1. Kii Yéhôva a nôgda inyu bagwélél bé?

 KII Yéhôva a ntehe i ngéda a mbéñge bagwélél bé hana ’isi? A ntehe i ngéda di nkon maséé ni i ngéda di gwé nduña. (Tjémbi 37:18) I ngéda a ntehe le di mboñ kii yosôna di nla inyu gwélél nye yak ikété mandutu, a nkon maséé iloo hihéga. Iloo ki hala, a yé bebee i hôla bés ni i lédés bés.

2. Kii Yéhôva a mboñ inyu hôla i bet ba gwé njôghe i ñem, lelaa di nla ôt nseñ ni mahôla mé?

² Tjémbi 147:3 a ñunda le Yéhôva a nkañ mambabaa ma bôt ba gwé njôghe i ñem. Kinje loñge titii inyu unda le i ngéda a mboñ hala, a nyoñ yihe le a kônde bañ bés njôghe i ngii njôghe. Kii di nlama boñ inyu ôt nseñ ni manjel momasôna a ngwélél inyu hôla bés? Di yoñ hihéga hiada. Dokta li li nyi bôlô yé li nla boñ ngandak mam inyu tibil mut a mbabaa. Ndi inyu boñ le nkokon a ôt nseñ ni matibla, a nlama tibil noñ maéba ma dokta. Munu yigil ini, di ga tehe i yom Yéhôva a nkal i bet ba gwé njôghe i ñem, ni lelaa di nla bii maéba mé i bisélél.

DI YÉ NSEÑ I MIS MA YÉHÔVA

3. Inyuki ngim bôt i nôgda le i gwé bé mahee?

³ Di niñil i nkoñ ’isi i het ngim bôt i ngwés bé bape, hala a mboñ le ngandak i nôgda wee i gwé bé mahee. Sita  yada le Helen a a nkal le: “Bagwal bem ba bé gwés bé bés. Pua a bé mut bisañ, a bé kal bés hiki kel le di gwé bé mahee.” Bebek le kiki Helen, yak we mut i bi tééñga we, i solok we, i kalak we hiki kel le u gwé bé mahee. Ibale hala a bi pémél we, i nla bane we nledek jam i hémle le ngim mut i nla toi gwés we.

4. Inoñnaga ni Tjémbi 34:​18, imbe botñem Yéhôva a nti bés?

⁴ To ibale bôt bape ba bi tééñga we, u nla ba nkwoog nkaa le Yéhôva a ngwés we, ni le u yé mahee i mis mé. A “yé bebee ni ba ba nok njôghe i ñem.” (Añ Tjémbi 34:18.) Ibale u “nimis makénd,” bigda le Yéhôva a bi tehe mam malam i ñem woñ, a ôt ki we ipañ yé. (Yôhanes 6:44) Yéhôva a yé ki bebee i hôla we, inyule u yé tik i mis mé.

5. Kii di nla nigil mu kiki Yésu a bé tôñ i bet bôt bape ba bé yan?

⁵ Ndémbél i Yésu i niiga bés i yom Yéhôva a nôgda. I ngéda Yésu a bé hana ’isi, a bé tôñ i bet bôt bape ba bé yan, a undga bo konangoo. (Matéô 9:​9-12) I ngéda i muda a bééna béba kon a bi tihba mbot yé ni botñem le a mbôôp, Yésu a bi hôgbaha nye, a bégés nye inyu hémle yé. (Markô 5:​25-34) Yésu a bi unda bilem bi Isañ i nya i yôni. (Yôhanes 14:9) Jon u nla ba nkwoog nkaa le u yé tik i mis ma Yéhôva, a nyimbe bilem gwoñ bilam, hémle yoñ lôñni gwéha yoñ.

6. Kii u nla boñ ibale u nôgda le u gwé bé mahee?

⁶ Kii u nla boñ ibale u mbéna nôgda le u gwé bé mahee? Añ minlôñ mi Bibel mi mi ñunda le u yé tik i mis ma Yéhôva,  u ôt ki mahoñol mu. b (Tjémbi 94:19) Ibale u mpam bé i yônôs ngim jam u bi kit le u mboñ, tole u nimis makénd moñ, u hégha bañ wemede ni bape, bok mahoñol i jam u nla boñ. Yéhôva a mbem bé le u boñ mam ma nloo we. (Tjémbi 103:​13, 14) Ibale ba bi ôbôs we i ngéda u bé mañge, u ôm bañ wemede nsohi inyu i jam li bi pémél we. Njom i ta bé i yoñ! Bigda le baboñbéba bon Yéhôva a mbat le ba timbhe inyu maboñok map, he bé i bet ba nôgha njôghe. (1 Pétrô 3:12) Sandra nu ba bi ôbôs i ngéda a bé mañge a nkal le: “Me mbéna bat Yéhôva le a hôla me i tehe memede i nya i kôli, kiki nyemede a ntehe me.”

7. Lelaa i mam di bi boma i niñ yés ma nla hôla bés i nson u Yéhôva?

⁷ Kekikel, u péénaga bañ le Yéhôva a nla gwélél we inyu hôla bôt bape. A bi ti we lipém le u ba so ngwelnson wé i nson u likalô. (1 Korintô 3:9) Mandutu u bi boma i niñ yoñ ma mboñ le u nla hoo nok i yom i bôt ba nok ndutu ba nôgda. Jon u nla boñ ngandak mam inyu hôla bo. Helen nu di mpôdôl a bi kôs mahôla, nano yak nye a nla hôla bape. A nkal le: “Me bé nôgda le me gwé bé mahee. Ndi nano Yéhôva a mboñ le me nôgda le a ngwés me, a ngwélél ki me inyu hôla bôt bape.” Helen a yé nsañal nu ngéda yosôna, a yé ki maséé i nson wé.

YÉHÔVA A NSÔMBÔL LE DI NEEBE LE A NWÉHÉL BÉS

8. Kaat Yésaya 1:18 i nkwés bés nkaa ni kii?

⁸ Ngim bagwélél ba Yéhôva i nginda gwé nduña inyu mam mabe ba bi boñ behee ilole ba nkôs sôble tole i mbus sôble yap. Di nlama bé hôya le Yéhôva a bi ti binoñ inyule a ngwés bés ngandak. A gwé ngôñ le di neebe likébla jé. Yéhôva a nsômbôl le di yi le, i ngéda ‘di mal kodol mam’ c lôñni nye, a mbigda ha bé bibéba gwés. (Añ Yésaya 1:18.) Di nti Tata wés nungingii mayéga inyule a mbigda ha bé bibéba di bi boñ behee! I nlélém ngéda, a nhôya bé i loñge di bi boñ.​—Tjémbi 103:​9, 12; Lôk Héber 6:10.

9. Inyuki di nlama boñ biliya i bok mahoñol i mam di mboñ nano, ni ma di ga boñ i dilo di nlo, he bé i mam di bi boñ behee?

⁹ Ibale mam mape u bi boñ behee ma ntééñga we, hoñol mam u mboñ nano ni ma u ga boñ i dilo di nlo. Bigda ndémbél i ñôma Paul. Hala a bé tééñga nye i yi le a bi lôôha tééñga bikristen, ndi a bé yi le Yéhôva a bi nwéhél nye. (1 Timôtéô 1:​12-15) Baa a bi ke ni bisu i hoñol bibéba a bi boñ behee? Heni, a bi boñ bé hala, ndi to hoñol i mam momasôna a bi boñ i ngéda a bé ntôô mut i base i Lôk Yuda. (Filipi 3:​4-8, 13-15) Maselna ni hala, a bi ke ni bisu i boñ kii yosôna a bé la inyu ñañ nlam, a hoñlak mam ma bé nye i bisu. Kiki Paul, di nla bé héñha i mam di bi boñ. Ndi, di nla ti Yéhôva lipém ni i mam di mboñ nano, di bemek i mam ma mbuma ñañ a mbôn bés inyu dilo di nlo.

10. Kii di nla boñ ibale i mam di bi boñ behee ma bi babaa bôt bape?

¹⁰ Hala a nla tééñga we inyule i mam u bi boñ behee ma bi nôgha bôt bape  njôghe. Kii i nla hôla we? Boñ kii yosôna u nla inyu lémés mam, u bat ki i bôt u nôgha njôghe nwéhél ni ñem woñ wonsôna. (2 Korintô 7:11) Bat Yéhôva le a hôla i bet u bi nôgha njôghe. A nla hôla we ni i bôt u bi nôgha njôghe i ke ni bisu i gwélél nye, ni i bana nsañ.

11. Kii di nla nigil mu ndémbél i mpôdôl Yôna? (Béñge yak titii i .)

¹¹ Ôt biniigana mu dihôha u bi boñ behee, u nwas ki le Yéhôva a gwélél we kiki a ngwés. Bigda ndémbél i mpôdôl Yôna. Iloole a kee i Ninivé i het Djob a bi om nye, a bi ke ngwéé homa numpe. Yéhôva a bi kodol nye, Yôna a ôt ki biniigana mu hihôha hié. (Yôna 1:​1-4, 15-17; 2:​7-10) Yéhôva a bi waa bé gwélél Yôna kiki mpôdôl wé. A bi témb a ep Yôna i Ninivé, ndi lisañ lini, Yôna a bi pala boñ hala. A bi nwas bé le hihôha a bi boñ i ngélé bisu, hi kéñ nye i neebe nson u mondo Yéhôva a bi ti nye.​—Yôna 3:​1-3.

YÉHÔVA A NHÔGBAHA BÉS NI NJEL MBUU MPUBI

12. Lelaa Yéhôva a nti bés nsañ i ngéda di gwé nduña ikeñi, tole di nimis ngim mut di gwéhék? (Filipi 4:​6, 7)

¹² Yéhôva a nhôgbaha bés ni njel mbuu mpubi i ngéda ngim ndutu i nyumus bés tole i ngéda di nimis mut di gwéhék. Di béñge i jam li bi pémél Ron bo Carol. Lok yap i i bééna 39 nwii, i bi nidba. Ba nkal le: “Di mboma mandutu i niñ yés, ndi ini i nloo hihéga. Kiki di bé ke ha bé ’ilo juu, di bi soohe ngandak, di sôk di nôgda nsañ ba mpôdôl i kaat Filipi 4:​6, 7.” (Añ.) Ibale u mboma ngim ndutu i i mpat we ñem, yible Yéhôva ñem ikété masoohe, boñ hala hiki ngéda, ibabé waa. (Tjémbi 86:3; 88:1) Bat Yéhôva hiki ngéda le a ti we mbuu mpubi. A ga waa bé hôla we.​—Lukas 11:​9-13.

13. Lelaa mbuu mpubi u nla hôla bés i téñbe ni Yéhôva? (Éfésô 3:16)

¹³ Baa u mboma ngim ndutu i i nwéés we? Mbuu mpubi u nla ti we ngui i ke ni bisu i gwélél Yéhôva. (Añ Éfésô 3:16.) Di tehe i jam li bi pémél sita yada le Flora. Ba bé missionnaire i ngéda nlôm a bi ke i ndéñg, i mbus ba bos. A nkal le: “I nduña me bé nôgda i ngéda nlô wem a bi yék me likanda, i bé tééñga me ngandak. Me bi soohe Yéhôva le a ti me mbuu mpubi wé inyu boñ le me pam i hônba. Yéhôva a bi lédés me tolakii i bibôdle hala a bé jam li nlet.” Flora a bi nôgda le Djob a nkônde lédés i bôdôl a bé a gwééne nye le, a ga nit nye mu mandutu mé momasôna. A nkônde le: “Bibañga bi kaat Tjémbi 119:32 bi bi yônôl toi me: ‘M’a pala nôgôl mambén moñ, inyule u nyibil ñem wem le me tibil nok mo.’”

14. Lelaa di nla ti mbuu mpubi u Nyambe pôla i hôla bés?

¹⁴ I ngéda u mbat le mbuu mpubi u hôla we, lelaa u nla boñ le maboñok moñ ma kiha ni masoohe moñ? Yoñ ngaba i minson mi mi ga boñ le mbuu mpubi u éga we. Mu mam ma, di nla sima i ke makoda ni i téé likalô. Soñgol Bibel hiki kel inyu yônôs boña woñ ni mahoñol ma Yéhôva. (Filipi 4:​8, 9) Mu kiki u ñañ, noode ôt pék mu i ndémbél i bagwélél ba Yéhôva ba ngéda kôba ba ba bi boma mandutu, u tehe ki lelaa Yéhôva a bi hôla bo. Sandra nu di mbôk di pôdôl a bi boma mandutu makeñi. A nkal le: “Ñañ u Yôsep u bi lôôha tihba me. A bi nwas bé le  mandutu ni ngitelepsép a bé boma, bi tômbôs maada mé ni Yéhôva.”​—Bibôdle 39:​21-23.

YÉHÔVA A NGWÉLÉL LÔK KÉÉ INYU HÔGBAHA BÉS

15. Bonjee ba nla hôgbaha bés, lelaa ba nla hôla bés? (Béñge yak titii.)

¹⁵ I ngéda di nok ndutu, lôk kéé i nla bane bés “lingen li ngandak hogbe.” (Kôlôsé 4:11) Bilôk bikéé bi bôda ni bi bôlôm bi yé yaga bañga njel Yéhôva a ngwélél inyu unda bés le a ngwés bés. Ba nla hôgbaha bés mu kiki ba ntégbaha ngéda ni bés, ni i ngéda ba nyoñ ngéda i emble bés ni loñgeñem. Ba nla éñél bés nlôñ u Bibel inyu lédés bés, tole ba nla soohe lôñni bés. d (Rôma 15:4) Ngim mangéda mankéé nu munlôm tole nu muda a nla hôñlaha bés mahoñol ma Yéhôva, kayéle hala a hôla bés i bana ñem nwee. Lôk kéé i nla yak ti bés mahôla di gwé ngôñ, kiki hihéga, i nla naña bés i je i boni i ngeñ nduña i nai.

16. Kii di nlama boñ inyu kôhna mahôla ma lôk kéé?

¹⁶ Inyu boñ le bôt bape ba hôla bés, di nlama bat bo mahôla. Bilôk bikéé bi bôlôm ni bi bôda bi ngwés bés, bi gwé ki ngôñ i hôla bés. (Bingéngén 17:17) Ndi i nla pam le ba yi bé kii di nôgda to kii  di gwé ngôñ. (Bingéngén 14:10) Ibale ngim mam i ntééñga we, kwel ni mawanda ma ma yé nhôôlak i pes mbuu, u kal bo i yom u nôgda. Yis bo kii ba nla boñ inyu hôla we. U nla yible mañ wada tole ima mi u mbôdôl ñem, ñem. Ngim bisita i bi kôs hogbe i ngéda i bi kwel ni nhôôlak sita umpe.

17. Kii i nla kéñ we i kôhna mahôla ma bôt bape, lelaa u nla keñgle i jam li?

¹⁷ U bana bañ lem i yén wetama, inyule nduña i nla boñ le u bana bé ngôñ i pôdôs mut. I nla pam le lôk kéé i bôda ni i bôlôm i tibil bé nok i yom u nôgda, tole i babaa we ni bibuk. (Yakôbô 3:2) U nwas bañ le i nya mam ini i kéñ we i kôhna mahôla ma mbéda we. Gavin nu a yé mañ, ni nu a bééna kon mahoñol, a nkal le: “Me bééna bé ngôñ i kwel to i tégbaha ngéda ni mawanda mem.” Ndi Gavin a bi nwas bé le mahoñol ma ma yuu nye, a bi boñ biliya i ba ni lôk kéé. A bé nôgda hogbe mu mangéda ma. Sita yada le Amy a nkal le: “I mam me bi boma i niñ yem ma bi boñ le i bane me ndutu ngandak i bôdôl mut ñem. Ndi nano me nigil i gwés ni i bôdôl bilôk bikéé bi bôda ni bi bôlôm ñem kiki Yéhôva. Me nyi le hala a nkônha Yéhôva maséé, yak me me yé maséé.”

MIMBÔNGA MI YÉHÔVA INYU DILO DI NLO MI NHÔGBAHA BÉS

18. Kii di mbem i dilo di nlo, kii di nla boñ nano?

¹⁸ Ibabé pééna, di nla ba nkwoog nkaa le Yéhôva a ga mélés i mam momasôna ma nôgha bés njôghe i ñem ni i minsôn. (Masoola 21:​3, 4) Ha ngéda i, i mam ma bi babaa bés ma ga ‘tuñgul ha bé to bés miñem.’ (Yésaya 65:17) Kiki di ntehe, ibôdôl nano, Yéhôva a ‘nkañ mambabaa més.’ Ôt nseñ i nya i yôni ni bitelbene bi gwéha Yéhôva a nyoñ inyu hôgbaha we. Kekikel u péénaga bañ le ‘Yéhôva a ntôñ we.’​—1 Pétrô 5:7.