1. Inoñnaga ni kaat Malaki 3:16, imbe kaat Yéhôva a ntila ibôdôl behee, kii i yé mu kaat i?

 HALA a yé dikôô di nwii le Yéhôva a bi bôdôl tila ngim kaat. Mu kaat i, môl ma bagwélél ba Yéhôva ma yé mu, ibôdôl ni i ngwélél wé nunu le Abel. * (Lukas 11:50, 51) Ibôdôl ha ngéda i, Yéhôva a bi tila môl mape mu kaat i. I len ini, didun di môl di yé mu. Bibel i nsébél i kaat i le “kaat mbigda,” “kaat niñ,” ni “nhôôk kaat niñ.” Munu yigil ini, di nsébél yo le “kaat niñ.”​—Añ Malaki 3:16; Masoola 3:5; 17:8.

2. Bonjee ba gwé môl map mu kaat niñ, kii di nla boñ inyu boñ le môl més ma ba mu?

² Kaat niñ i gwé môl ma bôt ba mbégés Yéhôva, ba konok nye woñi, ba gwéhék jôl jé. Ba gwé botñem i niñ boga. Yak bés, môl més ma nla ba mu kaat i, ibale di mboñ kii yosôna i mbéda inyu yila mawanda ma Yéhôva ni njel sesema i Man wé Yésu Kristô. (Yôhanes 3:16, 36) Bésbobasôna di gwé ngôñ le môl més ma tilba mu kaat i​—to di gwé botñem i niñ i ngii tole hana ’isi.

3-4. (a) Ibale jôl jés li yé ntilga i kaat niñ, baa hala a nkobla le di ga niñ i boga ni boga? Toñol. (b) Kii di ga tehe munu yigil ini, ni i i noñ ha?

 ³ Baa hala a nkobla le i bôt ba gwé môl map mu kaat niñ ba mal kôhna niñ boga? Bibañga Yéhôva a bi kal Môsi hana i kaat Manyodi 32:33, bi nhôla bés i timbhe i mbadga i. A bi kal nye le: “Tonjee yaga a bi boñ me béba, nyen m’a sas mu kaat yem.” Hala a nkobla le i môl ma yé hanano i kaat mbigda ma yé le ma séha. A yé ndik wee Yéhôva a ntila i môl ma ni liwindi. (Masoola 3:5, buk i si lipep.) Di nlama jo sañ inyu boñ le môl més ma tilba mu kaat i, ha ndik ni liwindi bé, ndi yak ni tinti.

⁴ Ndi di yé le di badba ngim mambadga. Kiki hihéga, di nla badba le: Kii Bibel i mpot inyu bôt ba ba gwé môl map mu kaat niñ, ni bôt ba ba gwé bé môl map mukété? I bôt ba gwé môl map i ntilga mu kaat i, imbe ngéda ba ga kôhna niñ boga? Y’a léña lelaa inyu bôt ba bi wo ibabé le ba yi Yéhôva? Baa yak bo, môl map ma nla ba mu kaat i? Di ga timbhe i mambadga mana munu yigil ini, ni i i noñ ha.

BONJEE BA GWÉ MÔL MAP MU KAAT NIÑ?

5-6. (a) Kiki di ntehe i kaat Filipi 4:3, bonjee ba gwé môl map mu kaat niñ? (b) Imbe ngéda môl map ma ga la ha bé séha i kaat niñ?

⁵ Bonjee ba gwé môl map mu kaat niñ? Inyu timbhe i mbagda i, di pôdôl le mintôñ mi bôt mintan. Mu bôt ba, bahogi ba gwé môl map mu kaat niñ, bape môl map ma ta bé mu.

⁶ Bôt ba bisu ba yé ba ba ntéba hana ’isi inyu ke i ane ni Yésu i ngii. Baa môl map ma yé ntilga mu kaat niñ? Ñ. I jam  Paul a bi kal ‘baso bagwelnson’ bé, ba ba bé i tison Filipi, li ñunda bés le môl ma minhook, mi mi ga ke i ane ni Yésu i ngii, ma yé ntilga mu kaat niñ. (Añ Filipi 4:3.) Ndi ba nlama téñbe ni Yéhôva inyu boñ le môl map ma yégle mu kaat niñ. I ngéda ba ga kôhna béndél yap i nsôk, nwaa le ba nwo, tole nwaa le njiiha ikeñi i mbôdôl, môl map ma ga la ha bé séha mu kaat niñ.​—Masoola 7:3.

7. Kii kaat Masoola 7:16, 17 i ntoñle bés inyu ngéda môl ma mintômba mimpe ma ga séha ha bé i kaat niñ?

⁷ I bôt ba noñ ha, ba yé limut li bôt likeñi. Baa i len ini, môl map ma yé i kaat niñ? Ñ. Baa môl map ma ga ba mu kaat niñ i ngéda ba ga pei gwét bi Armagédôn? Ñ. (Masoola 7:14) Yésu a bi kal le mintômba mimpe mi ga kôhna “niñ boga.” (Matéô 25:46) Ndi ba ga kôhna bé niñ boga kunda yada i mbus ba ma pei gwét bi Armagédôn. I ga ba ndik wengoñle môl map ma yé ntilga mu kaat niñ ni liwindi. I Ane i hikôô hi nwii, Yésu “a ga éga ki bo i mangen ma malép ma niñ.” I bôt ba ga nôgôl Kristô, ba téñbe ki ni Yéhôva, môl map ma ga séha ha bé ki i kaat niñ.​—Añ Masoola 7:16, 17.

8. Bonjee ba gwé bé môl map mu kaat niñ, lisuk jap li ga ba lelaa?

⁸ Bôt ba nyônôs baa ba yé minya mi kembee, mi mi ga tjiba i Armagédôn. Môl map ma ta bé ntilga i kaat niñ. Yésu a bi kal le “ba ga ke i tjiba i boga.” (Matéô 25:46) Mbuu mpubi u bi tinde Paul i kal le “bo yaga bon b’a kôhna mbagi kogse i tjiba i boga.” (2 Tésalônika 1:9; 2 Pétrô 2:9) I nlélém kogse i yon yak i bôt ba nkôôba boñ béba ikolba mbuu mpubi, ba ga kôhna. Ba ga tjiba, ba ga kôhna bé niñ boga. Ñ, ba ta bé le ba tuge. (Matéô 12:32; Markô 3:28, 29; Lôk Héber 6:4-6) Nano, di pôdôl mintôñ mi bôt ima mi mi ga tuge hana ’isi.

BONJEE BA GA TUGE?

9. Kaat Minson mi baôma 24:15 i ñéba le mintôñ mi bôt ima mi ga tuge hana ’isi mimbe mi, maselna ma yé hee ipôla i mintôñ mi nwo ima?

⁹ Bibel i mpôdôl mintôñ mi bôt ima mi mi ga tuge, mi ban-ga botñem i niñ i boga ni boga hana ’isi: “Bôt ba téé sép” ni “bôt ba téé bé sép.” (Añ Minson mi baôma 24:15.) “Bôt ba téé sép” ba yé i bôt ba bi gwélél Yéhôva i ngéda ba bé ba ngi yii i niñ. Ndi “bôt ba téé bé sép” ba bi gwélél bé Yéhôva. Ngandak ikété yap i bééna bé bihiumul bilam. Kiki i mintôñ mi bôt ima mini mi ntuge, baa hala a nkobla le môl map ma yé ntilga i kaat niñ? Inyu timbhe i mbadga ini, di pôdôl le i mintôñ mi wada wada.

10. Inyuki “bôt ba téé sép” ba ga tuge, umbe nson bahogi ikété yap ba ga sal? (Béñge yak “mambadga ma basoñgol” ma ma mpôdôl bitugne hana ’isi.)

¹⁰ Bôt ba nyônôs bana ba yé “bôt ba téé sép.” Nwaa le ba nwo, môl map ma bé ntilga i kaat niñ. Baa i ngéda ba bi wo, ba bi sas môl map mu kaat niñ? Heni. Inyuki? Inyule inyu Yéhôva, “ba yé i niñ.” Yéhôva “a ta bé Nyambe nu bawoga, ndi nu bayômi, inyule inyu yé, bobasôna ba yé i niñ.” (Lukas 20:38) Hala a nkobla le i ngéda bôt ba téé sép ba ga tuge, môl map ma ga ba ntilga mu kaat niñ, ndi “ni liwindi.” (Lukas 14:14)  Bahogi ikété yap ba ga ba “dikoo di mbok mu hisi hiosôna.”​—Tjémbi 45:17.

11. Kii “bôt ba téé bé sép” ba nlama boñ ilole môl map ma ntilba i kaat niñ?

¹¹ Nano, di pôdôl bôt ba nyônôs batan, “bôt ba téé bé sép.” Ilole ba nwo, ba bi boñ bé sômbôl i Yéhôva, bebek inyule ba bé yi bé nye. Jon môl map ma bi tilba bé i kaat niñ. Ndi i ngéda ba ntuge, Yéhôva a néhne bo njel i bana môl map mu kaat i. “Bôt ba téé bé sép” b’a bana ngôñ ni mahôla ngandak. Ilole ba nwo, bahogi ikété yap ba bé boñ mam mabe kiyaga. Jon i ga béda le ba niiga bo mambén ma Yéhôva. Inyu pam i niiga bo, Ane i Djob i ga boñ le bôt ba kôhna biniigana hana ’isi kiki ba bé ngi kôhna gwo ibôdôl nu hisi hi héga.

12. (a) Bonjee ba ga niiga bôt ba téé bé sép? (b) I bôt ba ga tjél nôgôl mambén ma Yéhôva, lisuk jap li ga ba lelaa?

¹² Bonjee ba ga niiga bôt ba téé bé sép? Limut li bôt likeñi ni bôt ba téé sép ba ba ga tuge. Inyu boñ le bôt ba téé bé sép ba bana môl map mu kaat niñ, i ga béda le ba yila mawanda ma Yéhôva, ba ti nye niñ yap. Yésu Kristô ni minhook ba ga béñge lelaa ba niiga bôt ba téé bé sép inyu tehe too ba nôgôl mambén ma Yéhôva. (Masoola 20:4) I bôt ba ga nôgôl bé mambén ma Yéhôva ba ga tjiba​—to ibale ba gwé 100 nwii. (Yésaya 65:20) Yéhôva bo Yésu ba ntehe i yom i yé i ñem. Jon ba ta bé le ba nwas le mut a lona mam mabe nyoo i mbok yondo.​—Yésaya 11:9; 60:18; 65:25; Yôhanes 2:25.

BITUGNE BI NIÑ NI BI BIKÉÉHENE

13-14. (a) Lelaa di bé nok ndugi bibañga bi Yésu bi yé i kaat Yôhanes 5:29? (b) Kii di nlama bigda mu bibañga bi?

¹³ Yésu a bi kal ki le bôt ba ga tuge inyu niñ hana ’isi. Kiki hihéga, a bi kal  le: “Ngeñ y’a lo le i bôt bobasôna ba yé ikété soñ b’a nok kiñ yé, ba pam; i bôt ba bi boñ mam malam inyu bitugne bi niñ, ndi i bôt ba bi bana lem i boñ mam mabe inyu bitugne bi bikééhene.” (Yôhanes 5:28, 29) Kii Yésu a bé sômbôl kal?

¹⁴ Di bé hoñol ndugi le Yésu a mpôdôl i mam bôt ba ga boñ i mbus bitugne gwap; hala wee bahogi ba ga boñ mam malam, bape ba boñ mam mabe. Ndi di yimbe le Yésu a bi kal bé le i bôt ba ga tuge ba ga boñ mam malam, tole ba ga boñ mam mabe. A bi pôdôl i mam ba bi boñ kôba. A bi pôdôl bôt “ba bi boñ mam malam,” ni bôt “ba bi bana lem i boñ mam mabe.” Hala a ñéba le ba bi boñ i mam ma ilole ba nwo. Baa maliga bé ma? Di nyi le Yéhôva a nla bé nwas le mut a lona mam mabe i paradis. I mam mabe ma, bôt ba téé bé sép ba bi bana lem i boñ mo ilole ba nwo. Kii Yésu a bé sômbôl ni kal i ngéda a bi pôdôl “bitugne bi niñ” ni “bitugne bi bikééhene”?

15. Bonjee ba ga ‘tuge inyu niñ,’ inyuki?

¹⁵ Bôt ba téé sép, hala wee ba ba bi boñ mam malam ilole ba nwo, bon ba ga ‘tuge inyu niñ,’ inyule môl map ma bé mu kaat niñ ilole ba nwo. Hala a nkobla le i “bôt ba bi boñ mam malam,” ba kaat Yôhanes 5:29 i nkal le ba ga tuge, bon yak kaat Minson mi baôma 24:15 i nsébél le “bôt ba téé sép.” I ndoñi i, i nkiha ni kaat Rôma 6:7, i i nkal le: “I mut a nwo a mal saa inyu béba yé.” I ngéda i bôt ba téé sép ba, ba bi wo, Yéhôva a bi sas bibéba gwap, ndi a ngi bigdaga mam malam ba bi boñ. (Lôk Héber 6:10) Ndi inyu boñ le môl map ma yégle mu kaat niñ, i mbéda le ba téñbe i gwélél Yéhôva.

16. Kii i yé “bitugne bi bikééhene”?

¹⁶ Mam ma yé lelaa inyu bôt ba bi boñ mam mabe ilole ba nwo? I ngéda ba bi wo, bibéba gwap bi bi séha, ndi ba bé gwélél bé Yéhôva. Môl map ma ta bé ntilga i kaat niñ. Jon i bôt ba bééna lem i boñ mam mabe, ba kaat Yôhanes i mpôdôl, bo ki bon ba yé “bôt ba téé bé sép” kaat Minson mi baôma 24:15 i mpôdôl. Ba ga ‘tuge inyu bikééhene.’ * I bikééhene ba mpôdôl hana bi nkobla le ba ga béñge too bôt ba téé bé sép ba nôgôl mambén ma Yéhôva. (Lukas 22:30) I ga béda ngéda inyu boñ le ba yi too môl map ma kôli toi tilba i kaat niñ. Inyu boñ le môl map ma tilba i kaat niñ, bôt ba téé bé sép ba nlama nwas mam mabe ba bé boñ.

17-18. I bôt ba ga tuge hana ’isi ba nlama boñ kii? Mambe “maboñok” kaat Masoola 20:12, 13 i mpôdôl?

¹⁷ I Ane i hikôô hi nwii, i bôt bobasôna ba ga tuge ba nlama nôgôl mambén ma yé ikété minhôôk mi bikaat, to ba bé bôt ba téé sép, to ba bé bôt ba téé bé sép. Ñôma Yôhanes a ñañle bés i yom a bi tehe i yiinda, a nkal le: “Me tehe bawoga, bakeñi ni batitigi, ba téé i bisu bi yééne ane, yak minhôôk mi bikaat mi yiblana. Ndi nhôôk kaat umpe u yiblana; won u yé nhôôk kaat niñ. Bawoga ba kééhana inoñnaga ni mam ma bé  ntilga ikété minhôôk mi bikaat inoñnaga ni maboñok map.”​—Masoola 20:12, 13.

¹⁸ Mambe “maboñok” i pes kaat ini i mpôdôl? Baa a yé i mam ba bi boñ ilole ba nwo? To! Di hôya bañ le i ngéda ba bi wo, ba bi saa inyu bibéba gwap. Jon hana ba mpôdôl bé i mam ba bi boñ ilole ba nwo. I maboñok ma, ma nlama ba i mam ba ga boñ i ngéda ba ga niiga bo nyoo i mbok yondo. Yak bôt kiki bo Nôa, Samuel, David, ni Daniel, ba ga niiga bo inyu boñ le ba hémle sesema i Yésu Kristô. Ibale i ga béda le ba niiga i bôt ba téé sép bana, wee bôt ba téé bé sép ba nlama nigil iloo ha!

19. I bôt ba ga tjél nôgôl Yéhôva i Ane i hikôô hi nwii, lisuk jap li ga ba lelaa?

¹⁹ I bôt ba ga tjél nôgôl Yéhôva i Ane i hikôô hi nwii, lisuk jap li ga ba lelaa? Kaat Masoola 20:15 i nkal bés le: “Nu ni nu a bééna bé jôl jé ntilga ikété kaat niñ a léña ikété titimba i hié.” Ñ, ba ga tjiba. Inyu hala nyen di nlama jo sañ le jôl jés li tilba mu kaat niñ, li yégle ki mu!

20. Imbe bôlô i ga séla i Ane i hikôô hi nwii? (Béñge titii i lipep li bisu.)

²⁰ Ane i hikôô hi nwii i ga ba ngand yomede! Bagwélél ba Yéhôva ba ga niiga bôt kiki ba bé ngi niiga bo. Ha ngéda i, di ga tehe ki, too bôt ba téé sép ni bôt ba téé bé sép ba ga nôgôl Djob tole ba ga nôgôl bé nye. (Yésaya 26:9; Minson mi baôma 17:31) Lelaa ba ga niiga i bôt ba bobasôna? I yigil i noñ ha, i ga hôla bés i nok i jam li.