HÉGDA le u yé i béñge ñañ niñ u muda wada nu a nyiba ngandak i télé, bebek le a yé ntôp tjémbi nunkeñi, nu yak wemede u ngwés. Ba ñunda niñ yé nye mañge, lelaa a bé nigil i tôp tjémbi ni lelaa a nyila ntôp tjémbi. Ha nyen ba ntémb ba éba nye a ntôp bisu bi ngandak bôt, lelaa a nhiôm ni nkoñ ’isi kayéle a yiba ikété ngandak biloñ. Kiki ñañ u nke ni bisu, hala nyen ba mpôdôl i nwii a bi lôôha kôs lipém. Ndi, i lisuk li sinima i, muda nu a mañap, a wo ki.

I muda di yé pôdôl hana a bi niñ toi, mbus a wo. To di nyoñ umbe ntén mut u u nyiba ngandak ikété nkoñ ’isi, lisuk jé li ga ba ndik nlélém. I mut nu a yé yaga le a boñ ngandak mam, ndi baa u nhoñol bé le, ibale biuni ni nyemb bi bak bé, ki a mboñ mam makeñi mape iloo ha?

Kinje ngoo le nyemb i yé lisuk li hiki wada wés. (Ñañal 9:5) Ndi to di mboñ yaa lelaa di nla bé ke biuni to nyemb ngwéé. U héya hala, mpuhge jam tole béba kon bi nla hubus niñ yés. Jon kiki Bibel i nkal, niñ i mut binam i yé kiki mbônji ‘i i nene kegla, ndi i nyoi kôkôa.’​—Yakôbô 4:14.

Inyu bôt bape, niñ i gwé bé nseñ, i yé ki yañga; jon ba nkal le: “Di jek, di nyok, ngo yani d’a wo.” (1 Korintô 15:32) Ndi baa u ntehe bé le i bôt ba niñ ntén niñ u, ba ñunda toi le niñ i yé yañga? Yani tole noma, ngéda ndutu i ga kwél we, u yé le u badba le: ‘Baa niñ mut yosôna i hala?’ Hee u nla lébna ndimbhe i mbadga ini?

I len ini, ngandak bôt i nhoñol le njoñ yi yon i nla timbhe mbadga i. Bidokta ni bôt ba njoñ yi ba bi léba ngim makeñge i i nla kônde bés dilo di niñ. Ndi biliya bi bôt ba njoñ yi bi ngi kenek ni bisu inyu ébés niñ i mut binam. Ndi to ba mboñ lelaa, minlélém mi mambadga nwon mi ngi bédga: Inyuki di ñun ni inyuki di nwo? Lelaa nyemb i ga mal? I gwigil bi bi noñ bi ga timbhe mambadga ma, yak ni ini le: Baa niñ mut yosôna i hala?