Baa di kôli i hégda nya ntén niñ i? Inyuki bé? Bibel i nkal bés le, Nyambe nyen a bi ha i ngôñ i ikété miñem nwés. (Ñañal 3:11) I niiga ki le: “Nyambe a yé gwéha.” (1 Yôhanes 4:8) Baa Nyambe nu gwéha a bé le a ha ikété miñem nwés ngôñ i niñ boga, ndi i mbus a ba bé bebee i yônôs i ngôñ i?

Ha boo bé, nyemb i ta bé bés liwanda. Ngo Bibel yomede i nkal le i yé “ñoo” nu a ntééñga. (1 Korintô 15:26) I mpala gwel ngim bôt, ndi i nyoñ ngéda inyu gwel bôt bape. Ndi kel yada, bés bobasôna di ga wo ndigi. Ngandak bôt i nkon woñi ngéda i nhoñol nyemb. Baa ñoo nunu a’ yémblana kel yada? Baa hala a nla toi bôña?

Hala a yé le a hélés we, ndi baa u nyi le ngéda a hek Adam bo Éva, Yéhôva a bé sômbôl bé le ba wo? Kaat Bibôdle i ñunda toi le sômbôl i Nyambe i bé le bôt ba niñ i boga ni boga hana ‘isi. Yéhôva Nyambe a bi yoñ ngandak ngéda i kôôba hisi le hi ba liyééne li bôt ba binam. Kiki a mal, a hek Adam, a bii nye ikété paradis, i wom Éden. Ndi “Nyambe a tehe mam momasôna a hek, ndi nun-ki, ma ba loñge ngandak.”​—Bibôdle 1:26, 31.

Adam a bi héga i pôôna Nyambe, a bak ki peles. (Ndiimba Mbén 32:4) Yak Éva a bééna bé  liton li béba jo ki jo, a bé peles. Yéhôva a bi kal bo le: “Gwala, ni bôl, ni yônôs hisi, ni suhus ki hio; ni kahbe i ngii tjobi di tuye, ni dinuni di ngii, yak ni ngii hi hégél i gwé niñ i i ñond ’isi.”​—Bibôdle 1:28.

Hala a bé lama yoñ bo ntandaa ngéda i yônôs hisi ni mbôda yap. Éva a bé lama gwal bon, yak bon bé ba gwal bon bape, letee hisi hiosôna hi yon ni bôt ndik kiki Nyambe a bé sômblak. (Yésaya 45:18) We u nhoñol lelaa? Baa Yéhôva a bé le a ti Adam bo Éva i nya mbén ini ibale niñ yap i bé sugul i tehe bon bap, ni bebek balal bap?

Bigda yak i bôlô a bi ti bo i kahap ngii binuga. Adam a bi kôs ndak i ti binuga môl, hala a bé lama yoñ nye ngéda i sal i bôlô i. (Bibôdle 2:19) Ndi i kahap i ngii binuga i bé kobla ki jam lipe: Adam a bé lama yoñ ngéda i yi hiki nuga loñge loñge inyu boñ le a yi kiki a nlama tééda yo. I ndak i nyônôs iba ini, i bé lama yoñ bo ngéda iloo ndak i bisu.

Jon di nla kal le, i bôlô Nyambe a bi ti Adam bo Éva, kiki bo i yônôs hisi ni kahap i ngii binuga, i ñunda le ba bi héga le ba niñ ntandaa niñ kiyaga. Ni maliga Adam a bi niñ ntandaa ngéda.

Bibel i mpôdôl ngim ngéda, het bôt ba kôba, ba bé niñ ntandaa dilo kiyaga iloo bés i len ini. I nkal le: “Dilo tjodisôna Adam a nom di ba 930 nwii.” I nsima ki môl ma bôlôm basamal, ba ba bi nom iloo 900 nwii! Hala wee Set, Énos, Kénan, Yared, Métusala ni Nôa. Bobasôna ba bi niñ ilole Ntida malép u nlo; Nôa nyemede a bi niñ 600 nwii ilole Ntida u nlo. (Bibôdle 5:5-27; 7:6; 9:29) Ndi lelaa ba bi boñ inyu niñ ntandaa dilo hala?

Bana bobasôna di nsima ba bé bebee ni libak li peles, tolakii bomede ba bé bé peles. I nene le, inyu hala nyen ba bé nom ngandak. Mambe maada ma yé ipôla libak li peles ni niñ boga? Lelaa nyemb y’a yémblana? Ilole di ntimbhe mambadga ma, di timbhe ndugi ini le inyuki di ñun ni inyuki di nwo.