1-2. (a) Kii baéga nkoñ ’isi b’a legel ndék ngéda? (b) Mambe mambadga di nlama timbhe?

HÉGDA le baéga nkoñ ’isi ba ntip legel le: “Nsañ u yé, to woñi u ta ha bé.” Ba nla kahal bép woo i tôl le ba nkôp nsañ ni nkoñ ’isi wonsôna. B’a gwés le di hoñol le ba nla mélés mandutu ma nkoñ ’isi. Ndi ki le b’a la bé sôña le sômbôl i Yéhôva i bôña! Inyuki? Inyule kiki Bibel i bi bôk pot, “mbuma w’a nyek bo . . . ndi b’a pei yaga bé.”​—1 Tésalônika 5:3.

² Di nlama ni timbhe mana mambadga: Kii i ga bôña i “njiiha ikeñi”? Kii Yéhôva a ngwés le di boñ ha ngéda i? Lelaa di nla bôdôl kôôba nano inyu boñ le di téñbe ni Nyambe i njiiha ikeñi?​—Matéô 24:21.

3. Inoñnaga ni kaat Masoola 17:5, 15-18, lelaa Nyambe a ga tjé “Babilôn Nunkeñi”?

³ Añ Masoola 17:5, 15-18, MN. “Babilôn Nunkeñi” a ga tjiba! Kiki di mbôk di kal, baéga biloñ ba ga la bé boñ jam jo ki jo ha ngéda i. Inyuki? Inyule ‘Nyambe [a ga] ha miñem nwap le ba yônôs mahoñol mé.’ Mahoñol ma mon ma yé le kii? Le baéga ba, ba tjé kwéha base yosôna,  yak ndôk bibase mukété. * Djob a’ ha mahoñol mé i ñem u “jôm li bitoñ” ni u “nuga bikai i i nkôyôp tjôôm.” Jôm li bitoñ li yé yimbne i biane gwobisôna bi bi nit ‘nuga bikai’, i i yé Adna biloñ. (Masoola 17:3, 11-13; 18:8) Ngéda minlôñ mi m’bô mini mi ga tjé kwéha base, hala a ga ba bibôdle bi njiiha ikeñi, i jam li bilim li li ga kônha bôt bobasôna woñi.

4. (a) Kii i ga tinde baéga biloñ i tjé kwéha base? (b) Kii i bet ba yé mu bibase bi ba yé le ba boñ ha ngéda i?

⁴ Di nyi bé kii i ga tinde baéga biloñ i tjé Babilôn Nunkeñi. I nene le b’a kal le bibase gwon bi mboñ le nsañ u ba bañ i nkoñ ’isi, ni le bi yé sum sum i mam ma m’bô. Tole ba nla ki kal le bibase bini bi nlôôha kot nkus ni lingwañ. (Masoola 18:3, 7) Baéga nkoñ ’isi ba ga tjé bibase gwobisôna. Ndi i mpôna le bahémle bobasôna bé bon ba ga tjiba. Ngéda bibase bi bi ga tjiba, i bet ba bé mu b’a lehel ñem, ba ma tehe le baéga bibase ba nla bé yônôs mimbônga nwap.

5. Kii Yéhôva a bi bôn le a ga boñ i njiiha ikeñi, inyuki?

⁵ Bibel i nkal bé bés dilo tjañen tjiba i kwéha base i ga boñ, ndi di nyi le i ga nom bé. (Masoola 18:10, 21) Yéhôva a bi bôn le a ga “hubus dilo” di njiiha ikeñi inyu boñ le “mintebek” nwé ni bôt ba base i maliga ba pei. (Markô 13:19, 20) Ndi kii Yéhôva a nsômbôl le di boñ ipôla njiiha ikeñi ni gwét bi Armagédôn?

6. Inyuki di nlama ndik bé kit maada ni kwéha base?

⁶ Kiki di ntehe mu yigil i ntagbe, Yéhôva a nsômbôl le bagwélél bé ba kit maada momasôna ni Babilôn Nunkeñi. Ndi di nlama ndik bé  kit maada ni kwéha base. Di nlama yoñ bitelbene i nit bibégés bipubi bi Yéhôva. Di béñge manjel ima di nla gwélél inyu boñ hala.

7. (a) Lelaa di nla unda le di ntéñbe i noñ matiñ ma Yéhôva ni ñem wés woñsôna? (b) Lelaa kaat Lôk Héber 10:24, 25 i nyigye nseñ i kodba ni lôk kéé yés, téntén munu mangéda mana?

⁷ Pog, di nlama ke ni bisu i nit matiñ ma téé sép ma Yéhôva. Di nlama bé kôna maboñok ma nyega ma nkoñ ’isi. Kiki hihéga di nlama tjél mintén mi malal ma nyega nwominsôna, kiki bo malal ipôla bôlôm ni bôlôm tole bôda ni bôda ni maboñok mape ma ma nhôñôs nyega i. (Matéô 19:4, 5; Rôma 1:26, 27) Iba, di nlama ke ni bisu i gwélél Yéhôva lôñ yada ni lôk kéé yés. Di mboñ hala to hee homa di nla kodba, mandap ma Ane, mandap ma bilôk bikéé tole lisol. To imbe ndutu di mboma, di ga waa bé ke makoda. Ñ, di nlama bé tjôô makoda més ‘kiki di ntehe kel i i nkôôge bebee.’​—Añ Lôk Héber 10:24, 25.

8. Umbe nwin di yé le di legel ha ngéda i?

⁸ Ngéda njiiha ikeñi y’a bôdôl, i nene le nwin wés u ga héñha. I len ini, di ñañal ñañ nlam u Ane, di boñok biliya i yilha bôt banigil. Ndi ha ngéda i, di ga legel ngim nwin i i ga kwél bôt kiki nop matan-ga. (Masoola 16:21) I mpôna le di ga kal bôt le lisuk li nkoñ ’isi u Satan li nkola. Ha ngéda i, d’a yi umbe nwin di ga legel, ni lelaa d’a legel wo. Baa di ga gwélél minlélém mi makeñge di ngwéélak nwii ndi nwii? Tole di ga gwélél makeñge mape? Di nla bé yi jam li nano. To imbe njel di ngwélél, i nene le di ga bana nsima i legel nwin u tjiba u Yéhôva ibabé i kon woñi!​—Ézékiel 2:3-5.

9. Lelaa bôt b’a leege nwin wés, ndi imbe botñem i ngui di gwé?

⁹ Nwin di mba di nlegel, u ga tinde bôt ba matén i yéñ njel i yip bés manyo ngélé yada inyu yosôna. Nlélém kiki di mbat Yéhôva mahôla i len ini inyu yônôs nson wés, hala nyen di ga bana ngôñ le a hôla bés mu dilo di. Di nyi ntiik le Nyambe a’ ti bés ngui i boñ sômbôl yé.​—Mika 3:8.

10. Kiki kaat i Lukas 21:25-28 i nkal, kii libim li bôt l’a nôgda inyu mam m’a bôña i njiiha ikeñi?

¹⁰ Añ Lukas 21:25-28. Bôt ba ga nok ndutu ngandak ngéda ba ga tehe le i mam ba bôdlak ñem ma nkahal kwo, kiki mam ma m’bô, mam ma nyuñga ni mam mape. Ba ga lôôha kon woñi, ba tôñôk inyu biniñ gwap inyule ngéda y’a ba ibe ngandak. (Sôfônia 1:14, 15) Ha ngéda i, i mpôna le niñ y’a kônde let yak inyu bagwélél ba Yéhôva. Kiki di nyoñ bé ngaba ni mam ma nkoñ ’isi, mam m’a kônde lédél bés. I nla pam le di bana ha bé to yom je.

11. (a) Inyuki mbok yosôna i mba i mbéñge Mbôgi Yéhôva ngéda kwéha base i mba i ma tjiba? (b) Inyuki di gwé bé le di kon njiiha ikeñi woñi?

¹¹ Bôt ba nkoñ ’isi b’a unup ngandak ngéda b’a tehe le bibase gwap bi ntjiba, ndi Mbôgi Yéhôva i ngi kenek ni bisu i bégés Djob jap. Ibabé nkaa, i jam li li ga tjama ni  nkoñ ’isi wonsôna, yak i internet. Baéga nkoñ ’isi ni ñane wap le Satan ba ga oo bés inyule ndik base yés yotama yon i ntjiba bé. Mahoñol ba bééna i mélés bibase gwobisôna hana ’isi ma nyon bé. Jon, mbok yosôna i mba i mbéñge ndik bés. Ha ni nyen biloñ bi ga yila Gôg nu Magôg. * Bi ga kodba kiki suluk inyu leñ bagwélél ba Yéhôva gwét. (Ézékiel 38:2, 14-16) I nla pam le di bôdôl badba lelaa mam m’a ba i njiiha ikeñi, inyule di nyi bé mam momasôna. Jam di nyi li yé le, di gwé bé le di kon njiiha ikeñi woñi. Yéhôva a ga ti bés biniigana ha ngéda i, bi bi ga péyés bés. (Tjémbi 34:20) Ha nyen, di ga “paa miño” di yik le ‘tohi yés i ntiige bebee.’ *

12. Lelaa “nkol maliga ni u pék” u bi bôdôl hôla bés i kôôba inyu mam m’a bôña dilo di nlo?

¹² “Nkol maliga ni u pék” u nkôôba bés ibôdôl nano inyu boñ le di téñbe ngéda njiiha ikeñi y’a bôdôl. (Matéô 24:45) Inyu pam i boñ hala, nkol u u ngwélél ngandak manjel, kiki bo makoda ma ndôn di bi tégbaha ibôdôl i nwii 2016-2018. Minkwel mi bi tiba mu makoda ma, mi nti bés makénd i hôlôs bilem bi bi ga bane bés nseñ i hilo hi Yéhôva. Di tiimba le pôdôl bilem bi.

13. Lelaa di nla téñbe ni Yéhôva, inyuki di nlama boñ hala ibôdôl nano?

¹³ Ndéñbe: Ño nkwel u likoda li ndôn li nwii 2016 u bé le “Di téñbe i gwés Yéhôva!” Likoda li li bi niiga bés le ibale di gwé maada ma bas bas ni Yéhôva, di ga téñbe i gwés nye. Ba bi hôñlaha bés le, di nla kôôge Yéhôva bebee ni njel masoohe ma nlôl i ñem, yak ni bañga yigil i Bibel. I boñ mam ma, i ga hôla bés i yémbél to mambe mandutu. Kiki lisuk li hiai hi Satan li nkôôge bebee, di ga boma manoodana inyule di ntéñbe i gwés Djob ni le di nit Ane yé. I nla pam le bôt ba kee ni bisu i nol bés hiol. (2 Pétrô 3:3, 4) B’a tééñga bés inyule di nyoñ bé ngaba i mam ma nkoñ ’isi. Ibale di ntéñbe i gwés Yéhôva ibôdôl nano, i ga bane bés jam li ntomb i téñbe ni nye ngéda njiiha ikeñi i ga lo.

14. (a) Kii i ga héñha i ntôñ Djob? (b) Inyuki y’a béda le di unda ndéñbe yés ha ngéda i?

¹⁴ I njiiha ikeñi, minhook ha bé nwon mi ga kena nson wés hana ’isi. Ngim ngéda i ga pam le nwominsôna mi nyôña i ngii inyu yoñ ngaba i gwét bi Armagédôn. (Matéô 24:31; Masoola 2:26, 27) Hala a nkobla le Juu li bakena ntôñ li ga ba ha bé ni bés hana ’isi. Ndi to hala, limut likeñi li ga ba ntjegek loñge. Minhôôlak mi lôk kéé i bôlôm mu mintômba mimpe nwon mi ga kena ntôñ Djob. I ga béda le di unda ndéñbe yés ni njel manôgla. Ibale di mboñ hala, di ga pei!

15. Lelaa di nla lédés hônba yés, inyuki nano nyen di nlama lédés yo?

 ¹⁵ Hônba: Ño nkwel u likoda li ndôn li nwii 2017 u bé le “Di tomb bañ!” Minkwel mi bi tiba mu mi nhôla bés i hônba manoodana. Di bi nigil ki le too di ntégbaha mangéda malam too mabe, ibale di mbôdôl Yéhôva ñem, di ga hônba letee ni lisuk. (Rôma 12:12) Di hôya bañ unu mbônga u Yésu le: “Nu a nhônba letee ni lisuk a’ tohlana.” (Matéô 24:13) Mbônga unu u niiga bés le, to di mboma mambe mandutu, di nlama téñbe ni Nyambe. Ibale di nhônba mandutu momasôna di mboma i len ini, hémle yés i ga kônde let ilole njiiha ikeñi i mbôdôl.

16. Kii i ga hôla bés i bana ñem ngui, lelaa di nla lédés ñem ngui di gwé ibôdôl nano?

¹⁶ Ñem ngui: Ño nkwel u likoda li ndôn li nwii 2018 u bé le “Bana ñem ngui!” Minkwel mi mi bi bigdaha bés le ñem ngui u nlôl bé i ngap di gwé. Kiki hônba, bañga ñem ngui i nlôl ni bôdôl di gwééne Yéhôva. Lelaa di nla lédés i bôdôl di gwééne Yéhôva? Di nlama añ Bibel hiki kel, di soñdaga ki inyu tehe lelaa Yéhôva a péyés bagwélél bé ba kôba. (Tjémbi 68:21; 2 Pétrô 2:9) Ngéda biloñ bi nkoñ ’isi gw’a leñ bés gwét i njiiha ikeñi, di ga bana ngôñ ni ñem ngui, i ga béda le di bôdôl Yéhôva ñem iloo mangéda momasôna. (Tjémbi 112:7, 8; Lôk Héber 13:6) Ibale di mbôdôl Yéhôva ñem munu mangéda mana, di ga bana ñem ngui i mbéda ngéda Gôg a’ leñ bés gwét. *

17. Inyuki di nlama bé kon Armagédôn woñi? (Béñge titii i lipep li bisu.)

¹⁷ Kiki di bi tehe mu yigil i ntagbe, libim li bôt li ntégbaha niñ yap yosôna munu dilo di nsôk dini. Ndi  di mbot ñem le di ga pei i njiiha ikeñi. Gwét bi Armagédôn bi ga ba lisuk li nkoñ ’isi unu. Bés di nlama bé kon woñi. Inyuki? Inyule Djob nyen a ga jôs bo, he bés bé. (Bingéngén 1:33; Ézékiel 38:18-20; Sakaria 14:3) Ngeñ Yéhôva a ga ti oda, Yésu Kristô a ga éga mintôñ mi gwét mi Yéhôva inyu ke jo gwét. Mu mintôñ mi gwét mi, minhook mi ga ba mu yak ni didun di biañgel. Bobasôna ba ga jôs Satan, mimbuu nwé mimbe, ni mintôñ nwap mi gwét mi mi yé hana ’isi.​—Daniel 12:1; Masoola 6:2; 17:14.

18. (a) Kii Yéhôva a bi bôn? (b) Lelaa kaat Masoola 7:9, 13-17 i nhôla bés i bana botñem inyu dilo di nlo?

¹⁸ Yéhôva a bi bôn le: “Jôl gwét yo ki yo i ñua inyu jôs we, i ta bé le i nyo we.” (Yésaya 54:17) ‘Limut likeñi’ li bagwélél ba Yéhôva li ga ‘lôl i njiiha ikeñi’! Ba ga ke ni bisu i gwélél nye. (Añ Masoola 7:9, 13-17.) Kinje botñem Bibel i nti bés inyu dilo di nlo! Di nyi le “Yéhôva a ntééda bahémle.” (Tjémbi 31:24) Ba bobasôna ba ngwés Yéhôva, ba béghak nye b’a ba maséé i tehe nye a mpubus jôl jé.​—Ézékiel 38:23.

19. Imbe botñem i mbuma ñañ di gwé?

¹⁹ Noode le hégda kii 2 Timotéô 3:2-5 a bak le a kal, ibale a pôdlak bôt ba niñ i mbok mondo, i het Satan a’ ba ha bé. (Béñge minkéñék mi matila le “ Maboñok ma bôt i mbok yondo.”) Mankéé George Gangas, nu a bi sal i Juu li bakena ntôñ a ntoñol i jam li ni bini bibuk le: “Nkoñ ’isi w’a ba ikété maséé ma mbuma ñañ ngéda bôt bobasôna b’a gwélél ndigi Yéhôva! Ndék ngéda, w’a bana nsima i niñ i mbok yondo. U ga ba i niñ ntel ngéda wonsôna Yéhôva a niñ. Di ga niñ i boga ni boga.” Kinje botñem i mbuma ñañ!