1. Kii di nôgda i ngéda mut wés lihaa a ntjôô Yéhôva?

BAA mut woñ lihaa a ma pam i ntôñ? Kinje ndutu! Mankéé nu muda wada le Hilda a nkal le: “I ngéda nlô wem a bi wo, i mbus 41 ma nwii ma libii, me bé hoñol le m’a kôs ha bé ndutu ipe i i nlel i. * Ndi i ngéda man wem a bi pam i ntôñ, a tjôô nwaa wé ni bon bé, i bi pam me i héya bitam.”

2-3. Inoñnaga ni kaat Tjémbi 78:40, 41, kii Yéhôva a nôgda i ngéda bagwélél bé ba ntjôô nye?

² Di hégda le i njôghe ikeñi Yéhôva a bi nok i ngéda biañgel nyoo i ngii bi bi waa gwélél nye. (Yuda 6) Di noode ki hégda i ndutu ikeñi a bi nok i ngéda litén jé Israel li bé ndogbene nye, li tiimbaga. (Añ Tjémbi 78:40, 41.) Yi le Tata wés Nungingii a nok ndutu ngandak i ngéda mut woñ lihaa a nkôm nye mbus, a nok we loñge loñge. A nkônôl we ngoo, a ga lédés we, a hôla ki we.

³ Munu i yigil ini, di ga tehe kii di yé le di boñ inyu boñ le Yéhôva a hôla bés i ngéda mut wés lihaa a mpam i ntôñ. Di ga tehe ki lelaa di nla hôla lôk kéé i bôlôm ni i bôda i i mboma i ndutu i. Di bôk ndugi di béñge i mahoñol mabe di nlama keñgle.

4. Kii ngandak bagwal i nôgda i ngéda lok yap tole ngond yap i ntjôô Yéhôva?

⁴ I ngéda lok yap tole ngond yap i ntjôô Yéhôva, bagwal ba mbéna badba le kii ba mboñ bé inyu boñ le man wap a yén ikété maliga. I ngéda ba bi pémés lok yé i ntôñ, mankéé wada le Luke a nkal le: “Me bé kal  le njom i yé yem. Me bé ke ha bé ’ilo inyu jam li. Ngim mangéda, me bé ee, me nogok njôghe i ñem.” Sita yada le Élisabet nu lok yé i bi tjôô Yéhôva a mbadba le: “Limbe jam libe me nyañ me bi boñ? I bé pôna wee me bi tibil bé niiga man yem maliga.”

5. I ngéda mut a ntjôô Yéhôva njom i yé yen?

⁵ Di hôiga bañ le Yéhôva a bi ti bésbobasôna kunde i yoñ makidik. Jon bés bon di nkit too d’a gwélél nye too d’a gwélél bé nye. Ngim boñge i bi yoñ makidik i gwélél Yéhôva ni ñem wonsôna ki le bagwal bap ba bé bé maliga. Ndi inyu boñge bape, bagwal bap ba bi jo sañ inyu niiga bo sômbôl i Yéhôva, ndi i ngeñ ba bi nañ ba bi kôm Yéhôva mbus. Jon hiki wada wés nyen a nlama kit too a’ gwélél Yéhôva. (Yôsua 24:15) Inyu hala nyen, a bagwal, i ngéda man nan a mpam ntôñ, ni hoñol bañ le njom i yé i nan!

6. Kii boñge ba nôgda i ngéda isañ wap tole nyañ wap a ntjôô Yéhôva?

⁶ Ngim mangéda, isañ mbai tole nyañ mbai a yé a pam ntôñ a tjôô yak lihaa jé. (Tjémbi 27:10) Hala a yé ndutu ngandak inyu boñge inyule ba ntehe bagwal bap kiki ndémbél ilam ba nlama noñ. Esther nu isañ a bi pam i ntôñ a nkal le: “Me bé ee ngandak inyule pua yem a bi ke haa ni ntôñ u Yéhôva. Ni le a bi kit le a ngwélél ha bé Yéhôva. Me ngwés pua yem ngandak, jon i ngéda a bi pam i ntôñ me bé me mbadba le a mboñ laa. Me bé me nkon woñi ngandak.

7. Kii Yéhôva a nôgda i ngéda isoñ tole nyuñ a mpam i ntôñ?

⁷ A mañge wanda, ibale isoñ tole nyuñ a bi pam i ntôñ, yi le hala a ntééñga yak bés! Soho u hôya bañ le yak Yéhôva a nok we bañga bañga. A ngwés we, a yé ki maséé lakii u ntéñbe i gwélél nye, yak bés lôk kéé yoñ di nkônôl we maséé. Yi ki le njom i ta bé yoñ ibale isoñ tole nyuñ a mpam i ntôñ. Kiki di mbôk di tehe, Yéhôva a bi ti bésbobasôna kunde i yoñ makidik més bésbomede. Jon hiki mankéé nu a yé nsôblege a nlama “begee yé yé mbegee.”​—Galatia 6:5

8. Kii di yé le di boñ i ngéda mut wés lihaa a mpam i ntôñ? (Béñge yak minkéñék mi matila mini le “ Soho, témb yak Yéhôva.”)

⁸ I ngéda mut woñ lihaa a mpam i ntôñ, u kôli bot ñem le kel yada a’ témb a kahal gwélél Yéhôva. Ndi kii u yé le u boñ ilole a ntémb? U nla gwélél i ngéda i inyu kônde lédés hémle yoñ. Ibale u mboñ hala, u ga éba bini bijô bipe bi lihaa ndémbél ilam bebek yak i nwet a mpam i ntôñ. U ga bana ki ngui inyu nihbe i ndutu i. Jon kii u nla boñ inyu lédés hémle yoñ?

9. Kii u nla boñ inyu lédés hémle yoñ? (Béñge yak minkéñék mi matila mini le “ Minlôñ mi Bibel mi mi nhôla bés i ngéda mut wés lihaa a ntjôô Yéhôva.”)

⁹ Boñ kii yosôna u nla inyu lédés  hémle yoñ. Hala a nlôôha ba nseñ le we ni lihaa joñ ni kee ni bisu i bana maada malam ni Yéhôva. Kii i yé le i hôla bé? Inyu lédés hémle yoñ, añ Bibel hiki kel u ôt pék mu. U kenek ki i makoda momasôna. Joanna nu isañ ni manyañ nu muda ba bi pam i ntôñ a nkal le: “I ngéda me ñañ Bibel, me nwan ndémbél i bôt kiki bo Abigail, Ester, Hiôb, Yôsep ni Yésu. Hala a nhôgbaha me ngandak. Ndémbél yap i nlédés me, i nhôla ki me i bana mahoñol malam. Yak ngembe yés nsik i nti me makénd ngandak.”

10. Lelaa kaat Tjémbi 32:6-8 i nhôla bés i ngéda di gwé ndutu?

¹⁰ Kal Yéhôva i mam momasôna ma ntééñga we. I ngéda u gwé ndutu, soohe nye ibabé waa. Yemhe Tata wés nugwéha le a hôla we i tehe mam kiki nyemede a ntehe mo ni le a ‘ti we maéba, a niiga ki we njel u nlama kil.’ (Añ Tjémbi 32:6-8.) I pot mbale, i añle Yéhôva i mam momasôna ma yé bés mahoñol, hala a ta bé jam li ntomb. Ndi Yéhôva a nok we loñge loñge. A ngwés we ngandak jon a nkal we le u kal nye mam momasôna ma ntééñga we.​—Manyodi 34:6; Tjémbi 62:8, 9.

11. Inoñnaga ni kaat Lôk Héber 12:11, inyuki di nlama bôdôl Yéhôva ñem i ngéda ba nkodol mut? (Béñge yak minkéñék mi matila mini le “ I ngéda ba mpémés mut i ntôñ​—hala a ñunda gwéha i Yéhôva.”)

¹¹ Nit makidik mimañ mi nyoñ. Yéhôva nyen a bi kit le ibale mut a mboñ béba ndi a tam bé, ba nlama pémés nye i ntôñ. I ngéda Yéhôva a nkodol bés, hala a yé inyu loñge yés, yak i mut ba mpémés i ntôñ. (Añ Lôk Héber 12:11.) I bôt ba mbéna kal le mimañ mi nkéés bé hop loñge, ngim mangéda bebek ba  ta ba pôdôl bé ngim mam i mut ba mpémés i ntôñ a mboñ. Di nyi bé i mam momasôna ma bi tagbe nyoo. Di bôdôl mimañ ñem, di yi le ba mboñ biliya i noñ Bitilna, ba nkéés i hop u “inyu Yéhôva.”​—2 Miñañ 19:6.

12. Bimbe bisai ngim lôk kéé i bi kôs inyule i bi neebe bikodlene bi Yéhôva?

¹² I ngéda di neebe makidik mimañ mi nyoñ le ba héya mut wés lihaa i ntôñ, hala a nla hôla nye i témb yak Yéhôva. Élisabet nu di mbôk di pôdôl a nkal le: “Hala a bé ndutu ngandak le di bagla ni lok yés i i bé nnañak, ndi i ngéda a bi témb yak Yéhôva, nyemede a bi kal le ba bé ba kôli pémés nye i ntôñ. A bi sôk a kal le bikodlene bi Yéhôva bi bi hôla nye i nok ngandak mam. Me bi tehe toi le Yéhôva a nkodol bés inyu loñge yés.” Nlô wé Mark a nkal le: “I mbus ngéda, lok yés i bi yis me le jam jada li li bi hôla nye i témb yak Yéhôva li yé le di bi waa kwel lôñni nye. Me yé maséé kiki Yéhôva a bi hôla bés i nôgôl nye.”

13. Kii i nla hôla we i ngéda u gwé nduña?

¹³ Yible mawanda moñ ñem. Kiha ni minhôôlak mi bilôk bikéé mi mi nla hôla we i bana mahoñol malam. (Bingéngén 12:25; 17:17) Joanna nu di mbôk di pôdôl, a nkal le: “Me bé me môdi. Ndi i ngéda me bi kwel ni bañga yem mawanda, hala a bi hôla me ngandak.” Ndi kii u nla boñ ibale u nôgda wee ngim lôk kéé i mbep pôdôs we?

14. Inyuki di nlama ‘ke ni bisu i hônbana bés ni bés ni i nwéhlana bés ni bés ni ñem wonsôna’?

¹⁴ Hônba lôk kéé yoñ i bôda ni i bôlôm. U nlama yi le, ngim mangéda lôk kéé i yé le i pot jam li li ntééñga we. (Yakôbô 3:2) Di yé bikwéha bi bôt, jon mankéé a nla kal jam li a gwéhék bé kal we tole jam li li yé le li babaa we. Di bigda maéba ma ñôma Paul mana le: “Kena ni bisu i hônbana bé ni bé, ni nwéhlaga ki bé ni bé ni ñem wonsôna, to ibale wada nan a gwé njom i tjelel inyu numpe.” (Kôlôsé 3:13) Sita yada i mut wé lihaa a bi pam i ntôñ i nkal le: “Yéhôva a bi hôla me i nwéhél lôk kéé i i bé sômbôl lédés me ndi i kal me bibuk bibe.” Kii likoda li nla boñ inyu hôla lôk kéé i i yé le mut wap lihaa a mpam i ntôñ?

15. Lelaa di yé le di hôla lôk kéé i mut wap lihaa a mpam i ntôñ?

¹⁵ Di tibil leege lôk kéé i mut wap lihaa a mpam i ntôñ. Sita yada le Miriam a nkal le a bé kon woñi i ke i ndap Ane i ngéda manyañ nu munlôm a bi pam i ntôñ. A nkal le: “Me bé kon woñi le ba nla kal me jam li li nla babaa me. Ndi hala a bi tééñga lôk kéé i i yé mawanda mem kiki mankéé a bi pam i ntôñ, ba bi kal bé me buk ibe to yada. Kiki ba bé  lôñni me, kekikel me bi nôgda bé wee me yé metama.” Sita ipe i nkal le: “I ngéda lok yés i bi pam i ntôñ, mawanda més ma bi lo i lédés bés. Bahogi ba bi kal bés le ba nyi bé to i yom ba kal. Ba bi ee lôñni me, bape ba tilna me. Hala a bi lôôha lédés me!”

16. Lelaa di nla ke ni bisu i hôla lôk kéé i mut wap lihaa a mpam i ntôñ?

¹⁶ Di kee ni bisu i hôla lôk kéé i mut wap lihaa a mpam i ntôñ. Munu ngéda ini nyen ba gwé toi ngôñ le di éba bo le di ngwés bo, di lédés ki bo. (Lôk Héber 10:24, 25) Ngim mangéda, lôk kéé i bôt bap ba lihaa ba mpam i ntôñ i yé i nôgda ndik wengoñle yak bo ba mpémés bo i ntôñ. Di nlama bé boñ le lôk kéé i hoñol hala! I boñge ba wanda ba ba yé le bagwal bap ba mpam i ntôñ ba gwé ngôñ le di lédés bo, di bégés ki bo. Maria nu nlôm a bi pam i ntôñ, a tjôô nye ni bon bé, a nkal le: “Ngim lôk kéé i bé i lo i lémbél bés bijek, i tégbaha yak yigil i lihaa lôñni bés. I jam li li bi tééñga bo, ba ee ni me. I ngéda bôt ba bé ôm me nsohi, ba bé sôñ me. Ba bi lédés me iloo hihéga!”​—Rôma 12:13, 15

17. Lelaa mimañ mi nla hôla lôk kéé i mut wap lihaa a mpam i ntôñ?

¹⁷ A mimañ, ni yéñ manjel i lédés lôk kéé i mut wap lihaa a mpam i ntôñ. Mbegee nan i yé le ni hôgbaha lôk kéé i mut wap lihaa a ntjôô Yéhôva. (1 Tésalônika 5:14) Ni yoñ ngéda i lédés bo ilole makoda ma mbôdôl ni i ngéda makoda ma mal. Ni yuuga bo, ni soohe ki ni bo. Ni pam likalô ni bo, ngim mangéda ni naña yak bo i bibégés bi ndap lihaa. Mimañ mi nlama tôñ lôk kéé i mut wap lihaa a mpam i ntôñ, mi éba ki bo gwéha ni konangoo.​—1 Tésalônika 2:7, 8.

18. Kiki kaat 2 Pétrô 3:9 i ñunda, sômbôl i Yéhôva inyu bôt ba bi tjôô nye i yé le kii?

¹⁸ Yéhôva “a nsômbôl bé le mut nye ki nye a tjiba, ndi a nsômbôl le bôt bobasôna ba pam i hiel miñem.”  (Añ 2 Pétrô 3:9.) Yak i ngéda mut a mboñ béba ikeñi, a yé nseñ i mis ma Nyambe. Di hôya bañ le Yéhôva a bi neebe le man wé a wo inyu bibéba gwés bésbobasôna. Yéhôva a yé bebee i hôla i bôt ba bi tjôô nye i témb i nyeni. Hihéga hi man nnimlaga hi ñéba bés le Yéhôva a mbot ñem le ba ga témb i nyeni. (Lukas 15:11-32) Ngandak lôk kéé i i bi pam i ntôñ i bi sôk i témb i kahal gwélél Yéhôva Tata wés nugwéha. Lôk kéé i bôda ni i bôlôm i bé ki maséé i leege bo. Élisabet nu di mbôk di pôdôl, a bé maséé i ngéda lok yé i bi témb i ntôñ. I ngéda a nhoñol i jam li a nkal le: “Me yé maséé ngandak inyule lôk kéé i bi lédés bés i kal bés le di lehel bañ ñem.”

19. Inyuki di nlama bé waa bôdôl Yéhôva ñem?

¹⁹ Di nlama bé waa bôdôl Yéhôva ñem. Hiki jam a nkal bés le di boñ li yé inyu loñge yés. A yé Tata wés, a nkap ngandak, a nkônôl bés ngoo, a ngwés ki i bôt bobasôna ba ngwés nye ba boñok sômbôl yé. Yi le kekikel Yéhôva a ga tjôô bé we i ngéda u gwé ndutu. (Lôk Héber 13:5, 6) Mark nu di mbôk di pôdôl, a nkal le: “Yéhôva a ga tjôô bé bés kekikel. Hiki ngéda di gwé ndutu a yé ha inyu hôla bés.” Yéhôva a ga ke ni bisu i ti bés “lipémba li li nloo li mut binam.” (2 Korintô 4:7) Ñ, yak i ngéda mut wés lihaa a ntjôô Yéhôva di nla téñbe ni Yéhôva, di nlehel bé ki to ñem.