1-2. Limbe likeñge li nlôôha lilam inyu nigil Bibel? Ti hihéga.

 HÉGDA le u nsômbôl somb ndap. Kii u ga yéñ i tehe ilole u nyoñ makidik ma? Baa u ga béñge ndik fôtô i bisu bi ndap? Ibabé pééna, u ga bana ngôñ i ke nyoo wemede u kiiña ndap yosôna, u béñge bituñ, u béñge yak pôk yé, u béñge too i ndap i i bi ôña loñge. Ilole u nsomb yo, u ga yéñ tehe makas mé momasôna.

² Di nla boñ nlélém jam i ngéda di ñañ ni i ngéda di nigil Bibel. Ntoñol Bibel wada a nkal le “Bibel i yé kiki soso nkum ndap u u yé i ngii ngandak, hikuu hié hi bak isi si.” Kii di nlama ni boñ inyu yi i yom i yé ikété Bibel? Ibale u mpala añ yo, u ga yi ndik ndék mam, hala wee “biniigana bi bisu bi bipôdôl bipubi bi Nyambe.” (Lôk Héber 5:12) Ndi, nlélém kiki u mboñ ni ndap u nsômbôl somb, le u njôp mukété inyu tibil béñge yo, u nlama nigil Bibel inyu tibil nok yo. Likeñge li nlôôha lilam inyu nigil Bibel li yé le di nla béñge lelaa i mam di nigil ngim homa ma gwé maada ni bahoma bape mukété Bibel. Boñ biliya i nok i yom u nhémle ni inyuki u nhémle yo.

3. Mambe makénd ñôma Paul a bi ti bikristen, inyuki? (Éfésô 3:14-19)

³ Inyu nok Bibel ikété makas mé momasôna, di nlama tibil tém yo. Ñôma Paul a bi ti bilôk bikéé bi bôda ni bi bôlôm makénd le ba tibil nigil Bibel kayéle ba pam i “nok kii i yé pôk, ni bibôñgô, ni ntel, ni ndip” i maliga. Ha nyen ba ga pam i ‘o minkañ, ba telep ki siñ siñ’ ikété hémle yap. (Añ Éfésô 3:14-19.) Di nlama boñ nlélém.  Nano di tehe lelaa di nla tibil wan Bañga i Nyambe inyu léba lisôô li nkus li yé mukété.

4. Kii di nla boñ inyu kôôge bebee ni Yéhôva? Ti dihéga.

⁴ Bikristen bi nlama ndik bé kon maséé ni biniigana bi bisu bi Bibel. Ni mahôla ma mbuu mpubi, di nyamnda ni ngôñ i nigil “yak ndip i mam i Nyambe.” (1Korintô 2:9, 10) Mu i yigil yoñ i Bibel wemede, baa u yé le u bôdôl nigil ngim ño nkwel u u mboñ le u kônde kôôge bebee ni Yéhôva? Kiki hihéga, u nla tibil wan inyu tehe lelaa Nyambe a bi unda le a bé gwés bagwélél bé i ngéda kôba ni lelaa a ñunda le a ngwés yak we i len ini. U nla ki nigil lelaa Yéhôva a bé gwés le bon ba Israel ba bégés nye. U hégha ni lelaa Yéhôva a ngwés le di bégés nye i len ini. U nla ki wan i mbañ Yésu a bi yônôs i ngéda a bé hana ’isi.

5. Baa u gwé ngim ño nkwel u u nsômbôl tém i yigil yoñ i Bibel?

⁵ Ba bi bat bôt bahogi ba ba ngwés boñ minyiña ikété Bibel le ba noode le kal i mam ba ngwés ba nigil ikété Bibel. Mandimbhe mahogi ma yé munu i minkéñék mi matila mini le “ Miño mi minkwel inyu yigil yoñ i Bibel wemede.” Inyu tibil nigil i nya miño i minkwel i, u nla gwélél Index des publilcations des Témoins de Jéhovah, tole Ñéga inyu nyiña u bikaat bi Mbôgi Yéhôva. I ngéda u nigil hala, u nla lédés hémle yoñ, u kôhna ki yi i Nyambe. (Bingéngén 2:4, 5) Nano di béñge ngim biniigana bi Bibel di nla tibil wan.

6. (a) Mambe maselna ma yé ipôla ntjega ni njômbi? (b) Inyuki di nla kal le bitééne bi Yéhôva inyu bôt ba binam ni ’isi bi nom i “boga ni boga”? (Éfésô 3:11)

⁶ Di béñge i yom Bibel i nkal inyu bitééne bi Djob. Maselna makeñi ma yé ipôla i bana ngim ntjega ni i bana  bitééne tole ngim njômbi. Di nla hégha ntjega ni njel i i nkena we i homa u gwé ngôñ. Ndi ibale ngim yom i nhék we mu njel, u nla ha bé bol i homa u kenek. Ki le njômbi i yé i homa di nsômbôl ke. Di nyi loñge loñge i homa di nsômbôl ke, ndi ngandak manjel i yé inyu pam nyoo. Di nla yoñ njel ipe inoñnaga ni i yom di ga boma mu njel. Di nti Yéhôva mayéga inyule ndék ni ndék a bi yeelene bés ‘bitééne gwé bi boga’ ikété Bibel. (Éfésô 3:11) Yéhôva a nla gwélél ngandak manjel inyu yônôs bitééne gwé, inyule “a mboñ le mam momasôna ma yônôs sômbôl yé.” (Bingéngén 16:4) Hala a mboñ le i mam momasôna Yéhôva a mboñ ma nom i boga ni boga. Kii i yé bitééne bi Yéhôva? Mambe maselna Yéhôva a bi lona inyu yônôs bitééne gwé?

7. I ngéda bôt ba binam ba bisu ba bi ndogop, mambe mahéñha Yéhôva a bi lona inyu yônôs bitééne gwé? (Matéô 25:34)

⁷ Nyambe a bi yis bôt ba binam ba bisu bitééne gwé. A bi kal bo le “gwala, bôla, ni yônôs hisi, ni ane ki hio, ni énél . . . hiki hégél i gwé niñ” hana ’isi. (Bibôdle 1:28) I ngéda Adam bona Éva ba bi ndogbene Djob, ba bi lona béba ikété lihaa li bôt ba binam. Yéhôva a bi héñha bé bitééne gwé, a bi gwélél ndik manjel mape inyu yônôs gwo. A téé ngim Ane i ngii i i nlama yônôs bitééne a bi bôk a yoñ inyu bôt ba binam ni nkoñ ’isi. (Añ Matéô 25:34.) I ntéak wé ngéda, Yéhôva a bi om Man wé, mbôkgwéé wé hana ’isi inyu niiga bôt ba binam kii i yé Ane yé ni inyu ti niñ yé kiki binoñ inyu tohol bés i mok mi béba ni mi nyemb. I mbus, Yéhôva a bi tugul Man wé Yésu le a ba Kiñe i Ane Djob. Ndi, di nla kônde nigil mam mape inyu bitééne bi Djob.

8. (a) Ño nkwel u Bibel u yé le kii? (b) Inoñnaga ni Éfésô 1:8-11, kii i yé bitééne bi nsôk bi Yéhôva? (Béñge titii i lipe li bisu.)

⁸ Ño nkwel u Bibel u yé le jôl li Yéhôva li ga pubhana i ngéda a ga yônôs bitééne gwé inyu ’isi ni njel Ane i i gwé Kiñe le Yésu Kristô. Bitééne bi Djob bi nla bé héñha, a bi bôn le sômbôl yé i ga yon ndik kiki a bi kal. (Yésaya 46:10, 11, buk isi lipep.; Lôk Héber 6:17, 18) Hisi hi ga yila paradis i het mbôda i Adam bo Éva i i ga ba peles, i bak i téé sép i ga ‘niñ i boga ni boga.’ (Tjémbi 22:26) Iloo ha, Yéhôva a gwé ki ngandak mam ipe i yônôs. Bitééne gwé bi nsôk tole njômbi yé i nsôk i yé le a at bagwélél bé bobasôna ba ba yé i ngii ni ba ba yé hana ’isi. Ha ni nyen bihégél gwobisôna bi ga suhus gwomede isi Yéhôva le nyen a ba Ñéga wap. (Añ Éfésô 1:8-11.) Baa u ta bé nhelek i tehe lelaa Yéhôva a nyônôs bitééne gwé?

9. Mambe mam ma ga yon i dilo di nlo yigil Bibel i nhôla bés i tehe?

⁹ Di wan le mbañ Yéhôva a bi pot i wom Éden, i i yé i kaat Bibôdle 3:15. b I mpôdôl mam ma bé lama boñ le bitééne bi Djob bi yon. Ndi i mam ma, ma bi bôña dikôô di nwii i mbus ngéda. Kiki hihéga, Nyambe a bi kal Abraham le ikété mbôda yé nyen Kristô a ga gwéé. (Bibôdle 22:15-18) I nwii 33 N.Y., nyen  ba bi babaa Yésu i tindi kiki mbañ i bé kal. (Minson mi baôma 3:13-15) Pes i nsôk i mbañ i, hala wee i ngéda ba ga nyagat Satan ño i ga yon i mamélél ma hikôô hi nwii. (Masoola 20:7-10) Bibel i ntoñol ki ngandak mam i ga tagbe i ngéda ôa ipôla nkoñ ’isi u Nsohop ni ntôñ u Yéhôva i ga yamb mayoo.

10. (a) Mambe mam ma ga bôña ndék ngéda? (b) Lelaa di nla kôôba mahoñol més ni miñem nwés? (Béñge buk isi lipep.)

¹⁰ Hoñol bihélha bi mam Bibel i nkal bés ma ma ga yon. Pog, biloñ bi ga kal le “nsañ u yé woñi u ta ha bé!” (1Tésalônika 5:2, 3) “Kunda yada,” njiiha ikeñi i ga bôdôl i ngéda biloñ bi ga tjé kwéha base. (Masoola 17:16) I mbus ha, jam li hélha li ga bôña, ‘Man mut a ga lo ikété ond i ngii lôñni lipémba, ni lipém likeñi.’ (Matéô 24:30) Yésu a ga kéés bôt ba binam, a bagal mintômba ni minya mi kembee. (Matéô 25:31-33, 46) Ha i ngéda i, Satan a ga ke ni bisu i kolba Yéhôva. Inyule a ñoo bagwélél ba Nyambe ngandak, a ga tinde biloñ i kodba inyu leñ bo gwét. I adna i yon ba nsébél le Gôg nu loñ i Magôg. (Ézékiel 38:2, 10, 11) Ngim ngéda y’a kola le minhook mi mi mba mi ngi yii hana ’isi mi ga ke i koba Kristô i ngii ni mintôñ nwé mi biañgel inyu jo gwét bi Armagédôn i mamélél ma njiiha ikeñi. c (Matéô 24:31; Masoola 16:14, 16) Ha nyen Ane i hikôô hi nwii i Kristô i ga bôdôl hana ’isi.—Masoola 20:6.

11. Botñem i niñ i boga i nlona we kii? (Béñge yak titii.)

¹¹ Nano noode le hégda mam ma ga bôña i mbus Ane i hikôô hi nwii. Bibel i nkal le Nhek wés a bi “ha yak mahoñol ma niñ boga ikété miñem [nwés].” (Ñañal 3:11) Noode hégda kii hala a nkobla inyu yoñ ni inyu maada moñ ni Yéhôva. Inyu pôdôl i ngéda i, i kaat ini ni hop u Pulasi le  Approchez-vous de Jéhovah, i ngwélél bibañga bilam bini lipep 319 le: “I mbus di ma niñ mbôgôl nwii, dikôô di nwii, didun di nwii, to didun di didun di nwii, di ga yi Yéhôva Nyambe iloo kiki di nyi nye i len ini. Di mba di ngi nôgdaga ndik wee di ngi gwé ngandak mam i nigil. . . . Di nla bé to hégda lelaa niñ i ga ba ilam i paradis. Jam li ga ba lilam li yé le, di nkônde kôôge bebee ni Yéhôva.” Ilole i ngéda i i nkola, kii ipe di nla kônde tém mu kii di nke ni bisu i nigil Bibel?

12. Lelaa di nla pa mis i ngii? Ti hihéga.

¹² Bibel i nyeelene bés ndék lelaa mam ma yé i het Yéhôva a yé “i bahoma ba nyôgi.” (Yésaya 33:5) Bibel i mpôdôl bihélha bi mam inyu Yéhôva ni pes yada i ntôñ wé u u yé nyoo i ngii. (Yésaya 6:1-4; Daniel 7:9, 10; Masoola 4:1-6) Kiki hihéga, di nla añ bihélha bi mam Ézékiel a bi tehe i ngéda ‘ngii i bi yibla, a bôdôl tehe biyiinda bi Nyambe.”—Ézékiel 1:1.

13. Kiki kaat Lôk Héber 4:14-16 i ntoñol, kii i nlémél we mu minson Yésu a ngwel i ngii?

¹³ Hoñol yak tel i Kiñe ni i Prisi keñi Yésu a gwé nyoo i ngii. Ni njel yé ikété masoohe, di nla kôôge bebee ni yééne ane i konangoo i mbuma ñañ i Nyambe, di bat ki nye nwéhél ni mahôla “i loñge ngéda.” (Añ Lôk Héber 4:14-16.) Hiki kel, di nlama ôt pék mu mam Yéhôva bo Yésu ba ma bôñôl bés ni ma ba mbôñôl bés ba bak nyoo i ngii. Gwéha yap i ntihba bés ngandak, i nyégsa bés i añal ñañ ilam ni makénd ni i bégés Yéhôva.—2Korintô 5:14, 15.

14. Limbe jam li nlôôha lilam di nla boñ inyu ti Yéhôva bo Yésu mayéga? (Béñge yak titii.)

¹⁴ Jam li nlôôha lilam di nla boñ inyu  ti Nyambe bo Man wé mayéga li yé le di boñ biliya inyu hôla bôt bape i yila Mbôgi Yéhôva ni banigil ba Yésu. (Matéô 28:19, 20) I jam li jon ñôma Paul a bi boñ inyu ti Yéhôva bo Kristô mayéga. A bé yi le sômbôl i Nyambe i yé le “mintén mi bôt nwominsôna mi kôhna tohi, mi pam ki i bana bañga yi i maliga.” (1 Timôtéô 2:3, 4) A bi sal ni ngui i nson likalô inyu hôla ngandak bôt kayéle le a pam “i tohol bahogi ni manjel momasôna.”—1Korintô 9:22, 23.

15. Inoñnaga ni Tjémbi 1:2, kii i nla kônha bés maséé?

¹⁵ Ntôp tjémbi wada a kal le i mut a gwé niñ i maséé ni ilam a yé nu a “ngwés mbén Yéhôva” a “ôdôk pék mu juu ni njamuha.” (Tjémbi 1:1-3; buk isi lipep.) Nkobol Bibel wada le Joseph Rotherham, inyu pôdôl minlôñ mi Bibel mini, i kaat yé le Studies in the Psalms, a bi kal le i mut ba mpôdôl munu a “ngwés mambén ma Bibel ngandak. A nyéñ mo, a nigil mo, a nyoñ ngéda i ôt pék mu.” A nkônde ki le i mut nu a nla “bé tégbaha ngim kel ibabé le a añ Bibel.” U nla kon maséé ni yigil i Bibel ibale u mboñ biliya i tém i yom u ñañ ni i tehe mambe maada ma yé mu minlôñ mi Bibel u ñañ. Kinje maséé di nkôhna i tibil tém Bañga i Nyambe!

16. Kii di ga tehe i yigil i noñ?

¹⁶ I mam Yéhôva a niiga bés ikété Bibel ma nlôôha ba malam. Ma nlôôha bé to let, di nla nok mo. I yigil i noñ ha, di ga wan ndip biniigana bipe, soso témpel i mbuu i Yéhôva, i Paul a ntoñol i kaat i Lôk Héber. I nigil i ño nkwel u, u ga lona we ngandak maséé.