés bés, tole di nôgda le di kôli bé ni konangoo i Nyambe, di yi le “Nyambe a nloo miñem nwés, a nyi ki mam momasôna.” (1 Yôhanes 3:19, 20) Djob a nyi bés iloo bésbomede. A ntibil yi i mam ma mpémél bés, mahoñol més, yak ni yom di nôgda miñem nwés. A nyoñ mandutu més kiki mé.

 Bitilna bi nti bés makénd le

• “W’a sébél, ndi Yéhôva a’ neebe; w’a lond, ndi a’ kal le: ‘Me nunu!’”​—YÉSAYA 58:9.

• “Yéhôva a nkal le, ‘Inyule me nyi mahoñol me gwééne bé, mahoñol ma nsañ, ha mahoñol mabe bé, le me ti bé botñem inyu lisuk linan. N’a sébél me, n’a ke i soohe me, yak me m’a emble bé.’”​—YÉRÉMIA 29:11, 12.

• “Ha gwiiha gwem ikété hibôi hioñ hi kôp. Baa bi ta bé ikété kaat yoñ?”​—TJÉMBI 56:9.

Baa i yi le Nyambe a nyoñ mandutu més kiki mé, i nla hôla bés ngéda di mboma ngolba? Di béñge ndémbél i Maria. A nkal le:

“Me bé nôgda le niñ i nlet, i ban-ge ki me nkoda, inyule man wem nu 18 nwii a bi kon pos letee ni nwii ima, ndi a sôk a wo. Me bi unbene Yéhôva ngandak, inyule a bi boñ bé yom, a mélés bé to kon wé!

“Nwii minsamal i mbus nyemb yé, liwanda jem jada ikété likoda li li ngwés me, li ban-ga ki konangoo, li bi nok me me ntjelel le Yéhôva a ngwés bé me. A bi yoñ ngandak ngéda i emble me, a kit bé to me hop, i mbus a éñél me minlôñ mi Bibel mi mi bi tihba me i poños. Kiki hihéga, kaat 1 Yôhanes 3:19, 20 i i nkal le: ‘Nyambe a nloo miñem nwés, a nyi ki mam momasôna.’ A toñle me le Yéhôva a nok toi mandutu més.

“To hala me bi pala bé nwas hiun! Me bi añ kaat Tjémbi 94:19 i i nkal le: ‘Ngéda nduña i mahoñol mem i mbôl, hogbe yoñ i nkônha ñem wem maséé.’ Me bi nôgda kiki bo le, minlôñ mi Bibel mini mi bi tilba inyu yem! Me bi sôk yimbe le, kiki me bé kal Yéhôva nduña yem, hala nyen njôghe yem i bé sôs, inyule nano me nyi le a ñemble me, a nok ki me.”

Kinje hogbe di nkôs i ngéda di nyi le Djob a nok bés, a nôgda ki i yom di nôgda! Ndi inyuki ndutu i nai hala? Baa inyu bibéba gwés nyen Nyambe a kogsene bés? Baa Nyambe a ga boñ ngim jam inyu mélés mandutu? I gwigil bi noñ ha, bi ga timbhe mambadga ma.