1. Kii i nkwés bés nkaa le di niñ “dilo di nsôk”?

BAA u bi gwéé i mbus nwii 1914? Ibale hala, wee u ntégbaha niñ yoñ yosôna i “dilo di nsôk” di hiai hini. (2 Timôtéô 3:1) Bés bobasôna di ma tehe mam Yésu a bi pôdôl inyu lisuk li ’isi. A bi sima mam kiki bo gwét, njal ikeñi, nyeñg disi, dimala (makon makeñi), liyanmbén, ni ndééñga i bagwélél ba Djob. (Matéô 24:3, 7-9, 12; Lukas 21:10-12) Di ntehe ki bôt ba gwé maboñok ñôma Paul a bi pôdôl. (Béñge minkéñék mi matila le “ Maboñok ma bôt i len ini.”) Bés bagwélél ba Yéhôva, di nyi ntiik le di niñil ‘mamélél ma dilo di nsôk.’​—Mika 4:1.

2. Mambe mambadga di nlama timbhe?

² Ibôdôl i nwii 1914 ngéda i ntagbe ngandak, jon di nkal le di niñil mamélél ma “dilo di nsôk.” Kiki lisuk li ’isi li nlôôha ba bebee, i mbéda le di nyi ndimbhe i mambadga mana: Mambe mam ma ga bôña mamélél ma “dilo di nsôk”? Ni le kii Yéhôva a nsômbôl le di boñ mu kii di mbem i mam mana?

3. Inoñnaga ni kaat 1 Tésalônika 5:1-3, biloñ bi ga legel kii?

³ Añ 1 Tésalônika 5:1-3, MN. Paul a mpôdôl “hilo hi Yéhôva.” Munu minlôñ mini, Paul a nsômbôl  pôdôl ngéda baéga nkoñ ’isi ba ga leñ “Babilôn Nunkeñi” gwét, hala wee kwéha base yosôna, i mbus Armagédôn a bôdôl. (Masoola 16:14, 16; 17:5) Ndék ngéda ilole hilo hi hi mbôdôl, bôt ba mba ba ntôô le “nsañ u yé, to woñi u ta ha bé!” Baéga nkoñ ’isi ba yé ba gwélél i nya bibuk ini ngéda ba mpôdôl maada malam ma nlama ba ipôla biloñ. * Ndi nlegla unu Bibel i mpôdôl le “nsañ u yé, to woñi u ta ha bé” w’a ba bé nlélém. Inyuki? Ngéda nlegla u w’a nôga, ngandak bôt i ga hoñol le baéga nkoñ ’isi ba mboñ toi le nsañ u ba ni nkoñ ’isi wonsôna, ba mélés ki woñi. Ha nyen, “tjiba y’a kwél bo kunda yada” ki “njiiha ikeñi” i yé nayak.​—Matéô 24:21.

4. (a) Kii di nyi bé inyu nlegla unu le “nsañ u yé, to woñi u ta ha bé”? (b) Kii di nyi inyu nlegla u?

⁴ Di nyi ngim mam inyu nlegla unu le “nsañ u yé, to woñi u ta ha bé.” Ndi ngandak mam ipe i yé le di nyi bé. Kiki hihéga di nyi bé kii i ga tinde baéga biloñ i legel i jam li, ni lelaa ba ga legel jo. Di nyi bé to ibale b’a legel hala ngandak ngélé tole a’ ba ndigi soso nlegla wada. To kii leñek, di nyi le baéga nkoñ ’isi ba nla bé lona nsañ, jon di ga emble bé bipopoda gwap. Maselna ni hala, Bibel i mbéhe bés le nlegla u won w’a yis bés le ‘hilo hi Yéhôva’ hi nyek!

5. Lelaa kaat 1 Tésalônika 5:4-6 i nhôla bés i ba nkôôbaga inyu “hilo hi Yéhôva”?

⁵ Añ 1 Tésalônika 5:4-6. Maéba ma Paul ma ñunda bés lelaa di nla yi ntiik le di yé nkôôbaga inyu “hilo hi Yéhôva.” Di nlama bé ‘ke ’ilo kiki bôt bape.’ Di nlama “yén péé.” Kiki hihéga, di nlama yoñ yihe le di yoñ bañ ngaba i mam ma m’bô ma nkoñ ’isi. Ibale di nyoñ ngaba mu, wee di nyila “ba nkoñ ’isi.” (Yôhanes 15:19) Di nyi le ndik Ane Djob yon y’a lona nsañ i nkoñ ’isi.

6. Kii di nlama yis bôt bape, inyuki?

⁶ U héya le bésbomede di nlama yén péé, di nlama yis bôt bape i mam Bibel i nkal le ma ga bôña i nkoñ ’isi dilo di nlo. Di hôya bañ le ngéda njiiha ikeñi y’a bôdôl, bôt b’a la ha bé yéñ Yéhôva. Inyu hala nyen i nlôôha ba nseñ i añal ñañ nlam nano! *

7. Kii Yéhôva a ngwés le di mboñ nano?

⁷ Munu ndék ngéda i ngi yii ilole  “hilo” hié hi mbôdôl, Yéhôva a gwé ngôñ le di pagap ni nson likalô. Di nlama yoñ bitelbene inyu ‘bana ngandak mam i boñ ikété nson Nwet.’ (1 Korintô 15:58, MN.) Yésu a kal bés kii di nlama boñ. Ngéda a bé pôdôl i mam momasôna m’a bôña dilo di nsôk, a bi kônde le: “Ndi miñañ minlam mi nlama bôk añlana biloñ gwobisôna.” (Markô 13:4, 8, 10; Matéô 24:14) Yi le, hiki ngéda u nke likalô, u nyoñ ngaba binyônôl bi mbañ i Bibel ini!

8. Kii i ñunda le nson wés likalô u nhol ndik hol ni hol?

⁸ Kii di nla kal inyu matam malam di nkôs mu nson wés likalô? Hiki nwii nson u u nhol ndik hol ni hol. Kiki hihéga, bésbomede di ntehe lelaa nsoñgi batéé likalô u mbet munu dilo di nsôk dini. I nwii 1914, nsoñgi u batéé likalô u bé 5 155 ikété 43 biloñ. I len ini, di yé didun 8 ni pes di batéé likalô ntjamak ikété 240 biloñ. Ndi nson wés u ngi kenek ni bisu. Jon di waa bañ añal le Ane Djob yotama yon i nla mélés mandutu ma bôt ba binam momasôna.​—Tjémbi 145:11-13.

9. Inyuki di nlama bé waa añal ñañ nlam u Ane?

⁹ Nson wés likalô u ga mal bé ilole Yéhôva nyemede a nkal le, hala a kôli. Dilo tjañen bôt ba ngi gwé inyu nigil i yi Yéhôva Nyambe bo Yésu Kristô? (Yôhanes 17:3) Di nyi bé. Yom di nyi i yé le, ibôdôl nano letee ni i kel njiiha ikeñi i ga bôdôl, ba bobasôna ba gwé “libak lilam inyu kôhna niñ boga” ba nla ki emble ñañ nlam. (Minson mi baôma 13:48, MN.) Lelaa di nla gwélél i ndék ngéda ini i yii inyu hôla i bôt ba?

10. Lelaa Yéhôva a nhôla bés i niiga bôt maliga?

¹⁰ Yéhôva a nti bés kii yosôna i mbéda bés inyu niiga bôt maliga ni njel ntôñ wé. Kiki hihéga, likoda li ñem sonde li nti bés makeñge ma likalô. Likoda li li nhôla i yi lelaa di nla kwélés bôt inyu ngélé bisu ni lelaa di nla boñ mapeple. Li niiga ki  bés lelaa di lôôs gwigil bi Bibel. Ntôñ u Yéhôva u nti ki bés nkuu bisélél inyu niiga. Nkuu u u nhôla bés i . . .

• bôdôl minkwel,

• ti bôt ngôñ i emble,

• hôla bôt ba gwé ngôñ i nigil,

• tégbaha gwigil bi Bibel, ni

• ti bo makénd i yuuga site internet yés, ni naña bo i ndap Ane.

I yé maliga le, di nlama ndik bé bana bisélél bi. I nsômbla le di gwélél gwo. * Kiki hihéga, ibale mut a nleege we loñge, ndi u yigle nye trakt, tole mbamble, a’ bana yom i añ ilole u ntémb u yuuga nye. Di nlama yoñ ngaba i nya i yôni i nson likalô hiki sôñ.

11. Nseñ u gwigil bi Bibel i internet u yé le kii?

¹¹ Gwigil bi Bibel ni njel internet mu jw.org^® i yé njel ipe Yéhôva a ngwélél inyu hôla bôt i yi maliga. I gwigil bini bi nhôla kii? Hiki sôñ dikôô di bôt di njôp i internet inyu nigil Bibel. I gwigil bini bi nhôla bo i bôdôl nigil Bibel. Bôt bahogi ni mboma ba nla kon woñi i neebe yigil i Bibel. Ibale u mboma i nya bôt i, éba bo i gwigil bi mu site yés internet. *

12. Kii bôt ba nla léba mu i gwigil bi Bibel ni njel internet?

¹² Gwigil bi Bibel ni njel internet bi mpôdôl minkwel kiki bo mini: “Njee a yé Nwet Bibel,” “Bôt Bibel i mpôdôl,” ni “Nwin u botñem u Bibel.” Ngéda mut a nigil gwigil bi, bi nhôla nye i yi:

• Lelaa Bibel i nla hôla we

• Njee a yé Yéhôva, njee a yé Yésu, bonjee ba yé biañgel

• Inyuki Djob a bi hek bôt ba binam

• Inyuki mandutu ni béba bi nai

Gwigil bi bi ñunda ki lelaa Yéhôva a ga . . .

• mélés mandutu ni nyemb,

• tugul bawoga, ni

• tjé biénél bi bôt ba binam inyu téé Ane yé.

13. Baa i nigil Bibel ni njel internet i kôli? Toñol.

¹³ Yigil Bibel ni njel internet yotama i kôli bé. Nson u yilha bôt banigil u yé nsima nkeñi di bi kôs. Di nhémle le i bet ba nsômbôl nigil Bibel b’a wan gwigil bi, le b’a kon maséé ni mam ba ga nigil mu, ni le b’a gwés kéñbaha yi yap i Bibel. Ibale ba gwé toi ngôñ i, bebek ba ga neebe yigil i Bibel. I mamélél ma hiki yigil mu, ba nkal nwet a nsoñgol le a yéñ mut a niiga nye Bibel. Hiki kel i nkoñ ’isi wonsôna, ni njel site yés, jam kiki 230 bôt ba mbat le mut a loo i niiga bo Bibel! Ñ, i yé nseñ le mut a nigil Bibel ni i njel i!

14. Inoñnaga ni oda Yésu a bi ti i kaat Matéô 28:19, 20, kii di nlama boñ? Inyuki?

¹⁴ Añ Matéô 28:19, 20. Mu kii di niiga bôt Bibel, di nlama boñ kii yosôna di nla inyu ‘yilha bo banigil . . . , di niigaga bo i tééda  mam momasôna Yésu a bi kal.’ Di nlama hôla bôt i nok le i yé nseñ i yoñ makidik i gwélél Djob ni i nit Ane yé. Hala a nkobla le di ti bôt ngôñ i neebe maliga, i bii mam ba nigil bisélél, i ti niñ yap nkikip yak Yéhôva, ni i kôs sôble. Ha nyen b’a la pei i hilo hi Yéhôva.​—1 Pétrô 3:21.

15. Inyuki di nlama bé ngeñee, inyuki?

¹⁵ Kiki di mbôk di kal, lisuk li ’isi li nlôôha ba bebee, di gwé bé le di lep ngéda yés i nigil ni bôt ba ntop bé yila banigil ba Kristô. (1 Korintô 9:26) Di ngeñee bañ to ndék mu nson wés! Ngandak bôt i ngi gwé ngôñ i emble ñañ nlam ilole lisuk li nlo.

16. Inoñnaga ni kaat Masoola 18:2, 4, 5, 8, kii di nlama boñ? (Béñge yak matila isi lipep.)

¹⁶ Añ Masoola 18:2, 4, 5, 8. Minlôñ mini mi ñunda jam lipe Yéhôva a nsômbôl le bagwélél bé ba boñ. Bañga bikristen yosôna i nlama keñgle maada momasôna ni Babilôn Nunkeñi. I nla ba le ilole a nyi maliga, nigil Bibel a bé i kwéha base. Bebek yak le a bé yoñ ngaba mu mam ma base. Tole a bé ti moni inyu nit yo. Ilole a nyila ntéé likalô nu a yé ngi sôblana, a nlama kit maada momasôna ni kwéha base. A nlama tilna nlômbi wé base inyu yis bo le a ta ha bé ni bo, tole a kit maada momasôna ni base yé, yak ni minlôñ nwominsôna mi mi gwé maada ni Babilôn Nunkeñi. *

17. Umbe ntén bôlô kristen i nlama bé boñ, inyuki?

¹⁷ Bañga kristen i nyoñ bitelbene le bôlô yé i bana bañ maada ni Babilôn Nunkeñi. (2 Korintô 6:14-17) Kiki hihéga, a nla bé sélél ngim base. Ni ki le, ibale kristen i nsal ngim homa, a ga neebe bé i gwel ngim nson i het ba nhôñôs kwéha base. Nano ibale homa bôlô a yé wé, a’ ke bé bat bôlô i ngim base, to neebe bôlô yé, inyule a gwé bé ngôñ i bana maada ni Babilôn Nunkeñi. Inyuki di nyoñ makidik ma ngui ma? Inyule di gwé bé ngôñ i yoñ ngaba minson ni  bibéba kwéha base i mboñ.​—Yésaya 52:11. *

18. Lelaa mankéé wada a bi téñbe ni matiñ ma Bibel mu kii a bé yéñ likala jé li kel?

¹⁸ Nano a yé ngandak nwii le, nkena bôlô wada a bat mañ wada le u loo i sélél nye bôlô i kapinda i ngim base mu tison. Mankéé a bé a ma kal mut nu le a nla bé sélél ngim base. Ndi lini lisañ, a bi témb a lo inyule a bi la bé léba mut numpe a mboñ i bôlô i. To hala, mankéé a bi téñbe i noñ matiñ ma Bibel, a tjél i bôlô i. I sonde i bé noñ ha, kégikel nu tison a bi unda fôtô i kapinda ipe i ntômôl mbasa mu base i. Ibale mankéé a héñha mahoñol, ndi a neebe i bôlô i, ki fôtô yé yon ba bi pémés. Ni hégda lelaa hala a bé le a tééñga bilôk bikéé bipe! Ni hégda ki lelaa Yéhôva a bé le a nôgda.

19-20. (a) Kii di ma nigil? (b) Kii ipe i yii bés le di nigil?

¹⁹ Inoñnaga ni mbañ i Bibel, a yii ndik ndék ngéda wee biloñ bi nkoñ ’isi bi nlegel le “nsañ u yé, to woñi u ta ha bé.” Masoda le Yéhôva a bi niiga bés le, biloñ bi nla bé lona bañga nsañ, to u u nom. Kii di nlama boñ ilole nlegla u u mpam, ni ilole tjiba i nkwél bo kunda yada? Yéhôva a ngwés le di pagap i añal ñañ nlam u Ane, ni i yilha bôt banigil. I nlélém ngéda, di nlama yén haa ni kwéha base yosôna. Hala a nsômbôl kal le di kit maada momasôna ni kwéha base, di tjél ki bibôlô gwobisôna bi bi gwé maada ni Babilôn Nunkeñi.

²⁰ Mam mape ma nlama bôña munu mamélél ma “dilo di nsôk” dini. Yéhôva a ngwés ki le di boñ ngim mam ipe. Mambe? Lelaa di nla kôôba nano inyu mam momasôna ma yé i njel? Di ga timbhe mambadga ma i yigil i noñ.