Djob a bi hek manyuu més i nya i yé hélha, kayéle ma nla mbôôp momede. I loñ Amérika, homa minyiña wada inyu matibla ba nsébél le, John Hopkins Medecine, a nkal le: Ngéda mut a mbabaa, a hondi, tole yom i ôm nye, “nyuu yé i njo sañ inyu mbuubaha mambabaa, to ma yé makeñi, to matitigi.” Kunda yada, nyuu i mbôdôl sal inyu kit matjél, yibil minkañ, mélés mbabaa, ni lédés nsôn.

BÉÑGE KI LE: Ibale Nhek wés a bi bañ manyuu més le ma la mélés mambabaa mé momede, baa di nla bé bana botñem le a ga hôgbaha mambabaa di gwé miñem? Ntôp tjémbi a bi tila le: “A mélés bôt ba gwé miñem mi nyodop, a nkañ ki bikwéé gwap.” (Tjémbi 147:3) Ndi ibale mahoñol moñ ma ta bé nwee, tole u gwé nduña i ñem, kii i nla kwés we nkaa le Yéhôva a ga kañ bikwéé gwoñ​—to len, to yani?

Djob a mbôn le: “U kon bañ woñi, inyule me yé ni we. U nwa bañ mis homa ni homa, inyule men me yé Nyambe woñ. M’a ba me nti we ngui. Hodo, m’a hôla we.” (Yésaya 41:10) Mut nu a nyi le Yéhôva a ntôñ nye, mahoñol mé ma yé nwee, a gwé ki ngui inyu kolba mintén mi manoodana nwominsôna. Nsañ mut a yé a nôgda ikété yé, won ñôma Paul a nsébél le, “nsañ Nyambe u u nloo mahoñol momasôna.” A bi kônde ki le: “Me gwé ngui i boñ mam momasôna inyu nu a nlédés me.”​—Filipi 4:4-7, 9, 13.

Bitilna bi nhôla bés i lédés hémle di nhémle mimbônga mi Yéhôva inyu bilôl bi bôt ba binam. Kiki hihéga Masoola 21:4, 5 (ntilga i lipep li li noñ) a nkal bés kii a ga boñ, ni inyuki di nla bana botñem le a ga boñ hala:

• “A’ tos gwiiha gwobisôna” i mis ma bôt. Yéhôva a ga mélés ndutu ni nduña yés yosôna le fet, to ibale bôt bape ba nyan mandutu més.

• Kiki ‘a yii i yééne i ane’ ni lipém jé jolisôna nyoo i ngii, a bak ki Kiñe Bayemlikok i i kéhi ngii bihégél gwobisôna, a ga mélés mandutu, ni ti bés mahôla ma ma nsômbla.

• Yéhôva a nyigye le mimbônga nwé mi yé “maliga ni bañga.” Hala a nkobla le kiki a yé Nyambe nu maliga, a ga yônôs mimbônga nwé nwominsôna.

“‘Ndi a’ tos gwiiha gwobisôna i mis map; nyemb y’a ba ha bé, to [maéya], to nlondok, to njiiha ki, b’a ba ha bé,  inyule mam ma bisu ma mal tagbe.’ Ni nu a bé a yii mu yééne ane, a kal le: ‘Nun-ki, me mboñ mam momasôna yondo.’ Ni nye a kal le: ‘Tila; inyule bibañga bini bi yé maliga, bi yé ki bañga.’”​—Masoola 21:4, 5.

Bihégél bi ngiinda yosôna, ni Bibel, bi nyelene bés libak ni bilem bi Isañ wés nu ngii. Bihégél bi, bi niiga bés bilem bi Djob ngi bibuk; ndi Bibel yo, i mbambal yaga bilem bi. Jon bihégél ni Bibel bi nhôla bés i yoñ nye kiki bañga yés Liwanda. Bibel i nkal bés le: “Kôôgana bebee ni Nyambe, ndi yak nye a’ kôôge bé bebee.” (Yakôbô 4:8) Yak kaat Minson mi baôma 17:27 i nkal le: “A ta bé nonok ni hiki wada wés.”

Kiki u nke ni bisu i yi njee Nyambe a yé, ndék ni ndék u ga ba nkwoog nkaa le ‘a ntôñ we.’ (1 Pétrô 5:7) Umbe nseñ u nla kôhna i bôdôl Yéhôva ñem?

Di yoñ hihéga hi Tôru, nu a nlôl i loñ Yapan. A bi néñél i moo ma nyañ nu a bé kristen, ndi i mbus a bi jôp ikété ngim ntôñ u yigil i bisañ, u ba nsébél le yakuza. A nkal le: “Me bé hoñol le Nyambe a ñoo me, me hoñlak ki le nyen a nkogse me inyule me bé nimis i bôt me bé gwés.” Kiki Tôru a bi jôp mu nlôñ u bisañ u, a bana ki mahoñol mabe, a bi sôk a yila “mut nu a gwé béba ñem.” Nyemede a ntoñle njômbi a bééna: “Kiki me bé njohok, me bé yiba bé. Inyu boñ le me yiba, me bééna ngôñ i nol mut nu a nyiba iloo me ilole me nwo.”

Ndi ngéda a bi nigil Bibel ni nwaa wé Hanna, Tôru a bi héñha ngandak ikété niñ yé. Hanna a nkal le: “Me bi tehe ni mis mem kiki nlô wem a bé héñha ndék ni ndék”. Nano Tôru a mpot ni makénd: “Ngim Nyambe i yé, i i ntôñ toi hiki wada wés. A ngwés bé to le mut nye ki nye a wo, a nwéhél  ki i bet ba ntam mahôha map ni ñem wap wonsôna. A ñemble mam ma di nla bé kal mut numpe ndik nyetama, a nogok ki mam mut numpe a ta bé le a nok. Dilo di nlo, Djob a ga mélés mam momasôna ma ma ñtéénga bés, ma ma nti bés ndutu, yak ma ma nôgha bés njôghe. Yak len ini, a yé a nhôla bés i het di bemek bé. A ntôñ bés, a hôlga ki bés i ngéda di ntomb.”​—Tjémbi 136:23.

Hihéga hi Tôru hi ñéba bés le, Nyambe a nla​—a yé ki bebee​—i mélés njiiha yosôna, ni i sas gwiiha gwés; hala a nhôla ndik bé bés inyu dilo di nlo, ndi hala a nhôla ki bés i bana niñ ilam ibôdôl nano. Ñ, to munu nkoñ isi unu u yôni ni mandutu, di nla kôhna mahôla ma ma nlôl ni Nyambe wés nu gwéha, nu a ntôñ bés.