1, 2. (a) Umbe nson u bi yila jam li bisu i niñ i Yésu, ni inyuki? (b) Kii di nlama boñ inyu pam i ba “bagwelnson lôñ yada ni Nyambe”?

YÉSU KRISTÔ a bé kapinda ni ñañal ñañ nlam. (Markô 6:3; Rôma 15:8) A bi pam i yônôs minson mi nwo ima loñge loñge. Kiki nsal bikék, a bi nigil i gwélél bisélél bi bôlô i, hala wee i yilha kék gwom bôt ba mbéna gwélél mandap map. I pes ipe, mu libak jé li nniiga ñañ nlam, a bi yi gwélél njôôñ yi i Bitilna a bééna inyu nhôla gwañga bi bôt i nok maliga ma ma yé i Bañga i Nyambe. (Matéô 7:28; Lukas 24:32, 45) Ngeñ a bi pamna 30 nwii, Yésu a bi bii bisélél gwé bi kapinda ipañ inyule a bé yi le i nson likalô u nlôôha mahee. A bi kal le nson u añal ñañ nlam u Ane u bé njom yada i i bi tinde Djob i om nye hana isi. (Matéô 20:28; Lukas 3:23; 4:43) Nson u, u bi yila jam li bisu i niñ i Yésu, a gwéhék le bape ba nigle nye.​—Matéô 9:35-38.

² I nla ba le di ta bé bikapinda, ndi di yé toi baañal ñañ nlam. Nson u, u nlôôha ba mahee kayéle yak Nyambe a nyoñ ngaba mu; jon di yé “bagwelnson lôñ yada ni Nyambe.” (1 Korintô 3:9; 2 Korintô 6:4) Di neebe toi le “Bañga [i Yéhôva] yosôna, i yé maliga.” (Tjémbi 119:159, 160) Inyu hala nyen, di nlama ba nkwoog nkaa le ‘di ntibil toñol bañga i maliga’ mu nson wés. (Añ 2 Timôtéô 2:15.) Inyu pam i boñ  hala, di nke ni bisu i hôlôs ngap yés i gwélél Bibel, sélél i bisu bisu di ngwélél inyu niiga bôt njee a yé Yéhôva, Yésu, ni kii yé Ane. Inyu hôla bés i tibil gwel nson likalô, ntôñ u Yéhôva u mpémés bisélél bipe bi di nlama meya. Ngeñ di njôp mu, a yé a ba ndik wengoñle di yé ikété nkuu wés bisélél. Di nla kal le bisélél bi, bi yé i nkuu wés bisélél inyu niiga.

3. Kii i nlama ba njômbi yés munu ndék ngéda i yii bés inyu téé likalô, ni lelaa kaat Minson mi baôma 13:48 i nhôla bés i yônôs njômbi i?

³ Ni nla hel inyuki nkuu bisélél inyu niiga u nséblana bé le nkuu bisélél inyu añal ñañ nlam. I buk ini le “añal” i nkobla le i legel nwin; ndi ini buk ipe le “niiga” i yé i hôla mut i nok nwin u, kayéle u tihba ñem wé ni mahoñol mé. Hala a nsôk tinde nye i ha yom a nigil i bisélél. Mu ndék ngéda i ngi yii bés inyu i téé likalô, njômbi yés i nlama ba le di bôdôl gwigil bi Bibel, ni le di niiga bôt maliga. Hala a nkobla le di nlama tibil yéñ bôt bobasôna ba “ba gwé libak lilam inyu niñ boga,” ni le di hôla bo i yila bikristen.​—Añ Minson mi baôma 13:44-48, MN.

4. Lelaa di nla yi i bet “ba gwé libak lilam inyu niñ boga,” ni lelaa di nla léba bo?

⁴ Lelaa di nla yimbe bôt “ba gwé libak lilam inyu niñ boga”? Kiki a ba i hiai i bisu, mpom njel di gwé inyu léba bo, u yé le di añal ñañ nlam. Jon di nlama boñ kiki Yésu a bi niiga bés: “To kinje nkoñ to mbai ni mpam, yéña mut mu nu a kôli.” (Matéô 10:11) Di nyéñ bé bôt ba ba ntôñ bé ni libak jap li mbuu, ba ba yé ngôk, tole ba ba ngwés bé maliga. Ndi di nyéñ bôt ba ba yé maliga, suhulnyuu, ni bôt ba yé njal i pes mbuu. Di nla hégha nyiña u, ni bôlô Yésu a bi lama boñ i ngéda a bé yéñ bikék bilam inyu bañ makôga, kop nson, bikobot ni gwom bipe. Ngeñ a bé a léba ntén kék a bé yéñ, a bé a yoñ nkuu wé bisélél, ndi mbus a bañ gwom bi ni makeñge. Di nlama boñ nlélém mu kii di nyilha bôt ba gwé libak lilam banigil.​—Matéô 28:19, 20.

5. Kii di nlama yi inyu bisélél bi bi yé mu nkuu wés bisélél inyu niiga? Ti hihéga. (Béñge bititii bi bibôdle.)

⁵ Kiki lem inyu hiki nkuu bisélél, hiki sélél mu i gwé yé bôlô. Di yoñ hihéga hi bisélél bi kapinda Yésu a bi lama gwélél. * A bééna ngôñ ni bisélél inyu hek ni tand kék; bi bi bé lama hôla nye i kit, i tôp, ni i se kék; ni bi bi bé hôla i kôlha yo, i yi ntiik le i kôdi bé, ni inyu at gwo tas tas. Nlélém i len ini, hiki sélél mu nkuu wés bisélél inyu niiga i gwé yé njômbi i tôbôtôbô. Jon di wan nkuu wés bisélél inyu tehe lelaa di nla gwélél bisélél bi mahee di bi kôs.

6, 7. (a) Lelaa u ngwélél mapep ma nsébla? (b) Mapep ma nsébla i lo i makoda més ma yé nseñ inyu mam ima, mambe?

⁶ Mapep inyu yi site yés. Mapep ma, ma nene dibobona, ndi ma gwé ngui inyu bôdôl nkwel ni bôt, ni inyu tinde bo i ke i site yés internet. Mu nyen ba nla nigil ngandak mam inyu yés, ba nla yak bat yigil i Bibel mu. Iloo 400 000 bôt ba bi bat yigil i Bibel i jw.org, bôt ba mbat ki iloo mbôgôl gwigil bi Bibel hiki kel ni njel internet! U nla yak hiômna ndék mapep inyu ti mo bôt mu kii u mboñ mam moñ ma hiki kel.

⁷ Mapep ma nsébla i lo makoda. I yom di mbéna sébél le mapep ma nsébla inyu naña bôt i makoda més ma yé nseñ  inyu mam ima. Ba nkal mu le: “Di naña we inyu nigil Bibel ni Mbôgi Yéhôva.” Mbus, i nti mut a nkôhna jo pôla i pohol i nigil Bibel ni bés “i makoda més,” “tole lôñni ngim mut i nigil ni nye.” Jon, i sélél ini i nhôla ndik bé bés i yis bôt njee di yé, ndi yak i naña “bôt ba nyi le mam ma mbuu ma yé bo nseñ” i nigil Bibel ni bés. (Matéô 5:3, MN.) Hala a nsôña bé le yak bôt ba neebe bé yigil Bibel, ba ba malo malam i makoda més. Ibale ba nlo i makoda més, ba ga tehe, ba nok ki biniigana bi Bibel.

8. Inyuki i yé nseñ le bôt ba lo i makoda to ngélé yada? Ti hihéga.

⁸ I yé nseñ le, di ke ni bisu i naña bôt i lo makoda més to ngélé yada ndigi. Inyuki? Inyule ni njel i, b’a tehe nsôsôgô u yé ipôla ligwañ di gwé i pes mbuu ni njal i mbuu bôt ba Babilôn Nunkeñi ba gwé. (Yésaya 65:13) Babiina bada le Ray bo Linda, ba ba nyén i loñ Amérika, ba bi yimbe ngim jam nano a yé ndék nwii. Ba bi kit le ba nlama bôdôl ke i mitin. Ba bé hémle Djob, ba nôgdaga le mam ma mbuu ma mbéda bo, jon ba bi bôdôl hiôm bibase yada mbus yada mu tison yap. Hala a bi yoñ bo ngandak ngéda inyu kiiña mu bibase bi gwobisôna. Ibôdôl yaga bibôdle, babiina ba, ba bi kit le base b’a pohol i bé lama yônôs mam ima. Pog, ba bé sômbôl le mitin mi ntiba mu base i, mi niiga toi bo. Iba, le bôt ba base i, ba haba kiki bôt ba nkal le ba ngwélél Nyambe. Mbus ngandak nwii, ba bé ba ma tôla bibase gwobisôna bi tison yap, ndi ba bi léba bé yom ba bé yéñ, hala wee base i i niiga toi; to bôt ba bibase ba bé tehe nyoo, ba bé haba bé kiki bôt ba nkal le ba ngwélél Djob. Mbus mayuuga ma base i bé sôk mu nsoñgi bibase ba bi tila, Linda a bi ke i homa wé bôlô, nlô wé Ray nye a huu mbai. Mu njel yé, Ray a bi tehe Ndap Ane, ndi a badba le, ‘kii i nkéñ me i ke emble mam ma mpôda nyoo?’ Ibabé pééna, mam a bi tehe nyoo ma bi lôôha lémél nye iloo ma momasôna a bi tehe! Hiki mut i ndap Ane a bé makénd ni minyaô, a bak a héba loñge. Ray a bi yén bisu, a gwés ki mam a bi nok! Hala a nhôñlaha bés jam ñôma Paul a kal inyu ngim mut a nlo i likoda inyu ngélé yé bisu, ndi a kal le: “Nyambe a yé toi ikété nan.” (1 Korintô 14:23-25) Ray a bé ke makoda hiki sonde; mbus a bôdôl lo yak i makoda ma ñem sonde. Yak Linda a bôdôl ke i makoda, boba ba bi bôdôl nigil Bibel tolakii ba bé ba gwé 70 nwii, mbus ba sôblana.

9, 10. (a) Inyuki bon ba mapep ba ntomb i gwélél? (b) Toñol lelaa di nla gwélél man lipep nunu le, Kii i yé Ane Djob?

⁹ Bon ba mapep. Inyu bôdôl nkwel, di gwé bon ba mapep juem, ba ba ntomb i gwélél. Ibôdôl i nwii 2013 nyen ba bi bodôl pémés bon ba bikaat, ba ma pam yom kiki bo didun di didun ditan! Yom i yé lam mu bisélél bi i yé le, ngéda u nigil i gwélél yada mu ikété yap, u nla gwélél gwobisôna, inyule bi yé ntilga nya yada. Lelaa u nla gwélél bon ba mapep ba, inyu tinde mut i neebe nkwel?

¹⁰ U nla pohol i gwélél man lipep nu a gwé ño le: Kii i yé Ane Djob? Unda mut mbadga i bibôdle, u nla bat nye le: “Baa u ma badba mbadga ini le: ‘Kii i yé Ane Djob? Baa w’a kal le i yé . . . ?’” Mbus, bat nye le a pohol ndimbhe yé ikété mandimbhe mana mo maa. Ibabé i yis nye le ndimbhe a mpohol i yé lam tole i yé ibe, unda nye homa a yé ntilga le: “Kii Bibel i nkal,” éñél nye minlôñ mi Bibel  mi ba nsima mu, kii bo Daniel 2:44 ni Yésaya 9:6. Ibale pôla i nene, kena nkwel ni bisu. Jam u nlama sôk boñ li yé le, bat nye mbadga i nsôk ni ño le: “Niñ y’a ba lelaa isi énél i Ane Djob?”, i i yé i si homa le “Hoñol le.” Hala a ga ba hikuu hi nkwel woñ i kel i mba i noñ ha. Ibale ni ntiimba bomna, u nla gwélél yigil 7 i man kaat ba nsébél le: “Miñañ minlam mi nlôl ni Djob!” Man kaat nu, a yé sélél yada mu bisélél di ngwélél inyu bôdôl gwigil bi Bibel.

11. Inyuki ba mpémés mimbamble nwés, ndi kii di nlama yi inyu tjam nwo loñge?

¹¹ Mimbamble. Nkum Ntat ni Tôde ’ilo! ba yé mimbamble ba nlôôha tjam ni kobol ikété nkoñ isi wonsôna! Kiki ba nkiiña ni nkoñ isi wonsôna, lipep li bisu li mimbamble li gwé ño nkwel u u ñôt mahoñol ma mintén mi bôt nwominsôna. Di nla gwélél mimbamble mi inyu hôla mut i yi mam ma nlôôha mahee i len ini. Jon inyu yi njee a kôli kôs nwo, di nlama yi njee mi mbéñge tôbôbôtô.

12. (a) Tôde ’ilo! a mbéñge bonjee, ni inyuki? (b) Imbe loñge jam u ma kôs mu kii u ngwélél i sélél i?

¹² Tôde ’ilo! a mpam inyu hôla bôt ba ba nyi bé Bibel loñge, tole ba ba nyi bé yo tjagda. I nla ba le kiki ba nyi bé biniigana bi Bibel, ba mbôdôl bé base ñem, ba nyi bé ki to le Bibel i yé mahee. Njômbi bisu i Tôde ’ilo! i yé le i kwés basoñgol nkaa le Nyambe a yé toi. (Rôma 1:20; Lôk Héber 11:6) Njômbi yé ipe i yé le i hôla nwet a nsoñgol yo i hémle le Bibel i yé toi “bañga i Nyambe.” (1 Tésalônika 2:13) Miño mi minkwel mi mapep ma bisu ma Tôde ’ilo! i nwii 2018 mi yé: “Le chemin du bonheur,” “12 maéba inyu maséé ma ndap lihaa,” ni “Mahôla inyu ba ba nimis bôt.”

13. (a) Nkum Ntat nu mbamba a mbéñge bonjee? (b) Imbe loñge jam u ma kôs mu kii u ngwélél i sélél i?

¹³ Nkum Ntat nu mbamba, a nlôôha pôdôl mam ma mbuu inyu bôt ba ba ngwés minkwel mi Djob ni Bañga yé. Tolakii ba nla yi ndék mam i Bibel, ba nok bé biniigana gwé loñge. (Rôma 10:2; 1 Timôtéô 2:3, 4) Unu nwii 2018, miño mi mi minkwel mi mi mpam lipep li bisu li ba Nkum Ntat ba mbamba mi yé le: “Baa Bibel i gwé ki mahee i len ini?”, “Kii bilôl bi ga lona bés?,” ni le “Baa Djob a ntôñ toi we?”

14. (a) Bividéô bi-na di nsima liben lini, ni bi di nléba nkuu wés bisélél, bi nhôla kii bés? (b) Baa u gwé ngim ñañ mu kii u ñunda bôt bividéô bi?

¹⁴ Bividéô. I dilo di Yésu, bisélél bi kapinda gwobisôna bi bé gwéélana ni moo. Ndi i len ini, basal bikék ba gwé bisélél bipe bi ngui​—kiki bo soo, bikei bi nse, bikei bi ntôp, bi bi njubus batone i kék ni bikei bipe ki. Nlélém inyu bisélél gwés bi mbuu, u héya bikaat bi mpam, di gwé yak bividéô bilam di ñunda bôt​—kiki bini bi-na di nléba ikété nkuu wés bisélél le: Inyuki di nlama nigil Bibel?, Yigil i Bibel i ntagbe lelaa?, Kii i ntagbe i Ndap Ane?, ni Bonjee ba yé​—Mbôgi Yéhôva? Bividéô bi, bi mpam bé to manut ima, bi bak ki loñge ngandak ngéda di mboma mut inyu ngélé bisu. Bi bi nom iloo ha, bi nla gwélana i mapeple, tole ni bôt ba gwé ngandak ngéda. Bisélél bilam bi, bi nla tinde bôt i nigil Bibel ni i lo makoda.

15. Ti dihéga ti di ñunda le ibale mut a ntehe vidéô ni hilémb hié, i nla tihba nye.

¹⁵ Inyu tibil nok jam li, di yoñ hihéga hi sita yada i i bi boma muda wada nu a bé lôl i loñ Mikrônésia, i het hop u bisu u yé Yapan. Sita a unda nye ini vidéô le Inyuki di nlama nigil Bibel? ni hop wé.  Ngéda vidéô i bi bôdôl, muda a kal le: “Hilémb hiem hi pon. Kinje jam! Lipodok jé li ñunda le a yé mut ôn i het me nlôl. A mpot toi hilémb hiem!” Mbus hala, a bi kal sita le, a bé lama añ ni béñge hiki yom i yé i site yés jw.org ni hop wé. (Hégha jam li ni Minson mi baôma 2:8, 11.) Di yoñ hihéga hipe. Sita yada i loñ Amérika i bi éble man manyañ nlélém vidéô ni hilémb hié. A bi béñge yo, a tilna nye ni njel internet le: “Homa ba nkal le ngui ibe yon i yé mbus mandutu ma nkoñ isi nyen a nlôôha tihba me. Jon me ntila inyu bat yigil Bibel.” Ndi a niñ i ngim loñ i het minson mi Mbôgi Yéhôva mi ta bé kunde!

16. Toñol njômbi i hiki man kaat ba nsima munu liben: (a) Emble Djob ndi w’a niñ boga ni boga. (b) Miñañ minlam mi nlôl ni Djob! (c) Bonjee ba mboñ sômbôl i Yéhôva i len ini?

¹⁶ Bon ba bikaat. Lelaa u nla niiga mut nu a nyi bé añ loñge, ni nu a gwé bé kaat yés to yada ni hop wé? Di gwé bañga sélél inyu yé​—yon i yé le Emble Djob ndi w’a niñ boga ni boga. * Loñge sélél ipe inyu bôdôl gwigil i yé man kaat nunu le Miñañ minlam mi nlôl ni Djob! U nla unda nye miño mi minkwel 14, mi mi yé lipep li nsôk li man kaat nu, u bat ki nye umbe nkwel u nlémél nye. Mbus, ni bôdôl nigil wo. Baa u ma noode jam li i mapeple moñ? Man kaat nu ba yônôs baa di nléba mu nkuu wés bisélél u yé le Bonjee ba mboñ sômbôl i Yéhôva i len ini? I nhôla banigil Bibel i yi lelaa ntôñ u nsal. Inyu yi lelaa u nla gwélél yo ngéda u niiga mut Bibel, béñge kaat ñem sonde le Niñ yés ni nson wés u bikristen, i sôñ Matumb, nwii 2017.

17. (a) Kii i yé njômbi i hiki kaat di ngwélél inyu nigil ni bôt? (b) Kii i mbéda inyu bôt bobasôna ba ba yéñ sôblana, ni inyuki?

¹⁷ Bikaat. Mbus we ni mut ni mbôdôl yigil i man kaat wada di nsima hana, to imbe ngéda u nla tagbe i kaat Kii Bibel i niiga bés? Sélél ini i ga hôla i kéñbaha yi i mut inyu biniigana bi bisu bi Bibel. Mbus ni mal nigil kaat i, téntén ibale nnigil a nhol loñge i pes mbuu, u nla kena yigil ni bisu i kaat ini le Ni téédaga bébomede ikété gwéha Nyambe. Sélél ini i ga hôla nnigil i yi lelaa a nla bii matiñ ma Bibel i bisélél i niñ yé. Bigda le, yak i bet ba ntip sôblana ba nlama ke ni bisu i nigil letee ba mal bikaat bi gwobiba. Ni njel i nyen, b’a la ba siñ ikété maliga.​—Añ Kôlôsé 2:6, 7.

18. (a) Kii 1 Timotéô 4:16 i nti bés makénd i boñ mu libak jés li baniiga maliga, ni limbe lisuk? (b) Ngéda di ngwélél nkuu wés bisélél, kii i nlama ba njômbi yés?

¹⁸ Bés Mbôgi Yéhôva bon di bi kôs oda i niiga bôt “bañga i maliga i miñañ minlam” i i nkena bôt i niñ boga. (Kôlôsé 1:5; añ 1 Timôtéô 4:16.) Inyu yônôs njômbi i, di gwé nkuu bisélél nyonok ni bisélél bi bi yéne bés nseñ. (Béñge minkéñék mi matila le “ Nkuu wés bisélél inyu niiga.”) Di boñ kii yosôna di nla inyu gwélél bisélél bi ni makeñge. Hiki ntéé likalô nyen a nkit imbe sélél a’ gwélél mu nkuu wés bisélél inyu jubus nkwel ngéda a mboma mut a ngwés maliga, ni imbe ngéda a’ gwélél yo. Ndi di hôya bañ le, njômbi yés i ta ndik bé le di kap bikaat; to i yigle bôt ba ba ngwés bé nwin wés bikaat. Ndi i yé le di hôla bôt ba ba yé maliga, suhulnyuu, ni bôt ba yé njal i pes mbuu i yila banigil​—tole bôt ba ba “ba gwé libak lilam inyu niñ boga.”​—Minson mi baôma 13:48; Matéô 28:19, 20.