1. Imbe botñem Yéhôva a bi ti bés?

 YÉHÔVA a bi ti bés botñem i niñ boga. Bahogi ba mbot ñem le ba ga niñ i boga ni boga i ngii, ba bak bihégél bi mbuu. (1 Korintô 15:50, 53) Ndi libim li mbot ñem le li ga niñ i boga ni boga hana ’isi, li bak peles, li bak mbôô, li niñik ikété maséé. (Masoola 21:3, 4) To di gwé bot ñem i niñ i ngii tole hana ’isi, botñem yés i nlôôha bane bés nseñ.

2. Hee botñem yés i umne, inyuki di nkal hala?

² Ikété Bibel, i buk ini le “botñem” i nla gwéélana inyu pôdôl “mam malam mut a mbem le ma ga yon.” Botñem yés i nla bé set inyule i nlôl ni Yéhôva. (Rôma 15:13) Di nyi mimbônga a bi bôn, di nyi ki le a yé a nyônôs mimbônga nwé. (Ñañga bôt 23:19) Di yé nkwoog nkaa le Yéhôva a gwé ndik bé ngôñ, ndi a gwé ki ngui i yônôs i mam momasôna a bi bôn. Jon botñem yés i ta bé mam di nhoñol, tole mam di ngwés le ma bôña, ndi botñem yés i umne toi i mam ma yé maliga.

3. Kii di ga tehe munu yigil ini? (Tjémbi 27:14)

³ Tata wés nu ngii a ngwés bés, a ngwés ki le di bôdôl nye ñem. (Añ Tjémbi 27:14.) I ngéda di mbôdôl Yéhôva ñem ni ñem wés wonsôna, ha nyen di nla bana makénd, di ba ki maséé i hônba mandutu di mboma len, ni ma di ga boma yani. Di béñge lelaa botñem yés i nsôñ bés. Inyu boñ hala, di bôk ndugi di béñge lelaa botñem yés i yé bés kiki hikoba ni kiki kôñgô. I mbus, di ga tehe lelaa di nla lédés botñem yés.

4. Lelaa botñem i yé kiki hikoba? (Lôk Héber 6:19)

⁴ Mu kaat yé a bi tilna Lôk Héber, ñôma Paul a bi hégha botñem yés ni hikoba. (Añ Lôk Héber 6:19.) Ñôma  Paul a bé béna hiôm i tuye, jon a bé yi lelaa basal i sitima ba bé leñ hikoba i lép inyu boñ le sitima i pôk bañ. Lisañ jada, ñôma Paul a bé ikété sitima i ngéda mbuk mbebi a bi bôdôl hôñ, a bi tehe lelaa basal i sitima ba bé leñ dikoba i lép inyu boñ le sitima i ôm bañ maaa, tiga le i bôô. (Minson mi baôma 27:29, 39-41) Kiki hikoba hi mboñ le sitima i pôk bañ, hala nyen botñem yés i mboñ le di tjôô bañ Yéhôva i ngéda di mboma mandutu makeñi ma ma yé kiki mbuk mbebi. Botñem yés i mboñ le di bana ñem nwee inyule di nyi le mam ma ga sôk ma lama. Di hôya bañ le Yésu a bi kal le di ga boma ndééñga. (Yôhanes 15:20) Jon ibale di mbok mahoñol més mu mimbônga Yéhôva a mbôn bés, di ga ke ni bisu i gwélél nye.

5. Lelaa botñem i bi lédés Yésu yak i bisu bi nyemb?

⁵ Di béñge lelaa botñem i bi hôla Yésu i téñbe yak i bisu bi nyemb. I Pentékôt i nwii 33 N.Y., ñôma Pétrô a bi sima mbañ i yé i kaat Tjémbi, i i ntibil toñol lelaa Yésu a bééna ñem nwee ni makénd. A bi kal le: “M’a tééda ki botñem yem, inyule w’a tjôô bé me ikété soñ, w’a nwas bé to le nyuu i nu a ntéñbe ni we i bol. . . . W’a boñ ki le ñem wem u ba nyonok ni ngandak maséé i bisu gwoñ.” (Minson mi baôma 2:25-28; Tjémbi 16:8-11) To hala kiki Yésu a bé yi le a nwo, a bééna botñem ngui le Djob a ga tugul nye, ni le a ga témb a ba maséé i ba ni Tata wé nyoo i ngii.​—Lôk Héber 12:2, 3.

6. Kii mankéé wada a bi kal inyu botñem?

⁶ Botñem yés i nhôla ngandak lôk kéé i bôda ni i bôlôm i hônba. Di yoñ hihéga hi Léônard Chinn, mankéé wada nu a ntéñbe ni Yéhôva, a niñik i loñ Ngisi. I Gwét bi Ntôla bi bisu, ba bi leñ nye i mok inyule a bi tjél yila sônda. A bé mu tuñ yé nyetama i ndap mok sôñ iba. I mbus ha, ba nyégsa nye i sal bôlô njok. A bi yik tila le: “Mandutu mem ma bi hôla me i nok le botñem yés i yé nseñ ngandak inyu hônba. Di gwé hihéga hi Yésu, hi baôma ni hi bapôdôl, di gwé ki mimbônga minlam mi mi yé ikété Bibel. I mam ma momasôna ma nhôla bés i bot ñem le mam ma ga ba loñge i dilo di nlo, ma nhôla ki bés i hônba. Botñem i bé kiki hikoba inyu Léônard, hala ki nyen i nla ba hikoba inyu yés.

7. Lelaa mandutu ma nlédés botñem yés? (Rôma 5:3-5; Yakôbô 1:12)

⁷ Botñem yés i nkônde let i ngéda di mboma mandutu, ni i ngéda di ntehe lelaa Yéhôva a nhôla bés, di yik le a nkônôl bés maséé. (Añ Rôma 5:3-5; Yakôbô 1:12.) Jon i botñem di gwé len, i gwé ngui iloo i botñem di bééna i ngéda di bi tip yi maliga. Satan a gwé ngôñ le mandutu més ma yuu bés, ndi ni mahôla ma Yéhôva, di nla hônba hiki ndutu mu.

8. Lelaa botñem yés i yé kiki kôñgô? (1 Tésalônika 5:8)

⁸ Bibel i nkal ki le botñem yés i yé kiki kôñgô. (Añ 1 Tésalônika 5:8.) Sônda i nhaba kôñgô inyu boñ le makoñ ma baoo ma tihba bañ nye i ño. Munu gwét gwés bi mbuu, di nwas bañ le Satan a tinde bés i bana mahoñol ma ma téé bé. A ngwélél ngandak manjel inyu noode bés, ni boñ le di bana mahoñol mabe. Kiki kôñgô i ntat ño u sônda,  hala nyen botñem yés i ntat bés le di bana bañ mahoñol ma ma téé bé, le ndi di kee ni bisu i gwélél Yéhôva.

9. I ngéda bôt ba gwé bé botñem yo ki yo, mam ma yé ma ba lelaa?

⁹ Botñem yés i niñ boga i nhôla bés i yoñ makidik malam. Ndi ibale di gwé bé botñem i ngui, di ga nwas le mahoñol ma nkoñ ’isi mon ma yoña bés, di ga nimis botñem i niñ boga di gwé. Di yoñ hihéga i ngim lôk kéé i nlômbi tison i Korintô. Ba bi nimis jam li nlôôha ba nseñ Yéhôva a bi bôn bo: Botñem inyu bitugne. (1 Korintô 15:12) Paul a bi tila le i bôt ba gwé bé botñem inyu bitugne ba niñ ndik inyu len. (1 Korintô 15:32) Ngandak bôt i mbôdôl bé mimbônga mi Djob ñem, i niñ ndik kiki kel i nye, i boñok kii yosôna i nlémél bo. Ndi bés di mbôdôl mimbônga mi Djob ñem. Botñem yés i yé kiki kôñgô inyule i ntat mahoñol més, i boñok le di niñ ndik bañ inyu yés bés bomede, tiga le di ôbôs maada més malam ni Yéhôva.​—1 Korintô 15:33, 34.

10. Lelaa botñem yés i nkéñ le di bana mahoñol ma téé bé?

¹⁰ Botñem yés i nkéñ ki bés i hoñol le kekikel, di ga pam bé i lémél Yéhôva. Kiki hihéga, bahogi ba yé le ba kahal hoñol le: ‘Me ta yaga bé le me ba mu nsoñgi u bôt ba ga niñ i boga ni boga. Me gwé bé mahee. Kekikel, m’a pam bé i noñ mambén ma Yéhôva.’ Elifaz, nye yak a bi lo i hôgbaha Hiôb, a bééna minlélém mi mahoñol. A bi kal Hiob le: “Mut binam a yé kii, le a laa ba mpubi?” I mbus, Elifaz a pôdôl Yéhôva, a kal le: “Nun-ki! Nyambe a mbôdôl bé bapubhaga bé ñem, to ngii yomede i mpôp bé i mis mé.” (Hiôb 15:14, 15) Kinje bitembee! Di hôya bañ le Satan nyen a ngwés le di bana i nya mahoñol i. A nyi le ibale di nkahal bana i mahoñol ma, di ga nimis botñem yés. Ndi bés di nlama kôm i bitembee bi mbus, di bok mis mu mimbônga mi Yéhôva. Kekikel, di péénaga bañ le Yéhôva a gwé ngôñ le di bana niñ boga, ni le a ga hôla bés i yônôs ngôñ yés i niñ i boga ni boga.​—1 Timôtéô 2:3, 4.

11. Inyuki di nlama hônba mu kiki di mbem le botñem yés i yon?

¹¹ I lédés botñem yés i ta bé jam li ntomb. Di nla waa bem le Yéhôva a yônôs mimbôñga nwé. Ndi Yéhôva nye a niñ i boga ni boga, a ntehe bé ngéda kiki bés. (2 Pétrô 3:8, 9) A ga yônôs mimbônga nwé i loñge ngéda, ndi a yé le a boñ hala i ngéda bés di bemek bé. Kii i nla ni hôla bés i ke ni bisu i lédés botñem yés mu kiki di mbem le Yéhôva a yônôs mimbônga nwé?​—Yakôbô 5:7, 8.

12. Inoñnaga ni Lôk Héber 11:1, 6, mambe maada ma yé ipôla botñem ni hémle?

¹² Di ga ke ni bisu i lédés botñem yés ibale di ntéñbe ni Yéhôva, nu a mbôn le i mam di mbôdôl ñem ma ga yon toi. I maliga, Bibel i ñunda le botñem i nkiha ni hémle. Inyu bana botñem, di nlama hémle le Yéhôva a yé, ni le a yé “nu a mbom i bôt ba nyéñ toi nye.” (Añ Lôk Héber 11:1, 6.) Kiki di ga kônde hémle le Yéhôva a yé toi, hala ki nyen di ga kônde ba nkwoog nkaa le a ga yônôs toi i mam momasôna a mbôn. Di béñge ni manjel di nla gwélél inyu kônde lédés maada més ni Yéhôva, le ndi di lédés toi botñem yés.

13. Lelaa di nla kôôge Djob bebee?

 ¹³ Soohe Yéhôva, u añ ki bañga yé. To hala kiki di nla bé tehe Yéhôva, di nla kôôge nye bebee. Inyu pôdôs nye, di nlama soohe nye, di bak nkwoog nkaa le a ñemble bés. (Yérémia 29:11, 12) Inyu emble nye, di nlama añ Bañga yé, di ôdôk ki pék mu. I ngéda di ñañ Bibel, di tehge lelaa Yéhôva a bi tééda ba ba bi téñbe ni nye i ngéda kôba, botñem yés i nkônde let. Hiki yom i yé ntilga ikété Bibel i yé ntilga “inyu niiga bés, kayéle ni njel hônba yés ni hogbe i nlôl i Bitilna, di bana botñem.”​—Rôma 15:4.

14. Inyuki di nlama ôt pék mu mam Yéhôva a bi bôñôl bape?

¹⁴ Ôt pék mu mimbônga Yéhôva a bi yônôs. Di béñge i yom Djob a bi bôñôl Abraham bo Sara. Ba bi pamna nwii ba bé ha bé le ba bana bon. Ndi Djob a bi bôn bo le ba ga bana man. (Bibôdle 18:10) Lelaa Abraham a bi boñ? Bibel i nkal le: ‘A bi hémle le a’ yila isañ ngandak biloñ.’ (Rôma 4:18) To hala kiki i mis ma bôt ba binam, Abraham a bé lama lehel ñem, nye a bi bôdôl Yéhôva ñem le a ga yônôs mbônga wé. Yéhôva a bi wéha bé Abraham nyuu. (Rôma 4:19-21) I nya miñañ i, i niiga bés le di nla bôdôl Yéhôva ñem ngéda yosôna, to ibale mam ma nene wengoñle ma nla bé bôña.

15. Inyuki di nlama hoñol mam Yéhôva a ma bôñôl bés?

¹⁵ Hoñol mam Yéhôva a ma bôñôl we. Hoñol bisai wemede u ma kôhna inyule Yéhôva a nyônôs mimbônga wé mi mi yé ikété Bibel. Kiki hihéga, Yésu a bi bôn le Isañ a ga ti we hiki yom i mbéda we inyu niñ. (Matéô 6:32, 33) Yésu a  bi kal ki le Yéhôva a ga ti we mbuu wé mpubi ibale u mbat nye wo. (Lukas 11:13) Yéhôva a nyônôs ki i mimbônga mi nwominsôna. Bebek le wemede u ngi hoñlak mam mape a bi bôn we, a yônôs ki mo. Kiki hihéga, a bi bôn le a ga nwéhél we, a hôgbaha we, a jés ki we i pes mbuu. (Matéô 6:14; 24:45; 2 Korintô 1:3) Ibale u nyoñ ngéda i hoñol i mam momasôna Yéhôva a ma bôñôl we, hala a nkônde lédés botñem yoñ le a ga yônôs ki mana mam mape a mbôn we.

16. Inyuki botñem yés i yé likébla likeñi?

¹⁶ Botñem yés i niñ boga i yé likébla likeñi Yéhôva a nti bés. Di mbem mam malam i dilo di nlo ni maséé, di nyi ntiik le ma ga loo. Botñem yés i yé kiki hikoba hiés, i mboñ le di ndeñg bañ, di umi siñ kayéle di nla hônba mandutu, di nla nihbe ndééñga, di nla ki téñbe yak i bisu bi nyemb. Botñem yés i yé kiki kôñgô yés, i nsôñ bés le di hoñol bañ mam ma téé bé, inyu hala nyen di ntjôô mam mabe, ndi di ntéñbe i boñ mam malam. Botñem yés i umne i Bibel, i nhôla bés i kôôge bebee ni Djob, i ñunda ki bés ikepam limbe likala a ngwés bés. Di nkôhna ngandak bisai inyule di nhôya bé botñem yés, di nlédés ki yo.

17. Inyuki botñem yés i nlona bés maséé?

¹⁷ “Kona maséé inyu botñem,” ñôma Paul nyen a bi ti i makénd ma mu kaat a bi tilna Lôk Rôma. (Rôma 12:12) Paul a bé maséé inyule a bé yi ntiik le ibale a ntéñbe ni Yéhôva ipam i lisuk, a ga niñ i ngii i boga ni boga. Yak bés di nla kon maséé inyu hémle yés, inyule di nyi loñge loñge le Yéhôva a ga yônôs mimbônga nwé. Kiki ntôp tjémbi a tila: “A yé kimasôda . . . nu a mbôdôl Yéhôva Nyambe wé ñem, . . . nu a ntééda maliga i mba ni mba.”​—Tjémbi 146:5, 6.