JAM li kum soñ li bé li nlébna mu Mbén Môsi. Ndi ligwéélak jé i ngéda Yésu li bi yaaba kayéle bôt ba ngéda yé ba bé kum soñ inyu yigye hiki man jam ba bé pot. Liboñok libe li, li bé inyu tinde mut i hémle bipôdôl bi nwet a bé kum soñ; ndi Yésu a bi yelel jam li letee ni ngélé iba. A bi niiga le: “Ndi bipôdôl binan bi ba ndik le, ‘Ñ,’ ñ; ‘Heeni,’ heeni.”​—Matéô 5:33-37; 23:16-22.

Inoñnaga ni kaat i ndoñi bibuk yada ni hop Ngisi le Theological Dictionary of the New Testament, “lem bon ba Lôk Yuda ba bééna i yigye hiki lipôdôl jap jolisôna ni njel kum soñ” i bé ngui ngandak kayéle hala a bé nene yak mu minlôñ mi kaat yap mambén, le Talmud, i i nsima loñge loñge mintén mi kum soñ mi mut a bé nyégsaga i yônôs, ni mi, mut a bé bé nyégsaga i yônôs.

Yésu nyetama bé nyen a kolba i lem ibe bôt ba bééna i kum soñ. Kiki hihéga, mut miñañ nu Lôk Yuda wada le Flavius Yôsep a pôdôl inyu ntôñ u nditi wada u Lôk Yuda le: “Ba bé tjél kum soñ, inyule ibale ngim mut a nlama ndik téé wiye i jôl li Djob inyu boñ le bôt ba hémle nye, wee ba mal ôm nye nsohi kiki mut bitembee.” Tilna i Lôk Yuda yada, i i bi lôl bé ni mbuu mpubi, le Sagesse tole Écclésiastique (23:11), yak yo i nyigye le: “Mut nu a mbéna kum soñ, a yé mut a noñ bé mbén to sii.” Jon Yésu a bi kolba lem i yoñ kum soñ kiki jam li minjôha. Ibale di mpot maliga hiki ngéda, di gwé bé ngôñ i kum soñ inyu boñ le bôt ba hémle bipôdôl gwés.