1. Inoñnaga ni kaat Matéô 11:28-30, umbe mbônga Yésu a bi ti?

YÉSU a bi kal limut li li bé emble nye le: “Lona i meeni, . . . m’a ti bé hogbe.” (Añ Matéô 11:28-30, MN.) Hala a bé ndik bé bibuk bi nyo. Kiki hihéga, béñge i jam a bi boñ inyu muda wada nu a bééna béba kon.

2. Kii Yésu a bi bôñôl muda a bé kon?

² I muda nu a bi yéñ matibla a waa. A boma mintén mi bidokta nwominsôna inyu yéñ mbôô. I mbus 12 nwii mi njiiha, to jam! Inoñnaga ni mbén Môsi, a bé nyega. (Lôk Lévi 15:25) Ngéda a bi nok le Yésu a mélés bakokon, a ke i boma nye. A tehe bañ nye, a tis linjek li mbot yé, a mbôôp mu manut ma! Ndi Yésu a bi mélés ndik bé nye, a bi yoñ ki ndun ni nye kayéle muda a nôgda le a ngwés nye ni le a nti nye lipém. Kiki hihéga, a bi sébél nye le: “A ngond yem.” Kinje hogbe ni ngui i muda nu a bi kôs!​—Lukas 8:43-48.

3. Mambe mambadga di ga timbhe?

³ Yimbe le i muda nu nyemede a bi ke i boma Yésu. A bi boñ biliya inyu yéñ nye. Nlélém ni bés i len ini, di nlama boñ biliya inyu ‘lo’ yak Yésu. Yésu a mélés ha bé makon i len ni njel manyaga. Ndi a ngi leñek bés unu nsébla le: “Lona i meeni, . . . m’a ti bé hogbe.” Munu yigil ini, di ga timbhe mambadga matan: Kii di  nla boñ inyu ‘lo’ yak Yésu? Kii Yésu a bé sômbôl kal ni bini bibuk le: “Yoña kop yem nson”? Kii di nla nigil mu ndémbél i Yésu? Inyuki nson a bi ti bés u nhôgbaha? Lelaa di nla ke ni bisu i yéñ hogbe mu kop nson i Yésu?

4-5. Ni imbe njel di nla ‘lo’ yak Yésu?

⁴ Njel yada inyu ‘lo’ yak Yésu i yé le di nigil mam a bi boñ ni ma a bi pot bañga liniglak. (Lukas 1:1-4) Mut numpe a nla bé sal i bôlô i inyu yés, ndik bésbomede. Njel ipe inyu ‘lo’ yak Yésu i yé le di yoñ bikidil i sôblana ni i yila banigil ba Kristô.

⁵ Di nla ki ‘lo’ yak Yésu ngéda di nkôôge mimañ mi likoda bebee inyu bat bo mahôla. Yésu a ngwélél ‘bôt bana a bi ti kiki makébla’ inyu tat bémba yé. (Éfésô 4:7, 8, 11; Yôhanes 21:16; 1 Pétrô 5:1-3) Di nlama kôôge bo bebee inyu bat bo mahôla. Di hoñol bañ le mimañ mi ñañ miñem inyu yi i yom i ntééñga bés. Mankéé wada le Julian a nkal le: “Me bi nyodi i Bétel inyule me bé kon, liwanda jem jada li bi ti me maéba le me kal mimañ le mi loo i yuuga me inyu lédés me. Me bi bôk ndugi me tjél. Mbus me neebe, mayuuga ma ma bi sôk bane me likébla lilam me mah bé bana.” Mimañ kiki mi mi bi yuuga Julian, mi nla hôla bés i yi “mahoñol ma Kristô,” hala wee i nok mahoñol mé ni maboñok mé, ni i kôna nye. (1 Korintô 2:16; 1 Pétrô 2:21) Mahôla ma ma nloo makébla momasôna ba nla ti bés.

6. Kii Yésu a bé sômbôl kal ni bini bibuk le: “Yoña kop yem nson”?

⁶ Ngéda Yésu a nkal le “yoña kop yem nson” a nsômbôl kal le ni “neebe me kiki ñane.” A yé wengoñle a bé kal le “begee kop yem nson ni me, di gwélél Yéhôva ntôñ.” Kop nson wee bôlô.

7. Inoñnaga ni Matéô 28:18-20, umbe nson u bi tina bés, bimbe bikwo bi nkaa di gwé?

⁷ Di neebe nsébla u Yésu ngéda di nti bésbomede nkikip yak Yéhôva, di sôblana ki. Nsébla u u yé inyu bôt bobasôna, Yésu a ga tjél bé mut nye ki nye nu a nsômbôl gwélél Nyambe ni ñem wé wonsôna. (Yôhanes 6:37, 38) Bôt bobasôna ba noñ Kristô ba gwé nsima i sal nson Yéhôva a bi ti nye. Di nyi ntiik le Yésu a’ ba ni bés, a’ hôla ki bés ntel wonsôna di nsal nson u.​—Añ Matéô 28:18-20.

8-9. Inyuki bôt ba suhulnyuu ba bé kôôge Yésu bebee, mambe mambadga di nlama badba?

⁸ Bôt ba suhulnyuu ba bé kôôge Yésu bebee. (Matéô 19:13, 14; Lukas 7:37, 38) Inyuki? Di béñge maselna ma bé ipôla Yésu ni Farisai. Baéga base ba ba bé ngôk, ba bééna bé to gwéha. (Matéô 12:9-14) Yésu a bé gwés bôt, a ban-ga suhulnyuu. Farisai i bé gwés bitel bikeñi, i bak ngôk. Ndi Yésu a bi unda le ngôk u ta bé loñge, a bi niiga banigil bé i sélél bôt bape kiki minkol. (Matéô 23:2, 6-11) Farisai i bé i nkônha bôt ba bé isi énél yap woñi. (Yôhanes 9:13, 22) Yésu a bé hôgbaha bôt bape ni gwéha ni bibuk bilam.

 ⁹ Baa u yé le u kôna Yésu? Badba le: ‘Baa me nyiba kiki mut suhulnyuu ni ñemlima? Baa me yé bebee i sélél bôt bape kiki lébla? Baa me yé minyaô ni bôt bape?’

12-14. Inyuki nson Yésu a bi ti bés u nhôgbaha?

¹² Inyuki nson Yésu a bi ti bés u nhôgbaha bés? Manjom ma yé ngandak, ndi di ga wan ndigi ndék.

¹³ Di gwé baéga ba nloo baéga bobasôna. Yéhôva, Sôk bôk wés Ñéga, a gwé bé ñem mbe, a ta bé mut a nyi bé ti mayéga. A yé maséé ni nson di nsal. (Lôk Héber 6:10) A nti ki bés jade inyu begee mbañg i minson a mbééga bés. (2 Korintô 4:7; Galatia 6:5) Yésu Kiñe yés, a nti bés ndémbél ilam inyu maada ni bôt bape. (Yôhanes 13:15) Mimañ mi mi ñéga bés mi noode kôna ndémbél i Yésu, nu a yé “ntééda mintômba nunkeñi.” (Lôk Héber 13:20; 1 Pétrô 5:2) Ba nliya i ba minyaô, i ti bape makénd, ba mboñ ki kii yosôna ba nla inyu tat bés.   

¹⁴ Di gwé mawanda ma nloo mawanda momasôna. Litén to jada li gwé bé gwéha to nson nlam kiki bés. Hoñol le: Di gwé nsima i sal ni bôt ba gwé bilem bilam ngandak, ndi ba nhoñol bé le ba nloo bôt bape. Ba nyi boñ ngandak mam, ndi ba ngôgôp bé, ba ntehe ndik le bôt bape ba nloo bo. Di tane ndik bé bo solôñ i bôlô, ndi ba nyoñ ki bés kiki mawanda map. Gwéha yap inyu yés i nlôôha bana ngui kayéle ba yé bebee i ti niñ yap inyu yés.

15. Lelaa di nlama tehe nson Yésu a bi ti bés?

¹⁵ Di gwé nson u nloo minson nwominsôna. Di niiga bôt i yi Yéhôva, di yeelak bitembee bi Nsohop. (Yôhanes 8:44) Satan a mbééga bôt mambegee ma nloo bo ngui. Kiki hihéga, a nsômbôl le di hoñol le Yéhôva a ga nwéhél bé bés bibéba gwés kekikel ni le di kôli bé le ba gwés bés. Kinje mbegee i nlôôha yét, ñ tembee ikeñi le! Ngéda di ‘nlo’ yak Kristô, bibéba gwés bi nwéhlana. Maliga ma yé ki le, Yéhôva a ngwés bés i nya i mbuma ñañ. (Rôma 8:32, 38, 39) Kinje maséé di nôgda ngéda di nhôla bôt i bôdôl Yéhôva ñem, ni i ngéda di ntehe kiki niñ yap i nlama!

16. Ni imbe njel mbegee Yésu a mbééga bés i yé maselna ni mape?

¹⁶ Mbegee Yésu a mbééga bés i ta bé kiki mana mambegee mape. Kiki hihéga, ngéda ba nhuu bôlô, ngandak bôt i yé i ba nwaak, ni ñunbak. Ndi ki le ngéda di nsal nson u Yéhôva bo Kristô, di yé maséé i nya i nloo héga. Di yé le di huu nwaak i bôlô, ki le di nlama boñ biliya i ke likoda i kôkôa i. Ngéda yigil i mal, di nôgda hogbe, di kôs ki ngui i mondo. Hala a yé nlélém ngéda di mboñ biliya i añal ñañ nlam ni i nigil Bibel. Bisai di yé di kôs bi nloo biliya di mboñ huum!

17. Inyuki di nlama yi i het ngui yés i nsugul di yoñok ki yihe?

¹⁷ Di nlama yi i het ngui yés i nsugul. Jon di yoñ yihe ni minson di nsal. Kiki hihéga, di nla mélés ngui yés yosôna i kot nkus. Ngwañ mut wada u bat Yésu le: “Me boñ laa le ndi me kôdôl niñ boga?” Mut nu a bé nôgôl Mbén. A bé lama yak ba loñge mut inyule Markô a bi kal mu i kaat yé le Yésu “a gwés nye.” Ngéda Yésu a bi leñ nye nsébla unu le: “Ke nuñul gwom gwobisôna u gwé, u ti diyeyeba, . . . ndi u lo, u noñ me.” I mut nu a bééna yaga ngôñ i noñ Yésu, ndi a bé bé bebee i nwas ‘ngandak yé nkus.’ (Markô 10:17-22) Sôk i bi sôk, a bi tjél kop nson Yésu a ti nye, a ke ni bisu i ba nkol u “nkus.” (Matéô 6:24) Ibale we nyen u bé i mut nu, ki u bi boñ lelaa?

18. Kii di nlama boñ hiki ngéda, inyuki?

¹⁸ Di nlama wanba hiki ngéda inyu yi limbe jam di mbugus i niñ yés. Inyuki? Inyule hala a nhôla bés i yi too di ngwélél ngui yés ni pék. Mañge wanda wada le Mark a nkal le: “Me bi tégbaha ngandak nwii me hoñlak le me nsuhus likala jem li niñ. Me bé nsañal, ndi me bé waa bé hoñol mam ma moni, ni lelaa me nla kônde bana nkus. Me bé nok bé inyuki niñ i bé lédél me. Ha nyen me bi yimbe le, me bé yéñ ndigi loñge yem, me tinak Yéhôva minluñ mi ngéda ni mi ngui yem.” Mark a bi bôñgôl niñ yé, a kahal tégbaha ngandak ngéda i nson u Yéhôva. A nkal le: “Ngim mangéda, moni mi yé mi héñél me, ndi ni mahôla ma Yéhôva bo Yésu, me mpam i bugus nson Djob i niñ yem.”

19. Inyuki i yé nseñ i bana litehge lilam?

¹⁹ Di ga kônde kôs hogbe mu i kop nson i Yésu ibale di mboñ mana mam maa. Pog, di bana litehge lilam. Nson u Yéhôva won di nsal, jon di nlama sal wo kiki Yéhôva a ngwés. Bés di yé bagwelnson, Yéhôva a bak Nwet. (Lukas 17:10) Ibale di nkahal yéñ i sal nson wé kiki di ngwés, u ga yidil bés ngandak. To nyaga i i gwé ngui ngandak i nla babaa, i waa ki ibale i nyéñ noñ yé njel, i yéñék ki héya kop i nson i nwet wé. Ndi di yé le di boñ mam ma hélha, di yémbél ki to imbe ndutu, ibale di nwas le Yéhôva nyen a éga bés. Di hôya bañ le mut nye ki nye a nla bé sôña le sômbôl yé i yon!​—Rôma 8:31; 1 Yôhanes 4:4.

20. Di nlama begee kop nson i Yésu ni mambe mahoñol?

 ²⁰ Iba, di sal ni mahoñol malam. Ngôñ yés i yé le, di ti Isañ wés nu gwéha le Yéhôva lipém. Dilo di Yésu, i bôt ba bé hép nkus ba hoñlak ndik bomede ba bi somol, ba tjôô yak kop nson i Yésu. (Yôhanes 6:25-27, 51, 60, 66; Filipi 3:18, 19) Ndi i bet ba bé gwés Djob ni ñem wap wonsôna, ba gwéhék ki mut wap libôk ba bé maséé i begee i kop nson i, niñ yap yosôna hana ’isi, ni botñem i sal ni Kristô nyoo ngii. Yak bés di nla ba maséé i begee kop nson i Yésu ibale di gwé mahoñol malam.   

21. Inoñnaga ni kaat Matéô 6:31-33, imbe botñem di gwééne Yéhôva?

²¹ Aa, di bana bañga botñem. Di mpohol i ti niñ yés sesema, ni i sal ni ngui yés yosôna. Yésu a bi béhe bés le di ga kôs ndééñga. Ndi di gwé botñem le Yéhôva a ga ti bés ngui i hônba to imbe ndutu. Kiki di nhônba, hala nyen di nkônde let. (Yakôbô 1:2-4) Di nla bana botñem le Yéhôva a ga ti bés i mam ma mbéda bés, le Yésu a ga tat bés, ni le lôk kéé yés i bôlôm ni i bôda i ga ti bés makénd. (Añ Matéô 6:31-33; Yôhanes 10:14; 1 Tésalônika 5:11) Kii ipe i nhéñél bés?

22. Inyu bimbe bisai di nla ba maséé?

²² I muda Yésu a bi mélés a bi kôs hogbe yokel. Ndi a bé lama kôs hogbe i boga ibale a bi yik yila nnigil Kristô. Baa a bi boñ hala? Ibale a bi pohol i begee kop nson i Yésu, wee a bi kôs nsima i niñ i ngii ni nye. Bisesema gwobisôna a bi boñ inyu noñ Kristô bi bé bé bañga jam ibale di nhégha gwo ni bisai bini a bi kôs. Too di gwé botñem i niñ i ngii, too hana ’isi, kinje maséé di ga nôgda inyule di bi pohol i neebe nsébla u Yésu unu le: “Lona i meeni!”