Buk i Lôk Héber i ngwéélana hana, i nti bés kunde i gwélél ngobol i yo iba. Ndi di ntehe nseñ i héñha inyu mana manjom:

1. Bini bibuk bipe bi pes kaat i Tjémbi i, bi nit ngobol i mondo. Maada ma yé ipôla kaat Tjémbi 144:12-15, ni minlôñ mi mbôk ha bisu ma nigne i buk i Lôk Héber ini le asher, i i yé bibôdle bi nlôñ 12. Asher a nla bana ngandak ngobol. Kiki hihéga, i nla nkobla le: “ba” tole “nu.” “Ba” a bé ngobol bisu. Ni nokna i, i mam malam ba mpôdôl i minlôñ 12 ikepam 14, ma mbéñge bibéba bi bôt, bi ba nsima i minlôñ mi bisu. Ndi, asher a nla ki unda le jam ba mpôdôl, li yé matam mut a nla kôs inyu ngim nson, ha ngéda i ba nkobol yo le: “Le ndi,” “inyu hala nyen,” tole “jon.” Buk ini i nsôk le “jon,” yon ba ngwélél mu ngobol yés i Bibel i nwii 2013 ni Ngisi ni ngobol Bibel ipe.

2. Ngobol yondo i nkiha ni mini minlôñ mimpe mi kaat tjémbi yosôna. Ligwéélak li buk ini le “jon” i nlôñ 12, i nkobla le bisai bi bi noñ letee ni nlôñ 14, bi nyônôl bôt ba téé sép​—bet ba gwé ngôñ le ba ‘sôñ bo ni le ba péyés bo’ i moo ma bibéba bi bôt (nlôñ 11). Mahéñha ma ma nene nlôñ 15, i het di nléba buk ini le “nsaibak” letee ni ngélé iba, bi ngwéélana ki inyu pôdôl nlélém jam. Bahoma boba i het i buk ini i ngwéélana i nlôñ 15, ba mpôdôl maséé ma ma ntihba nlélém litén​—hala wee “bôt ba yé le Nyambe wap le Yéhôva!” Ni hôya bañ le, ngéda kwañ, matila ma Lôk Héber ma bé gwélél bé gwom kiki bo gwalak (“”). Jon, bakobol ba bé lama hégda ngobol i téé, inoñnaga ni yom ba bé kobol kiki bo ngén, minlôñ mi Bibel mi mi nkéña ngim ñañ, ni bipes bi Bibel bipe bi bi bééna maada ni nlôñ ba bé kobol.

3. Ngobol yondo i nkiha ni mini minlôñ mi Bibel mimpe mi mi mpôdôl bisai Djob a mbôn ba ba tiñi ni nye. Nano nu di nhéñha i buk ini le asher, i hiémbi hini hi ntibil toñol mahoñol ma David nu a bééna botñem le Djob a bé lama kobol litén li Israel i moo ma baoo bap, le a bé lama ti bo maséé ni lingwañ kiki bisai. (Lôk Lévi 26:9, 10; Ndiimba Mbén 7:13; Tjémbi 128:1-6) Kiki hihéga, Ndiimba Mbén 28:4 a nkal le: “Matam ma nyuu yoñ m’a ba nsaibak, yak ni matam ma biték gwoñ, ni mbôô i bilém gwoñ, ni kégi u nyaga yoñ, ni bon ba mintômba ba bémba yoñ.” Ntiik, i si énél i man David le Salômô, litén li bi niñ ikété nsañ ni lingwañ, li ba bé ngi kôs i bisu bi ngéda. I bak ki le, mam ma bi tagbe i si énél i Salômô ma bé titii i mam m’a ba i si énél i Mésia.​—1 Bikiñe 4:20, 21; Tjémbi 72:1-20.

Di nla kal le, mahéñha ma di nléba i kaat Tjémbi 144 ma nhéñha bé nokna yés i biniigana bi Bibel. Hala a mboñ le i pes kaat Tjémbi i, i ntibil toñol botñem i bagwélél ba Yéhôva, ba a ngwés ngandak ibôdôl kôba​—le b’a tehe tjiba i bibéba bi bôt, mbus bôt ba téé sép b’a niñ hana isi ikété nsañ ni lingwañ.​—Tjémbi 37:10, 11.