LUSIA A YÉ BÔK I KÔÔ WÉ WAÉ. I ngéda a bé mañge, pôliômélit i bi gwel nye; kon u u mpala lôôhana, u tééñgaga boña, minsoho lôñni minkañ. I ngéda Lusia a bi pamna 16 nwii, i muda a bé sélél a kal nye le: “Nyambe nyen a bi kogse we inyule u bé ndogbene nyuñ, u boñok ki nye mam mabe.” Ngandak nwii mbus, Lusia a ngi hoñlak bibuk bi, ni kiki bi bi tééñga nye iloo héga.

I NGÉDA DAMARIS A BI YI LE A GWÉ POS I BOÑA, isañ a bi bat nye le: “Kii u mboñ le ndi jam lini li pémél we? Bebek le u mboñ béba jam kiyaga. Inyu hala nyen Djob a nkogse we.” I bipôdôl bini, bi bi tééñga mahoñol ma Damaris ngandak.

I hoñol le makon ma yé kogse i i nlôl ni Nyambe i ta bé jam li len. Kaat yada ni hop Ngisi le Manners and Customs of Bible Lands i nkal le ngandak bôt i ngéda Kristô i bé hoñol le “ibale mut a nkon, wee nye, tole mut wé lihaa, a bi boñ béba jam, jon kon u won u yé kogse yé.” Kaat ni hop Ngisi le Medieval Medicine and the Plague i nkal le ipôla nwii 500 ikepam i nwii 1500 N.Y, “ngim bôt i bé hoñol le Djob a bé lona himala hi makon i kogse bo inyu bibéba gwap.” I ngéda didun di bôt i Érôpa di bi wo dimala di kon i kék i nyônôs 14, baa bibéba bi bôt gwon Djob a bé kogse hala? Baa i ta bé maliga le himala hini hi bi kwél bôt inyule bon ba minson bon ba bé ti bo makon, kiki bidokta bi bi yik léba? Ngim bôt i nla badba le: Baa Djob a ngwélél toi makon i kogse bôt inyu bibéba gwap? *

BÉÑGE KI LE: Ibale makon ni mandutu bi yé kogse i i nlôl ni Djob, inyuki Yésu, Man Djob, a bi mbuubaha bakokon? Baa ki hala a bi kolba bé telepsép i Djob? (Matéô 4:23, 24) Yésu a mah kolba bé Isañ to kel to yada. Inyu hala nyen a kal le: “Me mboñ mam ma nlémél nye ngéda yosôna,” a kal ki le: “Kii Tata a kal me, hala nyen me mboñ.”​—Yôhanes 8:29; 14:31.

Bibel i mpot maliga. Yéhôva Djob “a kôdi bé.” (Ndiimba Mbén 32:4) Kiki héga, Nyambe a yé mbén i kwéha avioñ, a nol ngandak bôt i i yé mukété ndik inyule a nyéñ kogse mut wada! Abraham, bañga ngwélél Djob, a bé yi le mbagi Nyambe i téé sép hiki ngéda, jon a bi kal le, a ta bé le a hoñol le Nyambe a nla “tjé mut a téé sép mbôda ni béba mut.” A kal ki le: “Hala a ba nonok” ni Djob. (Bibôdle 18:23, 25) Bibel i nkal le: “Nyambe a ta yaga bé le a boñ [béba]”; a ta bé to le “a boñ biyôgda.”​—Hiôb 34:10-12.

Mandutu ma ma nkwél bés ma ta bé kogse i nlôl ni Djob inyu ngim béba di bi boñ. Yésu nyemede a bi kal yaga hala, i ngéda nye lôñni banigil bé ba bi boma mut wada nu a bi gwéé ndim. “Banigil bé ba bat nye le: ‘A Rabi, he mut ndim, he bagwal bé, njee a bi boñ béba ndi a gwééna ndim?’ Yésu a timbhe le: ‘Mut nunu a bi boñ bé béba to bagwal bé, ndik le minson mi Nyambe mi nene inyu yé.’”​—Yôhanes 9:1-3.

Kiki hala a bé mahoñol ma libim li bôt ha ngéda i, banigil ba Yésu ba bi hel i ngeñ a bi kal bo le to mut ndim to bagwal bé, ba bi boñ bé béba inyu kôs i ndutu i. Yésu a bi mélés ndik bé ndim i mut nu, ndi a bi kodol yak litehge libe li bôt, inyule  ba bé hoñlak le, ndutu i yé kogse i i nlôl ni Djob. (Yôhanes 9:6, 7) I bet ba nok njôghe i len ini inyule ba nkon, ba nkôs hogbe i ngéda ba nyi le Djob bé nyen a yé nwet mandutu map.

Bitilna bi nti bés makénd le

• “Nyambe a ta bé le a noodana ni mam mabe, to nyemede ki a noode bé mut.” (YAKÔBÔ 1:13) Ni maliga, i “mam mabe” ma ntééñga bôt ba binam hala a yé tjai ndi tjai len, kiki bo makon, njôghe, ni nyemb, ma ga mélhana ndék ngéda.

• Yésu ‘a mélés bôt bobasôna ba ba kon.’ (MATÉÔ 8:16) Kiki a bi mbuubaha i bôt bobasô ba bé lona nye, Man Djob a bi unda yom Ane Djob i ga boñ i nkoñ isi wonsôna.

• “[Nyambe] a’ tos gwiiha gwobisôna i mis map; nyemb y’a ba ha bé, to [maéya], to nlondok, to njiiha ki, b’a ba ha bé, inyule mam ma bisu ma mal tagbe.”​—MASOOLA 21:3-5.

Ndi inyuki bôt ba binam ba nkôs ngandak ndutu ni njôghe hala? Bôt ba ngi hunuk ngii ni isi nwii ndi nwii len inyu yéñ ndimbhe mu mbadga i. Ndi ibale Djob bé nyen a gwé njom, njee ni nu? Di ga timbhe mambadga ma i yigil i i noñ ha.