1. Lelaa niñ i ga ba i Ane i hikôô hi nwii?

 I NGÉDA bôt ba ga bôdôl tuge i Ane i hikôô hi nwii i Kristô, ngand yomede yon i ga ba! I bôt bobasôna ba bi jô bôt bap ba ga tehe bo, yak Yéhôva a gwé ngôñ i tehe bo. (Hiôb 14:15) Maséé ma ga ba i nkoñ ’isi wonsôna ha ngéda i. Kiki di bi tehe i yigil i ntagbe, “bôt ba téé sép” ba môl map ma yé ntilga i kaat niñ ba ga tuge “inyu niñ.” (Minson mi baôma 24:15; Yôhanes 5:29) Bebek le ngandak bôt i i bi wo mu mahaa més i ga ba bôt ba bisu i tuge inyu niñ hana ’isi. * Yak bôt ba ba téé bé sép, ba ba bi la bé yi Yéhôva tole ba bi gwélél bé nye nwaa le ba nwo ba ga ‘tuge inyu bikééhene.’

2-3. (a) Kaat Yésaya 11:9, 10, i mpôdôl bimbe biniigana bôt ba binam ba ga kôs hana ’isi? (b) Kii di ga tehe munu i yigil ini?

² I mba i mbéda le ba niiga ba ba ga lo i bitugne.  (Yésaya 26:9; 61:11) Jon, bôt ba binam ba ga kôs biniigana hana ’isi kiki ba bé ngi kôs. (Añ Yésaya 11:9, 10.) Inyuki? Inyule i ga béda le i bet ba ga tuge, ba niiga bo njee a yé Yésu Kristô, kii i yé bitééne bi Djob, kii i yé sesema i Yésu Kristô? I ga béda ki le ba yi le jôl li Yéhôva li nlama pubhana, ni le nyen a kôli ane bôt bobasôna. Yak bôt ba téé sép, i ga béda le ba niiga bo i mam Yéhôva a bi yik niiga bagwélél bé i mbus nyemb yap. Bahogi ikété yap ba bi wo i ngéda ba bé ngi mal tila Bibel. Bôt ba téé sép ni bôt ba téé bé sép ba ga nigil ngandak mam.

³ Munu i yigil ini, di ga timbhe mambagda mana: Lelaa ba ga niiga i bôt ba ga tuge hana ’isi? Ibale ba nôgôl i mam ba ga niiga bo tole ba ntjél nôgôl mo, baa môl map ma ga tilba i kaat niñ tole heni? I mambadga mana ma mbéñge yak bés. Di ga tehe lelaa di ntiimba toñol mbañ ihogi i kaat Daniel ni i kaat Masoola inyu jam li bitugne. Di béñge ndugi i mam ma yé kaat Daniel 12:1, 2.

4-5. Kii kaat Daniel 12:1 i niiga bés inyu dilo di nsôk?

⁴ Añ Daniel 12:1. Kaat Daniel i ñunda i mam ma ga bôña i dilo di nsôk. Kiki hihéga, kaat Daniel 12:1 i nkal le Mikael, hala wee Yésu Kristô, ‘a téé ha inyu loñge i litén li Djob.’ I mbañ ini, i bi bôdôl yon i nwii 1914, i ngéda Yésu a bi yila Kiñe i Ane i Djob.

⁵ Ndi, mbañ Daniel i ñéba ki le Yésu a lama ‘telep’ i ‘ngéda njiiha y’a ba, i nya i maa bé ba ibôdôl i ngéda loñ bisu i bi ba, letee ni ha ngéda i.’ I “ngéda njiiha” i, yon i yé “njiiha ikeñi” kaat Matéô 24:21 i mpôdôl. Yésu a ga telep tole a ga lo i sôñ bagwélél ba Yéhôva i lisuk li ngéda i njiiha i, hala wee i gwét bi Armagédôn. I bagwélél ba Yéhôva ba, bo ki bon kaat Masoola i nsébél le “limut likeñi li li nlôl i njiiha ikeñi.”​—Masoola 7:9, 14.

6. Kii y’a bôña i mbus le limut li bôt likeñi li mpei i njiiha ikeñi? Toñol. (Béñge yak “Mambadga ma basoñgol” ma ma mpôdôl bitugne hana ’isi munu i Nkum Ntat nunu.)

⁶ Añ Daniel 12:2. Kii i ga bôña i mbus le limut li bôt likeñi li mpei i njiiha ikeñi? Di bé kal ndugi le, i mbañ ini i mpôdôl nson u bagwélél ba Djob u u bi témb u bôdôl hol munu dilo di nsôk. * Ndi hala bé nyen i yé; i mbañ i, i mpôdôl bitugne i mbok yondo. Kii i nyis bés hala? Bibañga bini le “minluñ mi biték” bi bi yé i kaat i Daniel 12:2 bi yé yak i kaat Hiôb 17:16, bi nkobla le “Soñ.” Hala a ñéba le kaat i Daniel 12:2 i mpôdôl bitugne i mbus Armagédôn.

7. (a) Inyuki di nla kal le bôt bape ba ga tuge inyu “niñ boga”? (b) Inyuki i bitugne bi, bi yé “bañga bitugne”?

⁷ I ngéda kaat i Daniel 12:2 i nkal le i bôt ba ga tuge ba ga kôs “niñ boga,” hala a nkobla le kii? Hala a nkobla le i Ane i hikôô hi nwii, i bôt  ba ga tuge, ibale ba nke ni bisu i yi Yéhôva ni Yésu, ba nôgôl ki bo, ba ga kôhna niñ boga. (Yôhanes 17:3) I bitugne bi, bi yé “bañga bitugne.” Bi nloo bitugne bi bôt ba bi bôk ba tuge behee. (Lôk Héber 11:35) Inyuki? Inyule i bôt ba bi bôk ba tuge behee, ba bi témb ba wo.

8. Lelaa bôt bape ba ga tuglana le “ba kôs mbolo, ba nyiip ki bo i mba ni mba”?

⁸ I bôt ba ga tuge bobasôna bé bon ba ga neebe le Yéhôva a niiga bo. Mbañ i Daniel i nkal le: “Bahogi b’a tuglana le ba kôs mbolo, ba nyiip ki bo i mba ni mba.” Hala kiki ba ga unda le ba yé ndok, môl map ma ga tilba bé i kaat niñ, ba ga kôhna bé to niñ boga. Ndi ba ga “nyiip bo i mba ni mba” hala wee ba ga tjiba. Hala a nkobla le kaat Daniel 12:2 i mpôdôl lisuk li ba bobasôna ba ga tuglana inoñnaga ni i yom ba ga boñ i mbus bitugne gwap. * (Masoola 20:12) Bahogi ba ga kôhna niñ boga, bape ba ga tjiba.

9-10. Kii i ga tagbe i mbus njiiha ikeñi, bonjee “b’a bai kiki libayak li libôbôl li ngii”?

⁹ Añ Daniel 12:3. Kii ipe i ga bôña i mbus “ngéda bikuu ni bikuu”? Ha ndugi i yom kaat i Daniel 12:2 i nkal, nlôñ 3 u ñunda le yom ipe i ga bôña i mbus njiiha ikeñi.

¹⁰ Bonjee “b’a bai kiki libayak li libôbôl li ngii”? Bibañga bi Yésu i kaat Matéô 13:43 bi nhôla bés i yi bonjee ba, a kal le: “Ha ngéda i, bôt ba telepsép b’a bai ni ngui kiki hiañgaa mu Ane i Tata wap.” Mu minlôñ mi, Yésu a bé pôdôl “bon ba Ane” hala wee minhook, nwon mi ga énél lôñni nye nyoo i ngii. (Matéô 13:38) Jon, kaat Daniel 12:3 i nlama pôdôl minhook ni i bôlô mi ga sal i Ane i hikôô hi nwii.

11-12. Umbe nson 144 000 i ga gwel i Ane i hikôô hi nwii?

¹¹ Lelaa minhook mi ga éga “limut le li yi telepsép”? I Ane i hikôô hi nwii, minhook mi ga sal bas bas ni Yésu Kristô inyu niiga bôt hana ’isi. I 144 000 bôt ini, i ga ba ndik bé bikiñe, ndi i ga ba ki biprisi. (Masoola 1:6; 5:10; 20:6) Hala nyen ba ga hôla i mbuubaha biloñ, ndék ndék ba hôla bôt ba binam i témb yila peles. (Masoola 22:1, 2; Ézékiel 47:12) Minhook mi ga ba maséé ngandak.

¹² Bonjee ba ga ba mu “limut” li ga yila bôt ba téé sép? Mu nsoñgi u, di ga bana i bôt ba ga tuge, i bôt ba ga pei gwét bi Armagédôn, lôñni boñge ba ba ga gwéé i mbok yondo. I mamélél ma Ane i hikôô hi nwii, bôt bobasôna hana ’isi ba ga ba peles. Imbe ngéda ni môl map m’a ba ntilga i kaat niñ ni tiñti, he ni liwindi bé?

13-14. I ngéda bôt bobasôna ba ga yila peles hana ’isi, kii hiki wada wap a nlama unda ilole a nkôs niñ boga?

¹³ Di hoñol bañ le ibale mut a yé  peles wee a mal kôs niñ boga. Hoñol ndémbél i Adam bo Éva. Ba bé peles, ndi inyu boñ le ba niñ i boga ni boga, ba bé lama nôgôl mambén ma Yéhôva Djob, ndi ngoo le ba bi ndogbene nye.​—Rôma 5:12.

¹⁴ Mam ma ga ba lelaa inyu i bet ba ga ba hana ’isi i mamélél ma Ane i hikôô hi nwii? Bobasôna ba ga yila peles. Baa bobasôna ba ga nit Ane i Yéhôva ni ñem wap wonsôna i boga ni boga? Tole bape ba ga boñ kiki Adam bo Éva, ba ba bé peles, ndi to hala ba ndogbene Yéhôva? I ga béda le i mambadga mana ma kôs ndimbhe, ndi lelaa hala a ga bôña?

15-16. (a) Imbe ngéda bôt ba binam bobasôna ba ga bana pôla i unda le ba ntéñbe ni Yéhôva? (b) Lelaa mam ma ga ba i lisuk li manoodana ma?

¹⁵ Satan a ga léña i mok inyu hikôô hi nwii. Mu i ngéda i yosôna, a ga la bé yumus bôt ba binam. Ndi i ngéda hikôô hi nwii hi ga mal, ba ga pémés Satan i mok. Ha nyen a ga noode bôt ba binam ba ba yé peles. Mu i ngéda manoodana i yosôna, bôt ba binam ba ga sôk bana pôla i unda too ba ga ti jôl li Djob lipém, ba nit ki Ane yé. (Masoola 20:7-10) I biliya hiki wada wap a ga boñ inyu kolba Satan gwom gw’a unda too môl map ma ga tilba i kaat niñ i boga ni boga.

 ¹⁶ Bape, ba nsoñgi wap u nyiba bé, ba ga boñ kiki Adam bo Éva, ba ga kôm Ane i Yéhôva mbus. Kii y’a pémél bo? Kaat Masoola 20:15 i nkal le: “Nu ni nu a bééna bé jôl jé ntilga i kaat niñ a léña i titimba i hié.” Ñ, i bôt ba ndok bana, ba ga tjiba i boga ni boga. Ndi libim li bôt li li yé peles li ga net i manoodana ma nsôk ma. Ha nyen môl map ma ga ba ntilba i boga ni boga i kaat niñ.

17. Ba bi kal Daniel le kii i ga bôña munu ngéda yés? (Daniel 12:4, 8-10)

¹⁷ Kinje maséé di gwé i hoñol i mam ma ga bôña i dilo di nlo! Ndi Daniel a bi kôhna ki nwin u u yé nseñ ngandak, u u mbéñge ngéda yés, hala wee “ngéda lisuk.” (Añ Daniel 12:4, 8-10; 2 Timôtéô 3:1-5) Añgel i bi kal Daniel le “yi yomede y’a hol nholok.” Ñ, litén li Djob li ga nok i mbañ i yé mu kaat Daniel loñge loñge. Añgel i bi kônde kal Daniel le mu ngéda i “batjatjañk b’a tjañgap ndigi; to wada a’ tibil bé yi.”

18. Ndék ngéda kii i ga pémél bibéba bi bôt?

¹⁸ I len ini, a yé wengoñle bibéba bi bôt bi nkôs bé kogse inyu mam mabe  ba mboñ. (Malaki 3:14, 15) Ndék ngéda, Yésu a ga kéés bibéba bi bôt, a bagal ki bo ni biloñge bi bôt kiki ntééda bémba a mbagal mintômba ni minya mi kembee. (Matéô 25:31-33) Bibéba bi bôt bi ga pei bé i njiiha ikeñi, bi ga tuge bé to inyu niñ i mbok yondo. Môl map ma ga ba bé ntilga i “kaat mbigda” i ba mpôdôl i kaat Malaki 3:16.

19. I bôdôl nano kii di nlama boñ, inyuki? (Malaki 3:16-18)

¹⁹ Nano nyen di nlama unda le di ta bé i pes i bibéba bi bôt. (Añ Malaki 3:16-18.) Yéhôva a yé i kot bôt ba a ntehe kiki “ntolok tik yé yom yaga,” tole bôt ba a ndiihe ngandak. Ibabé pééna, di nyéñ ba i pes yap.

20. Umbe mbônga ba bi sôk ti Daniel, inyuki u mbem le u tehe wo u nyon?

²⁰ Di niñil toi i ngéda i mbuma ñañ. Ndi, bihélha bi mam bipe bi yé i njel. Ndék ngéda, béba y’a ba ha bé. I mbus ha, di ga tehe kiki mbônga Yéhôva a bi ti Daniel u nyon, a bi kal nye le: “U [ga] telbene ki i ngababum yoñ i lisuk li dilo.” (Daniel 12:13) Baa w’a ba maséé i ba ha i ngéda Daniel a ga témb a ‘telep,’ nye ni i bôt u ngwés? Ibale hala, boñ kii yosôna u nla nano inyu téñbe ni Yéhôva. Ha nyen w’a ba nkwoog nkaa le jôl joñ li mba ntilga i kaat i niñ.