Maéba ma Bibel: “Lem nan i ba bañ i gwés moni. Kona maséé ni mam ni gwé.” ​—Lôk Héber 13:5.

I len ini, hiki linut li ntagbe, nkoñ ’isi u unda bés ngandak gwom tole mam di nlama somb. Ndi Bibel yo i nkal le, di ‘kon maséé ni mam di gwé.’ Lelaa di nla boñ hala?

U gwés bañ moni ngandak. I len ini, i bôt ba “ngwés moni” ngandak ba yé bebee i nimis gwom gwobisôna ba gwé. (1 Timôtéô 6:10) Ndi nseñ u ta bé! Sôk i nsôk, Bibel i nkal le: “Nu a ngwés moni a’ nuu bé moni.”​—Ñañal 5:10.

Gwés bôt he moni bé. Ibabé pééna, bigwel moo bi gwé nseñ. Ndi i gwom bi, bi ta bé le bi gwés bés to ti bés mayéga; bôt ba binam botama ndigi bon ba nla boñ hala. I bana ‘bañga liwanda’ i nla hôla bés i bana lem i kon maséé ni mam di gwé.​—Bingéngén 17:17.

Maéba ma Bibel: “Ñem u nhak u yé bañga matibla.”​—Bingéngén 17:22.

Maséé ma yé kiki “bañga matibla” ma ma nla hôla bés i hônba kon. Ndi lelaa di nla ba maséé ngéda di nkon?

Ti mayéga. Ibale di mbéna tjelel, ‘dilo di niñ yés tjodisôna’ di ga ba dibe. (Bingéngén 15:15) Maselna ni hala, Bibel i nkal le di “yi ki ti mayéga.” (Kôlôsé 3:15, MN.) Bana lem i kon maséé ni mam malam ma mpémél we, to i ba ya le ma ta bé bañga jam. Gwom kiki bo loñge manañle ma hiañgaa, loñge mbebi tole man hiol hi mut di ngwés ma nla lémés niñ yés.

Bôñôl bôt bape mam. To ibale u nkon, ‘i bana lem i ti i nlona maséé iloo kôhna.’ (Minson mi baôma 20:35) Ngéda bôt bape ba mbégés biliya gwés, di ga nôgda maséé, di hoñol ha bé ki mandutu més. Ibale di nhôla bape i lémés niñ yap, yak bés di ga nok line li niñ.

Maéba ma Bibel: “Ni wan mambe mam ma nlôôha ba nseñ.”​—Filipi 1:10, MN.

I babiina ba ba ntégbaha bé ngéda ntôñ ba yé le ba bagla. Jon balôm ni baa ba ba gwé pék, ba nlama yoñ libii jap kiki jam li nlôôha ba nseñ.

Boña mam ntôñ. Iloole u kit i boñ mam wetama, baa u ta bé le u boñ mo ni sobiina woñ. Bibel i nkal le: “Bôt iba ba yé loñge iloo mut wada.” (Ñañal 4:9) Kiki hihéga, ni nla lamb bijek, ke i wom tole jôwa mambot ntôñ.

Unda sobiina woñ le u ngwés nye. Bibel i nti babiina makénd i gwéhna ni i tina lipém wada ni nuu. (Éfésô 5:28, 33) I nwemla, i sambla tole i ti sobiina woñ man likébla bi yé mam ma nla lédés libii. Ntiik, malal ma nlama ndik ba ipôla babiina.​—Lôk Héber 13:4.